موسي ناصر( ود نفاش )

و نحن صغار في الاوليه كنا نحكي القصص و النكت علي ودنفاش و كنا نظن انها شخصيه خرافيه . الي ان شاهدته بلحمه و دمه و هو يعمل في المحطه الوسطي في امدرمان و في بار ليمينيوس اليوناني الملاصق لقهوة شديد من الجهه الشماليه و اسمه الاصلي موسي ناصر و يسكن فريق الدومه في ود نوباوي و هو جار لاشهر ظرفاء امدرمان كمال سينه الذي تأثر في صباه بود نفاش .
و بما ان موسي هو خال اصدقائنا و جيراننا محمد و عبدالرحمن احفاد الشيخ دفع الله صاحب القبه المشهوره في وسط امدرمان . و السيد عبدالرحمن كان يستدعي موسي و يساله عن حال امدرمان و البلد و ماذا يقول الناس . و لقد قال للسيد عبدالرحمن مره ( الناس يا سيدي قالوا انته خليت درب ابوك ، ابوك كان بياكل القرض و متكرب بالبرش انته يا سيدي بقيت ساكن في صرايه و تشرب المويه البارده و راكب رولزرويز ) . و السيد عبدالرحمن لم يكن يغضب و يقول له ( قول للناس يا موسي الزمن اتغير، انا كان اتكربت بي البرش حسه ما في زول بسمع كلامي ) .
كل امدرمان كانت تحب و ترحب بود نفاش . عمنا هريدي كان صاحب الدكان في الركن الشمالي الغربي لجامع امدرمان العتيق و هو من اشهر تجار امدرمان و كان قديما يجالسه الاستاذ احمد محمد صالح الشاعر . و عندما صار عضو في مجلس السياده و هذا بمثابة رئيس الدوله منعته مراسيم القصر من الجلوس امام دكان هريدي . و كان يطلب من السائق ان ياخذ تخريمه كبيره و هو في طريقه الي القصر مارا امام دكان هريدي و يطلب من السائق ان يهدئ السرعه او يتوقف قليلا . و ينظر متحسرا الي المجلس و يقول ( نعمل شنو ، ما منعونا ) .
هنالك مثل سوداني ، فعندما تريد ان تتكلم عن ضخامة شئ فيقال ( ده و الله حمار هريدي ما يشيلو ). و كان للعم هريدي حمار ضخم بشكل غير اعتيادي . و اقنع ود نفاش عندما كان صغيرا العم هريدي بان ياخذ الحمار الي ابروف للاستحمام . و الحمير وقتها تزود بسرج جميله و لجام و فروه مرعد و تؤخذ الي الحلاقين مثل اعمامنا اولاد ايوب و العم عبدالعزيز والد سيد عبدالعزيز شاعر الحقيبه .
و اشتري ود نفاش كرتله (نوع من اليانصيب ) و طلع الحمار في الكرتله و بعد مده اتي البعض لتهنئة العم هريدي فعندما سؤل ود نفاش عن نتيجة الكرتله قال لهم ( عم هريدي كسب الكرتله ) .
العم هريدي كان كذلك متذوقا للنكته و يحب القفشات . و قبل العيد و في يوم الوقفه كان الناس يعرضون البضاعه في الترابيز الضخمه امام المتاجر . فنصب احد معارف العم هريدي تربيزه امام متجره و كان يبيع شباطة طهران و هي شباطه مخلوفه من المطاط ، كانت في رجل اغلب الناس في بداية الخمسينات حتي النساء . فاتي رجل عجوز و بدأ في تقليب الشباطه و صاحب الشباطه بعيد و كرر عملية التقليب لمده طويله . فساله عم هريدي عن طلبه . و عرف انه يريد شبط لحفيده و عندما سؤل عن مقاس حفيده لم يعرف و لم يعرف سنه بالظبط . بل قال (في المدرسه هو بقرا جزء عم ) فقال العم هريدي ( اها الشباطه دي كلها من قد سمع و لي فوق ! ) .
في احدي المرات عندما خرج السيد عبدالرحمن من القبه بالسياره كان موسي ود نفاش يقف عاري الصدر باسطا يديه . فنزل له العم باب الله الملازم للسيد عبدالرحمن و بالاستفسار قال ود نفاش ( قالوا سيدي اتبرع للصليب الاحمر بي 500 جنيه ، الصليب الاسود ده عاوز ليه 5 جنيه بس !! ) .
ود نفاش اشترك مع صديق و اشتروا كومر من النقل الميكانيكي ملجن بي 170 جنيه و قاموا باصلاحه و الحقوه بدائرة المهدي و بعد دفع البنزين و اجرة السواق يتبقي لهم مبلغ يقارب الجنيه يكفي لمصاريفهم . و لكن عندما استلم السيد الصديق مسئولية الدائره تخلص من كل السيارات المستأجره . فذهب ود نفاش و صديقه للباخره الطاهره التي كانت ترسو جنوب الصهريج و شاهد السيد عبدالرحمن نازلا السلم حافيا و في صحبته خواجه الماني . و قال السيد عبدالرحمن لود نفاش ( يا موسي يا ولدي ده يوم جميل جدا ، الخواجه ده اسلم علي ايدي ) ، فقال ود نفاش ( مافي فايده يا سيدي ، انته الليله دخلته واحد الاسلام و السيد الصديق مرق اثنين !! ) .
شقيقي يوسف بدري كان متشددا في تدينه منذ صغره و قبل ان يبلغ الثامنه عشر كانت له لحيه كثه و قال له ود نفاش مره في بيتنا ( يا يوسف يا ولدي الدقن دي شنو ؟ ) فرد يوسف بحده ( رجاله ) فضحك ود نفاش و قال ( يا يوسف يا ولدي الصوف ده كان فيهو رجاله كان بقوم في ...؟) . و صار هذا مثلا امدرمانيا مرادفا للمثل الاخر ( الشعر كان عزيز ما بقوم في ...) .و هذا ما يردده اهل الصلع .
سمعت من عمي محمد بدري و الذي هو صديق لود نفاش ان والدة موسي جرته للسيد عبدالرحمن عندما كان صغيرا لكي يعطيه الفاتحه لكي يوقف جنه و شيطنته . و عندما ذكرت الوالده انه يدخن السيجاره الخضراء صفعه السيد عبدالرحمن و اطار سنه فطلب من العم باب الله ان يعطيه خمس جنيهات . و عندما قبض موسي الخمس جنيهات ادار وجهه قائلا ( واحده تانيه بي جاي يا سيدي ) . فضحك السيد عبدالرحمن بشده و قال ( الله ينعلك يا مطموس ) .
قديما في امدرمان كان من يتبول او يتبرز في الطريق يؤخذ الي التمنه او الظبطيه و يغرم ريال و تلك كانت سياسة برمبل الذي استمرت حتي بعد خروج الانجليز و هنالك قصة القروي الذي حضر لامدرمان و اكل ربيت بقرش و عندما قضي حاجته اعتقله البوليس وبعد رجوعه لاهله سالوه امدرمان كيف فرد ( و الله كويسه بس تاكل بي قرش و ....بريال !! ) .
و بينما ود نفاش يتبول احس بشرطي يقف خلفه فانتقل بضعة امتار و واصل و عندما طلب منه الشرطي ان يتبعه الي المركز قا ل ود نفاش امام الناس الذين تجمعوا ( انا بلته لاني شفته البوليس قاعد يبول ، اهو ده بولو اهو ) ، و عندما انكر البوليس قال ود نفاش ( اها يا جماعه في زول ببول في محلتين ؟ ) فاسقط في يد البوليس و ترك ود نفاش في حاله .
في سنة 1960 حضرت محاكمه لود نفاش في مجلس القضاة الاوسط جنوب المجلس البلدي و مجلس القضاة يتكون من قضاة في الدرجه الثالثه من اعيان امدرمان منهم عمنا عبدالرحيم محمد خير صاحب مصنع الريحه و عمنا الصايغ و اخرين . ود نفاش كان قد قبض عليه و هو يدخن سيجاره . و اذكر القاضي و هو يقول له ( ما حتخلي شراب الدخانه ؟ ) ، فرد موسي ( اي حاخليها ، هي ذاتها بقت تعمل لي ضربة قلب ، الا يكون عندي قلبين واحد للدخانه بس ) . و ضحك الجميع و حكم علي ود موسي ب150 قرش غرامه ، تدافع البعض لدفعها .
موسي كان يدخن بطريقه مميزه و هو عادة يضع السيجاره خلف ظهره و يتمشي ثم يشفط نفس . السواري الذي قبض علي موسي من المؤكد لم يكن من ابناء امدرمان . و موسي لم يسمع حوافر الحصان و عندما قال السواري ( جيب السيجاره دي يا زول ) ، قال موسي ( اتفضل بس قول لي انته حصانك ده ملبسه ربر ؟ ) .
في حوادث ودنوباوي 1970 و القتل و الرصاص كان شقيقي بابكر بدري مع عبدالرحمن ود الشيخ في ودنوباوي بدافع الفضول و عندما لعلع الرصاص هربوا و احتموا بمنزل خاله ود نفاش في ودنوباوي و عندما تاخر ود نفاش بدات النساء في العويل والبكاء و صار المنزل في حالة مأتم و في المساء حضر ود نفاش و لم يكن داريا بالحاصل فلقد كان في حالة مقيل مع بعض الاصحاب في ابروف . فزجر النسوه و طلب منهم ان يكفوا عن البكاء فقالوا ( هي ما كنا قايلين قتلوك في الحرابه ) فقال ( يكتلوني في حرابه ليه انا ود النجومي !! ) .
نكتفي لان سيرة الحبيب موسي لا تخلص .
شوقي

ya slaaaaaaaam ya dr shwaygi
really you made me laugh 2 much
a wonderful person like you should be always with us,,,
you got great pure heart
mashallh ,
please 3mao shwagyi ma t7rmna from you writings
im addicted 2 them
akhook alsgeer 3moorrrrrrrrry
hhhhhhhhh
love you much

يا عم شوقى
تكتفى شنو ، هو على كيفك
صاحبك كمال سينا كان راجع بعد حظر التجول من قييله فى بحرى مع جماعه اصحابه ايام كان حظر التجول الساعه 6 مساء مسطول و سكران ، قبل التفتيش فى الكوبرى شالته نومه، لمن صحا كان العسكرى شابك الجماعه افتح ..انزل سينا قال للمعاه انتو لعبتو كنكان تانى والا شنو. العسكرى مات بالضحك واخلى سبيلهم.

الأســتاذ / يوسف بدري

" كان في ود نفاش .. " هكذا تبدأ النكتــة دائماً. لم أسمعها بأي صيغة غير تلك مثل "كان هناك رجلاً يدعي ود نفاش " أو نحو ذلك. و كأن ودنفاش صفة و هوية و ليست إسماً لإنسان بشخصه، كأنك تقول "كان في واحد مسطول " أو "كان في رباطابي".
أذكر منها "كان في ودنفاش راكب ليه عجلة، دقش ليه مرة، القفة و قعت من العجلة و تدفق الخضار. المرة قالت ليه "أجي؟؟؟" فرد عليها "ما تجي .. بلقطوا براي"
و"كان في نفاش دخل القراش...... إلخ"
وبلا شك يا شوقي كانت حكاوينا و نكاتنـا و نحن في الأقاليم تختلف عن نكاتكم أنتو ناس أمدرمان الذين تعرفون مميزات و صفات شخصية "موسي" و أشكال الطرافة التي تعبر عنها. وبلا شك كانت نكاتكم "المؤلفة" أقرب إلي شخصية ودنفاش.
بقي أن أضيف أنني سعدت جدا بهذا التوثيق لـ "ودنفاش" الذي يعد معلما بارزا من معالم الحياة الإجتماعية في السودان طوال النصف الثاني من القرن الماضي.
هل مازال حيـــاً يا أســتاذ شــوقي؟

عمر يا ولدي كيف حالك .
ناس عمك موسي ديل كانوا حلوين و ساهلين ، سهلوا الدنيا الصعبه و ضحكوا الناس و ما طلبوا حاجه من الدنيا غير الستره و راحة البال .
و لك التحيه
شوقي

الابن احمد البشير
لك التحيه .
و الله حقيقه ماعلي كيفي . لكن انته قادر تتخيل انو انا لمن اكتب عن الناس ديل بكون عندي احساس بالالم قدر شنو ؟ .
عشان خاطرك يا غالي حاكتب ليك بعد يومين عن عمك الخواجه او كمال سينه رحمة الله عليه .
شوقي

خالد الايوبي العزيز
لك التحيه و الموده . موسي من مواليد بداية العشرينات و انتقل الي جوار ربه بعد ان امتع الناس و اضحكهم . رسالته كانت اسعاد الاخرين ، لم يوفر مالا . مات كاغلب اهل امدرمان تاركا الدنيا كما دخلها . لم يترك سوي الذكري العطرة .
شوقي

up
wa kman up

ya 3mo shwagy niseet
dayir arsil laik email
bs amlta laik add bs ma shayfak fe my list pls aktb lai emailak hina
ana 7agninak lagayat ma tktbo
hhhhhhhhhhhhhh
im waiting

العزيز شوقي
شكرا كثيرا لما تمنحه لتاريخ أمدرمان من ترجمات إبداعية .. وشكرا لما تمدنا به من خامات لابد سنكتبها في يوم ما ..
لكن .. من أين جاء لقب ود نفاش ؟ الذي لصق بموسى ناصر .. وما هو أصل موسى .. أعني هل هو أمدرماني صميم أم مهاجر من مكان ما في السودان
محبتي .

شوقى العزيز...عليك الله كان ما خرمت غلى احمد داؤد والسر السفيه وكاك وود مرجان

وحسن عبد الصمد حسن العسكرى...وبالمناسبة عم باجورى يبقى عمى يا استاذ شوقى

وسوف افتح له بوست عما قريب..رحمة الله تغشاه وربنا يوسع قبرو فقد كان ايضا

احد ظرفاء امدرمان ولنا عودة،،،

عمنا العزيز شوقى بدرى
اين انت ايها الرجل؟.
اليومين القلتهم فاتوا و بوست الخواجه كمال سينه لسه ما نزل. انشاء الله المانع خير.
و هاك دى يمكن تحفزك على الكتابه

ذكر لناالعم الاستاذ عبد الرحيم الشيخ صاحب سينه و دفعته فى المدرسه الآتى
" كنا لاعبين فى دورى المدارس وبعدين سينه قام مسك الكوره و حاور الدفاع والقون وبدل ما يدخلها فى القون بقى يضرب الكوره مع خط ااجير بتاع القون بحيث انها تمشى وترتد ليه تانى. الاستاذ بتاعهم كورك فيه ده شنو يا ابن الكلب , سينه قال ليه داير ادخل الجوانى فى الاول.
فى انتظارك يا جميل

العزيز امير
ود نفاش امدرمانى مولود فى امدرمان ومولود فى ود نوباوى وهم انصار والاسم ود نفاش له اكثر من تفسير ولكن ليس هنالك شئ مؤكد لماذا سمى ود نفاش . وكان فرده العم عبد المحمود الذى هو ابن الشيخ غريب الله وصار شيخا ولقد تزوج العم عبد المحمود شقيقه موسى فالعاده قديما ان زولك يقيف فى طهورك ويكون وزيرك فى عرسك او تتزوج اخته ويبردك ويشيل عنقريبك . وكان كذلك صديقا لعمنا محمد بدرى وهم من مواليد بدايه العشرينات .

الابن احمد البشير
يا سيدى نزلنا بوست الخواجه .
الاخ عبد الرحيم الشيخ هو شقيق ابراهيم الشيخ رحمه الله عليه وهو من ظرفاء امدرمان ابناء الوالده النخيل التى كانت مشهوره فى امدرمان ووالده فاطمه الشيخ والده محمد والفاتح ومصطفى النقر الذين كانوا من مشاهير كره القدم محمد اكبرهم ولعب فى المورده وهو دفعتنا . رحمه الله عليه . صدمته سياره فى امدرمان وهو عائد بالعيش للمنزل ولم يتعرفوا عليه فى امدرمان التى اختلت موازينها وبقى جثمانه طيله اليوم فى المستشفى والمنى وابكانى خبر موته وقلت .

ود فاطمه بت الشيخ



إتصارعنا جمب البيت وإتطالعنا تحت القيـــــف
وبربطنا دايماً دم . وأصلك كريـــــــم وعفيـــــــــف
ما خفتا يوم من ذول ، وما فيك ابداً قول
لكن الزمن غدار الشال أمير ( الدار )
ود فاطمه بت الشيخ ، يلموه كأنوا قشيش ؟!!
سلم علي إبراهيم الكرموا كان بالهِيـــــن
البركه فيك يا رحيم ويسلمنا عز الدين
هامات دوام عاليه حتي النخيل طايله
مصطفي الدوام صافي , الطبعوا ما جافي
ديل فوارس أُم در ناس النقر وبدر
حتي الصغير صالح والباب دوام فاتح
بكيت عليك شديد وانا القالوا قلبوا حديد
كل ما أفكر فيك يوجعني إني كنت بعيد
قالوا ما عرفنا ما شافوا فيك فارس للفريق حارس ؟
كيف يشيل أوراق ده الطيب الاعراق
ما إسمه كان معروف وما بكتبوه بحروف.


شوقي بدري.......

العزيز صديق الموج

شكرا لتذكيرى بهؤلاء الرائعين سأرجع لهم وربما فى بوست منفصل . تحياتى لابن اخ باجورى الامدرمانى العظيم لك الود والتحيه ..
شوقى ..

أستاذنا الرائع شوقى بدرى

كلما أقراء إسمك أستعجل الدخول إلى البوست ليقينى من الإرواء

فى داخله لإشتراكى معك فى ذات العشق الأمدرمانى

مع تقديرى و إحترامى

أحب أم درمان في شخوصك التي تؤرخ لها، رغم أنني إقليمي، إلتحقت بركب الأمدرمانيين في هذا الزمن الأغبر
وفي إجازتي ذهبت إلى خالي العزيز حسن الشايقي "عليه رحمة الله" الأمدرماني الجميل، الشايقي الذي أحب الأنصار وأحبوه رغم القطيعة التاريخية بين الشايقية والأنصار، وقد ظل يعيش بينهم في ودنوباوي قرب مسجد السيد عبدالرحمن المهدي إلى أن إنتقل إلى رحمة الله العام الماضي.
وقد ذهبت إلى خالي لأستعرض معرفتي بأمدرمان متسلحاً بحكاوي وشخصيات الجميل شوقي بدري، فوجدت أنه يعلم الكثير والكثير عن هذه الشخصيات، وعن آل البدري....فلك التحية أخي شوقي وللخال العزيز حسن الشايقي المغقرة والرحمة.

عمنا شوقى بدرى
تشكر على هذه الاستراحة الامدرمانية والذكريات عن احد ظرفاء امدرمان (موسى ودنفاج) طبعا سمعت بالكثير عنه ولكن ذى ما بقولوا سمح الكلام من خشم البعايش )
ولكن حسب علمى انموسى ودنفاج له اصول مصرية ما مدى صحة ذالك
وطبعا موسى ودنفاج كما ذكرته كان يعمل بالبار وقالوا صورته كانت فى زجاجة الشرى الكلام ده صاح والله اشاعة
لك تحياتى

لي فوق

الاخ طه ... شكرا على المداخله يا سيدى واتمنى ان اواصل عندما يسمح الوقت ونكتب عن الرائعين فى امدرمان والسودان .

نادوس 2000 .... رحم الله خالك حسن الشايقى انت يا ابنى كذلك امدرمانى لان امدرمان بلد الجميع ليس هنالك سودانى ليس عنده حبيب او قريب فى امدرمان .

بلدى يا حبوب .... يا سيدى موسى ناصر ما عندى ااااااى صله بالمصريين نسوان بيتهم مشلخات واهلوا انصار وافتكر جموعيه لانو صديقه وزوج اخته عبد المحمود الشيخ دفع الله الذى صار شيخا ولهم قبه وحيران ونوبه هم جموعيه والحى فى امدرمان سمى على الشيخ دفع الله وهم اهل امدرمان قبل ان يأتى المهدى الى امدرمان وينزل فى ابو سعد بلد الاستاذ موسى المبارك ود المك وهو آخر من شيع الناس جنازته بالنحاس والخيول رحمه الله عليه كان مدرسنا فى مدرسه الاحفاد الثانويه وعضوا فى الوطنى الاتحادى .
ودنفاش كان يبيع الشرى ولكن لم يكن هنالك شرى ود نفاش الشرى كان ابو رحط او الجنوبيه 19 قرش القزازه صارت 23 قرش وابو تركتر . والنوع الجيد شراب البرجوازيه كان الشرى القبرصى الزجاجه 37 قرش ونص ارتفعت الى 45 قرش وسط احتجاج شديد من كبار الافنديه . الويسكى عند ود نفاش كان 3 جنيه و65 قرش . عرقى العيش 20 قرش البكرى عند بنت احمد فى ميدان الربيع بى 25 قرش . عرقى البلح وارد الشماليه 35 قرش اذا وجد . احد سفرءنا الاوائل فى لندن كان يقدم عرقى البلد فى حفلات الكوكتيل . بالمناسبه انا لحدى حسه لا كتحته لا انصقعته بس كنت ببارى الناس . البيره ابو جمل 17 قرش ونص من البار وفى الجناين بى 25 قرش وهى انتاج محلى والقزازه كبيره ترحمن اكبر من المستورد حوالى نص لتر . امستل وابو طبله والهاينكن كانوا بى 25 قرش من البار ... ولك التحيه .

الاخ امير .... بخصوص الاسم ود نفاش السمعتوا عن تفسير الاسم لا يخلوا من بزاءه ولكن لست متأكد من صحه الكلام . ولك الشكر

والله يا عم شوقي امدرمان لها تاريخ ناصع مع الظرف والظرفاء لكن لي تسأل لماذا لم يقوم كتاب أمدرمان بكتاب عن نوادر وقصص ظرفاء امدرمان وهم كثر ؟؟؟

وتاني في حاجة عليك الله مسعر الشربة دي كدة وما بتشربها يااما يتاع ضرائب كنته او (طيارة)


خالد

الابن خالد لك التحيه و الموده
عمك ما كان بكتح و لا بنصقع ، لكن دخلته بيت اي مخنجي في امدرمان و قعدته في ( بيوت الدم ) الانادي . لانو ما عاوزين نسمع بالدنيا قلنا نعيشا . و الجماعه كانوا بدفعوني العدل او النصيب في الشراب . بالمناسبه الشري القبرصي الفاخر كان اسمو بيل دراي يعني شاحب ناشف . و حتي غير المتعلمين كانوا بعرفوا الكلمه دي بالانجليزي . في سنة 1982 رفعوا سعر الويسكي من 12 او 13 جنيه الي 18 جنيه ، اخونا ي . ب من فريق ريد كان مسافر لمن رجع لقي الويسكي بي 18 جنيه قال لي بتاع البار بتدوا قرانتي مع القزازه ؟ ده شراب ده و لا الكترونيات !! .
مع ايام الحر الشديد في امدرمان و الكتمه ود نفاش خته عنقريبه في راس البيت . المفتش برمبل الانجليزي كان بجي ماري . شاف موسي نايم رماه بالحجار لمن موسي صحي قال ليه ( انته زول مجنون نوم في راس بيت ؟ ) موسي رد عليه ( مجنون انا و لا مجنون البطقع !! ) .
شوقي

الاستاذ شوقي بدري

التحية لك وان تعيد كتابة التاريخ الشعبي؛ وهو التاريخ الحقيقي الممتلئ بالعبر .
عندنا في عطبرة كان هناك ابو جنزير؛ وهو رجل كانت له نوادره واغلبها منسوجة؛ واتمني ان يقوم الاخ عادل امين - مؤرخ حياة عطبرة الشعبية والذي يسير علي دربك في رصد الحكاوي العطبراوية- بتوثيق سيرة ابو جنزير ؛ كما وثقت انت لسيرة ود نفاش.

مع التحية.

عادل

الاخ عادل
شكرا علي المداخله
الغريب اني عرفت محمد عواره ( ابو جنزير ) و المصوراتي والشاب محمد الفاتح محمود الذي بسببه بدأت قصه الانتقام و الاعتداء . تقاطع طريقنا في هذه الدنيا و ربطتنا صداقه . و لقد قابلته منذ شهور .
و لك التحيه
شوقي

up

و كمان
Up
زى ما بيقول اخونا عمر رجب