أتـــاري السلطــة دي حلــوة كدة...

في الانترفيو الوحيد الذي شارك فيه نيكسون الرئيس الامريكي الذي طرد بعد فضيحة وتر غيت. انه متحسر علي فقده للسلطة بالرغم من انه لم يكن ينقصه اي شئ والمجتمع يعطيه حماية وراحة كاملة. وقال انه شاهد المليارديرات يعيشون حياة خرافية في الريفيرا في جنوب اوربا الا ان ذلك لايقارن بالسلطة.
وللاحتفاظ بالسلطة ضحي نيكسون بنائبه اسبيرو اقنيو وقذف به للذئاب وعين فورد بدله الذي اصبح اول رئيس اميركي غير منتخب. وكسنجر وزير خارجية نيكسون الذي لم يكن يستطع ان يكون رئيسا للجمهورية لانه يهودي مولود في المانيا والقانون الامريكي لايسمح للمتجنسين بان يكونوا رؤساء للجمهورية. وسعي كيسنجر لان يجعل ولي نعمته روكيفيلر نائبا للرئيس فورد الذي كان شخصا مغمورا لايساوي شيئا. فماالذي يدفع شخص مثل روكيفيلر اغني اغنياء العالم لان يكون نائبا لرئيس لم ينتخب حتي. فهل السلطة حلوة بهذه الدرجة.
لقد قال المحامي احمد سليمان السلطة دي حلوة كان الزول ضاقا ما بخليها. ولهذا باع احمد سليمان كل الناس حتي نفسه اخيرا.
ولماذا يقبل مبارك المهدي بان يصير احد خدم البشير في نظام كريه شرده وشرد اهله واجاعهم بعد عز هل هي السلطة؟. قالوا ان السلطة تعمي هل هذا حقيقة؟.
من اعقل والطف الناس الذين قابلت اخي رياك قاي ترت. ما الذي يجمعه مع حكومة الجبهة؟. اذكره عندما كان نحيلا قصير القامة ونحن في مدرسة ملكال الاميرية في الخمسينات. وهو من نوير فنقاك.
اول مواجهة بيننا كانت بسبب حذاء الباتا الذي يستحيل السير بدونه في ملكال في الخريف لان الارض طينية لزجة. وعندما ضاعت فردة حذائي وهذا يحدث دائما اختلفت مع رياك الذي كان اقل مني حجما وانا في السنة الرابعة وهو في السنة الثانية. وواجه سمعتي السيئة وحبي للعراك بشجاعة متناهية. وبالرغم من تدخل ابراهيم الحاج ابراهيم وهو من ابن تاجر في فنقاك ويتكلم اللغة النويراوية كلغة امه لصالحي الا ان رياك كان يقول له بكل هدوء انت المفروض ان تقف معي لانك من بلدتي. ولان الطين يغطي الاحذية, فلقد اقترح رياك ان نغسل الاحذية وهو يخلف رباط جذمة الباتا. وعند غسل الحذاء المتنازع عليه وضح انه حذاء رياك الذي قال لي بكل بساطة(شيل الجزمة ياشوقي, انا النويراوي ممكن امشي حفيان انت ود ام درمان ما بتقدر تمشي حفيان). وصرت انا ورياك لانفترق. شخص بهذه الروعة لماذا يلوث سمعته بأن يشارك الجبهة الحكم.
عبد الملك البرير الذي كان واليا علي ام درمان والذي نغم عليه اغلب اهالي ام درمان حتي ستات الشاي ثم لفظته الجبهة اخيرا. ماذا كان ينقصه؟.
الاخ عبد الوهاب عثمان الذي كان وزيرا للمالية من اكثر الرجال الذين اعجبت بهم. واذكر انه عندما تولي منصبه كتبت له مناشدة في جريدة الخرطوم وقلت له ان الجبهة ستستغله وتلوث اسمه الجميل ثم تلفظه ولقد حدث. والرجل قد حاول جاهدا ان يقف امام طوفان الفساد. لقد كان هو وابراهيم عبيد الله عم الاخ خالد الحاج من اعظم المبعوثين في براغ وحازا علي احترام الشيوعيين والديمقراطيين بالرغم من ارتباطهم بالاخوان المسلمين. لماذا ياتري قبل عبدالوهاب عثمان ؟ هل هو حب السلطة فقط؟.
العم ابراهيم جبريل كان من اثرياء الخرطوم وكان اكبر سمسار في السودان ولقد سار ابنه سعد رحمة الله عليه في طريقه. وكان يضرب به المثل في الاناقة وله منزل ملئ بافخر الاثاث والرياش. وعندما كان سجينا في بداية الستينات, كان له سجاير خاص في علب من الصفيح يصنع في اليونان كل علبة تحوي خمسين سجارة. وكان المسجونون السياسيون يستمتعون بهذا السجاير. وحتي بعد خروجه من السجن كان يرسل هذا السجائر لزملاء السجن.
العم ابراهيم هو السمسار الذي باع العمارة في شارع الجمهورية والتي كانت مكاتب السفارة الامريكية. واشتراها العم صالح العبيد واحمد العبيد. والمبلغ كان مائتي وثمانين الف جنيه سوداني. وذلك الشيك صور ونشر في الجرايد كشيك تاريخي. ونصيب العم ابراهيم جبريل من تلك الصفقة لم يكن يقل عن عشرة الف جنيه في وقت لم يكن فيه ثمن المنزل لم يزد عن خمسمائة جنيه.
العم ابراهيم جبريل صرف مبالغ طائلة لكي يدخل البرلمان و لكي يصير وزيرا في حكومة الوطني الاتحادي وكان يفشل. وعندما كانوا يقولون له(انت راجل غنيان مالك ومال السياسة). وكان يرد انتوا ما عارفين معني انو الزول يجي نازل في هوتيل في بيروت يقولوا ليه ياسعادة الوزير بتعني شنو.
الذي دفعني لهذه الكتابة هو انني شاهدت تعيين مجموعة من الارزقية كسفراء لحكومة السجم وادهشني ان أري وسطهم سفير السودان للنرويج. الشاب الوسيم المعقول الطبيب الاخصائي احد مالكي مستشفي خاص في الخرطوم محمد علي التوم زوج حفيدة البشير الريح وهو ود القبائل ود النوراب شيوخ الكبابيش الذين وقفوا امام جبروت الخليفة عبدالله التعايشي ودفعوا الدم والنفيس. هل يحتاج السودان لسفير في النرويج؟ لقد كان للسودانيين سفير في السويد منذ الستينات والسويديون ليس لهم سوي قنصل فخري. هل د.محمد علي التوم يقدم للسودان كطبيب اخصائي اكثر مما يقدمه كتشريفاتي في سفارة النرويج؟ . ماالذي يدفع رجل لم نشهد منه سوي العقل والمعقولية لان يطارد منصب كهذا في حكومة سيئة لايمكن ان يقبل اي عاقل ان ينتسب اليها. الم تكفي العشرين سنة التي قضاها الدكنور محمد علي التوم مرتبطا بالسويد في اقناعه بان هذا خطأ؟ ولا السلطة تمام حلوة؟ولقب سعادة السفير اجمل من الدكتور؟.
شـــوقي بــدري..

الأخ الكـريـم شــوقى،

قـديمـأ قالت العـرب:

يقولون سعــدا شـقـت الجن قلبـه.......... ولكن سعــدا لم يبايع ابابكــر
لقـد صبـرت عن لـذة العيش أنفس.......... وما صبـرت عن لذة النهى والأمـر

عزيزى ابو الريش
شكرا على بيت الشعر الذى سأحفظه عن ظهر قلب واستشهد به . هل تصدق اننى لم اسمع به من قبل ؟ .
اهلنا قالوا آخرتها كوم تراب . لو الناس ختت الكلام ده فى راسها مافى شكله. كلما الناس يقولوا لى ناس الجبهه ديل لو لموا فيك اضحك واقول يلموا فينى انا ولا فى ابو الريش .
الله يديك العافيه . شكرا
شوقى ...

عشان كدة عشق الديناصورات للسلطة وسعيهم لها واستماتتهم فى سبيلها يفوق كل تصور .. شكراً أستاذنا شوق بدرى

انها الثروة و السلطة
ادوات التسلط و الجبروت يا عم شوقى
لان المال المكتسب عادة ما ياتى من سبيل غير شرعى
لذلك يشعر الحرامى انه قد يحمى نفسه بسلطة هى الاخرى مغتصبة
Money and Power

الاخ مارد ...
العم احمد محمد صالح الشاعر الفذ اختير كأحد اعضاء مجلس السياده فى الحكومه الاولى وبعد مده طالبه اهل مراسيم القصر بأن يكف من الجلوس امام دكان العم هريدى فى الركن الشمالى الغربى للجامع الكبير فى امدرمان . وكان متألماً ويريد ان يستقيل الا انه كان يخجل ان يتهرب من المسئوليه الوطنيه . وعندما انتهت الديمقراطيه كان سعيداً بأن ربنا قد حلاه . هكذا كان الرجال قديماً .
لك التحيه ..
شوقى ...

العزيز اسامه ...
لك التحيه ...
العم حماد توفيق انعم عليه الملك فاروق بلقب بيه ومخصصات اللقب الا انه رفضها لانه لم يكن يوافق على سياسه الملك فاروق . وصار وزيراً يمثل الوطنى الاتحادى . وفاز فى دائره الحصاحيصا وهى معقل العم عبد الرحمن على طه اول وزير للمعارف ايام الجمعيه التشريعيه .
فى ايام الحكم العسكرى صار حماد توفيق مديراً للبنك الزراعى وقامت كل المشاريع الزراعيه تحت دعم البنك الزراعى . كان يسكن فى منزل بالايجار فى العباسيه مواجه حواء كلاب ست العسليه . ويفصله زقاق صغير من ست العرقى . وفى آخر ايامه شاهده شخص يحمل راديو ترانزستر وهو يمشى فاقترح الشخص ان يعود لكى يأخذه للمنزل . وبالسؤال عن الراجل الجاء يصلح الترانزستر عرف بأنه قد غادر المحل ولم يكن قد حضر لاصلاح الترانزستر بل كان يريد بيعه . هذا هو الفرق يا ابنى والامثله كثيره .
شوقى ...

"اهلنا قالوا آخرتها كوم تراب.."

الأخ شــوقى،

الشيــخ فـرح ود تكتـوك زمان قال: "خـربانـة ام بنـايـة قـش" (تنوين التاء الأخيرة)
دا لما ما عـرفـو يزعلـوه كيف، قـرروا أن يهـدمـوا القطيـة فوقـو، يمكن يزعل ويغضب، فلمـا شعـر بحـركـة غيـر عاديـة، طلـع من القطيـة، ولقى الجماعـة يشلعـوا فيهـا.. فقال قولتو ديك وبـدا يشــلـع معاهـم!

Quote: هذا هو الفرق يا ابنى والامثله كثيره

ايوا يا عم شوقى
انا ماقاصد ديل
انا قاصد اللى بالى بالك

العزيز ابو الريش....
من الاشياء التي لاتعرف هو ان خالد ابن يزيد بن معاوية بايعه الناس بالخلافة بعد موت ابيه فرفضها وانصرف الي العلم والادب والمعرفة والحكمة واتجه الي الترجمة والكتابة والتأليف. في الكيمياء والفلك والطب وماتركه من مؤلفات لايزال موجودا والذين فضلوا السلطة ماتوا تلاحقهم اللعنات..
لك التحـــية...

عزيزي اسامة..البعض تمسك بالسلطة منهم قريبي وزوج ابنة خالي عزالدين السيد الذي ترأس اغلب البرلمانات السودانية وعنده مقدرة خيالية احسده عليها علي التأقلم مع كل الاوضاع وهو لايحرق مراكبه ابدا ولا يخلق عداوات.
ابوصالح كذلك تمسك بالسلطة. وعندما عرف ان الدكتور مامون محمد حسين والذي حكم عليه بالاعدام في بداية الانقاذ, قد تعرض للتعذيب والضرب والجلد, قال بعد ان شاهد اثار التعذيب اعفي مني يامامون دنيا واخرة انا ما كنت عارف. ولكن بالرغم من هذا لم يقبل ان يترك السلطة.

Quote: كان يسكن فى منزل بالايجار فى العباسيه مواجه حواء كلاب ست العسليه . ويفصله زقاق صغير من ست العرقى .

العم المؤرخ شوقي البدري؛ عندي سؤآل أنت منو في السودان ألماكان ساكن جنب ست عرقي أو ست عسلية

الابن العزيز وك حمـــاد..
والله يا ابني ضحكتني في نص الليل. في حي الملازمين مثلا ما كان في ستات عرقي ولا عسلية البيوت غالية وجميلة ونظيفة جناين وعربات ملاكي. في بيت المال, السردارية, العرضة,الهاشماب , ماكانت في الحاجات دي وفريق اسحف مثلا والمغاربة وزريبة الكاشف, الركابية , المسالمة, وأحياء كتيرة.
(بنوك الدم) كانت منتشرة في فنقر وتامة عتالة موردة القماير العباسية...الخ.

انت يا عم شوقى ماش بعيد مالك ، ما انا القدامك ده زاتو كنت رئيس للمنبر ده سنتين كاملين ،

عاين ليهم هسع بتكاتلوا فى (السلطة) كيف ، وأنا لافى فى زقاقات المنبر شايل لى (بطارية) ولابس لى (سفنجه) كل لون من بلد



لووووووووووووووووووووووول


زى ما ضحكك أخونا حماد ، قلنا نشاغلك شوية يا عمو

يا زول يا زول و لا يا ابليس يا ابليس !!
بعد ما طردوك جايي لي عمك حانف وجيهك اباطك و النجم ، ايد وري و ايد قدام . ما عندك التكتح . زي ما قالوا اهلنا اسود مراح يشوف الرغوه في بولو .
ما كان يا ود اخوي تكلمني من اول لمن كنته المدير بفتحة الميم ، و الناس واقفه صف عاوزه تخش المنبر . كان جبته ليك مية زول و من كل زول نشيل 200 دولار ،100 ليك و 100 لي عمك . كل واحد عشره الف دولار . نقوم ننزل لينا كم ركشه . عمك يشغلهم ليك عباسيه مورده و بالعكس ، خمسه سنين يبقوا خمسين ركشه ، عشره سنين نبني عماره . جايني بعد ما الدحيش اكل العيش .
عمك المستاء شوقي

أســاذ شــوقى،
أولا أنا ما أسحــرك، قول ما شـاء الله..

بعـدين والله كلمـة "ركشه" دى، وســط كلامـك الكلـو زقاقات المسـألمـة وستــات العـرقى والقمـايـر، دا ذكرنى سيــد المـوتـر اللى جا ظهــر فجـأة وســط ممثلين كانـو يمثلـو فى فلم عن القـرون الوسطـى فى جبال هـوليــوود!
أنا طبعـا الركشـة دى ما شفتهـا فى حياتى، لكن مـؤمن بيهـا، لأنـو الناس اللى يتكلمـو عنهـا أصحابى مشــو الســودان وشــافـوهـا، وأنا يثق فيهـم.. وهـم ما بكـذبـوا فى الحاجـات دى.
لكن إستغــربت لما جا إسمهــا على لســانك.. وانت خرجت من الســودان قبالى بسنتسن تلاتـة كدا.
بالمناسبــة، فى واحــد عمنـا هنــا، أول ما استقل الســودان، تانى يـوم مشــى للمطبعــة الحكـوميــة، ووقف هناك.. لحـد ما طبعـوا الجـوازات.. وأول جـواز طلـع، قام طابقـوا ليك، وللمطـار طـوالى..

الرجل الموسوعة شوقى بدرى



هذه أول مداخلة فى مواضيعك القيمة


فكنت أقرأ لك وأحفظ بعض المواضيع فى الجهاز


وما دعانى للدخول الآن هو ما ذكرته عن

خالد بن يزيد بن معاوية وعلى حسب علمى انه

بعد وفاة يزيد بويع لمعاوية بن يزيد

ورفض البيعة وتفرغ للعبادة وتوفى بعد فترة

قصيرة بعد ذلك فأرجو منك التأكد والإفادة

والشكر مقدما

عزيزي الابن ود محجوب
انا كل الزمن ده عارف انو ده خالد بن يزيد بن معاويه ، بعد كلامك ده شكيت ، في موسوعة سين و جيم شريف العلمي الطبعه الخامسه 1990 شركة المطبوعات للتوزيع و النشر بيروت لبنان ، المجلد العاشر . تقول انه خالد بن يزيد بن معاويه ، لكن ما عارف ليه عندي احساس انو كلامك ده صح .
شكرا علي الاهتمام
شوقي

طبعا يا ابوالريش انا الركشات دي شفتها عند اهلها في اسيا . و بما ان كل صحباني كانوا عجلاتيه و نقاشين فان تطلعاتهم عادة حافله او بالعدم ركشه . و نسمع بان فلان دلوقت عندو ركشتين و التاني عمل قلاب و الخ . انا بعد الاربعين سنه دي شالوني ختوني في العباسيه بكون عبسنجي اكتر من الباقين . امبارح كنته بتكلم تلفون مع الشاعر التيجاني حاج موسي و كان بقول لي و الله يا شوقي الواحد بتخيلك كانك كنته في العباسيه دي امبارح . و سبب المكالمه منع اعادة طبع احد كتبي بواسطة الرقابه . و الكتاب طبع قبل كم و تلاتين سنه .و قالوا عاوزين يعملوا عاصمة الثقافه !! و عائد هذه الكتب كان من المفروض ان يذهب الي مركز عبدالكريم ميرغني .
و لك التحيه
شوقي