عجوز في الثمانين تدفع خمسة مليون ريال لمن يتزوجها

اول الحكي
وأنا كالطـفـــلة في يديه كالـريشة تحملها النسمات
يهديني شمسا يهديني صيفا وقطيع السنونـوات
يخبرني أني تحـفته وأساوي آلاف الـنجـمات
وبأني كنز وبأني أجمل ماشاهد من لوحـات
يروي أشياء تدوخني تنسيني المرقص والخطوات
كلمات تقلب تايخي تجعلني امرة في لحظات
يبني لي قـصراً من وهم لا أسكن فيه سوى لحظات
واعود لطاولتي لا شيء معي
كلمات ليسـت كـالـكلمات لاشيء معي إلا كلمات
الكلام لنزار قباني والغناء لماجدة الرومي

في البدء كانت مجرد مكاملة

رغم اني لم اكن على وفاق تام مع حبائل النوم ولم اكن بالطبع ابحلق في السماء اعد نجيماتها لانه في الاصل لا طريقة عندي لاشاهد السماء ولا حتى النجوم اظنها بمبسوطة مني حتى تتركني انعم بضياءها المخبوء خلف نوافذ مغلقة تماما ، الا ان رنين الموبايل طفش ام الهدوء الذي كنت انعم به . ومددت يدي لاري من المتصل ..
يا الهي هذا المجنون ماذا يريد ، الم يكن قبل شوية يزعجونني هو واخته ام مازن ؟؟ ..
- ايوه .. نعم .. يا لغم ..يا ثقيل يا حليوه .. موش كنتو معاي قبل شوية في شنو ؟
- اسمعي ، انا اكتشفت اني زول نمبر ون في السوق ..وممكن اكون مطلوب على مستوي واسع .. موش ممن دا اكيد . . واحدة هسع دقت لي واتغزلت فيني ..
- اها وبعدين .؟
- ولا قبليها .. انتي عارفه ، أني ربحت موبايل ( باندا )
- لا والله مبروووووك ، حا تديني اشدو اكيد ، صعب اكتيير اكتير اخليك ..
- انتي هبله .. خليني اكمل كلامي
- اها .. يا فالح .
- وعارفه قبل كده ربحت .خلاطة ..
- عارفه .......بس شن جاب الغراب لامه ..
- اكتشفت اني انسان على قدر كبير من الجاذبية .. صاح .. !!
واكتشفت انو في جيبي سبعة وثلاثون ريال .. ودا رقم يجعلني متفاءل انو الحياة حلوة . واحمل بكلاريوس صيدلة دا سبب كافي جدا يخلي اي بت تموت في دباديبي ، لان النساء بطبعهن وعلى حد قولك انتي (كريميات) اي يميلن الى التكرمن والتمسح ..
وما تنسي الانجازات التانية .. اثنين شاكوش شديدي الضربة .. اربعة عشر قسيمة مرور بسبب احدى تلك المخالفات (نمت في الحبس) ثلاث ايام بلياليها .. خلصت امبارح ناس بيتنا من شر ثمانية فيران دفعة واحدة بالسلخ والقتل .. في صغري قتلت كل كدايس الحلة ..وهذا يعجلني رجل عنيف ، ربما اكون في مستوي عبد العزيز المقرن .. انا عارف ان الجكس بحب الرجال الارهابين ..
ايه رأيك موش صفات تخلي (وصايف) وام وصايف توافق على طول .
- نسيت الصاعوط ..؟؟؟؟
- لا دا انجاز كبير يساوي نوط الجدارة ومن الدرجة الاولى كمان وهذا ما لم تصل لمستواه بعد .. هي مستواها اقل من كده بكثير . ممكن تقولي ان مستواها لحدي السجاير وبس .
ونسيت كمان ، عندي رخصة ، واي ميل على الهوتميل ، و مكتوب .. ومسنجر على الهوت اتواجد فيه عشرة ساعات بس للفيميل ،وهنالك مسنجر تاني للرجالة ..
- انت يا ود مجنون ، هسع مزعجني الساعة اربعة عشان تعرض على انجازاتك عشان انا اطلب ليك يد وصايف ..
وللذين لا يعرفون (وصايف) التي يعرض ابن خالتي انجاازاته ليقدمها لها والتي هي عبارة عن كيس صاعوط وموبايل باندا كسبه من محلات بن داؤد بشارع الستين لان امه ارسلته ليشتري لها مرقة ماجي فغير رايه واشتري صلصة المراعي . وسبعة فيران قتلهم عن طريق اللصاق والشرك .
يعرض هذه المميزات ليوسطني حتى اقنعها بالاقتران به ..
ووصايف التي بكي بسببها امراء وشيوخ وارهابيين من الدرجة الممتازة وعلى مستوي الجزيرة العربية قاطبة .. لثلاث ايام فقط من دبرستها لم تقص شعرها ، امها جعلت ستة من اخواتها وثلاثة من عيال الجيران يتساعدون في حمل شعرها حتى تستطيع خبيرات التجميل ان يقصصنه لان طوله اصبح ضعف طولها .
..........
طبعا ومن غيري يفعلها
ساعود استنوني

البت وصــايف

ووصايف التي حكي عنها .. لها رمش لم يسمح للشمس ابدا ان تضع وهجا علي جسدها ، لان ظله كان لها ظلاً ولا ظل القمر ..ووصايف التي يبكي فيها ابن خالتي .. لونها .. احتار فيه كل خبراء التجميل والطب والزوق العام ، واخيراً سمو لونها باسمها واصبحنا كلنا نقول ان هذا اللون قريب من وصايفي او بعيد منه ..
ويقال ان سبب سقوط عبد العزيز المقرن وشلة االارهاب كان بسبب ضحكة وصايف .. غير ان البعض قال ان اصل تمرد الارهابيين في العالم العربي كان بسبب وصايف وليس بسبب اخر ..
لم املك الا ان ا قول ،
سمح يا ود امي ، ح اكلمها
وقول ليها عندو نية كمان يختطف البنغالي بتاع البقالة الجمبهم ومعاهو اخوانو واهدد بقطع ريسينم بعد ثلاثة ايام ان لم يسحب وزير الخارجية كل البنغالة في الخليج ودا مكسب كبير لانو مديرنا البنغالي حا يقطع وشو .
بعد يوم واحد من هذا الحديث ، وجاءني ابي بجريدة اظنها المدينة ، فيها خبر غريب وطريف ، لامراة تعدت الثمانين بثلاث سنين قالت انها تبحث لاكثر من خمسة عشر سنة وبمثابرة وحرص شديدين لزوج يشاركها حياتها .. وانها مستعدة ان تدفع له اكثر من خمسة ملايين ريال ان وجدت فيه حلاوة المعشر وانست اليه ..
في فوري اتصلت بابن خالتي ، طالبت منه ان يمسح (وصايف) من راسه بالاستيكة .. ولم اخبره حتى استلمت منه عهداً موقعاً على رسالة موبايل ان يمنحني مليون ريال جزاء بشارتي الساره له .
عندما عرف ، لم يعقب باي كلمة .. كنت اعرفه مجنوناً .. دائما تحيرك تصرفاته . حتى حديثه ابداً لا تتوقع الى ماذا سوف ينتهي ، يبدأ بكلام ويختمه بكلام . ولن تعرف اي شيء يقصد ، لانه يتحدث في كل شيء وعن اي حاجة ..
.....
استنوني
دقيقة بس هسع بجي

عجوز ثمانينيه تعلن عن رغبتها في الزواج

العجوز الثمانينية لم تكن هينة ولا لينة ، وطموحها في الحياة لا حدود له وهي ان تسعد من يقترن بها وتهبه قلبها وعطفها وملاييينها التي لا تعرف عددها ويساعدها في نسيان تلك السنين العجاف التي مضت من عمرها وهي تبحث عن شريك بقاسمها شغاف القلب ، قالت ان لها اولاد واحفاد ولا تأبه بهم ، لانها لم تقصر معهم . وانها تريد ان تختم حياتها مع رجل شاب شريطة ان لا يتعدى الاربعين من عمرها وان يكون بيهم وداً واحتراماً ..
قالت هي جادة في مسعاها وان حلمها ان تظفر برجل في وسامة جون كيندي ورشدي اباظه او انور وجدي (لانهم بالطبع من جيلها) ومع ذلك ان كان عريسها الجديد في وسامة وائل كافوري او براد بيت فهي لن تمانع ..
قالت ان الحياة جميلة ويجب ان لا نضيعها في العقد والعادات البالية التي تقف في وجه سعادة الانسان وتمنعه ان ينهي حياته بالطريقة التي يشعرها معها بالرضاء التام .
تحدثت عن جمالها وقالت رغم سنين عمرها الا انها مازالت تحافظ على رشاقتها وصحتها وهي تمارس رياضة المشي وبالبطع لم تقول ان الايروبكس رياضتها المفضلة خوفاً من جمعية الحياة الفطرية ، وانها لا تتناول غير حبة ضغط في الصباح وحبة سكر في المساء وانها تاكل كل شيء ، لكنها تحب البيتزا والهامبرجر بالجبنة بصورة خاصة . رغم الام المفاصل التي تأكل عظامها .
والمحت انه ليس لديها مانع ان تجرى بعض (الترميمات) اقصد ان تسمح ليد طبيب التجميل ان (يصلح) قليلاً اعني (كثيراً) من جلدها ..ان سمح لها عريسها بذلك . ومع ذلك كان من المفروض ان تقول ان سمحت لها هيئة الاثار ان تغير من (مومياؤها) المحنطة .
ابن خالتي جاءني مساء نفس اليوم . وقال لي
- شفتها يا شيري ، اتخيلي شفتها ..
دي محتاجة ستة شهور بس عشان تدرس كل فورمات طلبات الازواج ، وممكن تروح فيها قبل ما تصل لاختيار..
مشينا انا واكرم لسور الحوامل بتاع شارع السبعين قنا ممكن وعسى ننعم بنظرة منها وتقوم تختارني انا ، عارفه عشان نوصل بس االسور ، اخدنا اكثر من ساعتين من زحمة الدنيا ... يا بت انا شفت راشد الماجد وعبد المجيد عبدالله ، وائل كافوري
كلهم عايزين يعرسوها ..
اقول ليك شوفي لي وصايف ..قول ليها انا موافق وامري لله ..


اخر الحكي
مثل اسفنجة مبلولة
بالشــوق
امتص قلبي سيرتك
ومنحني مقعدا قبالتك
ورحت بكفي احتمي
من وهج حضورك
لحظتها عرفت
ان الطريق الى
عينيك وحده هو
الامان

شيري اول امبارح

قلتى لى بتدفع كم ؟
خلاص القروش للزول الكتب الخبر

ٍسلام مربع

فناننا الموسيقار الجميل

حمزه


عارف لمن كلمت ام مازن ، قالت لي تمشي معاي بكرة الدكتور
قلت ليها في شنو ..
قلت (انقلب راجل )
عشان اعرس المرة واتحصل على الخمسة مليون
سلمت ياسيدي للطله

يا سلاااااااااااااااام

تعرفي يا شيري انا ما قريت هسه غير سطرين ويا سلام دي ما للسطرين طبعا لانو داك موضوع مفروغ منو
يا سلام دي عشان دخلتا لقيتك و حمزه سليمان ورجعتا لي زمن ورا رائع وجميل

الأخت الغالية شيري
يا حليلك وحليل عصافيرك
شوفي باختصار شديد
انا عاوزة واحدة بنفس المواصفات
المادية دي
لكن عمرها لا يتجاوز ال22 عاما فقط
اما بتاعة الثمانين دي
خليها تعرس ليها حانوتي

مع تحياتي

بالمناسبة الكلام الفوق دا سر بيني وبينك

فعلا زمن رائع وجميل
شيري وايهاب وحمزة....عبور للطرب والصكة والجمال ..وليته وليتهم...

البت شيري
السعوديات المقرشات ديل متوسط اعمارهم بين مية وميةوعشرين سنة ومتوسط اعمار الرجال السودانيين قبل الانقاذ كان خمسة وخمسين لي ستين سنة...يعني زولتك بتقتلها اتنين سودانيين قبال تموت وبي كدا تكون عرسة وخراب ديار...لكن برضو يمكن سوء الحظ يرمينا فيها..كدي رسلي العنوان ..واها كلو هم

يديك العافية
ولك الشكر

عبد الله جعفر

المرهف عبد الله جعفر وحضورك الباهي سمى بالروعه الى قمتها والبهاء الى منتهاه
كل الود و التحايا

ٍسلام مربع

ايهاب
كنت عايزه اقول ليك العريس ، لكن لقيت انو ممكن يحصل لبس في الموضوع وتقوم المدام تقول الراجل دا جنه ولا شنو يادوب معرسيني كمان عايز يعرسني..
اعمل حسابك يا سيدي ، في الغالب النساء لا يتركن ازواجهن دون مراقبة لصيقة ،
سلمت ياسيدي لله

احمد حنين

اثنين وعشرين بس ..؟؟
انا غايتو ما بعرف واحدة بالمواصفات دي الا صديقتي (وصايف) ودي دفع احد شيوخ وامراء النفط مهراً خمسين مليون يورو بس ..
اما الثانية .. فهي نانسي عجرم ، قالت عمرها اثنين وعشرين ..لكن صحي عندها اكثر من عشرين مليون .. اتخيل غنوة ( اه ونص) بس كسبت من وراءها عشر مليون ..

سلمت ياسيدي للطله البهية


عبد الله جعفر

سلام مربع ياسيدي بحجم طلتك البهية ،
سائلين عنك ..عساك طيب ..
ياسيدي ما تدقش مع الانقاذ ، تراهم عازمين على دفننا اكثر من الاول حتى وان جاء كولن باول او دخل القصر جون قرنق
انا في الغالب لا امنح ثقتي للذين تحزبوا حتى وان كانوا مع حزب الله ..فهؤلاء لا يفعلون شيئا غير المحسوبية والجعجعة
سيبك منهم ، واحسن ليك تقدم طلباتك في هذه التحفة الاثرية ..
لا تدري اين الخير ، ربما في الغد تظفر بفستان او حتى شوال او قبعة تقع ليك في الورث ..
ويرجع تاريخها الاثري الى حملة نابليون او حتى وقعت من زوجة الملك ادوارد الثالث بتاع بريطانيا ولا ماعارفه حق مين
تكسب بدل الخمسة مية مليون ..
سلمت ياسيدي للطله البهية

شيري العسل وضيوفها (العرسان) ..

طبعا يا شيري ما تصدقي أي زول دخل ليك هنا وقال أي عذر والسلام ..

الجماعة كلهم دخلو يشوفو المواصفات.. علً وعسى ..

لوووووووووول

قولي لأكرم ألحق فرصتك حتضيع ..




إيهاب.. أطلع من دولا.. آل ماضي جميل آل ..

أحمد حنين.. لاحظ انو العروسة هي البتخت الشروط وليس العريس المطلوب الحصول عليه ..

يا بت يا شيرى
رسلى لى العنوان بسرعه، قبلان بكل الشروط
ما عندها اخت لاخوي دكين؟؟
رجاء اتجهزوا للحنه والسيره
و بى كلام عبدالله جعفر ده قريب حتجوا تعزو فينى

الكلام دا سري و كدا ..

الأخت / شيري ..

انا قاعد أحاول أقنع في الجماعة و زي قررررربت و كدا ، بس عندي شوية شروط كبرنامج حد أدنى من المعقول و في نفس الوكت قابل للتفاوض و هو كما يلي :
أولا :
نعمل خطبة و نمشي نشوف الموافقة حقت الزواج من الداخلية مش سعودية و لكوني صاحب خبرة في نفس المجال يعني ما حتطول ثلاثة أربعة سنة كدا .
ثانياً :
نعمل( ملكة ) يعني عقد يالماعارفين ،، و العصمة لازم تكون في يد أم يارا ، عشان مافي زول يظلم التاني ، و بعدين ننتظر شوية عشان نتعرف على بعض أكثر ، و كان عايزة تواصل تعليمها ما عندي مشكلة خالص و أدعمها تماماً .
ثالثاً :
من هسه أنا ما مسئول عن التأمين الطبي و لو رفضت موافق بس ما تتعدى التكلفة خمسة مليون بأي حال .
رابعاً :
ما في نقل كفالة خالص .
خامساً :
قبل العرس بكم يوم كدا يدوني فرصة أشاور نفسي تاني .

الأخت / شيري

سلام كتير وكبير




ديه الزوجه المثاليه ...على وزن الزوج المثالى المفروض يكون 90/20/40

90العمر

20 مليون دولار فى البنك

40 درجة الحرارة العريس

ٍسلام مربع

حببيبة البي رجويه

يارجويه ، اسكتي خليهم ، الجماعة ديل ، انا عايزه استعمل البوست دا
اداة ضغط ، لكل البقدم طلباتو .. اصلوا انا استغلالية وبتاعة فرص
سلمتي ايا حبيبة للطله البهية

مراويد

يامراويد يا اخوي المراة دي نفسها طويل . . وطموحها كبير لا حدود له
عشان كده .. الامل في راسك دا ، بسماع خبر تعزيتها
بعيد شوية

عصام دهب

اولا ياسيدي مفروض الموافقة تكون من هيئة الاثار السعودية وليست الداخلية
وزارة الداخلية للارامل السعوديات بتوافق على طوووووول او تكون معييوبة
ناقصة يد ولا رجل ولا عين ..
عشان كده مفروض من الاول تخليك في السليم
من ناحية التأمين الطبي ، لا اطمئن ياسيدي ، مفيش شركة تأمين تقبل تأمن عليها .. لانو تكاليف علاجها مفتوحة
لانها هي ح تتزوج ما تتمسك بالشرط دي
سلمت ياسيدي

اختي العزيزة شيري
السلام عليكم
. . . . . . .
جاهزين جاهزين
لحماية الدين

(اقصد تكملة نص الدين)

وعلى فكرة انا حلفاوي

شيري العزيزة
رجعتي ورجع للمنبر بريقه وأتألقه من جديد، لينا شهرين معظم المواضيع المنشورة جادة ودمها تقيل ومافي حاجة تسلي حتى عادت شيري
ورجعت كريت إلى البيت ....
رموش البت وصايف!!!!!!!!!!!!!
دي رموش واله (مظلة مشربية من مشربيات مباني جدة القديمة)؟؟؟
وأم 80 التي لا تقبل بأب 44 دي حكايتها حكاية والله
بس والله عندها طموح وطموح عالي جدا ويمكن ناوية تعمر ل 120
أم ثمانين ربيعا والتي هي في عمر الزهور ما جابت حاجة جديدة من عندها وأظن إنها مصاحبة الفنانة الشحرورة الظغنتوتة صباح أو صبوحة وهي من نصحتها بأن تبحث عريس دون الأربعين كزوجها السابق فادي لبنان

قالت هي جادة في مسعاها وان حلمها ان تظفر برجل في وسامة جون كيندي ورشدي اباظه او انور وجدي (لانهم بالطبع من جيلها) ومع ذلك ان كان عريسها الجديد في وسامة وائل كافوري او براد بيت فهي لن تمانع ..

شيري العسل

قلتي لي بتتنفس يعني

وين العروسة بس ورينا درب خمسة مليون دى وين معليش اقصد الامورة الحلوة وين

شيرى العزيزة..حليلك وحليل تحياتك المربعة
والله اتا مستعد ادفع خمسة الاف ريال واقراك فى المتبر
بس مشغول بالتجهيز لحفلة وداع تبلدينا باقى البورداب
عينونى رئيس اللجنة المنظمة..اقصد ورطونى..بس صالح
بستاهل...حتما سوف اعود ولكن ليس قبل الخميس الجاى

سلام مربع

ادورب ود الخطيب
دي شروط قاسية شوية ، موش انت شايف كده
لانو عجوزنا دي ح تخرخر ، بيني وبينك .. عندها حق .. دي عاصرت ثمانين جيل ..
خليها 80/4/45
ثمانين لعمر واربعة للفلوس وخمسة واربعين للعمر
سلمت ياسيدي للطله

حمزاوي
ياسيدي موش لازم تجهز .. لازم تكلم المدام
عشان تديك الاذن .. دا شرطها الاساسي
انت جاهز للحتة دي ؟؟
سلمت ياسيدي للطله

حبيب بلدو

طبعاً صباح مثلها الاعلي ، رغم انها اصغر منها شوية ..
وبيني وبينك ليها حق .. انتظرت خمسة عشر سنة تبحث عن عريس
عشان تعرف ان الاجيال القديمة بتحب تتاكد من كل شيء
خمسة عشر سنة بتحاول تتاكد من اختيارها .
سلمت ياشفيف لهذا الاطراء الجميل وسلمت اكثر
للطله البهية التي خصيتنا بها ..

ذا نايل
حقيقي الموضوع دا جد .. لو انت في جدة اول لحدي سور الحوامل
في شارع السبعين . .وهناك ح تاخد تفاصيل اكثر ..
سلمت ياسيدي للطله ..

صديق الموج
دا بس من زوقك العالي ، سلامي وتحياتي الى العزيز
تبلدينا . . وربنا انشاء الله يكتب سلامته
وبلغوا عننا كل السلام
ربنا يوفقكم يا اهل المحنة ياطيبين

غايتو وسامة كندي ووائل كفوري دي ما معانا ولا بنعرف ليها
لكن الشروط التانية موافقين عليها
انا من الآن موافق اتزوجها
اكيد ما حاتعيش ليها أكتر من سنتين
والواحد يستحملها لمدة عامين
ونكون زي فادي لبنان
نسوي شنو
يعني الواحد اكيد حا يتعب معاها تعب شديد جداً
يعني لو عاوز ليك موية بس لازم تكورك لحدت ماروحك تطلع
ناهيك عن الونسة اللطيفة الأخرى
وأهم شيء عندي تكون بتضحك
مش زي بعض النسوان الكبار الواحدة صارة وشها اليوم كلو
وما تضحك مع راجلها الا بعد يكلكلها على قول خالنا

ابو حراز
سلام مربع

لو عاوز تكون زي فادي لبنان حقك راح ، لانو الراجل (نأأأأأبو طلع على شونه) لا هي ماتت ولا هو
استفاد واجد من الوضع الحاصل ..
وحكاية الموية وجيبانها دي ، انت ياكافي البلا ماشي تعيشها في الحلة الجديدة ولا حلة حمد
شن كتر هنا غير الفلبينيات .. عشرة بمية ريال ..
كتر من الفلبينيات .. وكل خمسة خليهم مسئولات من حاجة .. يعين الرجل ، واليد ، والراس ..
والاسنان والاضان .. وانت خليك بس مراقب الوضع ، وزي مابقول مراقب عمال ..
والله خوفي ، هي من تضحك اخيرا
هاهاههاهه
تبري يا ود امي ،انشاء الله هي
سلمت ياسيدي لهذه الطله الحلوة

Quote: اخر الحكي مثل اسفنجة مبلولة بالشــوق امتص قلبي سيرتك ومنحني مقعدا قبالتك ورحت بكفي احتمي من وهج حضورك لحظتها عرفت ان الطريق الى عينيك وحده هو الامان

وبس,,,,,,