جبال مأساة .. سهول أحزان : مقاطع للوطن..

على مد البصر شايف
مخازي بلدنا بالكيمان
جبالن شايلة مأساتنا
سهول ممتدة من أحزان
مآسي على البلد تنهال
باسم السنة والقران
لا زولن سعيد فرحان
ولا بتشوف حقوق انسان

وعلى مد البصر يابا
وحاتك يا عظيم الشان
جبالن شايلة مأساتنا
سهول ممتدة كوم أحزان
ونيلك يابلد شقيان
موجو عديل وقف حردان
يبكي على شدر ضبلان
ويطرا زمانو كيفن كان ..

# # # # # #

حليلك يا بلدنا الكان
تكية ومرسى للضيفان
حزين الليلة ياأهلي
فاقد فرحو وين ما كان
غارق في الدموع يبكي
وفاقد أمنو ليهو زمان
صدى صوتو الملا الوديان
بسأل : ويـــــــن
وين الليلة يا ايمان
سوداني البعرفو زمان
وينو الليلة يا عثمان ؟؟؟؟؟؟؟؟؟؟؟؟؟؟ .

##########################


توضيح بسيط فقط :

# (ايمان) و(عثمان ) هما رمزان الى (زول) و (زولة).


وللجميع مودتي ..

خضر عطا المنان

الكريم خضر الاخضر


مساء الخيرات
UP

الصديق العزيز : هشام

تسلم يا صاحب القلب الابيض .. والحرف المخضر في زمان الجفاف
والجدب الأسود..

لك المعزة .

خضر عطاالمنان

العزيز خضر ..... صدقت القول فلك التحية والاحترام
UP
UP
UP
السمؤل

على مدى البصر فنان
ابوك فعلا عطا المنان
خضارك شايلو من زرعك
وكلامك من حجى الحبان

تسلم يا أخو الأخوان
ياأوسلي العظيم فنان
ياشتل الحنين رويان
ويانخلن وقف ريقان **



خضر عطاالمنان

الابن الوفي : السموأل

تسلم يا ابني ..
وهذا بعض مما نحسه نحو ذلكم الوطن المنكوب
باهله ..


تحيات مزهرة لك يا أيها الفاضل .

خضر عطا المنان

مستقرب أنا ليه ما شوفت المحفل ده

رغم إنه المشاركه حقتي متأخرة إلا إنو برضو بتحصل

لم طبوركن يرن
عروق الداره تنتح بالتعب
وأنا المسكين
زي حروق الليل بجن
ساوي الحنين خلقن كعب
ساوي الأنين توبا كعب
يا ريت صرة الحال تنعدل
صرة الوجه الكان بشوش
تزاول ما تلم
عشان ينصلح حالي
فوق زينكن أنم
يا بلدي القبيل
غناك في كل ساحه
وذكرك كان يفوت حد الصراحه
وزينك وطن مشهور بالفلاحه
إلا الليله أصبح مخدر بالحجا
غشوك ناس السافله ودب لعنه

طارق ع الأحمدي

خضر ياشفيف
مادام الكلام للوطن
القومة ليه معاك


بلدا فيها نيل
للموية دافر...
وارضه مسطحة
زى اوراق الدفاتر..
تزرع تفتح فى الجداول
والخضرة زى ابتسامات
البشائر...
الحقول جابت ثمار
ما عرفنا الجوع والدمار..
وصدرنا للبلد البعيد
والقطر والمجاور...
بس الليلة جاءتنا المشاكل
بيها الغيوم صارت تسافر...
حتى الطيور هجرت وكور
عند المغارب والبواكر...
ولو ولد طفلا جديد يسال
امه وين الجواز عاوز يسافر...
عشان الزواج كا بالرسائل
وابوه لسع مهاجر...
كايس الضمان ..عاوز الامان
عاوز ما يسمع دبابات العساكر...

حتى الجماعة صارت تهاجر...
عشان تجمع من المغتربين الضرائب
وتكدس فى بنوك الوطن المجاور...

عشان السودان عاوز يهاجر
حتى النيل داير يسافر
وغير مجراه القديم
عشان حكومة العساكر..

انا ذاتى عاوز اسافر
حتى للظلمات والدياجر...
بس لمنو نترك المساكين
الحيارى
المكافحين الضوامر...
المابعرف وين ينوم
غير رواكيب فى الهواجر...
الما بملك رسوم الجواز
ولا بعرف حجوزات التذاكر...

ابقوتة_ قبل الاغتراب

(( **انا ذاتى عاوز اسافر
حتى للظلمات والدياجر...
بس لمنو نترك المساكين
الحيارى
المكافحين الضوامر...
المابعرف وين ينوم
غير رواكيب فى الهواجر...
الما بملك رسوم الجواز
ولا بعرف حجوزات التذاكر** )) >

ابقوتة_ قبل الاغتراب
*************************

الحبيب : أبوقوتا

روعة بجد ..

لكن دا كان ابوقوتا قبل الاغتراب !!!
ثم ماذا بعد الاغتراب ؟؟؟؟؟؟

هل أتحفتنا ياسيدي بما عندك من بيت الكلاوي ديك ؟؟؟.

لك المحبة .

خضر عطا المنان

الجميل خضر،
الحزن يعصر مهجتي كالبرتقالة
الآن أعرف مأزق الكلمات
أعرف ورطة اللغة المُحالة
وأنا الذي اخترع الرسائل
لست أدري
كيف أبتدي الرسالة

كلامك حلو يا ود عطا المنان فهو يدخل القلوب من حيث يخرج الشجن
فتربع على عرش احساسنا العظيم بك

معز

(( ** الحزن يعصر مهجتي كالبرتقالة
الآن أعرف مأزق الكلمات
أعرف ورطة اللغة المُحالة
وأنا الذي اخترع الرسائل
لست أدري
كيف أبتدي الرسالة **))>
******************************

زولنا السمح : معز

هكذا حالنا معك دوما .. تتسلل الينا خلسة من حيث ندري ولا ندري
فتحيلنا حقلا من البرتقال والقرنفل .. والياسمين واليانسون .

فأي برتقالة تلك التي عصرت مهجتك يا سيدي ؟؟..

أنها اكثر البرتقالات حظا في دنياالبرتقال .

لك شوق لا ينضب .

خضر عطا المنان

الحبيب ورفيق الصبا الجميل خضر الاجمل

التحية لك عزيزى وانت تحمل هم الوطن فى احداقك حيثما حللتواينما رحلت رغم يقينى انك تنعم بالحياة الرغدة ولكن يقينى اكثر انك لن تهنأ بها والوطن تقطع اوصاله بواسطة فئة باغية استحلت كل حرام وعاثت فسادا فى ربوعه الجميل ..

احى وطنيتك اخى واحى حبك الازلى لاهلنا الاكارم ..

(( ** احى وطنيتك اخى واحى حبك الازلى لاهلنا الاكارم **)) .

******************************************************

كم أنت رائع يا عمدتنا يا قرشو .. فأنا ـ بدوري ـ أحييك
وأكبر فيك هذا الشعور الطيب نحوي .. وما حبي لذلكم البلد
العظيم وشعبها الكريم الا بعض من حبكم يا سيدي ..
وان كان لي ما ازيد هنا فهو :

يا بلد يا باقي همي
أنتي اللقمة والجقمة
وساري هواكي في دمي
أناالساويكي ليا دليل
وأعزك أنتي زي أمي
بلاقي دوام حروف اسمك
تراقص في حروف اسمي
عايشك يومي في الغربة
وكاسي هواك مسام جسمي .
**********************

وتسلم يا عمدتنا ياعظيم .

ولك محبتي .

خضر عطا المنان