مشاهد ثانية من الخرطوم ..!!

عكس الريح

د. معز عمر بخيت
[email protected]

مشاهد من الخرطوم (2)

بعد أن ودعت سائق التاكسي الذي رويت لكم قصتي معه في الأسبوع الماضي عبر الطريق من منزلي بمدينة الصافية ببحري وحتى وزارة الداخلية بالخرطوم كان المشهد هناك في الوزارة متمثلاً في ذلك الموقف النبيل من العميد القدوة عطا محمد عبد الله مدير إدارة الأجانب بعد أن شوهت مرايا الفرح بداخلي تلك الرائد، ولقد رويت ذلك المشهد كاملاً في مشاهد من الخرطوم (1)
فقط أود أن أذكر هنا أنه بعد نشرت ذلك المقال اتصلت بي سيدة سودانية مقيمة في أمريكا وقالت لي أنها تحمل الجواز السوداني لكن لديها طفلة مولودة بأمريكا تحمل الجواز الأمريكي لكنها سودانية (أي الطفلة) أباً عن جد عن أم وقد حضرت مع طفلتها للسودان في عطلة قصيرة لكن الأب لم يحضر معهما لظروف عمله بالولايات المتحدة. الطفلة عمرها أربعة سنوات وقد تم رفض تسجيلها بقسم الأجانب نسبة لعدم وجود ضامن لها وتم كذلك رفض ضمانة الأم التي لم تدر ماذا تفعل ولا أدري أنا ماذا فعلت حتى كتابة هذه الأسطر!
كانت محطتي التالية في ذلك اليوم هو صحيفة الأضواء والتي كانت تقبع في السوق العربي بالخرطوم قبل الرحيل لمقرها الجديد. السوق العربي وما أدراك ما السوق العربي.. صورة مصغرة ليوم الحشر كما وصف لنا!! الأعمى شايل المكسر.. الناس هناك يصنعون المعجزات في انفلاتهم من عتمة الحياة بالذهول المقنن وبالفطرة على اجتناب الفجيعة.. يسيرون ولا يدرون إلى أين! لا يعبهون بالسيارات ولا طرق المرور.. الإنفعال ليس في قاموسهم.. لا غضباً و لا ضحكاً.. الإحساس بالآخرين يعني عندهم ذنب الذات الأخرى.. غريزة البقاء لديهم أن تسير إلى كنف المجهول وألا تحاور نبض الحياة، فالحياة هناك لا تنبض.. أما الباعة المتجولون والمقيمون والذين يفترشون الأرصفة يشقون صمت الناس بسجع الأغنيات التي تحقق الدعاية المطلوبة لبضاعتهم التي يمكن أن تشتريها بعد المفاصلة حتى بلا ثمن!
أعظم ما شد انتباهي هو تلك اللافتة التي امتدت بعرض الطريق بحيث لا يمكن ألا يلحظ وجودها كائن من كان! هذه اللافتة كتبت بكل ألوان الطيف وبحجم أكبر من الذي يستخدم في الترحيب الكاذب بالرؤساء والملوك حينما يحلون بالبركة واليمن والخير والوفاء. كتب على هذه اللافتة بذلك الخط العريض الملون: عطارة الغبش لعلاج الأيدز والسرطان والسكري والرطوبة والضغط!!!!! هذه الأمراض التي استعصت على كل علماء البشرية تأتي عطارة الغبش لتخدع الغبش وتعالجهم منها!! هل هناك مشهد حضاري أعظم من هذا بالله عليكم؟؟
ما استوقفني في هذه اللافتة هو ترتيب تلك الأمراض. ماذا يعني أن يكون الأيدز رقم واحد يليه السرطان ثم السكري ثم الرطوبة ثم الضغط؟ هذا الترتيب يمثل لي كطبيب من ناحية علمية منطقاً ما وهو أمر جد مخيف ومرعب بالرغم من أنها غفلت عن العجز الجنسي والذي صار هاجساً عجيباً أو لعله لا يتماشى مع الدعاية للعلاج من مرض الإيدز! وأن تمتد هذه اللافتة بهذا الحجم وعبر الطريق لهو مؤشر خطير لوجود هذه الأمراض بالسودان للحد الذي يدق ناقوس الخطر. فمثل هذه العطارة كانت في السابق تدعو لعلاج الإمساك والمصران ووجع الرأس والحمى وبعض الإلتهابات العارضة فانظروا إلى ماذا تنادي الآن؟
بعد أن أمضيت وقتاً رائعاً بين الأصدقاء بصحيفة الأضواء خرجت في زحمة المرور ساعة الذروة. رأيت الجميع يسرعون وفي حالة سباق وكأنهم يلاحقون أمراً عاجلاً يقودون من أجله سياراتهم بسرعات جنونية.. يتخطون الإشارات الحمراء ويتجاوزون كل قوانين المرور بلا احترام لأي أولويات على الطريق للحد الذي يجعلهم يتحدون كل أخطار السرعة من أجل الوصول لهدف ما!!
سألت أحد الأصدقاء قائلاً: لماذا يسرع الجميع هكذا دون تقدير لأي شيء فما الذي يودون اللحاق به؟ قال:
نعم هم هكذا.. الواحد منهم يسرع بالصورة التي وصفتها ويتعدى الجميع ويكسر الإشارات، يطلع فوق الأرصفة و(التلتوارات) ولا تستعصي عليه الحفر وهو في عجلة شديدة من أمره. ثم بمجرد أن يصل لمنزله يدخل مسرعا.. ًيلبس العراقي والسروال ويحمل كرسيه ليجلس في الشارع!!!
مدخل للخروج:
ومضى الزمان ولم أزل ألقى التدحرج كلما أمضيت عهداً في الصعود إلى عوالم مقلتيكِ.. وليتنى يوماً يصافحني المدى.. فأشد ترحالي إليك..

معز

Quote: عطارة الغبش لعلاج الأيدز والسرطان والسكري والرطوبة والضغط!!!!!

Quote: نعم هم هكذا.. الواحد منهم يسرع بالصورة التي وصفتها ويتعدى الجميع ويكسر الإشارات، يطلع فوق الأرصفة و(التلتوارات) ولا تستعصي عليه الحفر وهو في عجلة شديدة من أمره. ثم بمجرد أن يصل لمنزله يدخل مسرعا.. ًيلبس العراقي والسروال ويحمل كرسيه ليجلس في الشارع!!!

العزيز د. معز..

ســـــــــلام..

رجاء الغالية،
سلام ليك يا ست الناس
ما تتصوري سعادتي وأنت أول من يشرفني هنا:
يا ريت تعرف
كمان تعرف
لحدة وين بعزك
وفي أعماقي حسيتك

ألف مساء خير عليك

سلام يادكتور يااديب.
ارجو منك المواصــله عن الخرطوم بالعصر وبالليل وعن كل طريف مــر بك.
ســـلام
محــمد يوســف

زولنا السمح فينا : معز

حملت مصباحي ليلا .. متخفيا من خفافيش الليل يا معز ..
وبعد أن هدأ ضوضاء النهار.. وعاد كل أغبش الى بيته عله ينعم
ولو بـ ( حلمة!!!!) تنسيه ماساة نهاره الصاخب المتعب .

هل تعلم ـ ياصديقي ـ عما كنت أبحث عنه في تلك العتمة من الليل الحزين؟؟

كنت فقط أبحث عن خرطوم تركتها علني أجد منها ولو ( خرقة بالية!!)
تدلني على أنه كان هنا يوما مدينة اسمها الخرطوم!!!!!!.

فلما لم أجدها .. أطفأت مصباحي الوحيد خشية أن يقبض على متلبسا
بتهمة التلصص ليلا في زمان العسر الأنساني المهيب !!.


فأين ذهبت تلكم المدينة الحالمة يامعز.. بربك قل لي ؟؟؟.

لك المحبة وأنت تسافر بنا عبر جراحات وطن لم يعد يشبهنا فيه شيء.

خضر عطا المنان

العزيز الغالي خضر،
حتى الجراح في وطني لم تعد هي الجراح
ورائحة البنج في كل مكان
لا المدينة هي المدينة
ولا انتظار الحلم عاد ممعناً في اللهفة
بحثت عن حلم يقظة هناك
فلم أجده حتى في عيون الناس

سألت إحدى بائعات الشاي بم تحلمين؟
قالت ألا يحولوا هذا الشارع لاتجاه واحد!!
لكنهم قد حولوا كل الوطن لاتجاه واحد نحو الهاوية

لك كل المحبة

معز

الأخ العزيز محمد يوسف،
لك الشكر الوافر على المرور الزاهي وبإذن الله تتوالى المشاهد..
ما هي أخبار حصاد خاصة بعد الحريق وقد كتبت لك مواسياً في صفحة «عكس الريح» عندما كانت بصحيفة الحياة..
لك فائق المودة..

أتمنى أن تراسلني على الإيميل
[email protected]

في انتظار الباقي يا دكتور....

Quote: في انتظار الباقي يا دكتور....

الباقي حفلة بي ندى القلعة يا سي جي
أحكيه واللا بتغير ..

Dr. Moiz

You brought us close to home, and made me wanting December to come tomorrow to go back and visit Home.

Fe Aman Allah
Agab

الدكتور العديل وزين
مشهد هسا دي (سماحة مطرة شكشاكة وبرقها قبلي ضاربا السوق العربي)....

انشا الله ناس الاضواء جرايتم فتحوها وسابليقهم كابا

Quote: سماحة مطرة شكشاكة وبرقها قبلي ضاربا السوق العربي

يعني جو فول يا شمهروش
حاسدك عدييل والله
سلام ليك كتييييير ومحبة وشوق
وتسلم من الحساد والعزال
معز

Hello Agab
Thanks a million for your visit and comment
I wish you a very pleasant stay in Sudan. December is a perfect time for holiday
Witing for your views and images from home

Kind regards

Moiz

Quote: نعم هم هكذا.. الواحد منهم يسرع بالصورة التي وصفتها ويتعدى الجميع ويكسر الإشارات، يطلع فوق الأرصفة و(التلتوارات) ولا تستعصي عليه الحفر وهو في عجلة شديدة من أمره. ثم بمجرد أن يصل لمنزله يدخل مسرعا.. ًيلبس العراقي والسروال ويحمل كرسيه ليجلس في

الشارع!!!
*** يادكتور/ معز
قالوا واحد المانى زار السودان قالوا ليهو (أها الحركه كيف هناك)، قال ليهم (بره الشارع)!!!
يعنى تلقى قدامك الأشارة منوره أحمر أجى واحد بكل هدوء يطلع من الشارع ويلف يمين الأشارة ويواصل، لأنه الأشارة حسب فهمو زى ما قال واحد من ناس الخليج (قطع الأشارة) والنور كان أحمر لمن مسكو البولسي وسأله ليه: قطعت والنور أحمر؟؟
رد عليهو: لأنه ألأشارة دى للأجانب( وااااو).

الأخ الحبيب تاج السر،

Quote: قالوا ليهو (أها الحركه كيف هناك)، قال ليهم (بره الشارع)!!!

لو تذكّر كاريكاتير عز الدين الشهير الرسم فيهو سواق البص بتاع الأهالي الزمان داك وهو سايق البص برة شارع الزلط وماشي في التراب مبسوط يغني:

وا ناري الما بقيت سواق
أترك الشارع وامشي بالدقداق

بس دي البقت علينا.. الإشارة بتاعة الأجانب لأنهم بحترموا القانون ونحن بنكسروا بدون أي سبب بس حباً في التكسير وأذية الآخرين

تسلم يا سيد الناس

معز

الدكتور الغالى / المعز
سرد جميل ومفرح وانت تحكى لنا عن الخرطوم ونحن لشوق لسماع تلك المشاهد من بلاد الغربة .... لك حبى وتقديرى ....
عطارة الغبش تعالج الايدز .... السرطان .... السكرى والضغط ... الكتابة ما مشكله يادكتور معز المشكله انو الناس بتمشى عشان تتعالج بالرغم من حملات التثقيف القائمين بها انت وامثالك الجميلين عبر كل الاجهزة الاعلامية لكن برضو الناس مصرة تصدق الدجل والدجالين .... يكون دى من علامة الساعة يا دكتور ...... وربنا يستر
السمؤل

مسّاك بالخير يا السمؤل يا فرح مليان نضار..
ياخي والله انت ما عارف أنا بفرح كيف لم ألقاك كاتب لي إن شاء الله حرف واحد بس..
شكراً ليك كتير على حروفك الندية (مش زي بعض الناس الكئيبين الحايمين حسة بي برة ديل)..
لك الود الكبير وجداول المحبة

معز

دكتور معز تحياتي .... يازول بختك ... انته زرته البلد في اجازة الصيف بالرغم من الحر والرطوبه وزحمة المواصلات ويمكن المطر والباعوض بس بيني وبينك برضو لذيذ .... لانو فيهوالواحد بلتقي تقريب اغلب الناس وخاصتا الطيور المهاجره ... وبتكتر المناسبات الاعراس والحفلات العائليه وما يتبعه من رحلات وسمر مع القمر............. وبعد ده كله تقوم تظهر وتتالق شويه في التلفزيون .... بس المره دي كنته مسمر شويه .... من حوامة السوق العربي والعطارين ...... جد بالرغم من كل الشقي اللذيذ ويوم ممطر وفطور من سمك سوكي ... وقهوه في القولدن قيت وسرحان في اكسير الحياة وهو شاقي الشمال ... جد احلي واجملي من اي بقعه علي وجهه البسيطه ... والا رايك شنو مع احترامي وتقديري ومعزتي يا دكتور معز.

أخي الحبيب Willeim Andrea
يا سلام عليك وعلى مداخلتك الحلوة وكلماتك التي تنساب كالعطر في صدر النسيم..
السودان حلو رغم قسوة ظروفو، وناسو حلوين والحياة معاهم ليها طعم تاني بالإضافة لكل الحاجات الإنت قلتها دي..
تسلم يا سيد الناس ياخي وأنا سعيد جداً بهذا التداخل الأنيق
لك فيض محبتي

معز

دكتور عمر يا راقى يكفنى الود الكبير والجدول المحبة تزيدنى شرفا
ياخى الجميل ..... كما لك منى خالص الدعوات بان يحفظك رب العباد وفى كل خطوة سلامة
حبى وتقديرى
السمؤل

اغلب صواني المرور قد تغيرت 00
ولكن مازالت صواني الطعام في حاجة الى تغيير 00
ولو تلفت يميناً وشمالاً من هذه اللوحة القماشية العريضة لوجدت العجب بجوار الجامع الكبير
حيث العقارب والثعابين والدواء لكل داء
مجموعة من المشعوذين السخيفين يعرضون بضاعتهم والتي بها علاج لكل شيء حتى زهايمر ريغان وعرفات !!
توقفت عند أحدهم وحكيت له مشكلة وهمية تتعلق بديون ومبالغ مطلوبة مني
فكان الخبر اليقين والحل على يديه عندما قال لي ستأتيك عربية من السعودية
فقلت له أخشى أن تأتي لتصدمني !!!!
في السوق العربي يرقد كل العالم وترقد كل الألوان
طالبات بجمال رهيب وقوام ممشوق
وخصر يكاد ينفجر لينسف السوق العربي بكل ما فيه !!!
والشلوخ لا اراها حائمة وسط هذه الزحمة !!!!
عدا والدتي التي كانت تمسكني من يدي وكأنني طفل رضيع !
كنت كلما أنظر اليها استمع لحوار طويل صامت ما بين الماضي العريق والحاضر الذي يحيل أنفاسك إلى شهقة لايطفئها إلا كوب عرديب من نفس السوق
ودائماً أقول لوالدتي عندما ارى فتاة ممشوقة القوام وبخدود وردية : ما بال النسوة اللائي قطعن خدودهن !!!!
اللبن 00 اللبن 00 اللبن 00 عبارة اسمعها يومياً في الصباح الباكر بالفتيحاب
طقوس اللبن أكثر من غريبة في الخرطوم !!
وعندما خرجت لبائع اللبن كان يتوقع أن تخرج له صاحبة البيت الأنيقة جداً
فصر وجهه ولم يأت مرة أخرى بهذا الشارع !!!
والغريب أنه قيل أنه كان يملأ لها الجك حتى حلقه !!!
أما أن فقد تم إتهامي زوراً بانني جغمت جغمة منه !!!!
بائع لبن آخر كان يمتطي حماره ويخلف رجلاً على رجل
نادى على صاحب البقالة وهو فوق حماره 00 طلب منه مشروب { سفن اب }
بدأ يشربه وهو على حماره وطلب من صاحب البقالة أن يبحث له عن قطعة ارض في حدود 150 مليون !!!!
شرقتني زجاجة الببسي التي كنت اشربها في ذات الوقت
يا ابن اللذين عندك 150 مليون وانت تمتطي حمارك البيجي !!!
تمنيت وقتها لو كنت بائعاً للبن !!!
فهذا يحقق لي هدفين : الهدف الأول ال 150 مليون والهدف الأسمى رؤية الرحيق و الجمال في الصباح الباكر !!!
وذهبت لمستشفى أم درمان
كنت أضحك كثيراً على أهل العوض وأنا منهم
ولكن جاء نفر وقد هزموا أهل العوض 10/0
لدرجة أنني سألت صديقي : هل هؤلاء يسكنون معنا في كوكب الأرض 0
تصور مريض اصبعه مقطوع وقد حضر معه 36 واحد بعكاكيزهم وسكاكينهم
تقابلك يادكتور في الخرطوم كروش متدلية ومترهلة ومتخمة مليئة بالسمك والدجاج المحمر !!
وسرعان ماتقابلك هياكل عظمية تهتز لمرور أقل نسمة عليها !!!
لكن أكثر ما يحيرني النساء في العمارات والنساء في الفتيحاب !!!!
هذا عذب فرات وذلك ملح أجاج !!! وبينهما برزخ في أمبدة !!!

Quote: لكن أكثر ما يحيرني النساء في العمارات والنساء في الفتيحاب !!!! هذا عذب فرات وذلك ملح أجاج !!! وبينهما برزخ في أمبدة !!!

عزيزي ابوحراز....راغب علامات الqoute

نحن نعزك ونخاف عليك من هرجهن...


هذا بعد اذنك يا بروف

دكتور المعز الرجل الشفيف
مرحب حبابك ..
لوحة واقعيه حقيقيه من البندر ..
اسمح لى اديك لوحة مصغره لاهلى واهل اب حراز اهلنا اهل العوض ..علها تبرد جوفك وجوف احبابك الزوار..

اول يوم وصولنا الحله .. عند العصريه ..
الحله كلها راجيانا برهه اهلك وجيرانك وآخر زول فى الحله ..كلهم متشوقين ومتلهفين ليك زى ناس بيتكم .. بكون فرحانه فرح خرافى من طلوعى من صالة المطار .. ورغم انى بحس انى خلاص ودعت الغربه ام غرور .. ووصلت بلدى الوسيعه بدون اى سور ..
ولازم اقضى ليله فى الخرتوم النعمنو الاهل الفى البندر والمناسبات البتجبرك ما تفوت وتجرى لى الحله والاهل .. وعشان كمان تستمتع بعقاب الاجازه كلها هناك .. وتكون ختيت هم ناس الخرتوم ..رغم انهم من افراد البيت ..لكن انا بشترط عليهم من بدرى نظموا اجازتكم معاى فى الحله ..دايره اعيش الفرحه بالاجازه ..لا زحمة عربات و لا شخشخة مكيفات ولا آخر صيحة الموضات .. ولا حاجات كتيره بتحسسك انك لسه ما فارقت بلاد بره ..
كل شىء اتغير حتى الملامح البسيطه نادرا ما تجدها فى البندر ..
عارف يا دكتور الليله البقضيها فى العاصمة دى ..بتكون بسنه كاملة .. مع انه مرات بتكون سواد ليل فقط .. وبدااااااااار بنطلع دقداق صاحب لوريك داك متوجهين على الحله الفى طرف الجروف والبحر .. لانه احيانا الرحله بتصل المساء..
لكن عارف سواد الليل ده.. اختك بتقعد فى نص السرير تحسب النجوم لمن جامع امدرمان يبدأ النباه القبل الفجر .. وطبعا بشترط نومة الحوش ..رغم ضيق مساحات الفسحه الفى البيت ..
وفرحتى بتتضاعف لما تبدأ المشاهد الحنينه بعد مغادرة البندر .. كمية من التوتر .. ما تحسسك حتى بالسفر والارهاق والفتر ..
تجى مارى بالحلال مرصوصه حوالين الشارع كالعقد المنضوم .. تتزين بقبه الشيخ فلان وضريح الشيخ فلان ..
وكيمان بيوت وسطهم مدرسة . وميدان كوره فى طرف الحله .. وعربتين بوكسى قدام دكان الحله الفى طرف الزلط .. ودى برضو فيها ريحة المدنيه ولو من بعيد ..
لكن احساسك بالغبش ببدا جواك اصل وليس صورة .. وحلم وليس خيال .. عند وصولى البنطون الجنيد او رفاعه
معروف انت جاى من السفر باين من شنطك وهدومك النضيفه وملامح الشوق .. البتكسر خاطر البشوفك ..
خالات وعمات جن راجعات من زيارة مريض فى مستشفى فى ابو عشر ولا الحصاحيصا
يجوك بى لهفه رغم عدم معرفتك باى واحده منهن .. فقط الملامح الحنينه والنوايا الجوه متشابه تمام وريحة الطيبه المشتته فى هدمن البارد ونفسن الاحلا من عطور الدنيا كلها .. واللهفه فى السلام ( وااااااااااااااا مصارينى ..يا حليلكم .. جيتو من السعوديه ؟؟ ) الاغتراب كلو ياهو السعوديه لمعظم اهلنا .. انا فى اللحظه ديك دمعتى وعبرتى ببداها معاهن يعلم الله .. وبعصر رويحتى جوووووووووووه فى كل واحده واشم ريحة امى وباقى اهلى ..
ويبدأ السلام بركه الجيتو وشفناكم طيبين يا اولاد بطنى ..
بتاع البنطون حمد الله على السلامه يا اولادى وبركه الشفناكم طيبين ..
العسكرى الواقف ..يا جماعه ديل جايين من السفر وتعبانيين ادوهم دور فى البدايه عشان يعدوا قبال مغيب الشمس ..ولا عشان الواطه حر واهلهم راجينهم بى غادى .
حاجه كبيره جد لى اماتكم الليله الجيتوهن طيبين ..
ستات التسالى ..دايرين تسالى .. يصرخوا الاولاد ايوه دايرين .. بس مافى قروش سودانيه دقيقه نادى عمك ..عمو الجايبنا من البندر .. ست التسالى لا لا خلاص شيلوا ده ساى عشان جايين من السفر..
كل واحد حانى فى حالك .. وهم حالهم تحنن اى عدو .. غبش بكل ما تحمل الكلمه دى من معانى جوه وبره
تغشف فى الحياة فى المعيشه ..ملابسهم الباليه والمتسخه بسبب معيشتهم اليوميه والكتاحه وحركة العربات ..
وتبدا ريحة الترعه والمويه وريحة القش الاخدر من الجروف .. وصوت البهائم ومراح السعيه جاى قاطع نص الطريق .. والعربيه تقيف .. والعلاله تعمى السواق ..
والهمبريب بى علالته انقى من اى غرفه مكندشه بى تكييف مركزى.. وبعد عراك طويل بين العربه ومراح البقر .. تبدا العلاله فى انخفاض بسبب وصولنا للجنائن ..والحواشات ومن هناك تلقى الناس كلها متشابه .. قاعدين وسط السرابات .. فيهم البحش فى قش بهيمتو ..وفيهم البسقى فى الحواشه وفيهم البتيرب يا دوب .. وملامح العراقى والسروال .. والبهائم المكومه فى طرف الزراعه والراعى البغنى بى مزااااااااااج حاكل عصايتو فى رغبتو ..
طلعنا كبرى الترعه ووصلنا الحله ..والقلب دقاتو زادت .. وده تفسير علمى ممكن تشرحوا لينا انت يا دكتور.. انا دقات قلبى بسمع صداها فى صدر امى البقع فيها قبل اى زول .. وبجعــــــــــــــر .. بى طول حسى.. نعم ببكى بى مراره الفراق الجواى ..ودام سنه بحالها .. علنى افضى هم السنه الماضيه وشوقها فى اللحظات الاولى .. واخواتى واخوانى وباقى ناس البيت والجيران مكومين فينى كل واحد داير يعصرنى جوووووه الحشا .. وانا لما يغلبنى بتفن فى الواطه لما يرفعونى ..قولى بسم الله وصلتى ولقيتى اهلك كويسين .. احمدى الله ..
تانى اجى على امى وناس بيتنا مقالده من طرف ..
وتبدا الصوره الجميله الحيه..يا حليلهم جوا ..بركة الجيتو .. عليكم الله ما تطولوا تانى .. اها ما بتصوموا معنا رمضان ؟ ويكون رمضان باقى ليه 8 شهور .. لا بعرفن ليك اقامه ولا بخبرن ليك اجازه سنويه وشغل ..
محنه حد النخاع.. ده كلو كوم وباقى الاجازه كوم تانى
لكن انا بقيف لغاية هنا .. وصدقونى سرحت وما حسيت بى نفسى كتبت كل الكلام ده ..
ارجو المعذره على الاطاله يا دكتور يا شاعر ..وللاخوه والاخوات زوار البوست..
والتحيه ليك قدر ابداعك وتسلم

العزيزة الغالية سوما،
تتداعى مواسم النشوة والشجن والحس الذي يسافر في أفق النفس يغمرها بالعشق والإبتهال..
لم أرد عليك مباشرة لأنني كل مرة أسافر في مشاهدك الندية وأؤجل ردي إليك حتى يزدحم الشوق في كل غرف الخلايا وتجاويف النفس وأعتاب النبض وهو يتدثر في قلب مفعم بالحب لكم..

تقولين ماذا؟!

Quote: طلعنا كبرى الترعه ووصلنا الحله ..والقلب دقاتو زادت .. وده تفسير علمى ممكن تشرحوا لينا انت يا دكتور.. انا دقات قلبى بسمع صداها فى صدر امى البقع فيها قبل اى زول .. وبجعــــــــــــــر .. بى طول حسى.. نعم ببكى بى مراره الفراق الجواى ..ودام سنه بحالها .. علنى افضى هم السنه الماضيه وشوقها فى اللحظات الاولى .. واخواتى واخوانى وباقى ناس البيت والجيران مكومين فينى كل واحد داير يعصرنى جوووووه الحشا .. وانا لما يغلبنى بتفن فى الواطه لما يرفعونى ..قولى بسم الله وصلتى ولقيتى اهلك كويسين .. احمدى الله ..

تلك دقات القلب تعلن أن آخر الأنفاس حسك الجميل هذا وهو انتحار لطول انتظار فقد التوازن أمام دمعة تستقبل في مقل العين رحيق الأفئدة..
لك عميق محبتي وشكري وامتناني يا سوما
وليتك تواصلين هذا السرد الشجي

معز

إذنك معاك يا نزار يا سيد الناس.. ما إنت صاحب الفضل دائماً
وربنا يديك العافية

الأخ نزار حسين
قلت إنت خايف علي من هرجهن
لكن أنا طبعاً ما عندي مشكلة في هرجهن
المشكلة بس الجيم دي تجي قبل الراء
هو سجيمان دا أحسن مننا وللا أحسن مننا
تحياتي

الأخ العزيز أبو حراز،
لك الشكر المبجل على سفرك الأنيق في واقع تعيس يصور حجم المعاناة والتناقض في وطن تلتهمه فئران العصر الأسود..
كان سردك جميلاً بحقائقه القاتمة وأبجدياته العارية من سحب الزيف المؤطر في وطن الغلابا..

لك تحياتي وشكري العظيم على تلك المساهمة الصادقة بحزنها النبيل

معز

السمؤل الغالي،
جميل انت هكذا وكل ما أراك دائماًً


ولسوف اعود

اخى الدكتور المعز /
جمال شخصى الضعيف لم ياتى من فراغ انما آتى من جمال عينيك
الجميلتين مااصلو قالو يا دكتور العيون الجميلة بترى
كل من حولها جميل
دائما ادعو لك ربى بان يجعل ايامك جميلة وان لاترى الى
الجميل
نفسى يا دكتور المعز اقمض عينى ثم افتحهها وجد نفسى معاك
امام مقرن النيليين واختر هذا المكان بالتحديد لجماله وكما
قال الفنان الراحل المقيم سيد خليفة

Quote: ولا الدنيا بما فيها تسوى ملتقى النيليين

تخريمة بسيطة يا دكتور

Quote: من خلال البروفائل دخلت الى موقع جامعة الخليج العربى . ومن خلال الموقع دخلت الى صفحتك الشخصية وعينى باردة على عصافيرك الاربعة ( الحلوين )

حبى وتقديرى
السمؤل

Quote: ًيلبس العراقي والسروال ويحمل كرسيه ليجلس في الشارع!!!

يـــــــــاحليلهم

راوية..

جميلةٌ ومدهشةْ..
وكل لحظة تطوف في غيابك الطويلِ
موحشةْ..

Quote: يـــــــــاحليلهم

يا «حليلك» إنت يا كليوباترا
بالمناسبة كليوباترا كانت مشهورة بأن أنفها جميل
لذلك كانت تستنشق نكهة العذوبة..

ألف تحية ليك عبر البحار النايمة تحلم بالخريف

معز

اخـي معـز
والله مستني وبلـهف باقي قصة الخرطوم
وبعدها لندن وهلمجرا....
لك كل الود
محمد يوسف

آآآآآآآآآآآآآآآآآآآآآآآآآآآآآآآآآآآآآآآآآخ يا محمد يوسف
هذا شجن طويل ولعلنا نعود..
لك هذا المقطع إهداءٍ لشخصك النبيل
مع تحية خاصة للسمؤل العزيز وأبوحراز ونزار حسين.. مع بقية العقد الفريد..

معز..
________________
الله إنى كنت ميسور المواهب
كنت أحلم أن اعيش بوردتين
و بعض ماء
قد كنت اسكن فى بريدى
كنت صوفىّ الدعاء
لا الحزن يقطن فى بلادى
او يغرّد فى ازدهاء
ذاك الذى ملك العقول
و شدّ افئدة النساء
و غدا نعود على جدارك
نتسحم بماء صبرك يارجاء
نبنى تلالك
ثم نحلم بالكساء
وغداً نعود .

الغالي سمؤل،
دائماً أنت مسك الختام..
وفاتحة الروعة

كل المحبة والإعزاز

معز

Quote: وطني: بكارة أنتظار أوكأس تدار تحت أقدام الكبار وطني: لُعبة أقتدار أو تكنولوجيا الاحتضار باي جهة يدار يصيرُ مائدة للإقتمار! حريتي: قمامة النظام حزبي: أنشوطة الاحلام ودمي: سفكة ليست حرام ووطني: هادئ ينام... وربما تتلألأ برأسة الاحلام ففيما الخصام والارض أدمنت الحطام..!

استاذ المعز

صباحك ود

احزنتني اللوحة التي خططت

ولايزال قلب ذاكرتي معلق بعيون تلك المرأة والقوانين الجائرة التي تباعد بيني و بين ذراعي أمي ..
سوما
انك سعيدة لانك هناك
وتستطعين ضم من تحبين

مع ودي
عالية

الأخت العزيزة علياء (عالية)،
أولاً لك الشكر اليانع مثل مرورك هنا وطلتك البهية وكلماتك الأنيقة..
ثم أعتذر عن تأخر عودتي لك فقد كنت خارج نطاق التغطية في رحلة خارجية
لك صادق المحبة ونأمل في تواصلك البهي

معز

د/ معز بخيت
اما عن

Quote: عطارة الغبش لعلاج الأيدز والسرطان والسكري والرطوبة والضغط!

وهذا غير العيادات المتحركة والتى قد تكون الكشات قد منعتها من الوقوف بالقرب من ميدان الامم المتحدة وشوارع اخرى وطبعا العيادات عبارة عن عربة بوكس محملة باكياس الدواء لكل داء والاغرب استخدام المايكرفون للدعاية طبعا ده يا دكتور ده عيادات اما على مستوى سوق ليبا وسوق ام فسوا وسوق ابوزيد وسوق سته وسوق اطلع بره وسوق لوانت راجل ادخل وسوق انجولا وسوق نحن كده الامر هنالك مختلف فتجد العجب بروفات عديل فى الشعوذه قبل الكشف لازم تصل بتاع (الرمل) علشان يحدد ليك مرضك ويحولك الى (الوداعية)علشان تعمل ليك تحليل شامل وولو كنت سعيد الحظ ما تقوم تظهر ليك الوداعية مرض جديد وفى هذه الحالة ما عليك الا الرجوع الى (رمالى ) بس الدور ده (رملته بيضاء ما حمراء ) وبعد ما تتأكد من التحاليل حينها تتوجه لمقابلة (كبيرهم) وهنا مربط الفرس يا كتب ليك علاج بروشته وده عادى حبة بخرات وموية محاية لكن المشكلة تكون فى جلسات والفيلم مافى الجلسة الهم الاكبر مطالب الجماعه (ديك اسود باحمر-تيس قرونه دفانه جو جسمه- دجاجة قاطعه- غراب اعور ) وما خفى كان اعظم .
طبعا الشفته انت فى زيارتك ده ممكن اقول عليها شفخانات لكن التخصصات ذى ما ذكرته ليك ده المشكلة
وشكرا على هذه المشاهدة بعيون فاحصة
وفى انتظار بقية الشقته وبحروف اديب كتبته
تحياتى

بلدي يا حبوب يا عظيم،

Quote: اما على مستوى سوق ليبيا وسوق ام دفسوا وسوق ابوزيد وسوق سته وسوق اطلع بره وسوق لو انت راجل ادخل وسوق انجولا وسوق نحن كده الامر هنالك مختلف فتجد العجب بروفات عديل فى الشعوذه قبل الكشف لازم تصل بتاع (الرمل) علشان يحدد ليك مرضك ويحولك الى (الوداعية)علشان تعمل ليك تحليل شامل

عليك الله بعد كدة في أي مشاهد تانية؟!! والله العظيم ما خليت حاجة.. والسبب إنو الدولة رفعت إيدها من العلاج وآدي النتيجة..
الله يديك العافية..

معز