(( الــ SUDANISM ))

1 . لو كنت فاهم اي حاجة ووممكن تفتى فى اي حاجة بدءا من طريقة الحلاقة التمام مرورا باحسن فريق كرة قدم فى العالم انتهاءا بوضع خطة ما تخرش المية لحل مشكلة الشرق الأوسط فى ثواني معدودة .


2 . لو عندك الايمان العميق بقدرتك الكاملة على التحليل المنطقى وربط الأمور مع بعضها للوصول الى نتيجة سليمة لأمر ما .. مثلا مادام فلان من الناس فى رأيو انو الحادث فى دارفور جريمة لكن ما تطهير عرقى معناها الزول ده عنصرى وكوز ومن رجال الأمن المنظمين .


3 . لو ثقتك بنفسك خرافية لدرجة انو كلامك هو دايما الصاح والباقيين الفهمهم شنو فى الحاجات دي ، والثقة دي ممكن تخليك كونك الفاهم الوحيد فى الدنيا تصدر حكمك على فلان بالجهل وعلان بالخيانة وفرتكان بالغباء .


4 . لو عندك صدمة حضارية عنيفة تخليك تؤمن بالديموقراطية ايمان عميق جدا .. بشرط انو تكون الديموقراطية دي فى صالحك ... وطبعا فى وجود الاستعراضات اللغوية والثقافية وكم هائل من المحفوظات والشعارات الممكن تستخدمه ضد اي كوز ما بيتفق معاك فى الرأى .


5 . لو كنت بتقول رأيك فى الدين بكل ـ حرية ـ وفى كل شي فى الدين بما فى ذلك الذات الالهية من حقك كونك ديموقراطى كبير وما كوز ان تبدي رأيك فيه ، ولو زول قال حرام معناها هو كوز رجعى ساى .. ما مشه امريكا عشان يفهم .



6 . لو ما كل زول من حقو يعبر عن رأيو .. لانه ( هو زاتو ما ناقش ابو النوم ) .. وبعدين عاين شكلو كيف .. وشوف دي لابسه كيف خليها تلبس زي الناس وبعدين تتكلم ... باختصار ..( شوف مين بيقول شنو ) .



7 . لو بتجنح عن الموضوع الحقيقى وتتجه للشكليات الماليها علاقة بالموضوع ... زي تكون بتتناقش مع واحد حول موضوع الشريعة الاسلامية مثلا .. فيقول ليك (نظام أفحمك )مايلى ( اصلا انت مسجل فى البورد ده من 2002 وكاتب اقل من 300 موضوع .. بالله اشرح لينا ده معناهو شنو ؟ ) ..؟



8 . لو كنت بتخاطب البعجبوك ـ او العاجبين الناس ـ بسابقة = يا أستاذ .. الاستاذ فلان ......... فى حين انو كلمة استاذ دي كلمة ما ساهلة .. واذكر هنا واحد صديقنا قال لـ"حنان بلوبلو فى حفلة :
بالله يا استاذة غنى لينا اغنية Killing Me Softly ؟



لو كنت بهذا الشكل ......... فانت وللأسف تعانى من مرض الــ SUDANISM المزمن