لاجئ .. ضروري .. لاجئ .. ضروري .. لاجئ .. ضروري .. / نزار فتحي

لاجئ ضروري



لِحافك تُراب ، غُطاك الهوا
سريرك مواجعك ، لياليك سوَا
همومَك أماني
وبويتَك شوارع كل المدن
هدومك ورق من بواقي الشقا
كأنك سماوي
مصاحب النجوم
والسحاب ، والقمر
شرابك اساك وموية المطر
فرايحي وحزايني
ومرّات خيالي
وروحك تعانِد كفاح البَدَن
طريقك رفيقك
خطاويك بترسم دموعك مسافة
خواطرك مسارح
وفيهِن خيولك زمان عربَدَن
دواخلك محارق
مواسم رحلك خلاص ابتَدَن
ثقافتك تقابض بواقي النَفَس
قرايتَك .. مُقرّر بداية النهار
تذاكر ؟
ح تنجح .. تباري الشمس
بتلعب ؟
ح تفشل .. تباري الشمس
كأنك محارب قديم .. منتصر
وداخل في داخل صميم الشتا
مقلَّد في نُصّك سيوف من غَضَب
ونار من إرادتك
مخاوفك حَطَب
سنينك .. دفو
ضياعك بِشِدْ في الثبات العَصَب
مناضل .. مطارَد
بطاقتك : ... بدون
مدينتك : ... مشرّد
وعيلتك : ... أساساً أساسي
ف خطوط التماس والرجوع
وظيفتك: تَجارِي الزمان في خشوع
وعمرَك : سنين من ضيا وإحتراق
رصيدَك : صراخ ، والصدى الجايي ليك
وصاحبَك : صراع بين حقيقة وعشَم
صديقتك : حبيبتك : مجاري الألم
ملامحَك بتظهَر
هي واضحة وخفيّة
هوايتك : سياسي بْتَسيَّس ظروفك
تَكيِّف مواقفك قصاد الوهم
نفسَك .. ابيّة
مُصنَّف في آخِر حدود الشهيّة
مواطن .. مُسالِم
مصيرَك ح تفضل تباري الغيوم
تحلَّق تطارد فصول السنة
وتكتِب بإيدَك
في اول جبينك
لاجئ .. ضروري
مواطن مُسالِم
مثالي .. ومؤقت
وفاقِد هويّة


---------------
الوفي خلّي
نزار فتحي
حتى الآن لم أسمع نداء ربط الأحزمة
حتى الآن لم يحن زمن الإقلاع
حتى الآن مضّيع هوية وقضيةواماني قصيّة وأحلام شجية



أبنوسي

تبلدي

لقد مررت من هنا ( كلاجيء ) من الهجير بوارف هذه الظلال
تسلم

نوارس أبوجهينة في حضرتنا !! ..
يا لفرحتنا وإكتمال شجانا ..
رد الله غربتنا يا ابوجهينة
ومشكور علي مرورك



أبنوسي

الأخ أبنوسي فعلا العمر هو ما قلت

Quote: وعمرَك : سنين من ضيا وإحتراق

لك خالص شكري

تبلدي


والساقية لسة مدورة


اسعد

مدورة يا ابو السعود رغم إنها بتشيل من بحر السراب ..
بس برضو راجينها ..
عزم وعشم ..


أبنوسي

أستاذي أنور الطيب سلامات كتير ومشكور يا سيدي علي حضورك

القصيدة كاتبها أخي وصديقي نزار فتحي يحاول يخطب ود الغربة علّها ترد كل الغايبين ..
ردّ الله غربتنا



لك خالص الود والتقدير لما تكتبون


ابنوسي

Quote: مصيرَك ح تفضل تباري الغيوم تحلَّق تطارد فصول السنة وتكتِب بإيدَك في اول جبينك لاجئ .. ضروري مواطن مُسالِم مثالي .. ومؤقت وفاقِد هويّة

لك التحية يا تبلدي، والقومة لنزار.. "كوبف هوخ" ومعناها بلفظ الألمان "أرفع رأسك"..

استاذي ياسر الشريف
ح أرفع راسي رغم تعب الزاد الشايلنو في سنامنا
أباري الشمس
أجاري النهر
وحتماً إن الله راد نصل وتصل تحاياك لي نزار


ابنوسي

وقصيدة أخرى
من نفس المنهل نزار
وبي نفس الطعم

له امنياتي وشانو وشانا الرجا وشان هناك ما ح نلين لمخالب الغربة الطاشر

________________

مِنْ تاني


حلِّقْ
وداعِب بي جنحاتَك بحر اشواقنا
صحِّي زمان أحلامك تاني
شتِّت فرحك
لملم كل هموم الرحلة
وغنِّي غُناك
أوعك تدفن جوّة الرملة بذور أحزانك
بكرة ح تكبر وتطرح جفوة
وترجع برضو براك .. وحداني
ارفع صوتك
تلقَى الليل
في حضن القمر
ارتاح .. واتدّفَى
وجرحك طاب .. ونزيفك خفَّ
حلِّقْ
وسيب جنحاتك ترقص
وتملا نهارك حُب ..وأماني
ويبدا صباح .. وقصيدة جديدة
تلوِّن بيها ملامح الدفتر
وليهو تضيف احساس ومعاني
ما تتدَارَى
وخلِّي الريح من تحتك تمشي
ومهما يكون ما بتهز نخلَك
وتفضَل إيدك
ماسكة زمام العشق الأصلي
وتفضَل غالي وعالي مكانك
وراكز فينا لحد اللهفة
حلِّقْ
وزيد بالشوق اشواقنا
وأدِّي قلوبنا صَفاك من تاني


__________

أبنوسي

كلام مليعين يا أبو الشباب
صاحبك نشّف ريق قلم الكلام
وانا محتاج لي كوز حبر
أبل جوفي و أجيك


سمح؟؟؟!!!!