|
كنا نعتقد أن بورداب الرياض رائعين
|
لكنا وجدناهم أروع من الروعة ... شباب يجيدون خَلق الابتسامة وبعثرة الفرح وصياغة الإلفة والمحبة ... ما أروعكم و(ما أحلاكم) وأنتم تنسجون أمسية العريس ود شندي بهجة وعيداً متفرداً وتُلبسونها حُلة زاهية ... ودقاسم ... صديق الموج ... تمبس ... شتات ... إسماعيل وراق ... أحمد حنين ... الصادق خليفة ... حبيب بلدو ... معتصم دفع الله.
شكراً لسودانيزأونلاين وشكراً لطلتكم الأنيقة ونتمنى أن تتكرر اللقاءات بيننا لنحيل ليالي الغربة رغماً عن سأمها وقساوتها وضيقها بهجةً
واحد قال ناس الرياض ديل جو علمونا رقصة القرد ومشوا!!!!
بالمناسبة
Quote: آخر الترتيبات لسفر بورداب الرياض ، تم الاتفاق مع حافلة من النوع الفاخر وموديل حديث جدا لنقلنا إلى موقع الحفل بشكل جماعي |
؟؟؟؟ !!!!
ود قاسم الكلام ده بذكرنا وعود حكومة الجبهة من نوع تمزيق فاتورة القمح وما إلى ذلك
|
|
|
|
|
|
|
|
Re: كنا نعتقد أن بورداب الرياض رائعين (Re: نادر)
|
العريس ود شندي الف الف مبروك وبيت مال وعيال بورداب الشرقية .. وددت لو كنت معكم .. فرحت كثيرا وحزنت اكثر ... اتمنى ان اسمع جديدكم وفرحكم بورداب الرياض الدار داركم والشرقية ازدانت بحضوركم وعقبال ما تحضرو فرح باقي بورداب الشرقية يا رب
| |
|
|
|
|
|
|
Re: كنا نعتقد أن بورداب الرياض رائعين (Re: أم سهى)
|
الرحلة ما بين الرياض والدمام ليست بالقصيرة، تمتد إلى أكثر من خمسمائة كيلو متر، ولكن حينما يتغمسك الشوق إحساساً بلقاء من تهفو إليهم النفوس، تنكسر في هذه الحالة قواعد الحساب والرياضيات فتصير الكيلو مترات بضع سنتمترات، يا له من شوق. سهر وطرب رقص وغناء عرضة هنا وتبشيرة هناك زغرودة خالة جو أسري جميل زاده جمالاً وألقاً المبدع عمار السنوسي غنى كما لم يغن من قبل رقص الجميع، بل خرج البعض من وقاره المعهود بورداب الشرقية أولئك الرائعون. الأصالة والكرم تكسو محياهم هكذا دخلنا في قلوبهم وسكنوا في دواخلنا دون جوازات سفر فهل العشق الأصيل يعرف القيود والحدود لا أعتقد.. لقد غمرتمونا بل أخجلتمونا بطيب لقياكم وكريم إهتمامكم فلكم الشكر مرات ومرات والتحية لك أيها القادم من ديار جعل يا من نسجت خيوطاً من الجمال يلتقى عندها الأحباب
| |
|
|
|
|
|
|
Re: كنا نعتقد أن بورداب الرياض رائعين (Re: صديق الموج)
|
Quote: لكم الود واعفوا لينا كان غلطنا فيكم اصلنا كنا فى ذمتكم مش قالوا الهناى فى ذمة الهنايين.. |
والله مش فارقناكم امس الصباح لكن بالجد اشتقناليكم يا شباب ويا ريت لو كنتم معانا كل يــــوم . لكم كل الود ونفرش لكم قلوبنا فرح ودقاسم الخال.. صديق الموج(ابو الشباب) .. حبيب بلدو .. احمد حنين(المبتهج).. وراق.. ودالشيخ الماسيترو.. شتات يا فردة .. معتصم دفع الله (يا صوااار ) ..الصادق خليفة..تمبس (يا ممسوخ نسيت شنو عندنا !!!!) .... فى انتظاركم ..
مع تحياتى
الشرغوف
| |
|
|
|
|
|
|
Re: كنا نعتقد أن بورداب الرياض رائعين (Re: نادر)
|
محمد الشيخ
لك العتبى حتى ترضى ... لكن حقيقةً كما قلت سابقاً تستحق أن يفرد لك بوست (براك) فقد آنستنا وشرفتنا مع بقية العقد الفريد ... والحق يكفى أن نسميكم(بورداب الرياض) ولا نذكر أسماءكم كأفراد فبترابطكم وصلاتكم الجميلة أصبحتم جسداً واحد يحمل كل أرواحكم العذبة ومعادنكم الأًصيلة ... وسننشئ معاً تحالفاً راسخاً يترجم أهداف هذا الوطن السيبيري السامية إلى واقع محسوس ... وسنحقق كل رؤى وبرامج أم سهى الواعية التي كانت تهدف لخلق مجتمع مترابط في الغربة يخدم قضايا الوطن جنباً إلى جنب مع قضايا المغترب السوداني ...
مرة أخرى شكراً جميلاً بورداب الرياض بدون فرز من حضر ومن لم يحضر فقد مثلكم هؤلاء الأخوة الكرام خير تمثيل ...
كنتي بتطلعي من عينيهم وكتين يفرحوا او يندهشوا أو يفترشوا سواعد بعض أو يتكلموا عن الأرض وسلام العالم وكنت غريب الوجه معذب ما أحلاهم شالوا معاي الهم بالجملة وهتفوا البحر ... البحر ... البحر
| |
|
|
|
|
|
|
Re: كنا نعتقد أن بورداب الرياض رائعين (Re: نادر)
|
قال رايعين قال؟؟
وحاتك يا نادر انا جيت قتا ليهم ياخوانا انا ود شندي ده بعزو
ود قاسم حلف دينو وايمانو اني ما اكرب معاهم الا ادفع قروش وانا طبعا زول ما شغال وظروفي سعبة وبعدين السفنجة ذاتا خلاااااااااااااص قاب قوسين ..
اها ود قاسم اتفسح ليك فيني وقال لي امشي اتشعلق في قطر الخبر ..لكن معانا بدون قرش ما بتركب ولو بقيت نبي..
اها وطبعا لانو زمن الانبياء انتهى .. اخوك مع ود قاسم ما ركب..
اها يا ود شندي غايتو مبروك العرس وفرحتا ليك والله وكان نفسي اجيك وابشر ليك بالسجارة وانطط فوق اهلك واقول ليك ابشر بالخير..
بس ظروفنا لمتنا مع بورداب رحمة ما عندهم
ويجي يقول ليك نادر بورداب الرياض رايعين..
تصدق يا نادر لو ان هناك ما يكفي من الصعود لصنعت لك مثلهم ..
| |
|
|
|
|
|
|
Re: كنا نعتقد أن بورداب الرياض رائعين (Re: نادر)
|
اخواني ناس الشرقية
ما عارفين نقول شنو الأشواق ماسورة مكسورة في بيت عزابة مافيشين
لك كل الود ونأسف للأزعاج ،، اما بخصوص الرحلة ،، العجيبة سوف احكي ليكم شوية شوية من طق طق للسلام عليكم وبعدين ما تنسو صديق الموج نسي سفنجتو عندكم وام حيدر حلفت ما يدخل البيت الأ يمشي يجيب السفنجة او يشتري واحدة جديدة وطبعا صباح الجمعة المحلات كلها مقفولة وبجي راجع اتم ليكم القصة ولحدي ما اجي اتخيلوا يكون الحصل شنو
| |
|
|
|
|
|
|
Re: كنا نعتقد أن بورداب الرياض رائعين (Re: نادر)
|
Quote: ود قاسم : كان اصغر في العمر مما كنت اتخيله .. وكما توقعته كان حكيما جدا
صديق الموج : ظهر اكبر عمرا مما رايته اخر مرة ... وهي سنة |
1987 ...
تنقو انتوا كريمين بى جد حتى فى حكاية الاعمار دى برضوا راعيتوا ودقاسم...يا حبيب ده عمك تنقو انت قريت عنه فى مجلة الصيبان ده كان صاحبه عديل وبعد كلامك ده رسل لى انزار... لو انا قلت ليه يا خال قال حا يقاطعنى عديل كده...دحين حنس لى حبيب بلدو يقبلنى خال والا برضو اصغر...تسلموا يا سمحين....وبعدين ما تنسى حكاية البت الشافت ود قاسم قالت ليه ..يا عمو الرجال الجو للعقد مشو قبيل انت قاعد لى شنو..ولو مكضبتى اسأل احمد حنين،،،،
| |
|
|
|
|
|
|
Re: كنا نعتقد أن بورداب الرياض رائعين (Re: صديق الموج)
|
حقيقة ما بقيتوا لي كلام أقوله أولا التحية والتقدير لكم جمعياً بورداب الشرقية فكلمة كنتم رائعين لا توفيكم حقكم كان اللقاء جميل والضيافة والترحيب أجمل والأجمل من كل ذلك ود شندي العريس وعروسته فادية وما زاد كل ذلك جمالاً عمار السنوسي وصوته الدافئ الذي أشجانا وحلق بنا في سموات الوطن وحط بنا في قلب دار جعل (شندي العظيمة وأهلها الطيبين الذين أشعرونا وكأننا منهم بل أكثر شعرت في لحظة بأننا نحن أهل العرس وهم ضيوف حقيقة كانت ليلة من ليالي ألف ليلة الدعوة مفتوحة لبورداب الشرقية لتشريف الرياض في اي لحظة ونكون سعداء بوجودكم معنا وكلمة شكرا لا تكفي ولا توفي بالله يا تمبس نزل باقي الصور بعد الدبلاج والمنتاج طبعا
| |
|
|
|
|
|
|
Re: كنا نعتقد أن بورداب الرياض رائعين (Re: Habib_bldo)
|
الأخ نادر والإخوة بورداب الشرقية .. تحياتي وسلامي .. هذه المداخلة كنت قد كتبتها في بوست الخال ودقاسم .. فآثرت أن أنقلها هنا مره ثانية .. الجزء الآول .. عند تمام الساعة الرابعة إلا ربع توجهنا تمبس وشتات والعبد لله إلى منزل الخال ودقاسم إستقبلنا الإبن زياد عند الباب وأحضر لنا البارد والشاي ودخلنا معه في دردشة عن الطفولة والشقاوة وحكاوي الزمن الجميل قطعها علينا صوت الخال يا أولاد ما تغشوا الولد دا لسه صغير وبعدها تسالمنا ولم يمر وقت طويل حتى حضر أحمد حنين ومعه ودالموج ولم يكملا سلامهما دخل علينا محمد الشيخ وكم كانت سعادتنا لأننا فعلاً خفنا أن لا يحضر معنا هذه الرحلة ، إسماعيل وراق ومعه الصادق خليفه دخلا علينا و قطعا ونستنا إستعداداً للخروج وعرفنا بأن البقية إعتذروا وقبل توجهنا إتصل علينا حبيب بلدو وذكر لنا بأنه سوف ينتظرنا في محطة ماكس عند النسيم وعندها بدأت الرحلة إلى الدمام وبعد مرور نصف ساعة حصل ما لم نكن نتوقعه سخانة شديدة في ماكينة العربية أدت إلى تعطيلنا ساعة من الزمن ولكن بحمد الله تم تدارك العطل وكانت شهامة السودانيين حاضرة وقتها فقد توقف لنا صاحب شاحنة سوداني أصيل وود بلد أبدأ إستعداده للمساعدة ولم يخيب ظننا فيه وهذا ديل على مرؤتنا وشهامتنا في أي بقعة من العالم شكراً محمد لوقفتك الكريمة والأصيلة . تواصلت الرحلة وتجلي ود الموج بأغاني الحقيقة ومعه إسماعيل وراق فقد إكتشفنا حس موسيقي عالي لود وراق وكانت الضواحي ونجوم الليل أشهدي وأنا أم درمان أغنيات طربنا لها كثيراً وبعدها دخلنا في دور شعر طويل وكذلك لم ينقطع الحوار كعادة البورداب في هذه السانحة فقد كان شتات وأحمد حنين وإسماعيل كعادتهم نقاشات حادة ومناكفات لم تنقطع طوال الرحلة وأخذ محمد الشيخ وتمبس في دور ونسة جانبية لم نسمع لهما حساً . قبل دخولنا كانت الإتصالات ترد إلينا من بورداب الدمام للإطمئنان على سلامة وصلونا فقد كانوا في إنتظارنا على أول المدينة . عمنا تنقو .. نادر .. زورو .. خالد الطيب .. شرغوف .. شكراً عماد ود شندي فقد كانت سانحة طيبة لنا للتعرف على هؤلاء الرائعون عن قرب فكانت أكبر مكاسب رحلتنا هذه فقد غمرونا بكرمهم وأحاطونا بإهتام كبيرأكد لنا أصالة ومعدن هؤلاء الأحباب فكلمة الشكر لا تكفي هنا كانوا معنا حتى لحظة خروجنا من الدمام ، كما لا أنسى أن أشكر الخال محمد بابكر فقد شاركنا فرحتنا وتعرف على بورداب الرياض عن قرب وتمنى لنا التوفيق ولم تمضي عشرة دقائق من مغادرتنا حتى إتصل مطمئناً على الجميع وسير رحلة العودة إلى الرياض . لسه ما تستعجلوا بحكي ليكم الحفلة بي رواقة .. راجع
----------------------------------------------------------------------------------------
الجزء الثاني .. قبل دخولنا لمكان الحفل إنتظرنا الصديق والأستاذ عمار السنوسي وفرقته عند البوابة ودخلنا مجموعة واحدة صافحنا ود شندي ومعه عروسته وهنيناهما على الزواج الميمون وتمنينا لهما حياة زوجية سعيدة . قدم إسماعيل وراق التهنيئة بإسم أسرة سودانيز أون لاين ونيابة عن بورداب الرياض للعريس عماد ود شندي وعروسته و للحضور الكريم وبعدها شدأ الأستاذ عمار بأغنياته الجميلة وتجاوب معها الجميع بالرقص والتصفيق وبورداب الرياض لم يتركوا ساحة الرقص وكانوا يحيطون ود شندي مبتهجين وفرحين ، أحمد حنين ومحمد الشيخ رقصا رقصات خاصة تجاوبنا معها جميعاً والخال ودج قاسم لم يترك أحداً جالساً في مكانه أصر أن نكون بجوار الصديق ودشندي نرقص ونطرب معه ، ودالموج وتمبس ورقصات جانبية شاركمهم كل من شتات والخال محمد بابكر والصادق خليفة وعمك تنقو ونادر وزورو وشرقوف وكنت أنا العبد لله في التصوير " كاميرا مان " ومعي تمبس وشرقوف نتبادل تصوير الحفل الجميل . حبيب بلدو لم نراه إلا في فترات متقطعة فقد كان مع مجموعة من أقربائه في مكان ما داخل الحفل . توقف الحفل لأداء صلاة الصبح وبعدها تواصل لوقت طويل من الزمن ختمها عمار السنوسي بأغنية أودعكم أفارفكم أودع أودع كيف .
عندي أمل يا بورداب الدمام ألاقيكم في أقرب الأوقات .. عمنا تنقو .. شرغوف .. خالد الطيب .. زورو .. نادر .. نسعد بيكم .. ونقضي معاكم أجمل اللحظات ..
دي من عندي أنا طبعاً .. نشوفكم على خير ..
| |
|
|
|
|
|
|
Re: كنا نعتقد أن بورداب الرياض رائعين (Re: معتصم دفع الله)
|
الاخوة الاعزاء
طبعا انا ما زلت نائم من تعب السفر و من مخاواة ناس حنين و من شراب شاي الحاجة فوزية .
اخوتي بورداب الشرقية فردا فردا ما احلى ساعات اللقاء وفي الشرقية وقرب الماكدنولز لقد كنتم رائعين كروعة ذالك المساء الذي جمعنابكم ، اخجلتم تواضعنا بكرمكم الفياض ، لقد غمرتمونا بحنانكم،لم نحس بأننا غرباء عنكم كانت كثير من القواسم المشتركة تجمعنا.
تنقو شخصيته كما توقعتها رجل هاشا باشا مرح كلحن الخميس تحس بأن هنالك كثير من الاشياء تجذبك اليه .
نادر : زول وجيه تحس بهدوء شخصيته ولكن ظهرت الحقيقة في الحفل الرجل كان قمة في الحركة ويبدو انه قد اشبع رغباته في ذلك اليوم المشهود .
زورو : رزين كعادة الانصار ( ما يقوم احمد حنين يشب لي في حلقي)حتى وهو يتمايل فرحا مع المبدع عمار يتمايل بكل وقار .
شرغوف : كاميرا مان ابداع في التصوير وقمة في التركيز و الراجل شكل صياد كويس و الكاميرا تحكي (بدون تعليق).
خالد الطيب :طبعا لم يجلس مكان واحد كان يتنقل هنا وهناك كالنحلة هاج طربا ومرحا في كل فاصل لعمار السنوسي و طبعاكان اكثر اعجابا بالفان القادم من كينيا خال العروس
عمك تنقو : صدقني انا عندما شفتك حسيت بأننا اتقابلنا ولكن لا ادري اين وها انت الحين تقول ذلك ، يا اخي عليك الله ما تشعتف روحي نحن تقابلنا وين ؟
| |
|
|
|
|
|
|
Re: كنا نعتقد أن بورداب الرياض رائعين (Re: معتصم دفع الله)
|
الاخ/ عماد
اولاً الف مبروك، وانشاء الله زي ما بقولوا اهلنا في السودان انشاء الله بيت مال وعيال، وناسف لعدم تمكني من الحضور لكن عزاي انو باقي اخواني موجودين وكانوا حاضرين وممثلينا لينا بالحضور وماعاوزين نعدد، على العموم الف مبروك وانشاء الله نجيكم في السمايات وباقي الافراح التانية وكدا.
الاخوة/ بورداب الرياض
اتقدم اليكم بأعتذار لعدم الحضور وذلك لظروف طارئة وخارجة عن "الكنترول" الارادة ولحدي أخر لحظة أنا ناوي الجية وأسالوا أخونا اسماعيل وراق واخونا معتصم دفع الله ولكن ابت تلك الظروف الا ان تطاردني وتلك البعبع المخيف هادم اللذات ومفرق الجماعات فتقبلوا اعتذاري ولكم العتبى حتى ترضون، فهلا تقبلتم اعتذاري لكم، والمسامح كريم رقم انني حزين جداً لعدم مشاركتي اخي عماد هذه الفرحة وبقيت الاخوان، ولكن عزاي انو الافراح الجاية كثيييييرة انشاء الله ادامها الله حيث أن " ليبيا فتحت" ولن تتوقف المسيرة ... الله يديكم العافية يا أخوان الصدق زي ما قال اخونا نادر لكن اخونا عماد ودشندي كان دايماً المبادر فالرجل يستحق اكثر من ذلك ولا شنو يا بورداب الرياض....
وليد احمد عبد الله
| |
|
|
|
|
|
|
Re: كنا نعتقد أن بورداب الرياض رائعين (Re: نادر)
|
انا عارف نفسي ما محظوظ دايما يفوتني عرس ولقاء ذي دا اكيد انا ما محظوظ قلت شنو يا اخوي ودقاسم Quote: وعقبال لود قاسم ودمحجوب جمعا يا رب ..
قلت جمعاً طيب ما تقول انا واخوي حمزاوي
| |
|
|
|
|
|
|
|