جراب الكركدي النازف ....نص للشاعر بابكر الدقوني

أرمي شــــــــــــــالك
للهوي الشـــــــــــالك
كتٌف ليلك اللكلك مشيك
ما عرف يمينك من شــمالًك
البنيات سرحن ضهرت قهر..
لولحن صدرن متاهة ..
فشن الريد للبكا الوسطاني
خلنك براك محتوتة من حماد رماد
والمغني الكان بغني غنا السماد
عشق حنينك للسفر ..والطين بطح
حق العبـــــــــــــــــــاد

*****************

يابنية سميني القديم
اللونو سيـــــــــن
طوالي ماخد منك العربي المريح
لافح عبايتو مسيد خلا
طاعن عصاتو كجيك عطش
والليل نفش
فيك الضــــــــــلال
القبلي شال
حمر عيونو الاربعة
كان في السما
كان جوه ما طالع سواك
يابنية ني وحيدك براك
يابنية سميني الهميم

*****************

ابريـــــــــق يبل الريق
وحواشات متندلة بالغبش
وانتي الرجع ليك التعايشي
وقالوا عايشي
انتق الفرح الحبستك فيهونخلة
واشربك قنانة
يا فترانة
مني ومن بني شنقول مرس
دايرين نسويلك عرس

****************

شنو واقفة بين غابة وسحابة
شنو كابة شاييك للحرابة
شنو يا بنية الهوسا فيك
ممحوقة في العربان
كنابي وعترة
يا بت البلد مسروقة
يابت البطن مطفوقة
هاريني الهوي
وجايب بعيبشة طهور الشفع المخروقة
بالسجم الدواس
ما طرحتك غزلوها بي شد اركب
لبسوك من اوجديد كركب
لو كنتي حفيانة المطر
كان علمك في الطين رمال الهودنا
كان اسمك اللقد السقد والسودنة
دليني في برهة وقايتك
كتري البن والسفر والانقلاب
خلي البنات يدخنن بالكرمشة
خلي الوليدات في ضريح الكشكشة
الليل مشي
دخل كش ما لاقي قش
ما كنا عارفين البدن هش