شـواكيــش .. جامعيــة .. !

كلية طب الأسنان
لمن يحصل تسوس بالشكل ده في حياتنا يا منال...لازم نقلع اسباب التسوس من جذوره... التخدير الموضعي لآلمنا ما بحل المشكلة...ومحاولة التقويم فشلت معاكي للاسف..ودايما بتركبي لي ضرس ما ضرسك..عشان كده الجسر امتد وزاد بيناتنا ...وقدر ما حركت فكي معاكي برضو مصرة تجيبي لي التهاب في اللثة ...انتي بقيتي حشوة مؤقتة لقلبي وانا محتاج حشوة دااااااااااااااايمة

كلية علوم التغذية
منال انتي سببتي لي تسمم في حياتي ..وعلاقتنا دي ناقصة فايتمين.. ولازم تنتهي لأنو الاستمرار فيها غير صحي على الاطلاق
وبعدين انا زهجت من المحاولات الفاشلة لتعقيم علاقتنا.. و زهجت من تطهيرك لجروحي القديمة...وبقى عندي عسر في هضم شخصيتك...حتى شهيتي للونسة مع البنات اتسدت
كفانا مواد حافظة يا دي

كلية هندسة الجينات
منال...انتي عارفة انو جيناتك هي السبب؟!!...ضعف المناعة العاطفي موروث في عيلتك.. أنا آسف بس أحماضنا النووية ما بتتفق ولازم نتحلل....وكلو كروموسوماية تمشي جهة
وكلو نواة تطلع خليته

كلية علوم الطيران
منال...يؤسفني اقول ليكي اني دقيت ليكي خروج نهائي من حياتي...اعمل شنو ياخ؟...انتي عارفة انو مكنة الحب بتخرب عاجلا ام آجلا..وبعدين انا زول درجة اولى وانتي يا دااااااااااب درجة الأفق
انا وانتي طيارتنا وررررررررر اقلعت ...ما تخلينا نهبط هبوط اضطراري برة مدرجات الحياة

كلية الموسيقى و المسرح و الدراما " ناس تماضر "
اسمعيني يا منال انا بحبك مووووووووووووت ومتمني أعرسك الليلة قبل بكرة...اها نمشي نشتري الشبكة متين؟
رأيك شنو في الدور ده؟...ما انفع ممثل يا منال؟
اسمعيني يا منال...بصراحة السيناريو بتاع حبنا ده فيهو خروج عن النص...حياتنا بقت نشاز...وانا بفتكر اننا لازم نفكر في الحوارات البتدور بيناتنا على مسرح الواقع.... ولازم نعزف عزف انفرادي كلو واحد براااااااااااااااهو.. فهمتيني مش؟؟
هاااااا؟؟...لأ المرة دي انا جاااااااااااااااااااادي....تمثيل شنو يا دي؟
ما تفهمي ياااااااااااخ ..الا ألحن ليك كلامي ده ؟

كلية هندسة الاتصالات
بصراحة يا منال انا كنت قايلك في السلك...لاكين طلعتي موبايل بلا بطارية... انا وانتي لازم نقطع اتصالاتنا ببعض..انتي مرات مشغولة...ودايما مقطوعة ..المسافات بيناتنا زادت..ومشاعرنا بقت مشوشة لأنو عواطفنا للأسف بقت لاسلكية
ياخي باختصار...حبنا طلع برة الشبكة

كلية الهندسة الزراعية
عارفة يا منال؟...الحب ده بذرة دايرة ليها تربة ممتازة...وموية نضيفة...واضاءة كافية شان تنمو...وانت للأسف تربتك ما نضيفة وماااااااااااااااالحة تب... و مويتك ما ارتوازية....وكان لازم نحصد الفشل في علاقتنا دي..خلينا من التفرع في المواضيع الغير مورقة....علاقتنا اصيبت باليرقات وانتي للأسف استخدمتي المبيدات العاطفية من غير ما تكلميني..بعدين بصراحة انا خايف انو براعمنا في المستقبل يطلعو زيك كدا

كلية علم البصريات
منال انتي عارفة اني زول عندي بعد نظر..وشايف اننا ما بننفع لبعض...اقول ليكي أنا ما قادر اكمل.. حاكتب كلامي على ورقة...ركزي معاي وحاولي تقري الحروف دي
I

H
A
T
E

U
أها غمضي العين الشمال...وافتحي اليمين...قريتيها؟ ...... كلك نظر يا منال ..

كلية علم الكيمياء
عارفة يا منال...المشكلة ومافيها انو حصل ركود لمشاعرنا....والاسعار العاطفية انخفضت...حتى أسهم القلب بقت بمعدل سهم واحد لكل 100 نبضة....وبعدين البضاعة العاطفية ما لعبة ياااااااااااخ
انتي مش عارفة انك حسب قانون العرض
والطلب لمن تزيدي في كمية الحنان ممكن يحصل نقصان في سعر العاطفة؟

كلية الآداب قسم علم الآثار
منال اسمحي لي انك تحفة مزيفة...الجكس كلهم تحف عتيقه و نادرة الا انتي.. ما عندك غير فك الرموز بالطريقة التعجبك...تنقبي عن المشاكل تنقيب...وبعدين انا وانت اساسا حضاراتنا مختلفة من البداية...وافتكر حقو ندفن البيناتنا بعد ده.... هووووووووووي مالك بتعايني لي كدا...ما فهمتي؟...ليــــــــــــه أنا بتكلم لغة مسمارية ولا شنو؟...شنو لعنة الفراعنة الانا اتبليت بيها دي

كلية الفيزياء قسم العلوم الفلكية
اسمعي يا منال انتي ما لاحظتي انو سنتنا الضوئية مرت بسرعة؟
يا بت الحلال الشمس والقمر ما بتلاقو في سما وااااااااحدة...يعني
باختصار نجم حبنا أفل... وبعدين انا كنت قايلك مجرة مختلفة عن باقي المجرات...كنت قايل ما ليك زي في الكون...طلعتي ثقب اسود في حياتي...وانا بالشكل ده ح الف معاك مدارات الحياة من غير اي هدف
أفتكر كلامي واضح وضوح كوكب الزهرة الساعة 4 الفجر

كلية علوم البحار
اسمعي هنا ده... مركب فيهو قبطانين بغرق أديــــــــــــــــــــــــــــــــــــــــــــــــل كدة...وبعدين انتي ما ملاحظة اننا دايما ماشين عكس التيار؟...وانو أمواج الحياة بترزع في مركبنا ده يمين وشمال من غير اي سبب...انت ليــــــــــــــــــــــه مصرة تغرقيني معاك يا منال؟... ياخي انا زهجت من المد والجزر الحاصل لي بسببك
يلا بعد ده نزلي شراعك من حياتي ...واقطعي خطافك عني
البحر ملاااااااااااااااان اسماك

الغالي حميدة بوست في السلك
قرات امس مقال في احدى الصحف يقول ان العلاقة الجامعية لا تصلح للزواج
لسببين الأول ان الجامعه للدراسة
والتاني .. اعتبار ان الطلاب يهربون من زحمة المحاضرات للاجواء الرومانسية
هكذا هو رأي الكاتب
يا ترى حل كلامة صح؟

Quote: لسببين الأول ان الجامعه للدراسة والتاني .. اعتبار ان الطلاب يهربون من زحمة المحاضرات للاجواء الرومانسية

طبعا .. للدراسة ..
دا الغرض الظاهر ..
لكن طبعا ما دراسة بحتة ..
صداقات البني آدم اغلبها بتكون من محيط الجامعة ..
خصوصا في السودان .. لانه بنقعد في الجامعة 25 ساعة في اليوم ..
اما مسألة المحاضرات ووالدكوك ..
فيها مسألة نسبية بتتفاوت من شخص لتاني ..
عندي صاحبنا .. قدر ما نحنسه يدك ليهو محاضرة ..
ما برضا .. غايتو قعد في الجامعة ستة سنوات ..

وطبعا اغلب العلاقات ما بتنجح ..
لانه كل واحد بكون أمه الصباح مدياهو المصروف ..
ومافي مسئولية ..
حتقول لي ليه ما ابوه البديهو المصروف ..
اقول ليك الابو .. مغترب ..

سلام،،

حميده .. صباحك زين

ؤ طيب ناس جامعة الرباط الوطني ؟؟


أكتر واحدة عجبتني حقت ناس البصريات
I

h
a
t
e

u

ألأخ / حمـــيده


تحيـــاتى و اشواقى أنت عارف أنا أتكيفتا منك شديد

عارف ليه ؟؟

لأنك أديت منـــال شاكوش من النوع أبو كديس ولا أعتقد

انك حتضعف و تعيد المياه لمجاريها لأنو بنات حــواء

مويه تحت تبن اوووووع تاكل راسك بكلمتين حلوات و تقوم

تبيع القضية أنا عارفك بطل .

الجميل حميدة
مسكينة البت منال دي ... اتخيل والله حنيت عيها
كافي البلا محل ماتمشي تشوكش ...ياخ خليها مرة واحدة تشوكش هي
ولا دا انحياز جندري
والريد نيلين

Quote: ولا دا انحياز جندري

دي حقوق المرأة .. يا زوربا ..
ما لازم يجربوهو كلو ..
لازم نبدل المواقع ..

والله يا عوض الله الفولانى
منال .. ما بستاهل ..

حميدة الشاكوش وقع في راسك ولا راس منال ... اصدقنا القول

* * * *
tolowss

والله .. يا تولوس ..
انا ومنال .. حاجة واحدة ..
ما فرقت ..

Quote: طيب ناس جامعة الرباط الوطني

والله يا مأمون ديل ..
جايين مشكوكشين من منازلهم ..

وحقت البصريات دي .. ما تبقا عليك ..
loooooooooooooooooooooooooooooool

زروبا...
knockwood

والله خطفتها من لساني.. منال.. كُر علي .. ما تستاهل..

حُميدة.. شكراً على البوست الظريف..


بنت الحسين

بت الحسين .. بت القبايل ..
ما نفسك في شاكوش .. !

حمــــــــــــــيدة



سلام


أنا حاغير لى الجــــــــــــــــــــــاحة بتاعتى الكلية البتقرا فيهاأصـــــــــــها خطرة شوية


فهمت حاجة

ناجي ..
اوعه تكون بتقرأ في مدرعات الشجرة .. !

حميده إزيك
.. قلنا نجاملك في بوستك.. بقيت تجدّع بي الحجار.. ما دايره شاكوش.. ليه، شكلك ماخد كتير وقاعد توزع في الفائض؟





بنت الحسين

والله يا بت الحسين .. فليق سااااااي ..
ياخي الجبهة الا تعملي ليها سمكرة ..