حجب سودانيزاولاين له علاقه ببوستات فضائح سودانير

Quote: سلام اتصل بى مسؤول كبير فى سودانير تلفونيا ، وقال لى كفوا عن سودانير اين وطنيتكم ، نحن عارفين نفسنا ما كويسين ، وخطوطنا متدهورة ، لكن ظروف السودان كده ليه انتوا ما تساعدونا بالسكوت بس ، لو السودان بلد كويس وميزانته صاح ليه هاجرتوا كلكم بره ، وقاعدين الما عنده شغله يعملها يشب فى الحيطه القصيره سودانير ، نحن ممكن نقاضيكم عديل كده للتشهير ، واتحملوا مشاكل القضاء ، والتعويضات سوف تكون ملايين الدولارات . اخبرته بانى سوف انشر رسالته هذه لاخوانى فى المنبر ، وده طبعا بعد ما ناقشته فى الشكوى بتاعتهم لينا فى القضاء ، يرد القضاء لنا ما خسرناه خلال عشرون عاما اولا بعدين يحاسبنا على ما كتبناه . عندما اخبرته بانى سوف انشر ما قاله حملنى رساله لاخى دكتور معز قال ليك ( انت تحمل جواز سفر سويدى وما عندك علاقة بالسودان عشان تكتب عنه رجع جوازك السودانى اولا بعدين اكتب عن شىء يخص السودان ) طبعا اختك تعجبك رديت ليك عليه رد فى الصميم ، ود عمى عمر بخيت العوض ما عنده علاقة بالسودان عجبى !!!!!! انا غايتوا كان جابت ليها شكوى وغرامة بالملايين ( ده شعرا ما عندى ليهوا رقبة ) يانى مقطعاه فى مصارينى ، وعرفتوا يا ناس سودانير تشيلوا حقنا وكمان تفطعونا النفس وتحرمونا نقول راينا ونفضفض المغص حقنا مع اخوانا فى المنبر فى حجر راى اكتر من كده ؟؟ ولا رايكم شنو ؟؟ دكتور معز خليها على المنبر موضوع الجريدة خليهوا يا ابوى ، امكن تكون عندنا حصانة هنا عاملها لينا الحبيب بكرى هناك من خابر يا ابوى يبقى فيها بيت اشباح وكده . اكتبوا لى بسرعة اواصل ولا اصم خشمى واقعد . يا حليل القصة حقت شيلة العروس . انا فى انتظار ردكم . صديقتى اشارت على ان اكتب المسؤول باسمه طوالى عشان تطربقوها فى راسه وما يقدر يعمل ليكم مثقال ذرة . ام وضاح

اكاد اجزم بان حجب سودانيز اونىين في السودان قد تم بناء علي مكايدات شخصيه اكثر منها قرار سياسي بالحجب واكثر الجهات ولولة من سودانيزاولاين هذه الايام هي سودانير والبوست الذي قرر ان يدخلها به دكتور المعز الي موسوعة جينيز في التسيب والاهمال وبالناسبه هناك كوادر نظاميه عاليه تعمل في سودانير
اؤكد بان حجب البورد له علاقه بمواضيع سودانير

الأخ عبد الله
شكرا لك ولأم وضاح

لكن الموضوع اكبر يكثير
قالوا الموقع يهدد الأمن الوطني

الموضوع صراحة
دارفــــــــــــــــور

الاخ احمد حنين تحياتي
صدقني الموضوع نقدر نقول عليه اصغر بكثير انها عقلية بعض الصغار وهذا لا يعني ان النظام كبير العقل ولكن انها عقلية من يريد ان تكون الحكايه مستوره
ان ماينشر عن دارفور في صحف الداخل لاينشر ربعه هنا في البورد الناس في السودان تجاوزا حواجز الكبت وفرضوا ارادة الكلام وحريه الكتابه ان ماينشر في الداخل اضعاف ماينشر في الخراج كما وكيفا
انها عقلية الصغار التي لاتريد ان يكشف الناس فضائحاها اكاد اجزم بان الامر متعلق بسودانير وسوف اتحري ايضا لمزيد من التيقن

سوف تظل سودانيز اون لاين عين البسطاء وصوتهم العالى ابى المرجفون
ام رضوا.

اعتقد كما قال الأخ احمد أن الأمر متعلق بدارفور ونقد الحكومة عموماً ياعبدالله .. لقد جاءتنى إشارة تفيد بذلك وقد أوردتها قبل ساعات
فى بوست آخر.. على العموم إذا بقى الموضوع موضوع سودان طير أو غيره حيتعبوا معانا زيادة .. والولولة والجقلبة مابتحلّهم .

نحن لم نتعد على أمن دولة.. نحن نمارس حقا مشروعا في انتقاد مؤسسة سيئة الأداء وتمارس الكبائر الإدارية ولها سمعة سيئة في جميع أرجاء المعمورة..
من تعدى على أمن الدولة هو من شرد اهلها على مطارات المدن وأرصفة الهم والجوع والفقر والمرض.. فليبحثوا عنه إذن بين أروقتهم ولببدأوا بسودان طير هذه,,

الخطوط الجوية السودانية في موسوعة جينس

فلتواصل الكتابة الرائعة والتوثيق يا دكتور معز ..

عادل

اخي عبدالله ...فعلا لا قولا ان ماينشر عن مشكلة دارفور في السودان والعالم اكبر واعمق مما يتناوله الاعضاء هنا ... واناكنت اعتقد ان الامر علاقة له بالمشاكل والمعارك الشخصية بين الاعضاء ولكني الان اميل للاعتقاد بان للامر علاقة بسودان طير وبشخص د. المعز فالرجل دائما ما تعرض للمكايدات والظلم واكيد ان وراء هذا الامر بعض من الصغار عقلا وفكرا ... وحقيقة عقلية الؤاد والقتل واجهاض الاحلام مازالت مسيطرة علي كثير ممن يملكون مقاليد الامور.... تحياتي لبكري ابوبكر وتحياتي لك اخي عبد الله وتحياتي للغالي د. معز
وتعلموا يا اخوتي معني ان يكون النقد هادف ويؤتي اكله من بوست سودان طير ... نقد بالحكمة والكلمة الطيبة الجميلة والابتسامة والضحكة ... بعيد عن السباب والشتائم ... ولو كان عكس ذلك لما اهتم به احد.... اخيرا تحياتي لكل اعضاء سودانيز او لاين ... ومزيد من النقد الهادف

لأ وألف لأ لأرهاب أصحاب الفكر الحر ومن يكتبون عن مشاكل أهلنا المغلوب على أمرهم.لأ للتشكيك فى وطنية العالم والكاتب الأديب الدكتور معز عمر بخيت,والخزى والعار لأولئك الذين أستباحو أعراضنا وشردونا فى المدن والأمصار نلتحف الشمس والبرد والصقيع ومعاناة وهجيرالغربة الموحشة.نحن لسنا عملأ ولسنا خونا نحن سودانين حتى النخاع,جئنا من شوارع وحواري وازقة السودان.عرفنا السودانين فى الملأعب والأندية الرياضية,فى حفلأت الأندية فى الأفراح والأتراح تلأقينا جيل تلو جيل لم نرا ولم نسمع بهؤلأ فمن أين جاءو وأين كانو نريد الأجابة,هل هم شريبو من ذلك النيل الذى أرتوى منه ثوار ومناضلى السودان مثل الأزهرى وزروق ومحجوب وعبدالخالق والشفيع هل هؤلأ قرأو كفاح جيل لأحمد خير المحامى وملأمح من المجتمع السودانى لحسن نجيلة.
ألم تدعو لهم أمهاتهم الدعاء التقليدى عند السيد الحسن الميرغنى والخليفة حسب الرسول ودبدر,هل هؤلأ لم يطلعو على سيرة ومناغب الوطنى الثائر الأمين المهندس نصرالدين السيد الذى زهب من هذه الفانية ولأ يملك منزلآ.أن السير والعبر كثيرة والثورة قادمة أنشاءلله,ورحم الله مكى عباس كما رحم الخطوط الجوية من بعده.

سيف الدين محمد جبريل

عليكم الله يا ناس سودانير .. قبل ما ترفعوا قضية على الموقع .. ورونا دفعتوا تعويضات لى ضحايا طائرة بورتسودان المنكوبة ولا لسة أنتوا في طور التحقيقات..

الأخ عبد الله

بالمناسبة صحف الداخل ممنوعة من تناول
احداث دارفور الأ من وجهة نظر الحكومة
وممنوع تحرك الصحفيين الي دارفور
وكل اخبار دارفور تحصل عليه الصحف من smc
ولذا الأخبار ،، يتم السيطرة عليها
قبل وبعد الطبع
اما ما تقوم به سودانيز من عرض صور واشرطة
فيديو للمأساة وبيانات حركتي دارفور
العدل والمساواة وجيش التحرير
هو المقصود بالحظر والمنع
وعدم قراءته في الداخل
اما صحف الداخل فكلها قد تم تدجينها
ومنعها من الخوض في الأمر

وفي دارفور
كان الجوع يستشري
وصدر جنوبنا يحرق
وعند الشرق أمراض
وبؤس قاتم أزرق
وصوت الحق مخنوق
وشعب بائس يغرق
ولا ربان ينقذه
ولا مجداف أو زورق
سواك الآن يا مولاي
يا قديسنا الأحمق

(من قصيدة عذاب القبر في الخرطوم)
د. معز عمر بخيت 1984م

وما زال العرض مستمرا..
الشكر لكم جميعا