يا رب في كم زول مشنكب في البورد دا؟. أنا زمان مكشكش!

زمان لمان كنت صغير (أكتر من كدا) حبوبتي بتناديني: المجذوب! ولما تزهج مني خالص: ها الدرويش دا. ولما كبرت شوية (بس ما قدر كبري الهسه) حبوبتي رقتني الي درجة مكشكش، وماتت عليها لا تحيد وكانت مطمأنة ربنا يرحمها.
أمبارح بالليل طريت حبوبتي وزمانها الجميل وحكاويها الحلوة وطريت في النص كدا كشكشتي الزمان. وبقيت في لحظة أفكر يا ربي انا لسع مكشكش ولا الحكاية شنو؟. والإجابة ما ساهلة!. بس هي الكشكشة ذاتها شنو؟. الغريبة انا أصلوا ما فكرت في الموضوع دا!؟. برغم حيازتي (بعد ما كبرت شوية) لعقلية تحليلية مشنكبة. بس خمنت انو الكشكشة هي أحد مراحل الجنون االمهمة أو قل أعراضه التي لا تخطأها العين. يعني بالواضح كدا أي زول ماش إجن لازم إمر بالكشكشة (حتى لو كان أبو عرام). بس الجنون نفسه ليس بسدرة المنتهى في عالم ذهاب العقل. الجنون مرحلة متوسطة (وقديما قيل أسأل خبير)، الزول الماش على الجن ببدأ
بتعرية سلك (شوية مشاكل نفسية)
ثم يكشكش (وفيروس الجن في هذه الحالة بكون زي فيروس الأيدز، بركن زمن ثم يهاجم الخلاية)
فتنحلج الصامولة فيكون الواحد منا صامولته حالجة
وبعدها يجن، فيرتاح من عناء الدنيا. لكن للأسف لبعض الوقت فسرعان ما تبدأ مراحل أخرى
وتبدأ بالإندراوة (والجن ممكن إداوى بس كعبة الإندراوة)
ثم الجنترة
وسدرة المنهى وهي الشنكبة (مرحلة الشنكبة والعنكبة) وهنا الناس تعمل حسابها شديد!!!!!!!!. الزول لما يشنكب بس تقوم جاري منو (ما عند حل تاني) بلاكم بشلت بكسر بعضعض بضرب بضبح بسكين بطورية بفاس بكفتيرة بقلم.
يا رب في كم زول مشنكب في البورد دا (سؤال بريء)؟.
ملحوظة:
حسب احصاءات موثوق فيها فأن 90 في المائة من الشعب السوداني يعيش في مرحلة الحلجان (الصامولة) أو الصمولة، يقال ان أول شعب في الدنيا نال هذه الدرجة هو الشعب الصومالي أيام سياد بري، وللمرة الثانية فأن أول شعب شنكب هو نفس الشعب الصومالي حسب سجل جينس للأرقام القياسية. وهناك أدلة لا تخطأها العين بأن بعض الرواد من ابناء الشعب السوداني والسباقين من أبناءه قد شنكبوا بالفعل.
أحمد سند
مدير مركز دراسات الشنكبة

هناك مرحلة مفقودة؟.

الاخ أحمد
علي ذكر الشنكبة والجنترة ، كتب لي أحد أصدقائي رسالة من السودان أيام ظهور الموبايل ، واستخدامه في الشارع لأول مرة قال لي والذمة عليه ( أن جميع الشعب السوداني صار يتحدث براهو ، 5 % مع الموبايل و95% مع نفسهم ) ياتري هل هذا البوست جدير بإلصاق هذه المداخلة من صديقنا النوش.
هناك تصحيح بسيط وهي مرحلةالإندراوة التي هي أكثر خطورة من الجنون نفسه ، لان الأندراوة لا بقدر عليها الفقير ولا الطبيب ، كما أن حالة خطيرة جدا حيث يكون صاحبها بين الناس ومنهم ومعهم يصعب تفريقه علي عكس المجانين.
مداخلة أخيرة :- متي تتلفت وزارة الصحة لهولاء المجانين وتعيد لهم تاهيل المصحات النفسية ( هولاء المجانين أصلاً هم ضحايا من مجتمعاتنا التي تدعي العقل ، لم يستطيعوا أن يستعوبوا ويتعايشوا مع ماشافوه من مصائب فأختروا نكران الذات)

You welcome Sidig and thank for your invaluable contribution
I wish if you could motivate mr. Nosh to share this madness with us.
I have just a little question for you and those who may know, what is the linguistic origin of the word:
كشكشة
??????

سلام


مرة راكبة حافلة للسامراب وما لقيت الا كرسى فى النص اها شغالة


قيام جلوس فى زول شافنى عجوزة وشمطاء قال لى تعالى اقعدى فى حتتى وبادلنى وبكل ادب قلتا ليه شكرن يا اها قام زول فى الكنبة الوراء زعل على قولة شكرن دى وبقى يهرج قال شكرن قال
بالله دى امة يكتلو قلب الناس بالشكرن يا اخى ما عاجبك كرسى النص اجرى تكسى بالله شوف الناس الوهم دى شكرن قال المهم بقعر عينى عاينت ليه لقيتو زول نضيف وشكلو عادى.. المهم كلمتا هاشم صديق( شوفتا كيف واخد بالك انا بعرف هاشم صديق) قال لى يا بيان المجانين بقو نضاف ذى وذيك كدا..المجنون اب شعر منفوش وسخان اختفى فى السودان

اها دى شنو كشكشة و لا جن احمر ولا شنو؟

))))المهم كلمتا هاشم صديق( شوفتا كيف واخد بالك انا بعرف هاشم صديق) قال لى يا بيان المجانين بقو نضاف ذى وذيك كدا..المجنون اب شعر منفوش وسخان اختفى فى السودان((((((

)))اها دى شنو كشكشة و لا جن احمر ولا شنو؟ (((
I guess that is the "ahmar" madness of the new globalization!!!!
or international "kashkasha"

سلام انت غير مشنكب ولا حاجة رايك شنو في مقاتلين التحالف في سجون ارتريا ؟؟؟
هل الحرية تتجزاء انا بخاطبك انت من ناس هولاندا
دايرن اجابة؟؟؟؟

أزيك يا كلكلة،
يا زول انت مهترش ولا شنو (مكشكش مبتدي)؟.
تحالف التحالف التحالف، الشيوعي البتاع الهناي . دا شنوا دا؟. دا ما مكان مهاترات سياسية. في بوستات تاني لمثل هذا الهوس حاول شارك فيها(مجرد نصيحة). والله دا كلام دا، سياسيي البورد دا بشنكبوا في الفارغة والمقدودة!!!!!!!!
مع مودتي لا شكنبتي
ابو سند

ويل للمكشكشين الذين هم عن السياسة معرضين!!!!!!!!!!!!

دخل القش ما قال كش، فهو أذن ليس بمكشكش.

دعوة صادقة الي بحث جذور كلمة مكشكش فهلموا معي !
وطبعا كل الكلمات الدالة والمعبرة عن أحوال غياب العقل وذهابه، انها أهم الكلمات في هذا الزمان.
1- مجذوب
2- درويش
3- أروش
4- مهترش
5- عندو سلك عريان
6- مكشكش
7- عندو صامولة حالجة
8- مجنون
9- مندرو
9- مجنتر
10- مشنكب

انها لهترشة

و أضيف لقائمة الأخ أحمد:

11-معشكب
12-فاطي سطر
13- فاطي صفحة
14- فاطي كراس دبل ، فما فوق...

أذكر أنني قرأت ورقة علمية في إحدى المجلات الطبية عن الأمراض النفسية غير المشخصة لدى السودانيين نشرت -على ما أعتقد- في الثمانينات ، و تخلص أن حوالي 16% من السودانيين يعانون من إحدى الإضطرابت النفسية الأساسية بنوعيها الذهاني و العصابي Neurotic & psychotic mental disorders متفاوتة في الحدة (من فاطي سطر لفاطي موسوعة كاملة) ;-)

أتوقع إنو النسبة بعد سياسات التحرير الإقتصادي وما نتج عنهامن تأثر الشرائح الأفقر و مفارقات الدخول و الضغوط الجتماعية و النفسية..ممكن النسبة بالراحة تكون قربت للربع ..

الله يديكم ويديناالصحة و العافية و راحة البال


د.إمام حسن
_________________________________________

"الجن بداوى...كعبة الإندراوة"

"خذو الحكمة من أفواه...الشباب الحلوين"

اخي الكريم
عندنا هنا بقولو الزول قرب يركب التونسية او ركب التونسية .

حلوه يا دكتور أمام من فاطي سطر لفاطي موسوعة كاملة).
انا شخصيا فاطى مكتبة مخصصة للأدوات المدرسية لشفع الإبتدائية.

أخ سيف مرحب بيك:

انت حليلك، انت من زمن الناس بتركب التونسية، الناس ما أطورت بقوا بقربو يركبو اللفتهانزا (الألمانية) او ركبوا اللفتهانزا.
ولي عودة
تقعدوا عافية