إلى مقـام حِـبـي المطـر

حِـبـي المطـر
ريحتـك دعـاش
قربك نعيـم
لو كان رُشاش
بُعدك خطرْ
مشتاقة ليك كل الزهور
لا شـاخ حنينا ولا فتـر
مشتاقة ليك كل المروج
شوقك تخلل في البراعم والجذور
من سُمعتك
حتى البذور
الأصلو يوم ما شافتـك
مسكونة بالشوق والحنين
حلمانة بي يوم دُخلتـك
ونسيت أقـول
مشتاقة ليك حتى الحُـفَـر
* * * *
وصاني ليك طير الخريف
الفارق أعشاشو وديارو عشان يجيك
متعطش أعياهو السفر
قال ليك بِـريدك ومُشتهيـك
وانت المطر
فوق الظنـون
قاموسك المافيهو جيم
حرف الجفاف حرف الجحود
حرف الجفاء
ما بشبهك
حرمان حبايبك طلتك
وانت المطر
كل البريدوك بندهوك
يا غيثنا يا ابو الفيض مَددْ
وانت السنـد
متحلقين جُبرانا يا أبو الفيض مَددْ
وانـت العَضَـدْ
متسورين محرابنا يا ابو الفيض مَددْ
وانـت العَـمَـدْ
متوسلين بي آمنة يا ابو الفيض مَددْ
وانت المَـددْ

سنجاوي ..ايها الشاعر الرقيق تحياتي وحمد الله علي السلامة

العزيز تولوس

الف مرحب بيك حبيبنا
المسنجر بسألني منك
والعيون بتقول حبابك

تحياتي

يا لذيذ النص ، والجرأة الخجولة .. والحس الوريف

أكتب ، فعلى الصمت اللعنة