Post: #1
Title: وصيه أم نجيضة لإبنتها
Author: Mamoun Zain
Date: 07-01-2004, 03:08 PM
وصيه أم نجيضة لإبنتها
يا بت هوي فتحي عينك و ابقي نجيضة وفالحة..... قدر ما اجي داخله عليكم القاكي .... هي هي هي .... و قر قر قر ..... تضحكي مع عبد الله دا.... الراجل ما تضحكي لو كتير..... يسعالني الله يحقر بك....الراجل اديهو العين الحمرا.... وان قدرتي لعند ايدك تلحقيها ليهو لحقيها...ابقي نجيضة.....أ ية..... زي امك.....الله بسعلني وقت ابوكي يقول حاجة تضحك.... امشي اتحشر في الاوضة واضحك زين واجي مارقة صارة وشي.....و بعدين اوعك ثم اوعك ثم ايضا اوعك... تقولي لو الجلابية دي سمحة والله العمه اللابسها دي سمحة... نفسو تقوم تعجبو يعرس فوقك.... وبعدين تشربي ما تروي....وأكربيـهو بالطلبات.... اوعي تخلي لك قرش يبيت في جيبو...واوعك تخليهو يشوف المسلسلات.... بيخربن الرجال.... وقت المسلسل داك.... شفتي جيبي فندكك...واقعدي دقي أي حاجة جنبو ويا ريت لوكانت شطة... وله كان عندك شافع بيرضع وجيعان وبيبكي خليهو في بكاءهو داك لمن المسلسل ينتهي....وبعدين ما يجي داخل يلقاكي تغني ......حتى ان بقيتي دايرة تغني.... اوعك من الغنا الخايس ناس حبيبي حبيبي.... امسكي في الغنا الحار...... زي البيجري نسيبتو و مرتو طلقانة......وله اندب حظي ام امالي...... وله دفاعنا الشعبي ياهو ديل.....وله النار ولعت بقلبي بطفيها..... اااااااااااي.... عشان تربي لو الزلعة .....والخلعة....بس اوعك تغني لو الليلة يوم الرجال.... بيقوم يصدق و يتحنفش فوقك ساكت........ واوعك تشكري لو حاجة جابها.... ان جاب لك لحم.... خُتي ايدك فوق راسك...وقولي لو وب علي وب علي وب علي....غشوك وادوك الجلافيط.....وان جاب لك فتيل ريحة...اول ما تفتحيهو... وتشميهو.... طوالي كشري وقبلي غادي وابصقي..... وقول لي لو..... دا شنو يا عبدالله؟...... الريحةالمتل ريحة الفسيخ دي جايبها من وين؟......غايتو انت مغستك تقد.......
وان جنك نسوان وله بنات....ما تخليهو يقعد وسطن....ويتونس.... طيريهو من البيت....وان ابى يمرق... قدر مايقولو نكته والله يخفف دمو قدامن صري ليهو وشيك.... وقول لي لو انت يا عبد الله ما عندك غير النكتة دي؟ يا خي عملت لنا بها وجع.وش......اصلهم الرجال عارفاهم... الواحد فيهم من يشوفلو لمت بنات يقعد يخفف في دمو ويعمل فيها ودنفاش.....وتلقيهو يضحك بلا سبب... حتى ان واحدة قحت ساكت ... يقعد يضحك ويصفق اديهو....واوعك تخليهو معاهن وتدخلي المطبخ تسوي لك شربات...... وحات الله بنات الزمن دا ان غفلت من راجلك دقيقة بس تلقيها عرستو
|
Post: #2
Title: Re: وصيه أم نجيضة لإبنتها
Author: Salwa Seyam
Date: 07-02-2004, 04:16 PM
Parent: #1
مامون دى وصية ام نكدية...إرهابية
|
Post: #3
Title: Re: وصيه أم نجيضة لإبنتها
Author: almulaomar
Date: 12-12-2004, 06:11 AM
Parent: #1
يا مامون أوعك تقول لي البت دقست وعملت بي كلام أمها موضوع الوصيه
|
|