شكرا بكري - تحياتي لبولا-النور حمد- بشرى الفاضل-ود قاسم -م ادم و الجميع

سلام للجميع في سنة اولى بورد بالنسبة لي كمشترك و سنة ثالثة كزائر
شكرا مهندس بكري ابو بكر للاستضافة
تحياتي لدكتور بولا -- استاذي في حنتوب --لم اشاهده او اسمعه منذ ذلك الحين
د النور حمد --قدامي بي سنة واحدة و صديقي و زميلي في ضيف الله --قطع شك بولا و النور يكونوا صفوني
فضيلي جماع -- قدامنا في جامعة الخرطوم --و في اللغة الروسية
بشرى --صديقي زميلي و دفعتي في حنتوب و جامعة الخرطوم
مصطفى ادم صديقي و دفعتي في جامعة الخرطوم
ود قاسم -- ورانا بي سنة في حنتوب و جامعة الخرطوم
تحياتي لكم جميعا
و تقبلوني بينكم
تحياتي لكل اعضاء المنبر
و صدقوني كلمة من زول عجوز -50+ -
صدقوني ان هذا المنبر مدرسة عضوا عليها بالنواجز
مرة اخرى سلام لجميع الاعضاء فردا فردا و الى لقاء

أرحب بالزميل ، الصديق ، الرفيق الصحفي ( الشاب ) عثمان عووضة ،، وقد انتظرت طويلا انضمامك إلى المنبر ،،
بس يا عثمان أظن برضك كنت معانا في المدرسة الوسطى ، وللا أنا اختلطت علي بعض الأمور ،، يا ربي إنت ما كنت في 24 القرشي ؟
عموما هذا المنبر أعاد تجميع الكثير مما تشتت ، ولك التحية ، والأمنيات الطيبة ،،

مرحب بيك في دارك

الأخ عثمان
تحياتي

استعرضت شريط ذكرياتي خلال إقامتي القصيرة بجامعة الخرطوم (عامين فقط) حيث ذهبت بعد ذلك إلى فرنساالتي أكملت فيها دراستي. وحاولت أن أتذكرك من بين الوجوه التي أعرفها، ووسط زملائي الذين لا يزالون رغم هذه السنوات الطوال أقرب اصدقاء العمر.
أنا دفعة محمد بيرق حسين، فهل ألقيت لي بطرف خيط أعرفك به؟

وعلى كلٍ أنا سعيدة بأن أكون أول المرحبين بك.

نجاة

أكملت مداخلتي، فإذا بي أجد ود قاسم يتصدر قائمة المرحبين قبلي. معليش

ياود قاسم انا قلت ليك قبل كدا في التلفون لو الواحد عنده متل ذاكرتك ديه كان بقى اليوم امين عام الامم المتحدة و البورد بتاع بكري ذاتو -- اوعه يقوم يطردني قبل ما يرحب بي--
كلامك صاح يا ود قاسم -- و بعدين قلت لي شاب يعني عايز تصغر عمرك ولا شنو؟؟؟
شكرا للترحيب

استاذة نجاة
محمد بيرق يتخيل لي كان الدفعة لورانا -- يمكن التاكد من ود قاسم ابو مخ نضيف -- مشكلتي اني تركت السودان بعد التخرج بي سنتين و الكلام دا قبل اكثر من ربع قرن ولم تت لي الظروف بالتواصل مع الكثيرين من الاصدقاء و الزملاء عشان كدا الواحد مخو ضرب حبتين
على كل اشكرك للترحيب و تحياتي لدكتور بولا استاذي -- لحدي ما الله يلمنا في ساعة خير او ساعة منبر -- وتحياتي للبنات ايضا و ان شاء الله حنتقابل كتير لو ربنا سهل
شكرا
ود قاسم طبعا ما حيدي زول فصة لانه سباق من زمان من زمن الكنتري ريس في حنتوب و الضريسة و ود قرف و التكيلات الله يطراها بالخير

مرحب استاذ عثمان عووضة

استاذة اماني
ترحب بيك السعادة و الايام الطيبة
من المداومين/ات على قراءة مساهماتك القيمة
ولا البتاعة بتاعة الجندر دي ما صاح كدا؟؟
شكرا استاذتي

يرى عثمان عووضة في البورد وطنا عاش فيه نهارات وامسيات الطفولة وايام المدرسة الوسطى والثانوية وجامعة الخرطوم ,,قضى عثمان عووضة حوالي نصف عمره خارج تراب السودان ولم تتزحزح هذه الذكريات الطيبات عن خاطره ..

تحياتي له وهو يغرد في سربه الكبير ,,

وهو يلتقي باصدقائه الحميمين ,,

وهو يرسم البسمات بين ساعات عمله المنهكة ولحظات التفاته الثاقبة الى البورد ..

هنا يؤانس غربته ويفرغ همه ,, ويبتسم ويضحك ويداعب ويصنع المقالب ويردد مفردات الستينات والسبينعات وربما تلك التي لاكها اجدادنا قبل ان ينقضي منتصف القرن الماضي ..

الم اقل لكم ان الرجل قديم قدم ابو الهول ,,
فهو هنا يرمي بتحيته لكبار السن من نوع الدكاترة عبد الله بولا وبشرى الفاضل ,, منهم من علمه ومنهم من تعلم معه ..
تحياتي له وتيحاتي لهم ....

دكتور عباس
على كل حال شكرا جزيلا على الترحيب -- لكن و بما انك جاي في المكتب فتوقع ان يكون بقية الرد
عمليا و باليد
ياخي القال ليك منو دكتور بولا دكتور بشري عجائز؟؟
شكرا

عثمان شيخ عوض الشهير بعووضة , مرحب واهلا وسهلا! لكن حكايتك فعلا عجيبة , ومن ناحية ضربان المخ دي , ما عندى فيها شك أبدا. يا أخي أنا صديقك فعلا ورغما عن أنفك الذي ما انفكّ يدعك اصبعك و فى حالات الغضب! وقاعد جنبك منذ خمس سنوات , وسألنا عنك سؤال الضهبان انا وفتيحابي و عباس الشيخ مرّ من هنا رمضان الفائت , والتاني قرب!وحاولنا مجددا استخدام كل تلفوناتك المعلنة والمخفية, وقرّبت أسأل عنك خلّي ( محمد خليل سليمان ) أو حمدان العاقب,
يا حليلك,
يا أخي بريدي معلن فى البروفايل , أرجو الإتصال . او0507837963
امّا حكاية "الشاب " دي يا ودقاسم يا اخوي , والله مافي داعي ليها البتة!!!!و يديك العافية .
يا نجاة , عووضة ما كلن فاضى وبيجي النشاط أو الكلية عشان يلقّط حق السينما!
عثمان عووضة أعرف أنك يمكن أن تساهم بالكثير في مشروع الترجمة . أرجو أن يتسع وقتك للمساهمة الرصينة في هذا الأمر.
التحيات للجميع

Quote: من المداومين/ات على قراءة مساهماتك القيمة ولا البتاعة بتاعة الجندر دي ما صاح كدا؟؟

لووووووووووووووووووووووووووووووول
لا صاااااااااااااااااااااااااااااااااح
جاينا مجندر جاهز يا استاذ عيني باردة

دكتور مصطفى ادم
ياخي و الله انت مخك اضرب من مخي --يقدر مخك يضرب مخيزي ما مخي ---الخ
اتكلمت معاك بالتلفون و اتونست معاك و تاني ما اشتغلت بي الشغلة
فتيحابي برضه اتكلمت معاهو لمن كان ماشي سوريا و منها و عيك لا انت لا هو ما عرفت ليكم خبر
حمدان و محمد خليل و الله باستمرار بتذكرهمو ما عارف ليه بالذات بيذكرني ليهم بوست قديم اعتقد بتاع الاستاذة تماضر بتاع الصريف
ياخي ما تجي ندنا بي جاي سبت و أحد-- دي على وزن خميس و جمعة لانه انا اجازتي الاسبوعية يوم السبت و الاحد
و الله العظيم حاضرب ليك و تلفونك معاي من زمان بس تقول شنو
ياخي ود قاسم دا حالته هسع مضيفني ما تحرشه لينا
شكرا مصطفى

استاذة اماني
اعملي حسابك انا مجندر دي قريتها مجنتر
تحياتي لاستاذنا تراث و الجميع
شكر/ن تاني
واللا شكرا دي ما بتجي

استاذنا الموسيقار ابو يعقوب
تحياتي
و الله انت يا استاذ حقو تضبح لي تور لانه زدت ليك عدد الدناقله في البورد-- بس المشكلة انو انا دنقلاوي الا ربع لانه الرطانة تعبانة
تحياتي و شكرا للترحيب

hala baik ustaz 3owooda
marhab baiki wlalhi
god bless u ya mlik
omar ragab
holland

عثمان عووضة!!!
والله زمن يا سلاحي!!

Quote: د النور حمد -- قدامي بي سنة واحدة و صديقي وزميلي في ضيف الله -- قطع شك بولا والنور يكونوا صفوني

أنا لا (أُصَفِّي) أصدقائي، يا عثمان، مهما طال الأمد. أذكرك، رغم مرور أكثر من ثلاثين سنة، وكأنك تقف الآن أمامي! بل وأذكر تفاصيل مماحكاتك التي لا تنتهي، مع عمر بشير، "ود أبوقوتة". كما أذكر كل تفاصيل تمرد الصبا والشباب، الذي تشاركناه، مما تعرفه، وأعرفه. أن شاء الله تكون عقلت!!

لو لم تكن لهذا البورد فضيلة واحدة، لكفاه أن جمعني بأناس ما كنت أظن أن الزمان سيجمعني بهم.
لك التحية على البعد، وما اسعدني بلقائك بعد هذا الزمن الطويل.

الاستاذ عمر رجب
ياخي مافي ملك غيرك و غير اللي خلفوك--شكرا للترحيب و تحياتي لك يا محترم
شكرا

النور
بس خلاس -- خليني اخم نفسي شوية و بعدين نشوف البيحصل شنو
دكتور النور!!!!!!!!!!!!!
ود اللذين امنوا اصبر لي --
لا حول ولا قوة -- النوررررررررررررررررر
يا لك من نور
بالله شوف البسويها فينا المهندس بكري000
اصبر يالنور00 الله يلمني في نوح ساكت!!!!!!!!!!!

الأخ عووضة
لك خالص الود. أنت كنت مطلع على التجربة الحنتوبية كلها وتتميز بروح الفكاهة والمشاغبة . كنت انضج مني لانك ربما عبرت من الغابة للخرطوم اقصد غابة الشمالية موطن اهلك لا غابة حروب الغوريلا . كلما اذكر حنتوب أذكرك بالطبع وكذلك آداب جامعة الخرطوم وغرفتنا بداخلية اربعات ز هل تذكر عم شاحوط بحنتوب صاحب المطعم الغريب الذي نبت بأطراف المدرسة وكلما كنا نساله عندما تفوتنا وجبات الداخليات يقول لناوكان حلفاويامثلك فاهل الغابة كاهلنا في ارقي نوبة
إندنا ادس وإندنا كمونية وإندنا
هل تذكره ؟ أما في داخلية اربعات فقد سكن بالقرب منا طلبة نيحيريين جاءوا ليدرسوا العربية هل تذكرهم
اليا اروقوندادي واديمو واديمي وإزيكيال هل تذكرهم؟ يا لها من ذكريات واتمنى ان تتحف البورد بروح الفكاهة والشغب والحيوية التي كنت تتحفنا واحياناص تغيظنا بها ولا باس ان تروي عنا ما تعرف بالسلب والغيجاب . مرحباص بك في البورد ولبكري الشكر والثناء فبورده اضحى بحق سفينة بشرية ستسو يوماً ما بالسودانيين في جبل ما كان في الحسبان وركابها كلهم بشر وغن اطلق بعضهم على بعض احياناً مسمى كائنات أخرى . بشر بعضهم ملائكة وبعضهم كانوا عفاريت في ربق الصبا مثلك لكن إنسانيتك كانت بائنة لي منذ حنتوبإذ كم رايتك تحزن يا عثمان حين تصادف مسالة ماساوية كان يضرب احدهم طفلاً أو نحو ذلك ويتعكنن مزاجك اليوم كله وفي كل ساعة وحين تشوت شيئاً امامك وتقول ياخ والله ياخ . يا لها من لازمة تذكرني دائمابك . طوال حياتي لم اكن ششخصاص موفقاص في العلاقات الإجتماعية لذا اعيش بمخيلتي مواقف اقول ليتي ساهمت فيها وافرح بامثالكم فرحاً داخلياً كبيراً لكنه ياتي دائماً بعد فوات الاوان

الوسطى و الثانوي و الجامعة عرفناهم يا عووضة ... كدي ورينا اسه وين

امكن نلقى حاجة تلمنا مع بعض ...




تحياتي ...

و اتمنى ان يطيب لك المقام و ان نلتقي في هذا البورد مرارا

و حللت سهلا ...

الاستاذ عثمان عووضة
مرحب بيك و نورت المنبر و بانضمامك الى اصدقائك المبدعيين الاساتذة عبد الله بولا -النور حمد- بشرى الفاضل-ود قاسم -م ادم و الشاعر فضلى جماع تكون قد اكتملت الحلقة لتعلموا جيلنا ادب النقاش...الفن.......السياسة.........الخ يلا يا جماعة بعد ده يكون عيب و عيب كبير فى حق هؤلاء الاستاذة ان ننحدر بنقاشنا الى فاحش القول ..........و ابقوا عشرة على الاستاذعثمان عووضة و غيرهم من المبدعيين

سيد حسين
ياخوي شيخ ملاسي ابو بيكون فايتنا في العمر بي شوية و في العلم بي كتير عشان كدة مافي طريقة تلمنا -- انت و انا -- نحنا زاتنا البقدرنا على جنس كبسولاتك الساخرة الساهلة الممتنعة الممتعة دي شنو -
تسلم حسين و تشكر

بكري ابو بكر
الباشمهندس -- المد لله جيتني ي كرعينك -- ياخي امس الوليدات و امهم بيتوني القوا عشان كتيت لي في البروفايل اني SINGLE غايتو اذا ما عدلتها بسرعة انت و انا نشيل شيلتنا
ياخي انا البلمني مع الفطاحلة ديل شنو -- بس غايتو ساكت بي جاه الملوك نلوك زي ما قالوا اهلنا-- انشاء الله يا بكري الله يديك بي كل حرف ينكتب في المنبر دا مليون حسنة و خمسة الاف يورو و عشرين مليون دولار و سبعة و تلاتين الف اسبوع زيادة في عمرك
ربنا يخليك و يسلمك
شكرا

سلام مليار يا ابا مهيار

كسب كبير للمنبر لا شك
انا لا قدرك ولا لحم صدرك يعني حمودة اكبر مني بي عقد كامل عدا
و نقدا.ودقاسم زايغ من ما داير يكتب عن أيام النشاط وضهر التور والباسكت والنشاط والعصر الذهبي لحلمنتيش ...
ودمت يا وجيه
جني

هل لك علاقة باستاذنا الكبير
محمد عثمان عووضه

معلم اللغة العربية السابق بثانوية بركات؟؟

وأهلاً بيك نورت دارك

دكتور بشرى اخوي
ياخي حكاية حنتوب دي حكاية عجيبة خلاس الله يطراها بالخير -- مش يطراها اخت عبد الله بالخير؛ دي واحدة تانية --
حكاية حنتوب دايرة ليها قعدة طويلة
ياخي الواحد يقول شنو في بلد كلها جناين فواكه و ميادين كورة و اشجار تمشي تحت ضلها من الداخليات لحدي التكيلات ما تلاقيك حتة شمس؟؟
تقول شنو في مدرسة كل داخلية فيها ليها حديقتها الخاصة-- تتذكر زمان يا بشرى لما الواحد يصحى من النوم الصباح يلاقي في جنب راسه قطعة منقة ولا ليمونة واقعة من الشجر من بالليل؟؟
تتذكر لمان نكون نايمين بره في جنينة النص و خاتين سرايرنا جنب بعض نتونس الليل كله و نضحك -- دكتور النور -- نوح -- هاشم محمد صالح -- احمد ادريس خليفة و باقي الشلة -- عييك زمن
ياخي في احسن من انه يكون بولا مدرسك و صاحبك و استاذك اللي علمك الانسانية؟؟
منو زي دكتور النور حمد تقدر تزعله و ترضيهو في تلاتة و خمسين ثانية بس
العدس و الكمونية عرفناهم التالتة ما كتبتها مالك يا جبان!!!
اما جامعة الخرطوم فتكفي حكاية النيجيرية الكانت بريليم بتاعة U CALL THIS A UNIVERSITY ?? WHERE IS THE BAR ?? WHRE IS THE DANCING HALL??
بعدين حكاية فاسيلا البلغارية و --شامتها الشهيرة--
ياخي لمن كنا في جامعة الخرطوم فD واحدة من الاجازات مشينا-- دكتور مصطفى ادم و محمد خليل , و انا --من ام روابة لحدي ود عشانا كداري عشان نزور حمدان ابراهيم العاقب -- دي اولاد الزمن دا هسي بعملوها لو ركبوهم شبح خلي كداري
مشتاق ليكم و الله يا بشرى -- يا حليلكم

JINI
انا JINI و جن بتاعين ال CIA ديل -- انت منو ياخ البتعرف مهيار وناس حمودة ديل ؟؟
كان ما وريتني مخاسمك لله و الرسول

HOPEFUL
ابدا و لله -- نحنا دناقلة ما بنعرف عربي كويس زاتو نتخارج بيهو مع الناس -- خلي كمان نكون اساتذة عربي
شكرا هوبفول و الله يطول عمرك و يديك الفي مرادك

عثمان عووضة
لوووووووووول
حمودة صديق عزيز ومن لا يعشق حمودة ألأبيض ضميرو الصافي زي قلب الرضيع
حمودة بضحكته المضيافة .
ياخي أنت قاعد برة ربع قرن وانا عقدين نتلاقا وين غير في واحة الرائع الباشمهندس بكري.
ودمت
جني

يا جني دا برضة ما بحلك -- ياخي انت منو -- انشاء الله تديني راس الخيط ساكت
بعدين ياخي ماتكلم زول بي حكاية ربع قرن دي يقومو يقولو نحنا عجايز و كدة و بعدين تتحمل انت المسؤولية

يعني +50 الكتبها منو
بعدين الحكاية كلنا في الهوا سوى وليس الهوى و هوانا خماسين
يعني عصار هبباي وهبوب ساكت

(يابنت عشرين والأيام مقبلة ماذا تريدين من موعود خمسين)

طرف الخيط يا شيطان انت داير السي آى أيه الجد جد يكتبوا إسمي

العنوان
جني ساكن القمقم اسأل حمودة

الاستاذ عووضة
اشكرك و سعيد بانضمامك الى المنبر الحر
و يمكنك تعديل و اضافة ما ترغب فى كتابته فى البروفايل وذلك بالدخول الى ملفك اعلى الصفحة بس اعمل حساب ما تكتب مطلق يقوموا ناس البيت ينفوك من البيت و تقطع راسنا .........كان غلبك رسلى بساعدك

يا باشمهندس دي غايتو عرفت ليها لكين تاني ما تلف راسنا -- نحنا الفرق بين شاشة الكمبيوتر و التلفزيون عرفناها قريب دا-- نحنا ناس زمن الرادي ابو حجر زي الطوبة داك
بعدين النسوان البِِيتطلَقوا ديل يلقوهن وين يا ود اخوي خليها على الله دي دبيسة السرور

عزيزي عثمان،
تحياتي الحارة "حِرةً مي مسخرة"،
أفو عاد يا عثمان دا كلام دا؟! نصفِّيك وننساك؟
إذا أنا نسيت عثمان شيخ عوض تكون ذكرى حنتوب قد فقدت أحد أهم بهاراتها وأفاويها. صعدت عبرةٌ حرَّى إلى حلقي وأنا اقرأ كلماتك الصادقة المستغيثة من عدوانية لجة الشتات التي تبتلع أجمل ذكريات العمر. وها أنذا أعاظل كلماتٍ تستعصي على فيضٍ من الشعور يتأبىَّ على اللغة. لقد أفْنَت المفاجأة كل قدرةٍ على التعبير عندي فكيف أقولُ؟
أرجو أن تعذرني الآن إلى أن تزول عن خاطري هذه الزلزلة التي لا سبيل معها إلى كتابةٍ تعلو إلى مقامك ومقام أفضالك عندي.
كل محبتي وإلى يوم الجمعة لعلني أستردُ رشدي وتوازني اللذان طاشا الآن تماماً.
بـولا

يا جبان وقفت عند الصريف بتاع ناس حمدان العاقب , ما كان تدخل لجوه شوية. . طبعا نسيت أنك ومن الميل الأول اتجرّست جرسة يرق لها قلب العدو ! اتصل حتى نتفاكر في أمور كثيرة يمكن أن تفيدكثيرا!
والله أيام يا زمان!!!!

يا سيدي الانسان دكتور بولا
مع السلامة ياخي انا مارق

اتصلت يا دكتور مصطفى و ما لقيت عندك اي امور يمكن ان تفيد
مالك عايز تنشر الغسيل اللي شمس تلاتين سنة ما قدرت تنشفه

البوست ده عجبنى قولت اهديه هذه الاغنية

و الله يا باشمهندس انت طلتك براها اعظم هدية و كمان زايد اغنية العميد يبقى الواحد يمشي و يتبختر في الاسواق رافعا هذا الشرف الكبير عاليا كجواز مرور
بعدين حكاية تنزيل الغناء دي موضوع تاني لانه عندي حاجات من عشرات السنين اكيد حتنفع

عثمان عووضة

انا جني وجن المس كول وهلمت كول
كنت على الخط مع حمودة يسلم عليك وقال ليك ما لآمي فيك!!!
جني

ياجني دا انذار اخير
عشرة دقائق فقط و حابشع بيك هنا

دق لي حمودة وعصفورين بي حجر تكون لميت فيهوا ولميت فيهو برضو
جني

على كل حال انا قررت اصبر عليكم انتو الاتنين