Post: #1
Title: رايحة الابرى تعطر شوارع السودان عامه ورمضان كريم
Author: امجد البصيرى
Date: 09-20-2004, 06:33 AM
الابرى الاحمر (الحلو ومر) هذه التركيبه العجيبه التى حيرت علماء الفلك واسرار البحار
وفعلاً هى عجيبه وغريبه وبسيطه فى نفس الوقت _ وانا مع انى بعيد من السودان لكن متاكد انو الايام دى ريحة الابرى تعطر شوارع السودان الحبيب وهى تفوح من كل دار
والسناريو بتاع الشغلانه دى غالباً مايكون كده .... ياعبد الباقى بكره من الصباح عايزاك تخطف رجلك وتمشى على السوق .... سوق بتدورى شنو كمان من السوق .... اجى يابنات امى شوفو الراجل ده كيفين بدور شنو من السوق ماعندنا عواسه بتاعت ابرى وبليله عدسيه وكبكبى وحش بصل ووووووو .... يالطيف نسالك العفو والتخفيف ياوليه عليك الله اتقى الله يعنى ضرورى العواسه دى اسكت اسكت اسكت الوليدات مايسمعوك ويشبو فى رقبتك دى بالله هم من متين منتظرين العواسه دى تقول لى خليها....... ياخ ماتبلى ليك شوية كركدى ولا تعصرى ليك ليمون وتعفينا من الشغله دى اسكت ياراجل هوى الظاهر عليك بديت تخرف جاراتى كلهن يعوسن وانا مااعوس ابرا واستبرى ..... خلاس قصر الحكى بتدورى شنو من السوق - تمشى سوق البهارات والله لابمشى سوق بهارات ولاشى السوق الايام دى كلو حريم ونقه وبعدين اجيب ليك الاغراض ناقصه تعملى لى سين وجيم الجرتقه وين والجنزبيل وين احسن تمشى انتى ..... انت ياعبد الباقى ماك نصيح كيفن عاد امشى انا فاضيه قالو ليك ولا فاضيه انا من الصباح ماشه على دكان ود الطاهر الفى الفريق التانى فطين قالت البصل بتاعو سمح بالحيل ..... ودايره اكلم الوليد طه يطلع فوق راس البيت ينزل لى الصاجات والكوانين ( المناقد ) وسخانات شديد والصاجات كلها سكن رفعناهن من السنه الفاتت والرفعه الياه وما اتحكو وعايزات حك شديد وبياخدن وقتى كلو خلاس خلاص بطلى نقه.
ام الوليدات جابت البصل وجات تورت بنوته من العوضه وقعن فى البصل حش وصينيه وراء صينيه لمن الصوانى قصرت البنات قالو كفايه الام كفايه كيفن انتن ماك عارفات انو الرجال بدورو ملاح التقليه والعصيضه امشى ياولدياطه لخالتك ام الفضل وقول ليها ادينا صوانى وبالمره جيب منها الفندق الكبير عشان ندق فيو البهارات.... خالتو ام الفضل امى قالت ليك ادينا صوانى والفندق الكبير امك جابت البصل ياجنى ااااى شوفوا بالله المرة الغبيانه دى انا ماقلتليها انتظرينى نمش سوا ود الباقر بتاع الدكان ده انا عارفه محتال ...... خلاس هالك الفندق والصوانى والبيت ريحة البصل تفوح منه وما اطيبها من رايحه دى خطوه وانتهت..
بعد نمشى على طاحونة ود الطاهر نجيب الذره عشان نعمل الذريعه دى قبل مارمضان اطب علينا ود الطاهر السلام عليكم اخبار الذرة شنو ؟ كدى اول شى رمضان كريم والله الذره الايام دى طايره فى السماء ياساتر خلاس كيل لى ربعين او تلاته .... وشوف لى كم شوال فاضى بدور اذرع فيو الذريعه حاضر ياام طه بس الشوال الفاضى بالفين جينيه ياراجل اتقى الله خلاس جيبى الف فى الشوال ام الوليدات جابت العيش الحب والشوالات .... وتحت الزير فرشت الشوالات وشتت الذريعه وزقته مويه وبعد يومى تلاته الذريعه قامت ونتف نتف نتف نتفته وختوها فى الجرادل ورجعوها من تانى لطاحونة ود الطاهر وبقت دقيق .
اها بعد ده جينا للكوجين فى الحلل الكبيره والمفراكه الحجم العائلى وجات حجه بتول وفطين وام الفضل يساعدوها فى الكوجين وبعد ماانتهن قالوا يخلو فى الحلل كمان تلاته يوم عشان اخمر ..... ومن دربن قالو بالمره نحطف رجلنا ونمشى لى الذريبه نجيب الحطب وكمان يسوقو معاهم السره قالوا دى بتعزل كويس ومشن على بتاع الكارو اتفقن معاو يوصلن ويصل الحطب ...... وصلن بالسلامه واتفقن على انو العواسه انشاء الله يوم الخميس العصر ويايوم الخميس ماتسرع تخفف لى نار الحلو مر اها الخميس جاء واى وحده جابت معاه القرقريبه بتاعته
واللقيمات اشتقلت وريحة القهوة قلبت الابرى ...... واول طرقة طلعت كانت من صاج فطين عينى بارده اريته طرقة السرور عيكم النبى كدى دوقوها طرقة الهنا واحده شبت من الشنفات ديلك قالت: والله اتذكر السنه الفاتت العواسه بتاعت ست النفر كان ابرى خاطى القول بيبسى بس وعاد تانى زيو مابجى اجى يابنات امى هسى الابرى ده مالو انا ماقلت حاجه لكن الظاهر كترتو (( الدواء)) والله الدواء مظبوط وعملتو محاسن
وسنواصل
|
Post: #2
Title: Re: رايحة الابرى تعطر شوارع السودان عامه ورمضان كريم
Author: خضر عطا المنان
Date: 09-20-2004, 08:20 AM
Parent: #1
الصديق العزيز جدا : أمجد ود البصيري :
انت يا خوي مسعول من الخير : هو رمضان جاكم قبال يومو
واللا شنو ؟؟؟؟؟؟!!!!.
لانو علماء الفلك حتى االأن مرجحين لينا يوم 15/10 /2004م
واللا دا يمكن رمضان ناس الجبهة بمناسبة الانقلاب الفشل دا!!!!.
المهم اخونا حسين خوجلي ( الودالزبدة ) قالو عملو ليهو عملية
مستعجلة جدا فجر اليوم الاثنين !!!!!! سلامتو وان شاء الله
ما يشوف بلا ياأمجد ياخوي !!!!!!!!. شيخو مرضان وهو مرضان
الحكاية شنو ؟؟؟؟؟؟.
خضر عطاالمنان
|
Post: #3
Title: Re: رايحة الابرى تعطر شوارع السودان عامه ورمضان كريم
Author: كبسيبة
Date: 09-20-2004, 10:25 AM
Parent: #1
امجد البصيرى- يديك العافية
رمضان كريم مقدماً
وشمينا الريحة في البوستة بتاعك
نسأل الله أن يكون شهر خير وبركة على كل أهل السودان
|
Post: #4
Title: Re: رايحة الابرى تعطر شوارع السودان عامه ورمضان كريم
Author: امجد البصيرى
Date: 09-20-2004, 11:42 AM
Parent: #3
ياكبسيسه
شكرا على طلتك الحلوه دى
وانشاء الله رمضان يجى وتكون الحفر بتاعتك دى اتردمت شوية
استاذى خضر عطا المنان
شكرا على المتابعه
ونتمنى رمضان الجاى تحضروا بين الاهل فى السودان
|
|