Post: #1
Title: وأيـــه الفائــــده
Author: mohsin_alsla7aby
Date: 09-11-2004, 05:15 AM
طالما انك تعبان وشقيان وتركب المواصلات
وتشاكل الكمسارى اللى بحاول يستقل مفاهيم اصبحت خاصه بهم
تخص ( التسعيره) على كيفك ترفع تنزل ولا يهمك
الصبح تركب من الكلاكلات للسوق العربى ياخدو منك
500 جنيه وبعد الظهر ترتفع الى 1000 جنيه ( اظن فيها بدلات ) وبعد المغرب تجد ان السعر رجع الى 500 جنيه
ولمن تعترض يقفل خشمك واحد او واحده من
الركاب ( اتعودو على كده ) ويقول ليك ياخىادفع انت وساكت
طبعا ما حاولت افهم زول الحاصل بعد اخر مره لاننى لقيت الشغلانيه اتعودو عليها
المهم اخوكم قام يوم ( كان قرفان ) و ( حلفت باغلظ الايمان) ان لا اعطى الكمسارى الا الثمن الذى يستحق
حتى لو اوصلها للبشير ذاتو
الكمسارى( نام)بباقى ال 1000 جنيه
قلت ليهو جيب 500 جنيه قال لى بتاعت شنو ( شوفو بيسال ) كمان
شد من هنا وجذب من هناك
السواق تدخل فى الامر : فى شنو يا ابو الشباب
رديت : عندى باقى 1000 جنيه دفعتها والباقى 500 جتيه
السواق : يازول ما عندك اى باقى ولو ما عجبك انزل
رديت : ما بنزل لو عاوز تنزلنى رجعنى مكان ما ركبت
السواق : يهدئ من سرعة العربيه ( نظام تخويف ) انت عاوز تقل ادبك ولا شنو ؟
رديت : ( وكل حماقة الدنيا ركبتنى ( لو المطالبه بالباقى ) والحقوق بقت قلة ادب.. حرم توقف العربيه دى الا اطلع بيك من شباك العربيه
تدخلت الاجاويد : صلو على النبى
اخوكم سكت سااااااااااااى
لاحظوالعربيه مكنوب عليها( صنقعت ) قام لف بيها على اللفه اخر محطه
اخوكم طبعا ساكت
السواق: يا ابو الشباب انت نازل وين ( العربيه ما فيها الا اخوكم) قلت ليهو اخر محطه ولا ما ممكن كمان
هنا تدارك الامر وقال لى : ياخى ( شوف ) ياخى دى
ما تفتكر نحن شغالين على كيفنا بس ذوقينا كده الناس ديل بيدفعو
ال 1000 جنيه يعنى ما جبر وهسع حرم ( يا ولد ) نادى الكمسارى رجع ليهو قروشو ماتشيل منو ولا جنيه
( ؟؟؟؟؟؟؟؟؟؟؟؟؟ )
رديت : صدقه ما عاوز ادينى 500 جنيه وبس
السواق : ما فى فكه
رديت : جيب النفكها ليك من اقرب محل
بمجرد نزولى من الحافله ( عشان افك القروش ) ما الاقى ليك الا العربيه الطارت زى الطياره والسواق يكورك لى عافيك يازول عافيك
اظن ما فى فايده
|
Post: #2
Title: Re: وأيـــه الفائــــده
Author: almulaomar
Date: 09-11-2004, 05:46 AM
Parent: #1
أخي محسن الصلحابي
أظنك حكيتها شديد ولما كانت الحكاية في الأساس بسبب عوامل كثيرة رهيفه بما فيه الكفاية كان لابد أن تنقد وتتخرم خرم أقل ضرراً من خرم الأوزون وأكبر بكثير من خرم الأبرة ولما إنخرمت محل رهيفه أصبح من الصعب رتقها لكن يحدونا الأمل بتغييرها كليا ، وما بقي الأمل قائماً أكيد حا تكون في فائدة .
|
Post: #3
Title: Re: وأيـــه الفائــــده
Author: mohsin_alsla7aby
Date: 09-11-2004, 06:11 AM
Parent: #2
almulaomar
Quote: أخي محسن الصلحابي
أظنك حكيتها شديد ولما كانت الحكاية في الأساس بسبب عوامل كثيرة رهيفه بما فيه الكفاية كان لابد أن تنقد وتتخرم خرم أقل ضرراً من خرم الأوزون وأكبر بكثير من خرم الأبرة ولما إنخرمت محل رهيفه أصبح من الصعب رتقها لكن يحدونا الأمل بتغييرها كليا ، وما بقي الأمل قائماً أكيد حا تكون في فائدة المصيبه الاكبر فى الطريق بس استنى شويه
|
Post: #4
Title: Re: وأيـــه الفائــــده
Author: almulaomar
Date: 09-12-2004, 01:46 AM
Parent: #3
أخي محسن تقول أن المصيبة الأكبر في الطريق وتطلب منا الصبر شوية هل الصورة بهذه القتامة أم هل صبأت وكفرت بمقولتنا المشهورة "قالو الصبر عاقبو الحلو"
|
|
|