معلبات التهم الجاهزة في بقالة البورد

فى بقالات الاحزاب و الحكومات السودانية الكثير من التهم الجاهزة للإلتصاق بأى فرد فى حالة تعارض فكره مع النظام او الحزب
الزول ده طابور خامس
جبهجي او كوز
شيوعي

هل نحن هنا افتتحنا بقالة من هذا النوع لنقوم بالصاق التهم بالآخرين ؟
ماهو مفهومك لمعارضة ؟ الانظمة , الاحزاب , افكار المثقفين المستحدثين و ما الي آخره
مع احتفاظك لوطنيتك


الموضوع للمناقشة و اكتساب افكار وليس للونسة و الاستهتار

الاخت صفا ..
نظرية المعاي معاي ..
والما معاي ضدي ..
والكل في دائرة الخونة ..
حسب رؤية كل واحد ..
ومن خارج دائرة الضوء ..
وبنظرة للاحزاب عموما ..
المتوالي والغير متوالي ..
لا تجد من يقدم نموذج جازب ..
وخصوصا لفئة الشباب ..
فأفتقدت أغلب الاحزاب القاعدة الجماهيرية ..
وذلك للمارسة الخاطئة ..
وكيل التهم .. للطرف الآخر ..
بدون سند .. يحترم العقل ..
ويفترض أن كل من تكلم .. وامتلك ملكة تطويع الحرف ..
ان يكون ما قاله .. لا يأتيه الباطل ..
وغير قابل للنقاش ..
فأذا ناقشت ..
فأنت ذو مآرب آخري ..
والكثير من النعوت .. التي تجود بها لغتنا العربية ..
لذلك كانت النتيجة .. كما تري ..
والواقع خير شاهد ..

المشكلة ان السوداني لم يتربي في بيته علي ان الاخر قد يكون صحيحا او افضل
كنت قبل غربتي اظن ان الشعب السوداني هو شعب الله المختار

بعد الغربة واحتكاكي بجنسيات اخري

رايت اننا نقبع في الذيل ..والمشكلة اننا لا ندري واحياننا نكابر

يا صفاء فى بقالتكم دى ما بلقى لى نص كيلو ايدولوجية وجوز كيزان المونيوم وحبة ظلامية وكيلو شيوعيين من النوع الأصلى


لأنى لفيت المنابر كلها ما لقيتها


البوست فعلا يا صفاء جميل ومعبر

الاخت صفاء

طبعا انتي اتصنفتي خلاص:
كوزة وظلامية وبتاعة انقاذ وطريقة ليك ما في؛
وحتي طرحة الكوزات لبسوك ليها !!

حقيقة هذه مشكلة عويصة؛ لا تتيح اي حوار منطقي..
الرجاء مراجعة هذا البوست ففيه بعض الافكار القريبة

تقدميين ورجعيين؛ كيزان وشيوعيين

عادل

السلام _ استاذه صفاء _

موضوع جميل _ لا اميل لا تهام اشخاص بانتسابهم الي جهات بعيهنا فقط من خلال الكتابه هنا. في ظني ان هذا الامر لا يقدم شئ ذو فائده _ واذا نظرنا مليا في اهداف اقامه منبر _ كهذا _ سوف نري الاهداف الاساسيه هي تناول موضوعات تهم _ السودان _ كبلد _ وشعب _ ولكن وفق اسس معينه _ اولا _ بالنسبه لي _ موضوع الحكومه وتسليمها للسطه والتنازل عنها _ موضوع اساسي _ يجب التركيز عليه من الكل _

سوف اعود لا حقا لاكمال المداخله _ وشكرا مره اخري علي البوست _
دوما _ محب ..


معزره استاذه صفاء _ لا استطيع الايفاء بالعهد ولا استطيع العوده لاحقا من اجل اتمام ما انقطع من مداخلتي _ مشغول ببوست _الدين_ واكتفي بالقدر الذي قلته في المداخله اعلاه والي اللقاء في حوار اخر حول موضوع اخر ..

safa
اولا اهلا بيك وانت من قدماء المحاربين فى المنبر واستدليت من ذالك بقراءة ملفك .وبما انك من اهل البيت القدام فلك كثير السلام.
اما عن معلبات التهم فيمكن اعتبارها ثقافة سودانية مؤصلة للاسف الشديد اذا رجعناكلنا بالزاكرة للوراء لوجدنا هذه المعلبات كانت متداولة فى الونسات التى غالبا من تختلط بالسياسة وكذالك فى مراحل الدارسة ما ان تحدث مشكلة بين زيد وعبيد وفى حالة انهزام عبيد على طول زيد يتهمه بأنه (كوز - شيوعى - امنجى- ) عليه ارى ان هذه المعلبات اصبحت جزءا من تقافتنا السودانية .
تحياتى

تحية للأخوة وشكراً لكاتبة البوست .
الموضوع يستاهل النظر إليه بعمق والبحث في أسبابة ودواعية، وكما ذكر أحد الأخوة أنه أرث للعمل السياسي للأحزاب، وهو أيضاً أحد أهم الأسباب التي أدت لأن نفقد الديمقراطية ثلاثة مرات وتعبنافي أن نحصل عليها للمرة الرابعة .
لا أريد أن أكون أحد مسوقي المعلبات التي ذكرتها الأخت صفا، ولكن الحقيقة أن هذه الظاهرة بدات في العمل السياسي في الجامعات والمعاهد، عندما أتخذت التنظيمات السياسية سياسة الغواصات أو ما يعرف بالكوارد السرية المندسية في تنظمات أخري، وأخذت هذه التنظيمات من التهم الجاهزة وسيلة للإستقطاب والإستعداء أيضاً، والغريب أن هذه التنظيمات أوجدت مبررات أخلاقية لعملها هذا، بل الأدهي أن بعضهم أوجد مبررات دينية محاولاً أن يوجد فتوى بجوازه. ومهما كان الأمر فإن المنطق يقول بأن هذه المعلبات مرفوضة من الدين والعرف وكريم الأخلاق، وهي أدني مستوى الأنحطاط البشري .
وإن كانت مثل هذه المعلبات تسوق في بعض الأحيان في هذا المنبر، فأعتقد أنها تصدر من حالات ضعف، وفقر للمنطق والحجة يحاول بها الأخرون أزاحة البعض عن الطريق، وأشيد هنا بمجهودات الأخ عادل عبد العاطي في تعاطية لمثل هذه الظاهرة، وأتمنى أن يصبح الحوار الفكري الجاد ديدن هذا المنبر الرائع، والكلمة الصادقة دوماً هي سلاح الأقوياالقادر على مجابهة مثل هذه المعلبات الفاسدة .

صفا.

ما هي المشكلة في وصفك بأنك كوزة؟

الناس وصفوك بالكوزنة لأنك بتدافعي على حكومة الكيزان بكل قوة, فما هي المشكلة هنا؟
ولا خلاص كلمة كوز ولا كوزة دي بقت شتيمة حارة؟

دينق.

سلام يا صفاء وينك انت؟ طولتى ما ظاهرة

الكلمات

امنجى, جنجويد, ظلامى.. منبت. كوز.تائب. بيته زجاجى
وطبعا فى واحدات كدا لزوم حياء لا يمكن كتابتها

والله يا كوستاوي ..
انا ما عارف سبب نزول .. الصورة ..
يعني المغزي شنو ..
اخوك مخه تخين .. بالليل ..
واتخيل لي الصورة تركيب ..
يعني ملبسنها الخمار .. رجالة ..
بأحد برامج التصميم ..
اتخيل لي فوتو شوب ..
ولا ما كدا ..
اعملها ابيض واسود ..
ما بتظهر الفروقات في اللون ..
وبتظبط معاك كويس ..

كوستاوي
كده حيقولو ظلامية
خليها منووووووورة أحسن

الكوزة صفاء.

ذي ما اسمك صفا، من دون دي ماتكون مشكلة، فكونك كوزة مامفروض تكون فيها مشكلة، الا للكيزان.

فالماعايز ينادو باسم توجهو الفكري ككوز، يرفع ايدو من الكوزنة، وحينها نرفع ايدنا منو.

بالعدم انا كمال بشاشا اعلنتها حربا علي الكيزان الي ان يقولوا الروب عديل كده!

اما البتحججو بالديمقراطية فما عارفين معناها ذاتو!

كل البتضمنو ليك الديمقراطية هو حق التعبير والتنظيم الي اخره.

الكيزان من حقهم يعبروا عن رايهم زينا، رغم انهم لايؤمنو باي حق للاخرين، ويسعون في المنبر ده لطرد خصومهم وارهابهم حتي بالقتل.

فيا كيزان بطلو جرسة او حي علي النزال.

شوف الكلام دا سمح كيف

Quote: اما البتحججو بالديمقراطية فما عارفين معناها ذاتو! كل البتضمنو ليك الديمقراطية هو حق التعبير والتنظيم الي اخره.

وشوف الكلام دا اشتر كيف

Quote: الكيزان من حقهم يعبروا عن رايهم زينا، رغم انهم لايؤمنو باي حق للاخرين، ويسعون في المنبر ده لطرد خصومهم وارهابهم حتي بالقتل. فيا كيزان بطلو جرسة او حي علي النزال.

سبحان الله يا بشاشة بقى عندى ايمان قاطع انك
two in one
(واحد اسمه (بشا) و التانى (شة

دكتورة بيان

اذا كلامي ماواضح، مسؤليتي اوضحو ليكي.

مرة تانية من حق الكيزان يتنظمو او يعبرو عن رايهم. وبي نفس الطريقة من حقي اعبر عن راي. مافي شكل ولا قالب محدد ولا كلام محدد متفق عليه هنا.

فالكوز لمان يدافع عن النظام، ده من حقو. حتي لمان يعلن الجهاد علي رودا، ولا يكفر بشاشا ده حقو.

ده المقصود بالنزال او الدواس الفكري. علاقتي بالكيزان علاقة صراع فكري يتطور الي حرب عديل كده، في حالات التجريدة، لطرد الموناليزا ولا ارهاب تماضر.

ده كلو يندرج تحت حرية التعبير. فالمشكلة وين؟

شكرا ليك اخى بشاشة
الكلام وضح تب

لما تكتب تانى راعى الفروق الفردية بين الناس عشان رسالتك تصل..
من غير تشويش..خاصة للناس الما كيسين ولا فطنين ذى حالتنا..

ممكن سؤال تانى؟

من هو الكوز فى تعريفك؟

أعتقد أن الديمقراطية الى الأن لم تمارس بشكلها الذى أشتقت منها الكلمة(ديمقرأطية) على مستوى العالم أجمع.فالديمقرأطية شأن ليس بالسهل فى ذات الحين اذ ما أردنا ان نعرف الديمقراطية بقير تسميتها التاريخية والأكاديمية,فأعتقد أن الديمقرأطية نار ونور فى آن واحد,لذلك يجب أن نؤمن بهذه الحقيقة ونعيشها كوأقع ثقافى وفكرى ونجسدها فى ممارستنا اليومية من البيت والشارع والمدرسة,بمعنى أن نعترف بالأخرين مهما كانو يحملون من أفكار وهذا يقودنا لمسألة شائكة الأ وهى مسألة الدين والسياسة حيث هنالك الكثير من القيبيات التى لأ تتوأفق مع العلم من ما يعقد من مسألة الديمقرأطية وتطوره.فهل يعقل أن يأخذ النقاش قرون ودهور فى !هل يحق للمرأة أن تصبح قاضى ام لأ! وهنالك الكثير من الأفكار التى تقف عثرة فى تطور وبناء الديمقرأطية بشكلها الأمثل,وللحديث بقية.

دكتورة بيان

الكوزنة عندي حالة ذهنية او نمط تفكير. اساسو هوس ديني ناتج من فهم للدين وافد ودخيل علي قيمنا الروحية كسودانيين المشبعة بالتسامح.

الفارق الاساسي مابين الاتنين يتلخص في نزوع المهووس للتطفل منتهكا حرمة وقداسة علاقة المخلوق بخالقه. من دون تنظير كتير في دنقلا، بخلاف اولياء امرك واهل بيتك، لايتجرأ احد بالتدخل في علاقة الغير بخالقه علي الاطلاق.

والفرد العادي ينفر بشدة من ممثلي الاسلام السياسي كنموذج غريب عليهم بتشددو.

الكوزنة او الهوس الديي او الاسلام السياسي، يجسد طرح الثقافة العربية للدين، بينما التصوف يمثل اساس الثقافة السودانية بل اساس تركيبة الشخصية السودانية نفسها!

بذلك الكوزنة تمثل احدي اعراض حالتنا المرضية المتمثلة في فقدان الهوية!

بشاشة
الله يقطعنى حتت ويحت اهلى حت البرم كان فهمتك.. شوية شوية على
اصلا الاسلام ثقافتو هى الاسلام جاية من القرآن والسنة المطهرة انتشر فى كل المجتمعات بأختلاف لغاتها وعدل فى الاعراف السائدة اكد على القيم الجيدة.. و مسح القيم السيئة واحلها بقيم جديدة عالية

Quote: الفارق الاساسي مابين الاتنين يتلخص في نزوع المهووس للتطفل منتهكا حرمة وقداسة علاقة المخلوق بخالقه. من دون تنظير كتير في دنقلا، بخلاف اولياء امرك واهل بيتك، لايتجرأ احد بالتدخل في علاقة الغير بخالقه علي الاطلاق.

هل انت تقصد تاريخيا ام حاليا؟

Quote: بذلك الكوزنة تمثل احدي اعراض حالتنا المرضية المتمثلة في فقدان الهوية

ياتو هوية هويتنا النوبيةام هويتنا الزنجية العربية؟

بالله خطوة خطوة عشان الفروق الفدرية وكدا باقى انا غبية شديد

المشتركين و المشاركات البيت محروس وستو تكوس

حميدة

اساسي ,, يعني شعب الله المحتار فاقد الافكار ؟ كلامك فيه شئ من الصدق المشكلة البقنع الديك منو ؟

يازولyazoalيازول ,, طلباتك متوفرة بس خش اي بوست واقطع زي ما عاوز

عبد العاطي
محب
بلدى يا حبوب
حامد علي
دينق
كستاوي ... مابسالك
بيان ,, وينك يابيان ليك وحشة ,,ما بتتفقي معاي دائما يتحول الحديث عن الاشخاص بالبورد و مناقشة الاشخاص وليس ما يطرحونه من افكار او آراء ؟؟

كبسيبة

بشاشة
سيف الدين

أراء جيدة, و تفسيرات مفيدة, و مناقشة مثرية, و تبادل أفكار اشكركم كثيرا وبيجيكم بعدين للتعليق اكثر اصلي مشغولة شوية

Quote: كستاوي ... مابسالك

What did I do

اصلا الاسلام ثقافتو هى الاسلام جاية من القرآن والسنة المطهرة انتشر فى كل المجتمعات بأختلاف لغاتها.

دكتورة بيان.

اولا سلامتك، والكيزان كلهم كرامتك، قولي امين!

بالنسبة لي مافي حاجة اسمها الثقافة الاسلامية بالالف واللام، خارج اركان الاسلام الخمسة. عشان كده طالبنا بي تقرير مصير اسلامي!

ياستي وبما انو ربنا جعلنا شعوب او قبائل، فلن ارضي ان تفرض علينا قيم الاخرين كدين، خارج الاركان الخمسة.

فذي ماقال الامام المهدي، هم رجال او نحن رجال! لهم فهمهم المستنبط من واقعهم، للاسلام، ولنا فهمنا!

الاسلام واحد نعم، لكن الفهم متعدد، حتي داخل مدرسة الاسلام السياسي الواحدة، كما مجسد اضراب الترابي داخل سجن الشريعة نفسها، بينما علي عثمان خالف رجل في التاني، في قصر الشريعة!

اذا ده حاصل ليه مصرين تفرضوا قيم البداوة العربية الدفنت المرأة حية، كدين علي مجتمع المرأة جسدت معاني الالوهية ذاتها في ثقافتو يوم من الايام؟

فلو الرقص محرم في اسلام الثقافة العربية، فالرقص شعيرة كما الصلاة ووسيلة تعبد في اسلام الثقافة الافريقية في السودان!

ياتو هوية هويتنا النوبية ام هويتنا الزنجية العربية؟

يادكتورة ما الكلام في سؤلاك ذاتو، كابلغ علي ازمة الهوية المتجذرة فينا!

الهوية ذي البصمة واحدة، او ابدا مامتعددة! التعدد دليل علي انفصام الشخصية كmultiple personality disorder
في الاول شيلي كلمة عربي او عربية برة خالص، لانو مافي شئ عربي "يذكر" في هويتنا الافريقية. اما ذنجي في اللغة لاتعني شئ خلاف سودان او Black، عشان ما نغرق في شبر موية!

اذكري الاجناس كلها ثلاثة لمان توزعي السودان براهو لي اربعة فالرابع ده من وين؟

فالنوبي والزنجي جنس واحد Blackوثقافة واحدة "افريقية" من قامت الدنيا!