شكوي الي سجيمان والاخ ود قاسم وجني .الموضوع سندس الزراعي

التحيه لكم ايها السادة
اخوتي في الفترة الماضية اي قبل اربعين سنة تم انجاز اخر اكبر مشروع زراعي في السودان وهو مشروع امتداد المناقل,تم انجازه في فترة الحكم العسكري الاول الفريق ابراهيم عبود.منذ ان استولي هؤلاء الجماعة علي الحكم سمعنا ببد العمل في احد المشاريع اسمه سندس الزراعي ,لم يتم انجاز المشروع الي يومنا هذا,المشروع في ارض اغلبها غير زراعي في منطقة خيران تنحدر من الشرق الي الغرب وتفصل النيل الابيض عن الخرطوم تماما, واشهرها الذي يمر الذي يمر بمناطق الدمر دمر الكريل ود جار النبي. اي حد سافر الي كوستي عن طريق جبل اولياء لابد ان يكون شاهد المنطقة وخلوها من الاشجار,اللهم الا من من مزرعة وحيدة بالقرب من نقطة تفتيش الجبل وبها بعض اشجار البان.لماذا استغرق هذا المشروع اكثر من 15 عاما ومشروع المناقل الذي يروي من الترعة القادمة من سنار استغرق ثلاثة سنوات.من هم اصحاب الارض التي قام عليها المشروع , هل تم اغتصابها ,من هم الذين اشتروا الاراضي الزراعية , هل لهم علم بان هذه الارض ربما تكون غير صالحة.نشرت هذه الرسالة عند ناس طابت , وبعد فترة نشر في السودان هنالك بشائر عن المشروع.
ياسجيمان بما بما انك تحب ناس بحر ابيض اطلب منك العون.
يا ود قاسم انتهي عهد التهميش لغرب الجزيرة فهاهومشروع سندس الزراعي.
يا جني بما انك تحمل العصي السحرية ارجو منك ان تكمل المشروع.
في الختام تقبلوا فائق شكري.

أخي سيف أنا من الضحايا
والآن جالس بس أستغفر واشمشم في يدي
وأولادي هاك يا لوم وتأنيب لأنني أضعت 30 مليون جنيه كانت حاتشتري ليهم حافلة تبيض ذهبا
ولبنا سائغا شرابه
وليوم الليلة محلك سر
آخر حاجة سمعنا الباقي بس يعملو الضنابية (!) وهي عبارة عن قناة تصب الماء من بحر ابيض نحو ال BOOSTER من خلال الطرمبات وبعدين الترعة الرئيسية التي قالوا انها جاهزة الآن
واضافوا ان العمل يسير جيدا في ترع ابو عشرين وابو ستة تمهيدا لأفتتاح المشروع مع عيد الاستقلال
دا كلامهم غايتو
لكن الاستغفار مستمر واللوم حسب المناسبات
والمشكلة زول اسمه الصافي جعفر هو صاحب المشروع كما يبدو وليس مديره كما يشاع
الله كريم ..لابد انني اقترفت ذنبا حتى اقع في هكذا فخ
-------------
رب اشرح لي صدري

الحبيب محمد عبد القادر

شكرا علي المرور وايضاح مشكلتك

الارض لها اصحاب وانت دفعت فلوس هل تم تحديد المدة التي يسلموك فيها المزرعة؟ هل سالت ماهو شكل المشروع؟ هل لديك عقد شراء وتمليك؟ لان هنالك الاف من الذين دفعوا فلوس ممنذ مدة طويلة ولهذه الفلوس ارباح بنسبة 5% سنويا في النظام البنكي الغربي وعندهم في السودان 24% يعني لو حسبت المدة تجد فلوسك 85 مليون لو اشتريت قبل عشرة سنوات,

ربنا يعوضك ويطلع ليك حقك ويلزمك الصبر

شخصي الضعيف ابن احد شيوخ البساطاب الذين يسكن جزء منهم في جبل اولياء في ديم البساطاب ويعرفون هذه الارض جيدا

ود عوج الدرب

السادة الاعزاء
عن سكان المنطقة الاصليين
البساطاب ثم الدويحية ثم العرواب ثم الجميلية ثم الحمداب.
هنالك مشكلة بين احد شيوخ المنطقة واهل الارض الاصليين ويتمتع هذا الشيخ بصلة طيبة باهل الحكم

لن يتنازل هولاء عن ارضهم وسوف تكون معركة ثالثة وقنبلة اخري في صدر اهل الحكم

سيــــــــــــــــــــــيف
قلت البساطاب شعرة جلدى كلبت

ياخوى دى ارضنا عديل كدا

جدى بله ورثها من ابوه عشكوب ود محمد امام ود ضياب ود مرزوق ودعرمان...غير بتاع المعارضة
عندنا فيها 100 جدعة...ياربى الجدعة دى تساوى كم...حقت جدى مرزوق
هى كانت جنة الله على الارض فيها شجر الاراك..وخالى محمد ود اب رجاء كان بتور منها الارانب..مرة من المرات جاب لينا منها سبة ارانب...مما دخل عليها الصافى جعفر دا ..حرق شجرها وطير ارانبها
جداولها العملها دى غير كسرت بكاسى ابقوتة...ما افادت شىء...وقبل يومين..انقلب لينا فيها بوكسى ماتت فيه امراة..وطفل ..والباقى فى المستشفى بين الحياة والموت

اما صديقى الشاعر سبيل ..الله يعوضك فى فلوسك...اسى لو قلت لى زمان كان بعت ليك ارض جدى دى وصيعت ليك ناس الورثة....
سيف ..مرة قلت لابوى عاوز اشترى فى سندس قال لى انت كان عندك فلاحة...خلف المشروع جنب الترعة خمسة عندة 30 فدان امشى نجحها...خليك من الارض..الملقة دى هى كان فيها نجاح كان الخواجات ما خلوها....
انا بعرفها شبر شبر ....وفدان فدان...واراكة اراكة...ياحليل زم الاراك لما كان فيها
ولك ودى

ابوقوته ياسمح انت عارف اهلك البساطات قالوا ما بتكلموا اسع لمن المشروع يتم يقلعوه من الناس . اه ده مش مكر اخوك حام الناس بيت بيت كلو زول عارف مكانو وين
تسلم علي المرور

سيف مساعد
لك التحية أيها المهموم بحال أهلك في النيل الأبيض وغرب الجزيرة ،، سندس ده طلع زي المشروع الحضاري ، والصافي جعفر يعيش منذ سنين امبراطورا لمشروع لم يقم ،، تخيل لمدة خمسة عشر سنة هناك من يستلم رواتب وبدلات وحوافز على هذا المشروع ،، تقول لي أرباح ،، ديل خلوا أرباح يا راجل ؟؟

شكرا علي المرور الاخ ود قاسم
ربنا يعوض الناس الدفعوا فلوسهم في الفاضي

يا اخونا شوفوا الاستهبال نقلا عن ناس طابت من موقع سندس
الملكية
جاء القرار الجمهوري رقم 95|92علي احكام المادة{ا} الي[ب] المرسوم الدستوريالرابع لسنة 1991 والذي يقضي بنزع حيازة الارضي اعتبارا من22\2\1992م وينصعلي نزع حيازة50%من الاراضي المملوكة ملكية منفعه و40% من الاراضي المملوكة ملكية عيني.وهذا القرار هو قرار نزع حيازة وليس نزع ملكيه وسيتم ارجاع ملكية الارض المنزوعة بعد 30عاما,وقد جاء قرار النزع لمقابلة المساحات التي يشغلها شق الترع والقنوات والمصارف وتشيد مرافق الخدمات الاخري المرتيطة بالمشروع من مباني ادارة وخدمات وقد تم تشكيل لجنة معالجات الاراضي الخاصة بمشروع مشروع سندس الزراعي بصورة تضمن نزاهة الامر وحيدته.وكان تشكيل اللجنة علي النحو التالي
مولاناعباس خليفه[قاضي محكمه عليأ] رئيسا
مهندس عبد الحمن محمد صالح[رئيس قسم المساحة] عضوا


يعني 30 سنة قلع بدون مبرر والناس الدفعو فلوس عوضهم الله الترعه تبقي ملك اهل الارض ونطالب بتعويض ال15 سنة الماضية يا اهل الامر وعيييييييييييييييييييييييييييك

سيف

الحاجة الوحيدة البعرفا وبتذكرا..... انو المشروع كان معروض للبيع في السفارة السودانية بالرياض....وبصراحة انا لا قدمت ولا سعلت منو ولا حاجة... لانو كان السعر بالدولار ودا شعرن ما عندي ليهو رقبة..... كفاية لي ستاشر سنة بدفع في حفر ترعة الرهد.....وتحت تحت سمعت انهم عاوزين يدفنوها ودايرين الناس الدفعو لي حفرها يدفعو لي دفنها....وبكل صراحة وبكل امانة اي حاجة قاعدة تجي من طرف الحكومة دي قاعد اشك فيها وما بصدقها.....اها شوف ابقوتة قاعد في الرياض ومرة يكسر كراعو ومرة زهجان من كفيلو....وواطاتهم هناك معروضة للبيع.....

سجيمان سلام يابا
انا عايز اعرف لي شنو بالدولار ما بي السوداني يعني جنيهم ما قوي ولي حساباتهك في الخارج بالدولار . ابوقوته يبكي علي الارانب والاراك واهلنا ماخلوا ليهم حق التنباك

لكن الطواحين الدفعت فلوسها دي يحلو مشكلتهم كيفن

up

سيف أخوي

الخلا مالو ما كويس يا ناس بحر أبيض عشان لمن تشاكلوا تقولوا
لي بعض :طالعني خلا سندسّ!
نحن أراضي الخرطوم كلها باعوها يعني لوشاكلت واحد غلا تركب تاكسي
عشان تطالعوا الخلا!!

قال عصا جني قال!!
والله ديل عصا موسى يكسروها ليهوا فوق رأسوّ!
فال سندس قال!هاكم الإستبرق دا!
جني

والله قال لاطالعني الخلا يازول بيع شديد عارف في قطع تلقاها باعوها عشرين مرة, مره في ثلاثة جماعة كل واحد عندو نفس قطعة الارض والجوطه حصلت لمن جا البوليس والبائع واحد.
شكرا جني علي المرور والرد

ود عوج الدرب اخوي
سلام

الناس ديل الظاهر دربهم انعدل ، أو هكذا يخيل لي
هاك الخيت دا شوف موقعهم وطمئني عليك الله ، القصة ماشة ليقدام وللا لأ؟

http://sondus.net/sondus/arabic/aboutus.htm
بس بالله ما تنسى تفتح صفحة ( اسئلة متكررة وتقرأ آخر سؤال ؟ يقول ..

8 - متي يتم افتتاح المشروع ؟

بخصوص اكتمال بنيات المشروع الأساسية فمن المقدر للمشروع البدء في عمليته الإنتاجية اعتباراً من الموسم الشتوي 2001م .

الاخ الكريم محمدعبد القادر سبيل
يا خوي الكلام ده كلو كلام الطير في الباقير مافي اي حاجة, ازيدك علم مشروع الجزيرة بزرع القمح في دورة رباعية وهو اكثر خصوبة من اراضي بحر ابيض ما بنتج عشرة جوالات لي الفدان,ما نوع الزراعة التي تمت من قبل هنا,هل هنالكزراعو مطريه حتي يقاس عليها نوع الانتاج من اين اتوا بهذه الاحصائيه,الاحصاء لاتتم الا علي شي ماخوذ من الواقع انتاج خمسة سنين مثلا, او عشرة سنين مثلا عدد المزارع والمزارعين الذين قامو بالانتاج, كل هذا لايوجد,
الفلم التاني الانتاج سنة2001 ونحن الان في سنة 2004 الظاهر غلطوا سنة2021يكون الانتاج وربك عليم.
الايام الجايه بتكشف الحال

الاخ سيف
لك التحية
ياخوي استخلف الله وانسي حكاية سندس الزراعي دي...عندنا صاحبنا مغترب وهم الشريح الريشية التي اشترت الترماي..قال انو حكاية الصافي جعفر وسندس دي بتذكرو بي قصة المطالعة الزمان (دا كان بقيت زولا قديم زينا) فرعون وقلة عقله..فهذا ياصديقي مشروع لا يراه الا العاقلين ...

لك الشكر
عبد الله جعفر

الاخ عبد الله جعفر
الكاويني الاحصاء عملوها كيف الفلوس ضاعت ضاعت لكن الكضب لازومه شنو

شكرا علي المرور

يا ناس القانون طلب مساعدة

شركة تنمية شرق جبل اولياء

شركة تنمية شرق جبل اولياء