خليــك بالبيـــت

اول الحكي
هل سيتفق الطرفان على نزع الالغام!؟
لكن من سينزع من صدرى هذا اللغم العام!؟
ومن سيحاسب آمر فرق الاعدام
ويعيد الشهداء لسقف البيت وفى رمضان!؟
ومن سيقيم الحد على من ذبحوا الاسلام!؟
يا احفاد مسيلمة وزبانية الحجاج
إن صادرتم ثورات الشعب
وبلعتم قوت الناس
وعلى باب المسرح اعلنتم عن ملهاة
تدعى (انقاذ)
الكلام لـ : هاشم صديق ـ انتبهوا : يحفظ ضد مجهول
اهداء خاص الى اميراتي
ابنوسة /جندرية /تماضر/ميرفت والاخوان علي الحلاوي /ايهاب الطيب / ابو يسرا .لسؤالهم عني .

لم اكن في حاجة لاعرف كيف تصير انفصالي وتؤسس لحركة مقاومة عريضة ...
فكل الاشياء التي حولك تشير صراحة الى ذلك حتى وان كنت اطرش وعميان .
فان لم تكن في دواخلك تثور البراكين او انك بطبعك انفصالي وثورنجي .. فان حركات الساسة في صبحها ومساؤها ستحرك هذه البراكين ، وان كنت مسكين ومشلول فكر لا تحركك الزوابع والبراكين ... ففضلت خيرهم الرياضيين في بلدنا لا يقصرون معك فهم سيدمرون حصونك الدفاعية ويتركونك بلا طائل وهم ياكلون هزيمة في عقر دارهم وعلى مرأى من العالم .
وان كنت مهترشا مثلي ، فعليك وعلي السلام .. وقم من فورك للتعلم مني كيف تصير ارهابي او تعد كمينا لذات لحظة سعادة بعبوة ناسفة تجيب اجل التناحة والدبرسة . وعساهم الجنود الامريكانيين ما ربحوا خير .
احضر (دي دي تي) او (كي دبليو) حيث ان كي دبليو تعني كتشين وير واقرأ من فكر القاعدة كيف تصنع بووومب، ثم انزغم من نفاجها ذات فجأة واحتل عناوين الجزيرة . اختطف ركشة موديل 2004 (تطير) بها اذا ما حمي الوطيس .
او ابقى زي نحن وناس قريعتي راحت ، لا شيء تفعله غير مراقبة نشرات الاخبار وشفط الشاي . واياك ان تفكر في التخطي خارج عتبة بيتكم فكل الاماكن لم تعد امنة .. في ذلك فوائد جمة لن تعرف قيمتها الا اذ استمعت الى نصيحتي انا ..
ستتعلم من رقصات روبي الفاضحة ، كيف تسير الحياة بشعب قارب على الثمانين مليون نسمه وتكدس على رقعة نيلية صغيرة مساحتها اربعة امتار او ان افاقك ستشرع صوب الانحاءات والنتواءت الفكرية دون فائدة تذكر لمجرد ان رئيسك لا يرغب في تحقيق احلامك التي تراها مثل غناء عصفور ويراها هو وزمرته مثل التفكير في صرف مائة مليور دولار في احتفالات تمجد ثورتهم . وان انت قرأت شوية ستعرف وانت في جالس على معدك المنزوي في صالة منزل به اربعة اباجورات ثلاثه منهم لا اعرف حتى الان ان كانت بها لمبات ام لا والاخرى عبثت بها انا ذات مرة وانا اشاهد فلم رعب فانحرقت في يدي ، قصدي ان اضاءته غير كافية لفتاة معمشة مثلي لتحكم على منظر المدينة العام من خلال شرفة لا تبين ملامحها كثيرا من خلال ذلك المقعد لانه ببساطة لاشرفة لدينا ولا يسمحون في الغالب لفتيات او حتى صبيان بالنظر او الوقوف من خلال الشرفات .
ستتعلم ايها المحتمي ببيتك ان الحياة ابسط بكثير من اضاعتها في جدال لا يعود الينا بنفع . ولا حتى الاحتفالات التي نقيمها من اجل ان نضحك على انفسنا او نتفرج علي بعض ثم ننافق بعض في قضايا نعرف جيدا ان حكمها ليس في القرارات الاجبارية او الخطب الرنانة انما تنبع من دواخلنا المهترئة بتلك الاكذوبات ..
ربما تكون افكارك قد استوت وطلعت ريحتها مثل تلك التي هترشت بها ونيلت بها دنيتي وبوردكم ، ومع ذلك لا تخجل فالذين خرجوا بافكارهم وفرقعوا بها العالم لم يكونوا احسن منك في حاجة ..لا دكتور الترابي ولا سعادة العقيد جون قرنق ولا حتى اليسا او على عثمان محمد طه او هيفاء وهبي احسن منك في شي ..
كانوا يملكون فقط الشجاعة التامة .
احمل تنظيراتك الكثيرة ومسيخة واقرف بها خلق الله وكل (المحدقين) في خلقتك .حتى يقتنعون بفكرتك والانضمام الى حزبك او (تركها) لك .

شوية كده وراجعة تاني

شوية هترشه

اما ان اردت الانضمام الى حزبي ففي هذه الحالة خليك بالبيت ليس من اجل متعة مشاهدة آمنة لبرامج ،ربما لن تخرج منها ابدا بشيء يعود عليك بالنفع .. وانما ذلك كله من اجل تحضير وجبة مكرونة بيتوني بالفرن لاتعرف انت نفسك الى ماذا قد تنتهي .
عن نفسي لا اجيد مثل هذه الطبخات رغم انني مدمنة حتى التنيح ببرامج الطبيخ الهوائية ، اعني التي يكون بثها مباشراً لتكون مثلك ومثل اي مدمن لمباريات كرة القدم .. فان انت راهنت على ديفيد بيكام تكون بالغت وقصرت مع الساحر زين الدين زيدان وان ذكرت هولاء الكبار وعوره ) تكون اتلومت خالص مع الشافع (ويني روني) الذي جاء لعالم الشهرة من بوابات لشبونه يورو 2004 ،ومع ذلك لن يعفيك ذلك كله من تكدير وجبتك التي اعددتها بشق الانفس .. معلقة بي معلقة وكمشة بكمشة مع الشيف تامر ولاايه ما عارفه ان انت غفلت عن الرموت قيد لحظة واحدة لتفاجئك قنوات اخرى تركت كل الدنيا واحترفت مناظر القتل والسحل والاختطاف .
فحتى الاخبار الاتية من المحروسه مصر ليست على ما يرام .
طيب ومدام كده لماذا كل هذا الركض المحموم وراء احداث متكررة ومقرفة فشكل الرئيس قرنق على اعتبار ما يكون لا يختلف كثيرا عن الرئيس الفرنسي في هندامه ولا في رشة عطره او نظرته لكرسي الحكم ولا حتى عمنا حسنى مبارك يملك تلك العلامة البارزة التي تميزه عن الملك حسين . فكلهم متشابهون في طريقة كلامهم وفي طريقة لبسهم وفي نظرتهم الى امريكا او حتى اسرائيل . فالقذافي رغم جنونه فهو على حد سواء في خندق مع ياسر عرفات وولي العهد عبد الله بن سعود في العمالة لا يفرق البشير عنهم في شيء . كلهم توابع لنايزك في طريقها للحريق . .
متين ؟؟ الله أعلم ولا تسألوني لانني نفسي لا اعرف متى انتهي من طبختي التي وضعتها على النار من الساعة العاشرة وحتى اللحظة ولا اعرف مصيرها .. انه زمن التحايين الذي اعيش فيه حتى اسرق لي لحظة اهترش لكم فيها . ريثما اشوف لي صرفه في مشغولياتي التي لا تقل باي حال من الاحوال عن نائب الرئيس علي عثمان طه .
تبهرني هذه الطريقة التي يعرض بها (ألاشياف) جمع شيف او (الشيفه) وصفتهم الطبيخيه .. في الغالب هم يستعملون مسميات اشياء لو انك قلبت السودان كله فوق تحت لن تجد منها شيئا .. لذلك اكتفي عزيزي المستمع الى هترشتي بالاستخدامات البديلة التي يجيدها علماء الاقتصاد في شرحهم لسلوك الانسان الانتاجي بسبب ملاحقتهم لتحقيق اكبر قدر من الاشباع لهذه الحاجات ويعنون بالطبع اقتصاديات السوق الحر .
ما علينا ..هؤلاء الاقتصاديون مقرفون ايضا بدرجة تبعث على ترك (علمهم) دون تعليق . فان سمعت البقدونس فاستبدلها على الفور بعيش الريف فهو الاقرب الى ذلك وان سمعت الخيار فماله (التبش) سيكفيك شر هذا الخيار . وهذا البروكولي او الجبن المبشور ، الشمندر ، الشمر ، لن تجديه عزيزتي المشاهدة الا في الودك ، اتركيهم وبلا غلبة واستعيني بالببصل والتوم فانني لم ارى في حياتي طبخة خلت من البصل او التوم .

لا تغير المحطة
ساعود لاهترش

اىىىىىىىىىىى...ياجماعة

دى الليلة جاءت من وين

عودا حميدا مهترشاب

خليك بالبيت

في الغالب لن تطلع اكلتك مثل ما وصفوها لانهم قالوا بطريقة اكتيير مهضومي وسهلي وانتي ياعيني لست حمل هذه التزيينات التي يضعونها على اطباقهم .. فالسمك عندما يصفونه لك تحتاج الى ميزان الذهب او مقياس رختر حتى تقطعه .. ايه العبط دا .. 4 جرام سمك الناجيل و ستة واربعون جرام من لحم العجل .
هل يعقل عجل جعله الله اسمن خمسة عشر خروف بمية وعشرين كيلو . .اتركه كله واختار فقط 56 جرام .. سيبكم منهم يا بت شيري المكرونه بيتوني اسهل وارقي ..
نصف عصرة ليمونه .. معلقة واحدة زيت .. ربع معلقة توم /نصف كوب جبن برمزان مبشور/
معلقتين زيت .
هل يعقل .. (قنينة) بها خمسة لتر ، استخدمها بمعلقة معلقة ..؟؟
في الغالب تحتاج منك هذه الوصفات ان تحمل معك موازين حساسة تعمل بالحرارة ، لكن بسيطة ، فانت حاول استعمال ايديك في الوزن والقياس .. فحينما تسمع نصف معلقة فلتسارع الى (الكمشة) واغرف بها مثلما سمعت المقدار . اما ان سمعت نصف فنجان او حتى فنجان فماذا يعيب (الكوريه) وان تماديى ذلك الراجل اقصد الشيف في فلق راسك بمسيمات تزعجك وقال بالشامي الفصيح (منا محتاجين الا مقدار ازغير من بيضي مخفوقي . فاسرعي الى (المفراكه) واضربي بيها البيض ضربحاً مبرحاً حتى يستغيث .
امي طبخت كل شيء وتناولت في صمت كل شيء وابدعت فيه ، لم اراها في حياتي تلتقط ميزاناً او ملعقة لتبظبط بها طبخة .
ومع ذلك حينما انتهيت من هذه الهترشه وهرولت صوب مطبخنا ، لم اعرف اين انا ..
هل في الخُبر ام على جسر الرصافة ام الكرخ على جانب من طريق كان مزروع كله بالعبوات الناسفه ... حاولت ان اطلب الاسعاف حينما تذكرت اني تركت على الطاول الدجاج وطيور السمان فوق طاولة المطبخ ، لكن لعنت ابليسي وقلت لها انها ميته يابت ، اتركيها في شانها ماذا تضيرها العبوات الناسفه .. انتظرت لساعة ومازلت انتظر ان تنقشع سحابة الدخان والخراب الذي احدثه بوتجازي لكني لم انل شيئا ...
لا مكرونه بصلصة مكسيكية ولا يخن طيور السمان بالفرن .
في الارجح سياكل الجميع في غياب امي ارز بالدجاج ..
انها الكبسه ، قادمة من كل الاتجاهات
واعني زر بخاري بالدجاج
وسأبحث في اسباب هذا الخراب في الغد .. ربما للموساد يد في ذلك ..
.....

اخر الحكي
كان ثوبك فضفاضاً وكنت مرتاحاً فيه
لكن قلبك بقى الى جوارك
خرج ذات ابتسامة منك
يتنفسني حتى ذابت فواصل الافق
رأيته يتمرجح على قصاصات الاماني ..
أأكذب عليك !!!!
ذلك ما حدثتني به شرايينك
رأيتك انت ايضا تحمل قلبي .. لكنك ابدا لم تكن
مثلي ..
كنت انا شغوفة به
وكنت انت شغوفاً بالفراشات
لذلك خرجت عينيك في رحلة
وحتى اللحظة لم تعودان
شيري في ذات انتظار ما

انت يا شعلة التذكار
في تهاويم الكتابة
ادلقي العطر فراتا
اجعلي السراب سحابة
وازرعي الصحراء غابة

سلام .....

تولوس
سلام مربع

سلمت ياسيدي لهذه الاريحية
وسلمت اكثر للطله

شيري الحبيبة..

نورتي المنبر، واديتيهو صوت وحركة..

حمد لله على السلامة..

حأرجع تاني..

سلام مربع

ابو قوته

سلمت ياسيدي لهذا الترحيب

حبيبةالبي رجاء

تسلميلي ، ويخليك يارب

صمت دهرا ونطق تبرا
شيرى يا الف مرحب
ايه الغيبة دى؟

شيرى وعين الله ترعاكى
وخلى الباندويدث
شبعان يقبل فاكى

بركة الجيتى تانى فقد افتقدناك كثيرا

شيرى
خليك بالبورد وماتغيبى
عليك الله

شيري
تحياتي و عودا حميدا

( حنكون بالبيت ) اللي هو هنا

سلام مربع

حبيبة البي راويه العسل

منور بي وجودك ياستي
يخليك يارب وتسلميلي على ها الطله الحلوي

ابو جهينه
حاضر ياسيدي ما يصير خاطرك الا طيب
وسلمت للطله

خالتو د/بيان

ربنا يخليك يارب
وسلمت ياستي للطله


يازول يازول

يخليك يارب ، وسلمت للطله ،

صديقي موسي لم يخرج للعمل
قلت له : مالك البارحة؟
أجاب : البارحة الزهرة في أنضر جمالها
ولذلك كنت بالبيت
والزهراء هو إسم زوجته

أما سبب غياب شيري عن البورد لعل له مبرر
جيتاً جيتي بالعافية شيري


خليك بالبيت هلق حبيت
رح كون وحيدي وحدي فليت
الله يخليك خليك بالبيت خليك
خليك بالبيت هلق حبيت
رح كون حبيبي وحدي فليت
الله يخليك خليك بالبيت خليك
خليك لا تروح مشتاقة ليك
خليك كتير حبيت عينيك
و ما بعرف ليش و بغار عليك
الله يخليك خليك بالبيت خليك
ما تضل عالباب كرمالي فوت
ما خلى الليل طرقات و بيوت
ضجراني و شوب و كتير سكوت
الله يخليك خليك بالبيت خليك

جوزيف حرب

شيري

حلااااااااااااااااتك

وينك انتي الطال غيابك
العيون تسألني عنك
والقليب بيقول حبابك
والخطاوي الباكيه تسأل
كل يوم واقفات في بابك

.................................من روائع الموصلي


العزيزه شـــــيري..

وكتين تجي ..يرقص ويميل بابنا الكبير تحت الشمس..النيم يفوح يصبح ورد..والبيــــــت ينور جيرو
ويهش...تـم تـم خطاك شده العتب...وسوى العجب.....الكلام استلاف من هاشمنا......مرحباً ايتها الغايبه
عنا ..والحاضره فينا....لك عزيزتي والاحبه في ملتقاك عاطر الود
وكثير احترام ...والقعده الياها ..في بيتك.

................SHATAT

شيري سلام

كلام غايه في الروعه

شيري

الف حمد الله على السلامة

عليكي الله ما تطولي الغيبة

ٍسلام مربع

لكل الناس الحلوة اللي بتسال عني
كتير محبتي وسلامي

ايمو

سلامي الى صديقك موسي وزهرته النضرة
وسلمت ياسيدي لاغنية الفيروز
خليك بالبيت
وسلمت كثير للطله

قرجه

ربنا يخليك ياقرجة ..
سلمت ياسيدي للطه

شتات
مابيدي ياسيدي كل هذا الغياب
وربنا يقدرنا على رد جمايلكم
ومممنوني اكتيير اكتير .. لهذه الاحاسيس الجميله
ويسلموللي ها الايادي اللي كتبته
وسلمت مليون لهذا الاطراء الجميل

انور احمد

ممنونة اكتير يا انور
سلمت ياسيدي للطله

سجيمان

حاضر يا سيد المفلكبين
بس دعواتكم ، ربنا يفك اسرنا
سلمت ياسيدي للطله

العزيزة الف شكر على الاهداء والله مشتاقين لهترشاتك
هاشم صديق تصالح مع الاذاعة السودانية واعلن انه سيسهم من اجل نهضة درامية فى الاذاعة السودانية ودعا الى تجاوز المرارات والغبن الذى لحق بالمبدعين من الانقاذ واهلها داعياً المبدعين الى بث الفرح فى وجدان الشعب السوداني
اكرر شكري لك ايتها الدرة شيري

شيري البت الشلبية ..
عارفة ..
كل نشرة اخبار ..
بضبحوا فيها ذي تلاتة وتلاتين رأس ..
وكم كراع كدي .. وما عدده اتنين يد من الكتف ..
اها .. يقوم المذيع يبتسم ليك ..
ويقول ليك .. فاااااااصل اعلاني ..
وريد بووول .. بعمل لك جوانح ..
كتراااااااابة ..
ومع الضبح دا .. اطير بيهم ووووين ..
عشان كدا انا ما بشرب ريد بووووول ..
لذلك جري التنويه ..
جري مشا وين .. الله أعلم ..
غايتو لو لاقاك ..
خليهو يرجع لي قروشي ..
وشكراً

Quote: لكل الناس الحلوة اللي بتسال عني كتير محبتي وسلامي

بختـنا .. بختـنا
حمد الله على السلامة
اتلومتي في الغيبة البدون ميعااااد
الجابك يجيب روبنسون ياااااااارب

تحياتي

ٍسلام مربع

ابو يسرا

هاشم صديق ، فنان جميل ، على الدوام ينبض بوجدان شعبنا الطيب .
نحمد الله كثيرا على هذا التصالح ، الذي هو في الاصل تصالح معنا نحن ، جمهوره المحب له
سلمت ياسيدي للطله وسلمت اكثر للسؤال النبيل

حميده
عارف ياحميد ه ، اجمل شيء في المحطات الكثيرة ومسيخة دي ، الاعلانات طلع منها فقط السودانية والسعودية
لان الاثنين يشتركون في العواره .. وبدل ما يخلوا الناس تشتروا سلعتهم . .. يكرهوا الناس فيها ..
هسع عليك الله في اعور من دعاية سخانات ماعارفه اسمها شنو .. اللي في القناة السودانية
والله حاجة تنرفز
وتعالي بي جاي شاهد دعاية رود بينطيك جواااااانح .. اكثر من اربعة انواع ، وكل واحدة اجمل من الثانية
ودي واحدة بس .. وتكرهك في السلع الاستهلاكية ذاتها .
سلمت ياسيدي

سنجاوي

عميد بورداب جدة .. انتم ايضا غائبون تماما عن لقاءاءت بورداب جدة .
عمو روبنسون .. شكلوا كده ساب جدة ..
على العموم سلمت ياسيدي للسؤال النبيل عننا

اول الحكى لفاروق جويدة

وحدى أنتظرك خلف الباب

يعانقنى شوق .. و حنين ..

والناس أمامى أسراب

ألوان ترحل فى عينى

ووجوه تخبو .. ثم تبين

شيرى
كلامك كتير مهضوم نحن فى انتظارك على نار

وليد 500

ربنا يخليك يا سيدي ..
وانتم كمان كلامك اكتييير اكتيير مهضوم

شتات
عليك وعلى هاشمنا كثير التحايا
واعظم الاماني بطولة العمر السعيد

نصار
يارب تعودون ويعودون ونعود
هذا حلم نأمل ان نكون موعودن به
وسؤال خارج النص
ليك علاقة بجماعة شرفات الثقافية . يعني انت نصار عضو شرفات الثقافية

...........اهديك

أطول من السور
القلم.
تعظيم سلام
للكلمه
لي أبل القصايد
للحروف
الما بتسبح
للمكوك
لي كل والي
اكان ظلم.


..........من بورولوج..هاشمنا

...SHATAT

حمدا لله علي سلامة العودة و النضار

عقبالنا نحنا كمان نعود
و كل الغائبون/بات

ٍسلام مربع

عادل عثمان
سلمت يا سيدي على هذه الامنيات وحسن النية فيما طبخت ..
رغم انهم في الغالب يمتنعون/يمتنعن عن مجرد مد النظر الى اطباقي
ومع ذلك .. ساحفظ ما كتبت عن ظهر قلب لاريه لهؤلاء الشمات

ايهاب الطيب
البيان التأسيسي .. في الطريق الى الاعلان عن وكشف مسوداته .. لكن اخشي ما اخشاه ان تتسرب الى تلافيف البنود ايادي الامبرياليون الجدد من طقة يو اس ايه .. ويعيسون فيه الفساد فيخرج مسخاً
بشكل حكومات الشرق الاوسط ..
لذلك افكر جدياً في الذهاب الى (فكي) ربما يحجب عني العين واعني عين الكافر النصرانية في الواشنطن بوست .
سلمت ياسيدي للطله

عبد الله بابكر

ربنا يخليك يا سيدي
وسلمت ياسيدي للطله

حبيب نوره
ساحاول ما استطعت لكني لا اضمن لك ..
سلمت ياسيدي لهذه الطله

شيرى
فى البدء كان التلفزيون!
قال المذيع: حرب!
قالت شيرى: لع!
طبيخ بالفرن..

مكرونتك طاعمة، ولذيذة رغم الحروق..

يللا قطّعى السلطة ومصارينا بما يخرج من بين الفكين، ويميزنا عن القرود!

مدخل اول:
كنا فرشنا السكة ورود..
لو كلمتنا كان بالجية..
خطوة عزيزة ويوم موعود..
الخ...
والله حمد لله علي السلامة يا ملكة القلم والهترشه وان كانت بطعم المكرونة(لكن بس ختينا الكبسة ولو كانت بدجاج)...

Quote: اهداء خاص الى اميراتي ابنوسة /جندرية /تماضر/ميرفت والاخوان علي الحلاوي /ايهاب الطيب / ابو يسرا . لسؤالهم عني

لك الشكر والتقدير بحجم المساحات التى خلفها غيابك (وهي مساحات شاسعة) علي الأهداء الرقيق وتسلمى..

ونحن في انتظار البيان التأسيسي لانطلاق حركتنا الانفصالية يا سيادةالملكة..
وجاهزين..

ومع خالص التحايا لي عودة باذن الله...

حمدا على السلامه

ياخي ما مشكلة
خليك بالبيت
لكن الرسول كان
بعدتي من كيبوردك
يا شيري

العزيزة شيري

رغم خذلانك لمعجبيك ومؤيديك وتابعيك؛ ممن كونوا اللجان الانتخابية لحزب شيري؛ فخرجت عليهم بحركة التمرد؛ فذهبوا الي الغابة؛ ولم يجدوك هناك وسمعوا انك لا تزالي مع السريلانكية؛ وعلافوا انك تركتيهم لا قيادة سياسية لا عسكرية؛ ولا مشاركة في نيفاشه ولا فشفاشه؛ فاننا نرحب بعودتك.

هذا البوست من اجمل واروع واعمق ما قرأت في هذا البورد البايخ المسيخ اخيرا؛ والذي حتي سجيمان لياقتو ضعفت فيهو؛ في الشهرين الاخيرين؛ اي منذ اختفيتي - هل كنتي تحت الارض؟

عادل

مرحبا بالاميرة شيري

نورت البيت

ali

شيري
مرحبا بالعودة ،،
العودة دي مش المهندسين ،، أقصد العودة ،،
قلت ليك مية مرة خليك بالبورد ، الناس دي بتحبك ،، ما سمعتي كلام عمك ودقاسم ،،
امنحي البورد جزءا من وقتك ،،

سلام مربع

عادل عبد العاطي
هاهاهااههاه . تحت الارض مرة واحدة .. لا تخاف ياسيدي ، انا لست من العناصر المطلوبة بشدة ..
من قبل قوي (الظلامية) والانفتاحية والعدسات اللاصقة على طاولات المفاوضات في نفاشا وزقلونا . اذا تسربوا الى طايوقي وعرفوا انه لا يحمل الا (فقاعات) ارجعوها الى سبب ولعي الشديد بالكتابة ، وحينما نصبوا لي كمينا في ذات حروف .. قالوا انني لست من دعاة (الامبريالية) ولست من المحافظين الجدد .. ولست (انتي بايويتك) لدرجة تضجع (مناصبهم) فعمدوا الى زجي في خطوب الطبيخ ..
وبما انني لست مولعة كثيرا بالثورات الحمراء ولا التي تحت الحزام ولا تلك التي من سنة سيدنا نوح .. فقالوا كتر خيرها تلك المهترشة .. تركت لنا كثيرا من الخيرات ..
على الاقل سنعمد بطايوقها الى (فرن مايكرويف) ونرى ماذا ينتج لنا في درجة 78 فرنهايت ..
انا نفسي ، اتشوق لان اعرف ما الذي يفعله بارود ممتعض بشريان فتاة يستعر حتى الغليان
ومع ذلك باقية هي مع (الذين نجوا ) ...
سلمت ياسيدي لسؤالك وكتر خيرك

دقنه
اميره حته واحدة . ليتهم يمرون هنا .. ويقرأونني ..
كنت ساكون على ما يرام . .
سلمت ياسيدي

ود قاسم
اونكل ود قاسم

انهم يعهدون لي بكل ماهو متواطئ مع الدبرسة والانشغالية التي (تسيح) الدماغ وتوديهو في خبر كان .. ومع كل ذلك .. يتوقعون ان اقطع الطماطم فتطلع بامية .. وانت تعرف يا كراهة البامية لقلبي
سلمت ياسيدي

Quote: اهداء خاص الى اميراتي ابنوسة /جندرية /تماضر/ميرفت والاخوان علي الحلاوي /ايهاب الطيب / ابو يسرا .لسؤالهم عني

شفتى انا دى محظوظة كيف؟؟


اسال منك طوب الارض..وطوب الحيط.. وكل ما القى سيرتك استبشر خيرا..


سؤال فنى:: صحى دايرين (ياخدوك) ... ؟؟

تماضر نكهة الفواكه الاستوائية


سا استرد (من سرد) من بكان من انتهيتي ..
يقولون انهم لم يتفقوا حتى الان في سعري .. بعضهم ذهب الى ان يقدروني باليورنايوم لكثرة خطوبي .. وبعدهم قال ان (النبق) فيه شي من الخد الاسيل . .
وبعضهم قال ان وزني يتاقل دهب ..
هم احتاروا في امري
وانا الى الان لم اقرر بعد . . كم (تخارج) معاي البيعة
لانبري لهم برد طالما اعجبني وانا صغنتوته

يفــــتح الله
وبين البايع والشاري على الدوام هنالك رد ..يفتح الله

وحتى ذلك الاعلان الذي اظن انه سيستاخر حتى الاحتفالات باعياد
يونيو الانقاذية ... ثم اعياد الفاتح من ديسمبر
على العموم تلك قصة اخري مع اعياد الميلاد ..
اذ انني احتفلت بعيدي ميلادي في الفاتح من يونيو ..
هو لم يكن الفاتح بالظبط لكنه
قريب من الخمسة الاوائل
يمكنكي الان ان تقول لي
كل سنة وانتي طيبة

وانت برضو كل سنةوانت طيبه

اسمعهم (يكوركون) لي قالوا لهم رغبة شديده في زيادة (سلطة الاسود)
ولشدة ما اكره هذه السلطة التي تصنع من الباتنجان ..
يا الهي .. قطعت كبدتي ..
هم الرجال ديل .. ما بتحلى ليهم الا الاكلات التي تترم حد العمر وتنهش حباله الدائبة
قولي معاي يارب .. السيرلانكية ترجع من سفرها وماما تعتقني من هذه التدريبات التي تشبه الى حد كبير .. سجن الغواتنام

شيرى الدهب رخيص وانتى غالية...


المهم ( الشعيرية) ما تكون شوية..كلو ولا الشعيريى...دى طبعا في حدها الحد بين (العلمى) و(الادبى)..


ياخى انتى كلك فرح..


ومن كل قلبى ... اتمنى لك السعادة..والتوهج الدائم..

ووالله يلحق العريس ده يحرمنا من مليمتر نكهة فيك..الا نسير عليه مظاهرة من هنا لارشيف 2001 فى البورد..


لك اطنان محبة ...وقبلات صداقة...وربنا يسعدك..يا مصدر السعادة الازلى ...للجميع.

شيري الشهد
ورأيت أن أعرف عسلك الفوق عشان أفرق بين معزتك وبين معزة صغيرتي "شهد"،
حبيبة البي "وحقوق الطبع محفوظة لكي" سعيا نحو الإختلاف مع ما يحيطنا من عوالم لا تحترم حقوق الإنسان الاساسية ناهيك عن حقوق الطبع وخلافه.....
سعيدة بعودتك، فلتجعلي من العمق زينة لهذا المنبر "على الأقل صفحته الأولى".
وبيني وبينك والحلم "دريم" يتمدد النص الصديق "هاشم"

Quote: اول الحكي هل سيتفق الطرفان على نزع الالغام!؟ لكن من سينزع من صدرى هذا اللغم العام!؟ ومن سيحاسب آمر فرق الاعدام ويعيد الشهداء لسقف البيت وفى رمضان!؟ ومن سيقيم الحد على من ذبحوا الاسلام!؟ يا احفاد مسيلمة وزبانية الحجاج إن صادرتم ثورات الشعب وبلعتم قوت الناس وعلى باب المسرح اعلنتم عن ملهاة تدعى (انقاذ)

العزيزه شــــيري والاحبه في ملتقاك
..ســلام بالاشكال الهندسيه.....كافه

قالو لينا ما تقولو ..كافة الاشياء..بل..الاشياء كافه..بعد
الزمن دا كلو؟

بمناسبة المقادير..الحكايه الجايه دي حقيقيه..حصلت في بيتنا
زارنا صديق عزيز ومعاهو عروستو..بعد نهاية الزياره..وفي ونســـة
البــاب..العروس عجبها في العشا قراصة الحاجه الوالده..قامت
سألت اختي في حضور الحاجه عن مقادير ..القراصــه..أختي انخلعت
من السؤال دا..لكنها جاوبت ..تجيبي تلاته كبابي دقيق..كبايتين
مويــه..ربع معلقه..
..مع كل مقدار من المقادير الحاجه كانت بتقول حاجه واحده بس :

دا ما قراســـه دا....دا ما قراســه دا.

.................................

الحاجه يديها العافيه ...لمن تجي تسوي قراصه بتدخل يدها في
....جردل الدقيق...والمويه ..بالخرطوش ..هئ هئ هئ

.......................

مع عاطر الود..اعود بأذن الـلـه

........SHATAT

الزولة جدا شيري
والشوق الجاري عليك
أسمحي لنا انا نعلن اننا في المتن قبل المبتدأ نشتاق نكهه النعناع منك جدا ... ولا زلنا منذ غيابك لا نجد بابا نتاكية ونقرطع الشاي ونشتت
أما في المتن المبتدأ فالكثير والكثير من الابتهالات ان لاترتكبي هذا الغياب مجددا فانت مسؤولة مسؤلية كاملة عن مزاجنا الأبنوسي والعاجي والباذنجي
جزيل تحياتي للسرلانكية

والريد بالجد كدا نيلين

سلام مربع

شتات
انت عارف لو سألتني ، كنت حقول ليها كده
هاهاهاهههاه
حلوة حدا حكاية مقادير القراصة
سلمت ياسيدي للطله

زوربا السوداني الشفيف
انت ايضا كنت في حالة غياب
حاضر ولا يهمك يا سيدي .. كلك زوق يا شفيف ،
سلمت ياسيدي للطله وللسؤال

النمر تايقر
ربنا يخليك يا سيدي
وسلمت الف مليون للطله البهية

ود امي نوف
ربنا يجبر بخاطرك يا بت امي
وانشاء الله تسلمي من كل اذية
سلمتي ياستي للطله البهية

عبــاس
اسرتني الظروف
واياكم يا سيدي
ربنا يسهلها معاكم ومعانا
سلمت ياسيدي للطله

شروم
هاهاها ، غواتنام حتة واحدة ..
ربنا يستر علينا وعليكم ..
حاضر ياسيدي ، ساحاول ان ابقي
سلمت ياسيدي لللطله البهية

الغالية شيري
فرهد غيابك اغنيات
ظلت اراضي اللقيا بور
وينك ياست الغيبة الطويلة دي
والله العظيم اشتقنالك...

سلام مربع

تماضر

ربنا يخليك ياست الستات يازوق
وسلمت لهذه الامنيات الجزلات

ابنوسة

قبلاتي الى حبيبةالبي شهد
مع امنياتي الفائقة لها
بعالم سعيد ومشرق
انا هي التي تسعد على الدوام بذائقتك الانيقة
وانا هي التي يملا رئتيها من (الافاخر) ما تقصر معه
كل كلامات المتنبي ومديحه في سيف الدولة
كنت اقراه اليوم وتذكرتك ..
وقمت قرأت هاشم صديق مرة اخرى حتى اكمل متعتي
في هذا بذاك
كلاهما مبدع
وانت ايضا ..رائعة
لك كثير امتناني وبهجة حروفي
سلمت ياستي لهذا الطله الانيقة

شيري العزيزة

سلام وتحايا

والله مالحقت اقرا كلامك المنمق الفوق ده والله فاعذريني

لعدم المداخله..............

جيت والله اسلم عليك واهني وابارك


دمتي يا حبيبه


نوف

الغاليه شيري

حمدا للسلامه علي الرجعه

ربنا يفك اسرنا


لكن بيني بينك منو الاسرك ده

العزيزة شيري :

صبحك الله في رضاه

كم افتقدناك وكم افتقدك البورد عموما ، فمرحبا بك عودا حميدا طيبا
أرجو الا تعاودي الكرة وتغيبي عن البورد مرة اخرى والا اضطررنا لاتخاذ
إجراءات احترزاية باعتقالك وربما ترحيلك الى غوانتنامو او ابوغريب

ولك تحياتي وودي

شيري..

ليك وحشه والله ..

انت قاعده تمشي وين ؟؟

كله العالم جاء
جئت انت...
فأذا العالم جاء
المدارات ، خطوط الطول والعرض ، وخط الاستواء
وبحار العالم الخمسة جاءت ومجرات السماء
جئت انت ...
فاذا المريخ والزهرة جاءت
وعطارد ونجيمات الثريا
عشن شكا ابديا
بين ومض وانطفاء
فأذا الفصول بين صيف وخريف وشتاء
جئت دفء وغماما
جئت بردا وسلاما ... ورزازا وضياء
جئت انت ....
خطوك الواثق ايقاع الجياد العربية
شعرك السادل ليل فى الصحارى العربية
جئت كنزا من اساطير القرون الاسيوية
اننى ابصر فى عينيك تمثالا للعز عاش مجهول الهوية
اننى اقرأ فى صدرك تاريخا وعزا
حيث ترتاح القباب الاموية
وارتعاشات على كفيك كانت عفوية
ارهقتنى ...اغرقتنى ...مزقتنى ...احرقتنى..
اوقدت فى قلبى المشتاق نيران المجوس
اشعلت حولى الهوى سيرتنى مثل خط الاستواء
جئت انت فأذا العالم جاء
كله العالم جاء
كلها الارض تغنت والسماء
قل هو الله احد ...قل هو الله احد

شيري
عارفة انك من يوم نزلت البوست دا وانا بتحاوم ما قادرة ادخل ارد ؟
كيف نهون عليك قدر دا ؟
لكن خلاص بلاش ملامة
حمد لله على السلامة
لكن عليك الله تاني ما تعملي كدا

سلام مربع

تمبس
قاعدة امشي السودان واجي
سلمت ياسيدي للسؤال
وربنا يسلمك

فناني وموسيقارنا
حمزة سليمان

ربنا يجبر بخاطرك يا فنان ياشفيف
دائما جابر بخاطري ..
سلمت ياشفيف على هذا الاحساس النضير
وربنا يقدرنا على جزاكم
سلمت الف مرة للسؤال والطله البهية

الجندرية
الرصينة
حاضر يا حبيبة البي مايصير خاطرك الا طيب
ظروف وحات الله يا جندرية . قول ربنا يفك اسرنا
والله ما بيدي ، الا لكنت سكنت ليكم في البورد عديل كده
واملاهو ليكم هترشة وخليتكم تشتوا للبحلكم مني
سلمت يا عذبة لهذه الطله البهية
وربنا يقدرنا على جمايلكم

Quote: الغالية شيري فرهد غيابك اغنيات ظلت اراضي اللقيا بور وينك ياست الغيبة الطويلة دي والله العظيم اشتقنالك...

شيري شنوفاتحة لينا كده عشان قلنا ليك مشتاقين..

Quote: سؤال فنى:: صحى دايرين (ياخدوك) ...

تماضر ياخدوها...يسمع منك الله ..بس ما ياخدوها مننا.....وانت يا ست الهترشة تسلمى
وعليك الله ما تغيبى..بنشتاق ليك شديييييييييييييييييييييد انت مجنونة والا شنو؟؟؟؟

شيرى
خليك بالبيت واقرى الكلام المدهش ده
http://www.kikah.com/indexarabic.asp?fname=kikaharabic\...orytitle=محسن%20خالد

شيرى
يا بت انتى قاعدة وين فى البسيطة دى؟
عارفة ...؟
المكان ليس مهماً
المهم انو انا عازمة رقبتى عندك
مقيل من النوع الاصلى
وعلى هامش القيلولة عايزة ما مقداره تلاتة شهور مكرونة
انت قتى مكرونة بالفرن
وبراك فنحتى السيرة
فى زول اسمو راغب علامة ؟ الزول ده مرة الله فتح عليهو فى الغنا و قال " نقطة ضعفى الوحيدى "
واللبيب بالاشارة يطبخ ُ
اها .

سلام مربع

Tiger18
معقول افتح ليك يا رائع انت
بس انا كتبت اسمك بالعربي تايقر عشان كدة مالاحظت
سلمت ياسيدي للطله المباركة
ومعليش لهذا التقصير ..

صديق الموج

لا ما تخاف ياسيدي لن ياخدوني .. لان تمني لم يعجبهم
والبقالة كانت مليانه ..
هاهههاهاههاه
سلمت ياسيدي للطله وسلمت اكثر للسؤال ..


الاستاذ عادل عثمان

عارف يا استاذ عادل ، لن ابالغ واقول هذا من اجمل ما قرات في الشهور الاخيرة بعد سيرة طلال عفيفي
سلمت ياسيدي للطله البهية
ويخليك يارب

نجلاء التوم

البت الفنانه الشفيفة .. الرقيقة
عندنا ..
بخروني ، بخروني ..
فهذا الجمال كله يغمرني وضيوفي
ربنا يخليك يا نجلاء
وحقيقي حقيقي انا معجبة جدا بكل ماتكتبينه انت وعبير خيري
ربنا يخليكما لينا يارب
سلمت ياستي لهذه الطله الجميله

شيرى العزيزة
شكرا ً على الحفاوة
عزومتى خبرها شنو ؟ ولا انتى مشغولة عننا بالصفقة اياها
مكرونتى فى رقبتك يا زولة كان عرستى ولا كان " وهبتى نفسك للقضية "
بس كان فى زول قال ل القضية دى شنو كان ارتحنا .

سلامات
وعوافي
طولتي الغيبة
وفجر الريد اشتهي جياتك
حاجة عجيبة..
شفتي لون الفرح السبق الغيمة
وبشر بيك...
رقصة بورد فرحان ...
وهلت خير شايلاهو صبية..
......
هل فكرتي كيف الحال في غيابك..
وكيف الشوق الهبًد صدر الريد بي نصيبة(مصيبة)
يوم خشينا لقينا خطاك
راسماهو طريقا
المهم ياشيري
حمدا لله علي سلامتك
واكيد نكهتك هي هي
بس قولي لي السيرلانكية تكتر من الشاي بي النعناع وكدا عشان قعداتك في النت ح تطول
مرحي بك يامرحي

سلام مربع

نجلاء التوم
ولا يهمك يا ستي ، وليك علي اسوي ليك وبايديني ديل
حلاة مكرونة بالبشمللي حاجة ما تخلص ..
مع انو موش تخصصي ولا في حاجة تنتمي الى جنس الطبيخ ذلك من عين الحقيقة
ومع ذلك .. يقولون ان يدي طاعمة واحتاج فقط الى كورسات مكثفة حتى اغدو مساعدة طباعة من الدرجة الطيش . لكن اهو عشان خاطري اكيد ح تاكلي ما عملته يداي .
سلمت ياسيدي للطله البهية

ود رملية ..

عاد دا كلام يا ود رملية
ياصديقنا القديم ...
انا متواجدة في النت من مدة ..
لكنك انت الغائب ..
طمني عليك ، انت كويس
موش مشكلة ، السيرلانكية تغيب عنا لتمتعها باجازتها الثلاث سنوية .. غير اني لا اقصر في (نفيستي) خاصة مع كائن يسمي الشاي ..
سلمت ياسيدي للطله وسلمت اكثر للاطراء ورياحين تراحيبك الجميله

شيري الهتروشة ... طبعا بطريقة (دز عوض إبراهيم عوض) الذي يخلع ضيوفه ويطير قلبهم بتلك الطريقة العجيبة
قعدنا في البيت ومنينا نفسنا بأكلة شهية من يد شيري الطاعمة
ولكن يا خسارة الطبخة باظت ولا لقينا أسبكتي بيتوني ولا معكرونة بصلصة الصويا ولا صلصة الطماطم حتى
اتركي المهمة للست الوالدة أم شيري وسوف نطلب منها ام رقيقة بكسرة وسنجدها اطعم من الاكلات التي يعرضها الشيف اياه
الله يديكي العافية وتعيشي وتطبخي

حبيب بلدو
سلام مربع


ياخسارة ...
كان نفسي اعمل ليك من عمايل يدي وحات عيني
لكن للاسف استعجلت و(كبيت) الزوغة ..
انا اعتبر ماقلته (كب زوغة)
شكلك كده ما عندك ثقة فيني
على العموم راحت عليك
ماليك في الطيب نصيب
سلمت ياسيدي للطله البهية

ست الدنيا ...شيري
سلام تكعيب...وينك انت
بقيتي تغيبي كتير...
رجاء لاتكثري الغياب حتي لايدمينا الشوق...

سلامات
وعوافي
شكرا شيري
واذا دار محور سؤالك عني فانا في تمام الصحة والعافية ولاينقصني شيء سوي رؤياكم الغالية
علي غرار اسلوب الرسايل القديم ياشيري علي كل حال نورتي البيت

tiger88

ٍسلام مربع

مع الحاصل دا ، قول لي شنو
ما بخليك تغيب ؟؟
سلمت ياسيدي للطله وسلمت اكثر للسؤال
يخليك يارب

ود العجمي

اما الحال فكما تراه ، غياب ، ووكسات ، وقلة حيلة
لاشيء جديد في البلد ، العمدة لسعة على غيه القديم
وامونه مصره ما تعرس عريس الغفلة
....
هاهاهاااه
سلمت ياسيدي للطله

شيري والله شحتفتيني وأنا عشان ما تشوفي الامتعض على وجهي من حموضة الجبنة مع زيادة الملح كبرت الزوغة وإذا قعدت وأكلت أكيد حأجاملك
إنتي وصي الست الوالدة تفرك ملاحها بالكسرة وختي صينية الاسبكتي وإذا مافي زول مد أيده وضاقها ما مشكلة برميل الزبالة موجود
تعرفي أحدى أخواتي كانت مهتمية بالقراية وبس لحد ما كملت الثانوي يمكن ما خشت المطبخ والوالدة كل يوم في إحتجاج ... البت دي ما حتنفع ما اتعلمت العواسة ما اتعلمت الطبيخ ... المهم الوالد كان يناديها يقول ليها أمشي عوسي طرقة عشان ترضي أمك ... وتعوس طرقة وكل خمس سنتمتر قطعة والوالد يشجعها والله دي أحلى طرقة كسرة أكلتها في البيت دا
المهم حالياً هي أمهر وأشهر طباخة على مستوى المنطقة
وإنتي ما تخافي بكرة إنشاء الله تتزوجي وتمشي بيت العدل وتكوني أمهر طباخة

سلام مربع

حبيب بلدو

والله مافي زول في البورد رافع معنوياتي في الامور الطبيخية غيرك
حتى امي ، لا تثني على ما افعله البته .. كان رضيت ولا بكيت امامها بالدمع الثخين
لكن من حين لاخر ، اسمع تشجيعات من اخي الكبير ، حتى ابي يحذرني في اليوم الف مرة من ان اقترب من المخزون الاستراتجي بتاعهم .
صائحا فيني اختي المواقع الاستراتيجية يا زفوته . وهذا هو اسم الدلع بتاعي
وها انت تنفخ فيني الروح ، وتبشرني بمستقبلي كبير في المطبخ
سلمت ياسيدي لهذا التفاؤل
ويخليك

نسأل عنك شيري بشدة مقاس 42 سوداء اللون برمائية وبالضرورة made in china وقلت يمكن لو نكت ليك موضوع قديم تظهري وتباني وتبدعي كالعهم بك والجماعة قالوا بتطلعي إنتي من غابات ومن وديان وبس
طبعاً ما حا أتعب روحي وأقرأ الموضوع من طقطق لي سلام عليكخم خاصة وأنني مارس هواية عجيبة في القرأة والقرايه أم دق تسمي القفز إلى النهايات أو قراءة الجريدة من الشمال لليمين أو من النهاية للبداية لا فرق ، فالأخبار واحدة والموت واحد والله واحد لا شريك له.
لذلك فكرت أن أتمسك بعنوان المقال بإعتبار أن ذلك أضعف الإيمان وأضعف من غنماية ناس حاجة حليمه جارتنا والتي علق عليها أحد المبسوطين من شد هزالها قائلاً والله الغنماية دي إلا تحلب لبن بدره. عليه فأن محور حديثي – حلوه ولا ما كدي – سوف يدور ويلف حول خليك بالبيت ، ولما كانت قعدتي في البيت تعني عملياً مواجهة أم أربعة وأربعين وجهاً لوجه ولما لم أكن منضوياً تحت أى برنامج رعاية صحية أو ضمان إجتماعي بحكم إن البقتل الله والبحيي الله ، ولما ينجلي الليل وينعس ساقي الخمر كما يقول المطرب الكبير عثمان حسين ، ولما للتلفزيون من تأشير سلبي على الصغار والكبار سواء بسواء وبخاصة باقة الأواخر والتي من ضمن قنواتها تلفزيون السودان الذي حشد إعلاميين يشار إليهم براية رجل الخط معلناً تسللاً واضحاً أو شرود كما يقول أهل المغرب العربي ، فهناك دكتور حمزة في برنامجه الشيق وأناقته البديعة وتقديمه لسلس لبرنامج كامير أسكوب والذي يجبرنا فيه على لحس الكوع رغم أنوفنا وأنوف جميع المتفرجين حتى يتكرم علينا ويتركنا نشوف الفيلم بعد أن تكون كبدنا قد إنهردت ، وهو بالمناسبة برنامج يومي كتب علينا أن نشاهده كما كتب على الذين من قبلنا لكن لا تفرحوا فإن كان هذا البرنامج يتوقف يوم الجمعة حتى يتمكن حماميزو من ترتيب هندامه يأتينا من لم نزود لا بخبر ولا بدون خبر ذلكم البطل الأولمبي كمال حامد صاحب أطول برنامج يبث على فضائية أو أرضية عالم السخافة أقصد عالم الرياضة والبرنامج يمتد لأكثر من مائة وعشرون دقيقة وحتى اذن ما بيعتر ليهو وهو فاق برنامج أوبر وينفري الشهير Oprah show وطبعا يتكرم الأستاذ ويتنازل عن تقديم البرنامج في حالة سفره مع بعثة الفريق القومي إلى زامبيا أو بعثة الهلال إلى يوغندا أو فرقة المريخ إلى القاهرة أو مؤتمر إتحاد الكونكاكاف وأو الفيفا أو سين صاد في الواغ الواغ ، هذه بعض الأسباب التي تجبرك على مقاطعة التلفزيون والدعاء على مخترعه بالويل والثبور.

where is she ri?/