Post: #1
Title: سحلول
Author: Tarig Sidahmed
Date: 10-12-2004, 01:18 AM
Parent: #0
سحلول
كان مندسي جوه أنفاسو
كان تعبان وليدو ينادي
ياسحلول كفاك خلاص
شربت السم ودم الناس
وكل الفيك وجعا خاص
ما داسوه يوم مانداس
واصل الشايلو فروة راس
فارغه من أسم المقري والمكتوب
وكلو عجيب شايلو طروب
مكفي، متكي أو مقلوب
واااحد عندك الشعقوب
يا سحلول بالفيك تب معروف
الدقن النازله نازله رفوف
والطقم الابسو بالدهب معلوف
والداخل عندك مارق ما مشيوف
والناس
الناس التقدح تتعب تعرق واقفه صفوف
راجيه المولى يمد الليد
والماسكه عروق سحلول
وين سحلول ... أهوداك سحلول
دخل المسجد صلى
إنتظروا الدعوه البركه النازله مذله
إنتظروا الدعوه يا أهل الله
كفاكم هين من يدين سحلول
والتلمسو يدو عمرو يطول
دي بركة سيدي سيدي السيد ما مذكور
صنقع دنقر قالو بيقول
تفتف قالو اسامي عطور اسامي بخور
وهاك يازول وهاك يازول وهاااااك يازول
الساعة النزلت فيها الصاقعه نزل سحلول
سيد القعده وملك النكته وهاك يا ونسه
وهاك يادي ختي الكاس كفايه امسكي
والحركه جابت حركه
سحلول إتململ داير الفكه
بنيه ظريفه تنزل كفه ترجح كفه
وعمك زادت جوه كريشتو الرجفه
حيكومتنا بلد حقتنا
ونحنه الندي السفه ونحمي السفه
ما سحلول إتكرع وما إنكفه
متين وبتين إنكفه
متين وبتين الرجفه تصيب الدفه
ما معقول يا سحلول ما معقول
تعرف كيف تلعب بجنيهنا والدولار
وتطوي في قرطاسك الأعمار
دواء حبوبه زيادة الأسعار
وتغطي بالشريعه فعايل التجار
ياسحلول أهدى
طلبتك بالقعده ديك تهدى
بيعرجونه بيشخلوبه إتكا
بمصلايه عليها عبايه تتشكا
بفاتورة قمح علي مصرانه تتوكا
بأطفال يسو الواي والوواطه تتبكا
يتامه غلابه عليهم الركا
ما معقول يا سحلول ما معقول
كلو مدقلم ذي سحلول
كلو مدمدم ذي سحلول
وكل الفارغه دقن سحلول
نعليه كريشتو
سرواله سبحتو
والكاس هول سحلول
النازل طالع لي سحلول
الماسك الجاز سحلول
الفينه خميرة البيره قمحنا الما محصود
قطنا وكل السوق سحلول
جوك الناس العارفه الحق
شقيش بتقبل
جوك الناس الشايله الحر
شقيش بتقبل
وجاهتك وين بتودي
الناس عارفين شن كنت مخبي
حصاد أيامنا وين كنت بتودي
شقيش بتقبل يا سحلول شقيش بتقبل
وين عاد تمشي
سحلول: لا يعني تتطابق الأسم بأنه المعني
طارق ع الأحمدي
|
Post: #2
Title: Re: سحلول
Author: بلدى يا حبوب
Date: 10-12-2004, 07:42 AM
الاخ/ طارق
ما اروعك وانت مع سحلول
وفى انتظار المزيد بس سحلول ده خليه فى البوست واخوفنا من السحاليل الماسكنه حسه
تحياتى
|
Post: #3
Title: Re: سحلول
Author: Tarig Sidahmed
Date: 10-12-2004, 10:05 PM
Parent: #2
شكرا يا بلدى يا حبوب
مافي فرق يا سيدي سحلول هو سحلول
شكرا مرة ومرات ورمضان كريم
طارق ع الأحمدي
|
Post: #4
Title: Re: سحلول
Author: Tarig Sidahmed
Date: 10-13-2004, 04:02 AM
*
|
Post: #5
Title: Re: سحلول
Author: خضر عطا المنان
Date: 10-13-2004, 05:56 AM
Parent: #4
Quote: سحلول ....
كان مندسي جوه أنفاس
كان تعبان والناس
تنادي ياسحلول :
كفاك خلاص ..كفاك خلاص
شربت السم ودم الناس
وكل الفيك وجعا خاص
ما داسوه يوم مانداس
واصل الشايلو فروة راس
فارغه من أســـــــــم
المقري والمكــــتوب
وكلو عجيب شايلو طروب
مكفي، متكي أو مقلوب
واااحد عندك الشعقوب .. |
الولد الطروب : طارق
لوحة معبرة ومنتزعة من جوف جمع أهلي الغلابة المتعبين..
لك المعزة .. وليتك تتحفنابالمزيد من ( السحاليل !!!!)
وما أكثرهم اليوم في وطني المنكوب بهم لا بسواهم ياطارق .
خضر عطا المنان
|
Post: #6
Title: Re: سحلول
Author: Tarig Sidahmed
Date: 10-14-2004, 01:59 PM
Parent: #5
شكرنا أستاذنا الخدر ود عطا المنان
السحاليل ينكبون كل جرف أخضر يحيليونه بقدرة الإمتصاص الفائقه إلي خراب ... هولاء يا سيدي أين ما حلو يحل الدمار فهم سهام شياطنيه تطلق في اللاء شي من اللاء شي للاء شي.
شكرا سيدي علي المرور والطله
وكل سنه وإنت بألف خير
طارق ع الأحمدي
|
Post: #7
Title: Re: سحلول
Author: Tarig Sidahmed
Date: 10-16-2004, 02:03 AM
*
|
Post: #8
Title: Re: سحلول
Author: Tarig Sidahmed
Date: 10-18-2004, 09:20 PM
أهنالك متسع من الوقت؟؟؟
طارق ع الأحمدي
|
|