Post: #1
Title: لما قوافلك طاشت فى النسيان
Author: alfatih
Date: 10-06-2004, 06:07 AM
لما جفيت الزول الكان مجنونك
لما بقيت بالشايلو جواك فى سجونك
لما دهستا بالنسيان وردة تغازل فى جنونك
لما عرفت التعب الكان مستنى فنونك
وكان بيكابد شان يلقى ملاذ فى سكونك
لما بديت بالزهج الواقف صف
مهدود الحيل فى شئونك
لما قوافلك طاشت فى الاهات
لزمت صمت الكون الكان بيكونك
لما صباعك شار بالتنوين
وقلب الكلمة بدونى بدونك
لما حروفك جاطت مربوكة
شال قاموس الحسرة عيونك
لما سعادتى طريتا تجينى
اتاريك لابد جوة جواك تفلى جنونك
اتاريك عارف انو جفاك ما مقدور
وانو الزول البيحبك
مجاز الضمنى بيكون مسحور
علاقتو بى خوفك هى الاقناع
كان طار السما وجلب الحور
وكان بقى زى عابد فى الظلمة
ووهج الليل مسلوب النور
اتاريك شايف الضوء النافذ عالق
وتضحك فينى تقول مجبور
وخوفى عليك هزّ النخل الفوقو العجوة
مضغ القرض المالى السور
وخوفى عليك بالزمن الهارى
قلبى يساسق تقول مسعور
بس الشوف الشايفو ما شاف ابعاد
عرف الارض الخاوية وبور
لقى جواها شوارع ماشة
ماشة بتعزف فى الديجور
مسكت نزفى توسوس فوقو
نزفى النازف حتى الموت
بينزف قبلك فى القبور
وانا بين انسان متمالك وحظو
يراوح ليها وهو معصور
يشوف فى دواخلو حكاية دم
وزمنوا الديمة هناك مشتور
وانا بين انسان متمالك وحظو
ربط جناح الخوف الكان مكسور
وبين سالب وموجب زعلانين
ليالى الحسرة واقفات طابور
وبين الزولة الاهتميت بيها
ملانة تعب وفيهاغرور
قصدى اريدها وما مغرور
كل الدايرو تكون هى المنبع
والحب البينا يكون مستور
وعشان خوفى عليها من العين
صرخت عليها لما حلقى صابو فتور
اصلو فى حاجة ناقصانى
وشان ألقاها دخلتا جحور
صفقت لى مدن الخيال
الكانت نايمة بالجمهور
حكايتى الشوق يا ناس ما تقولو شرور
وكان جنيت انسان مخبول
وريدو الليها يكون معذور
باريس
الجمعة 6/8/004م
|
Post: #2
Title: Re: لما قوافلك طاشت فى النسيان
Author: إسماعيل وراق
Date: 10-06-2004, 06:12 AM
Parent: #1
Quote: اتاريك عارف انو جفاك ما مقدور
وانو الزول البيحبك
مجاز الضمنى بيكون مسحور
علاقتو بى خوفك هى الاقناع
كان طار السما وجلب الحور |
وإنت بتقدر يا حبيب
مزيداً من الإبداع
بعيداً من التكسير
ورفقاً بالحال
|
Post: #3
Title: Re: لما قوافلك طاشت فى النسيان
Author: alfatih
Date: 10-06-2004, 06:20 AM
Parent: #1
الحبيب اسماعيل وراق
قلت لى ما بقدر على الهبباى ؟
وحات الطاحونة الله يكون فى عونى بس
انا كان بقدر دى حالتى ؟
اتخيل الواحد اتكسر لحدى ما بدأ
يفتش فى لغتو المكسرة معاهو
حاولت بالمغناطيس لملمت نفسى بدون تحيز
ويبدو انى قربت اتجمع 
لك الحب يا عزيزى
|
Post: #4
Title: Re: لما قوافلك طاشت فى النسيان
Author: سجيمان
Date: 10-06-2004, 07:07 AM
Parent: #1
الفاتح
طاشت دي يعني شنو؟؟؟؟؟؟
يعني جات الطيش؟؟
|
Post: #5
Title: Re: لما قوافلك طاشت فى النسيان
Author: Sidig Rahama Elnour
Date: 10-06-2004, 07:47 AM
Parent: #4
الاخ الفاتح
ترجيحة حلوة في الأحزان ، وقراءة سليمة
Quote: وخوفى عليك هزّ النخل الفوقو العجوة
مضغ القرض المالى السور |
|
Post: #6
Title: Re: لما قوافلك طاشت فى النسيان
Author: alfatih
Date: 10-07-2004, 07:35 AM
Parent: #1
الحبيب سجيمان
طاشت دى كما قال شروم الكنعانى
فى كتابه العربية تودينا للسادة
بتدى معنيين الاول من الطشاش
والتانى من طشة يعنى فرتق او راح
او جاية من طاش ما طاش
واريتك ما تطش .
تسلم كتير للمرور بى جاى
|
Post: #7
Title: Re: لما قوافلك طاشت فى النسيان
Author: alfatih
Date: 10-07-2004, 07:39 AM
Parent: #1
العزيز صديق رحمة النور
الاحزان مسلك الخاطر المهزوم
فلولا الحزن يبقى الفرح معدوم
شكرا للمرور فوق سطوح البوست
|
|