Post: #1
Title: بنى الانقاذ على خمس ......!!!!!!
Author: ودالعباسية
Date: 10-13-2004, 01:08 PM
بنى الانقاذ على خمس :
تأكل ماتشبع .....
تلبس مرقع .....
تتكلم تتلبع .....
تمشى الجنوب ما ترجع ....
محل ماتدخل تدفع ..قيل ثم ماذا .....
قيل تتخرج تتسكع .....
بدون تعليق
|
Post: #2
Title: Re: بنى الانقاذ على خمس ......!!!!!!
Author: abdalla BABIKER
Date: 10-13-2004, 01:17 PM
Parent: #1
Quote: تأكل ماتشبع .....
تلبس مرقع .....
تتكلم تتلبع .....
تمشى الجنوب ما ترجع ....
محل ماتدخل تدفع ..قيل ثم ماذا .....
قيل تتخرج تتسكع |
الكلام الفوق ده كلوووووووووووو
قبل الانقاذ
|
Post: #7
Title: Re: بنى الانقاذ على خمس ......!!!!!!
Author: Adil Ali
Date: 10-13-2004, 02:54 PM
Parent: #2
عبد الله بابكر.... سلامات..
يا أخوي إنت بتغالط في شنو... وعشان شنو؟
عزيزي.... ألا ترى انه ليس من العقلانية والأمانة في شيء مغالطة واقع يعرفه جيداً من ذاقوا ذل الجوع والفقر والعوز ابتداء من يوم 30 يونيو 1989 المشؤوم وحتى الآن... الواقع الماثل الذي يعرفه عشرات الآلاف من الخريجين الذين يعانون الفاقة والبطالة (أقصد بالطبع غير المنتمين للجبهة الإسلامية)... هو واقع يا عزيزي يدركه تماماً المكتوون بنار دولة الجباية والفساد بمختلف أنواعه. إنك تغالط يا عبد الله في واقع يعرفه تماماً ذوو الصبية الذين غرر بهم نظام الجبهة ووعدهم بالحور العين وسلّمهم مفاتيح الجنة وأرسلهم للجنوب لـ"الجهاد"!!!!! أقرأ "مصيبة العافية بت نورين" لمريم الطيب....عندها فقط ستدرك إنك تغالط وتكابر في ما لا جدال حوله:
Quote: ٍ
مصيبة العافية بت نورين
الى أمهات السودان القابضات على جمرة حرقة الحشا
اسمي العافية.. ساكنة امبده وعندى تمانية
ابوهم فاتهم متل الطير..شالو الشقا والضيم
خلاهم امانة ..اتحزمت واتلزمت على همى ..
قلت االعافية.. تقبلى وين فى الزمن الضيم ..
تقبلى وين فى الزمن الشين وراك تمانية..
اياكى يمة ويابة...وكتين الناس الشقيانين
السهرانين شايلين الليل يتراوحوا لى بيوتهم
كسرتى بتمرق..اشيل السوق على باب اللة..
عليك يااللة تكبر بلة ..تجبر صالح..
يشيلوا معاى هم الستة..............
فرهد بلة شوية وشفت عيونو..دخل ومرق مع الجنيات
سقتو مشيت لى جاد السيد سيد الطاحونة..قلت لو
بلة امانة روحك..ماعندى بلاهو يشيل الشيلة..
خليهو حداك ..يشيل ويخت اياهو جناك..........
يجينى المغرب جيعان واغيبش يحننى ..شايل لى
مدرسة اخوانو حق اليومية..فرحنا وقلنا خلاص
تقول اتوظف...........................
ويوم اتأخر بلة..قلبى نقر الجنا مو سالم..
اصلى بخاف الكشة..قلت االعافية اصبري شوية..
ابعدي الشينة.. صبري كمل جريت الشارع..
وقفت شوية.. اجرجرت على الطاحونة..
عارفاها بتقفل خمسة.. جادالسيد مصنقر بره..
قلت لو وووب ااجادالسيد وين بله.. باقي بخاف الكشه..
قام جاد السيد واتلملمو ناس الحلة......
جرينا النقطة.. جرينا الشرطة.. نقبل وين ااناس الشرطة..
نسأل مين.. لقينا الناس كارات كارات زي الطير..
نقبل وين ونسأل مين.. كمين كمين مفقودين......
وقف الضابط جمب الباب.. جريتلو سألتو..
_ وين بله؟؟؟
_ بله مين ياحاجه؟؟؟
_ بله وليدي الكبير.. أعاين لي الله وليهو..
_ اسمو بالكامل ياحاجة؟؟؟
_ بله عبدالحبار سماعين..
_ (يقلب ورقة بيده).. ده راح الجهاد اللواء 13
كتيبة المغيرات صبحا..
_ (منهارة).. جهاد مع مين.. جهاد ضد مين..جهاد لمتين؟؟
بتلفحو بله عيون اماتو.. ملاح اخواتو.. طبيق اخوانو
وبله يتيم...............
أنبح ليل ونهار زي الطير وعارفه الطير كان شالو جناهو
تب مابنوم.. أقوقي الليل وأقوقي نهار وحمالتي عليك ياالله
تفرج الحال.. اليوم في اليوم وبله بعيد مامعروف وين..
وغيرو كتير.. حالنا سجم.. ويومنا عدم.. وليلنا ندم....
يوما أسود زي الليل جوني بنات نايرات لابسات..
فتحت الباب ..
_ حباب الضيف.
_ زغردي ياأم بله..
_ بله رجع..ّّ؟؟؟؟؟؟؟؟
_ بله شهيد..
طرت هناك وقعت بعيد.. صرخ البيت.. صرخ الجار.. صرخ الطير..
مت حييت.. مت حييت.. مت حييت.. ألفين مرة.. شهيد لي منو..
شهيد لي شنو.. وقفت قويت وقلت...أمرقن بره.. ماهو شهيدكن بله.... بله شهيد أخواتو.. شهيد الطلبة الضاعو مهاهو.. شهيدي..
شهيد المسؤولية الشالا صغير.. شهيد البلد الطيب وخير..
بكره بفرهد بله مع أخوانو وتطلعو أنتو جماعة الغفلة..
بعد يومين جوني جماعة سمان ونضاف.. شايلين سكر وزيت..
ومية ألف على التربيزة.. صالح واقف بره يعاين.. جاهم داخل..
حفيان بي لباسو.. وقال لي رئيسهم أطلع بره..
ضحك الابله وعاين لي.. قلت لو بره.. صالح ماهو صغير..
صالح راجل وأرجل منك.. وصالح في الكتاب يابنية..
قلت لو بره وشيل حاجاتك.. واخجل.. ده تمن بله؟؟..
جزمة بله أشرف منك ومن الجابك.. ياوسخان ياتاجر الدين..
فقرانين ااي لكننا شرفاء وقلبنا ثمين..
قويت يابنية.. قويت وقويت.. فهمت وعيت.. حليل العافية
ست الكسرة الغافلة الطيبة.. فرطنا كتير.. غفلنا كتير..
دفعنا جنانا التمن الغالي..
شالو جنانا مابنسكت..
حرقو حشانا.. مابنسكت..
في الزنزانة.. مابنسكت..
بالجبخانة.. مابنسكت..
مليون دانة.. مابنسكت..
مابنسكت.. |
عبد الله......أتمنى أن تكون عقلانياً وتفكّر جيداً قبل أن تسطر كعادتك العبارات المقتضبة التي تكتبها كلما وردت سيرة نظام الجبهة الإسلامية الفاشي الفاسد. اما إذا كنت حريصاً على الدفاع عن هذا النظام، فمن الأفضل أن تدافع عنه، شأن آخرين في البورد، بما هو أكثر من مجرد عبارات وجُمل مقتضبة حتى تكون صاحب موقف واضح ومباشر... وحتى لا تضطر للرد بعبارات مثل "أنا فقط حريص على السودااااااان.... والسودان هذه الأيام لا يتحمل.... الخ....!
مع الود،
ع ع
|
Post: #3
Title: Re: بنى الانقاذ على خمس ......!!!!!!
Author: ودالعباسية
Date: 10-13-2004, 01:49 PM
Parent: #1
يـــــاراجل
كدي عينى فى عينك كدا
|
Post: #4
Title: وزياده فوق امور الجماعه...الخمسه
Author: ismat.abdelrahman
Date: 10-13-2004, 02:01 PM
Parent: #1
,] ود العباسيه..
انت ماسمعت بى ..باضافات التاهيل والتاصيل النقاذى
عايز تتخلع..تتشخلع
والأنسياب النسبى ..مابين الدين واللهط المباح
والمفاجره والمفاكره..والأنشراح والأنبطاح..
والرشاوى والبلاوى ..
|
Post: #5
Title: Re: وزياده فوق امور الجماعه...الخمسه
Author: ودالعباسية
Date: 10-13-2004, 02:16 PM
Parent: #4
الاخ عصمت عبدالرحمن
سمعته بيها لكن قلته الحاجات الفوق دي
هى التاعبة الناس فى هذا العهد الغابر
ولكن اللستة طويلة
تسلم على الزيارة ...
|
Post: #6
Title: Re: وزياده فوق امور الجماعه...الخمسه
Author: Ahmed Khalil
Date: 10-13-2004, 02:44 PM
Parent: #5
اسمحو لي ياجماعة اقول ليكم....كل ما ورد اعلاه.....غلط. و انو الامور اختلطت عليكم.
انتو جبتو بعض صفات الانقاذ.
اما الاركان فهي كالاتي :
الكذب (القصر و السجن)
التمكين (اللغف)
التكميم
الاقصاء
الترويع
و الفجور في الخصومة
|
Post: #8
Title: Re: وزياده فوق امور الجماعه...الخمسه
Author: salwa elsaeed
Date: 10-14-2004, 01:26 AM
Parent: #6
والركن السابع يا احمد
الغاية تبرر الوسيلة"الانتهازية".
اصلهم بيحبوا الرقم سبعة وبستغلوه لتبرر سقوطهم!!!
|
Post: #9
Title: Re: وزياده فوق امور الجماعه...الخمسه
Author: ودالعباسية
Date: 10-14-2004, 02:27 PM
Parent: #8
| Quote: (منهارة).. جهاد مع مين.. جهاد ضد مين..جهاد لمتين؟؟ |
عادل على
ربنا اديك العافية
|
Post: #10
Title: Re: بنى الانقاذ على خمس ......!!!!!!
Author: ودالعباسية
Date: 10-14-2004, 02:33 PM
Parent: #1
الاعزاء
احمد خليل
سلوي السيد
الانقاذ مصايبة كتيرة جدا ولا تحصى ...
مشكورين على الزيارة
تسلموا ....
|
Post: #11
Title: Re: بنى الانقاذ على خمس ......!!!!!!
Author: عبدالعظيم عبدالله
Date: 10-14-2004, 04:26 PM
Parent: #10
وهذه جزء من المهمة البايخة للانقاذ
تكذب تنافق تكابر
تبقى مواطن طاهر
|
Post: #12
Title: Re: بنى الانقاذ على خمس ......!!!!!!
Author: ودالعباسية
Date: 10-14-2004, 07:32 PM
Parent: #11
الاخ عبدالعظيم
مهمة الانقاذ تشريد وتجويع هذا الشعب .
تسلم يا حبيب على الزيارة ....
|
Post: #13
Title: Re: بنى الانقاذ على خمس ......!!!!!!
Author: محمد سر الختم
Date: 10-14-2004, 10:25 PM
Parent: #1
الأخ عادل علي
لماذا الهجوم على الأخ عبد الله بابكر، الراجل كلامو صاح
ود العباسية غلطان
الأركان ستة ما خمسة
الركن السادس
إعطاء المراكز الكبيرة للشُفَّع
يا عبد الله بابكييييييييييييييييييييييييييييييييييييييير
ياخ ناس الإنقاذ خجلانين يدافعو عنها، إنت لسَّة؟؟؟؟
|
Post: #14
Title: Re: بنى الانقاذ على خمس ......!!!!!!
Author: ودالعباسية
Date: 10-15-2004, 01:39 PM
Parent: #13
محمد سر الختم
والله خجلانين خجلا ...
تسلم ياحبيب على الزيارة
|
Post: #15
Title: Re: بنى الانقاذ على خمس ......!!!!!!
Author: Esameldin Abdelrahman
Date: 10-15-2004, 02:00 PM
Parent: #14
Quote: دفعنا جنانا التمن الغالي..
شالو جنانا مابنسكت..
حرقو حشانا.. مابنسكت..
في الزنزانة.. مابنسكت..
بالجبخانة.. مابنسكت..
مليون دانة.. مابنسكت..
مابنسكت |
ما بنسكت يا عبدالله
|
|