رقية وراق تسقط من الطائرة!

نسمة باردة هبت على الدوحة ، الناس التي إعتصمت منذ أيام بالغرف المكندشة إتقاء الحرارة والرطوبة التي يشتهي فيها الشهيق ، خرجوا ليبتهلوا فرصة قد لا تتكرر وجو غير متوقع في الدوحة في هذا الوقت من فصول السنة ، خرجوا إلى الحدائق والكورنيش وبعضهم أخذ العيال إلى حديقة الحيوان التي فتحت أبوابها على غير عادتها ! الفرح ساد المدينة المتجهمة ، وسرى خدر لذيذ ، وبداء الناس متسامحين وسمحين.
فجأة غمر ضوء باهر المكان ،لم يعرف الناس مصدره ، أخذوا يتلفتون في كل الجهات ، كان يأتيهم من كل جهة ، رفعوا رؤسهم للسماء ، ظنوا أن القمر يدنو من الأرض بالضوء الشفيف ، فركوا عيونهم وأعادوا البصر كرتين ، رأوها ، رأيناها تنزل علينا بالضوء ، تتنزل علينا كما الوحي ، من اللامكان سرى صوت وردي بالود ، وسرى صوتها مثل العبير بمناحة الصقيع وقصائد أخرى ، نثرت كنوزها وروائعها
عرف الناس ان النسمة الباردة ما أخرجتهم إلا لكي يروا المعجزة ، أن رقية وراق هنا ، أقرب اليهم من الأماني ، وأحن من أم رؤوم.

منذ الأمس نحن في حضرتها بهاء وجمال وذكاء وقاد وحضور مدهش ، سنكون جوقتها اليوم عندما تنشد قصائدها في الدفنة في الدوحة .
بقدر سعادتي لأنها ستعيد الحياة لنا لمدة أسبوع يجعلني أمد لساني لعثمان تراث الذي كاد يجن لما أنسرب له صوتها عبر الأسلاك ، و ودقاسم الذي ابى ان يترك التلفون حتى إعتصر أخر أنفاسه وقيل شوهد بعدها يتجول في الطرقات مزهوآ وآملآ ، برغم هذا أخاف من إنقضاء الأسبوع يوم 27 عندما تتركنا لزيارة الأهل والأصحاب في الخرطوم
يا ناس الخرطوم حاسدكم عديل عشان كده لن نتركها حتى نعتصر سلافة إبداعها ونفكها ليكم ليمونة معصورة ، بعد أيام رقية وقبلها تماضر حبيب الله ، حظ العمايا!

يا الله ..
...
يا الله يا الله .. رقيه وراق يا ابوساندرا ؟؟؟؟
نحنا الناس المشعلقين ما بين السماء والارض ديل نعمل شنو ؟؟
يا ابوساندرا .. ده ما حظ العمايا . ده حظ المفتحين شديد .. ويروحو في الرجلين الزينا ديل ...

لكن ليه كده بس انت ما غظت تراث بس .. حسع انا قربت اطرشقت وشكلي كده ح احرد بوستك ده تاني..

ياسلالالالالالالام علي هذه الرقية..
ويابختكم يااهل الدوحة .. برقية وراق الوريفة..

يا ابوساندرا .. (شريكك)
غايتو البوست ده اتصرف لي فيهو شان تفش غبينتي دي ..

يااااااااااا الله ياخ ..

أبو ماهي
لك وللرشيدة كل المعزة، نور بيتنا وشارع بيتنا، بحضور هذه الجميلة...
طبعا فاجأني بالأمس نادوس بهاتفها، وحضورها البهي لزيارتنا مساء اليوم....
ننتظرها على أحر من الجمر...

تخيل أعدد بوست ترحيبي بهذه النخلة الباسقة....ولكن لعن الله الأمية بهذه التكنلوجية
فقد ضاع أين ذهب لا أدري، وأنا أعيش حال الحسرة على مشاعر دلقتها فضاعت، دون أن تصل لها
وجدت هذا البوست...

ويا جندرية "ببل شوقك بهاتف"

غايتو في ناس في الدنيا دي بتريد روحها ريدة

شنو حركاتك انت وصاحبك دي ؟
ما عارفننا بنوم من المغرب
الليلة دي كان ما مشيت اشتريت كرت
وخليت السامقة الخضراء تكلمني هي واخوها كمان
لحدي ما شوقي نبل
يا ويلك وسواد ليلك
الكلام دا عربي عديل كدا
ما تعمل لي فيها اطرش

ويا نسام الخليج هبي

تمبس والجندرية

غايتو ممكن ننظر في طلباتكم ، بعد ما أقابل رقية بعدين في الحفل!!

نتمنى لرقية وراق وقتأ ممتعأ بين ظهرانيكم والوطن

لك الشكر يا أبا ساندرا

والتحية للأستاذة رقية وراق.. ويا ريت تقدروا تسجلوا وتسمعونا في البالتوك..

أبو ساندرا قال:

Quote: حظ العمايا!

طيب ربنا حنا عليكم يا العمايا.. ما تحنوا علينا نحن المكسرين وتشيلونا! مش قالوا الأعمى يشيل المكسر؟؟
أنا واحد من المكسرين ديل.. غير ألاقيكم في الشاشة دي، ما عندي أي طريقة تاني..


تسلم يا ملك .. ومبروك عليكم..

أبنوسه
نادوس أمس {باعك} ونام بالمحادثة مع الراقية
عادل عثمان
شكرآ على الطلة وكتر خيرك
الحبيب ياسر الشريف
والله مشتاقين ، والعمايا ديل ناس الخرطوم ، نحن عندهنا معاها أيام ،أقل من أسبوع ، وناس الخرطوم شهر بحالو

فرح
شكرآ على الجمال البريء

سلامات
وعوافي
ياابوساندرا سلامات
يشهد الله خلعتني خلعة ...
قبل دقيقتين فتحت رسالة من صديقي محمد الطائف من السودان يقول فيها انا رقية وراق بالدوحة ..فقال لي اسمع لي معاك.. طوالي جيت افتش لي عبق هذه الانسانة النبيلة فوجدت بوستك هذا
ولاادري هل الوًم ام اٌلام...
الف مرحب بالنخلة التي تساقط علينا ثمر الحديث المهذب والشعر الحنين
الف مرحب برقية ذات الهيام الاصيل بقضايانا وقضايا اطفالنا البائسين
الف مرحب برقية وراق وهي قد امتشقت مبضع الحروف لتحيل جراحاتنا افراحا ومحبة
الف مرحب رقية وراق
الف مرحب رقية وراق
الف مرحب رقية وراق
ولصديقي محمد الطائف اقول
لو ان اذني تعاني من صمم طويل فاني اليوم احسبها توازي صفة عين زرقاء اليمامة فلها العين ولي السمع .. فدعني التقط انفاس الغنا ثم ابثها لك .. وارجو المعذرة فحينها اكون في كامل سكرتي من نبيذ القصائد ...
والمحبة نيلين
طيب ياابوساندرا سلم عليها الي ان يكتب الله لنا شوف وسمع
وياابنوسة ونادوس خسمتكم بالنبي اكان تدفنوا براكم
شفتوا الشلهتا دي كيف
التحايا نواضر

صحبتكم السلامة يارقية، نتمنى لكم قضاء اجازة سعيدة
و ترجعوا بالسلامة قريباان شاء الله.

ابوساندرا
ابنوسه ونادوسها الجميل
وكل بورداب الدوحة الحلوين/ت

والله انا معاكم/ن رضيتوا ولا ابيتو اصلو عندى النية اجيكم/ن وارمى الروح التعبانه فى ظلال انسانكم، اه عندكم راى ولا اجى

ويارقية فيينا من الدوحة خمسة ساعات بس ماتعالى وغنى معانا فى الزمن الصعب ياجميلة

الجندرية.. تمى توبك فعيد الدوحة بدأ يطل بسقوط رقية الجميل

استاذنا ياسر الشريف.. فيينا دى ما تكلة منكم وتعبروا متعرجاتها الجميلة المذدانة بخضرة لا مثيل لها، طبعا ده تحريض لرقية تجيينا بجاى ولو جات على عليك اجيبها واجيكم


ومحبة

أديت صلاة العيد مع أهل الدوحة عبر الهاتف ، من زمان وأنا مصاحب أبوساندرا ، لكن أمبارح بس اتأكدت أن أبوساندرا صادق في صحوبيتي ليهو ،، والله اتونست مع رقية أكثر مما وصفها أبوساندرا ، لكني لا زلت أحس بلهفة وشوق لمزيد من الونسة معها ،، والله لو أن هذا المنبر لم يمنحني شيئا غير فرصة التحدث إلى رقية وراق لكان هذا كافيا ، ولكان أمرا يستحق مني الشكر لبكري ومنبره ،،
كانت الدوحة فعلا تعيش أحد أعيادها ، وكنت أنا أعيش معها هذا العيد ، وقد يممت وجهي شطر الدوحة ، وسيظل هكذا حتى يرحل عنها القمر ،،
الله يديك العافية يا أبوساندرا ، ويخليك ،، وتحياتي لرقية ووليد ، وكل رفاق الحضرة ،، ويا رقية في السعودية يؤدي الناس العمرة ، والله معزومة عمرة ،،

شكرا يا أبو ساندرا.. أتاريني أنا ما فهمت أنو العمايا ديل بتاعين الخرطوم.. طيب يا سيدي الأداهم بالكيلو وأداكم بالوقية أريتو يدينا بالجرام!!

العزيزة إشراقة: نحن كان جينا فيينا ما بنلقى فرصة للاستماع .. لكن نرجو أن نجيء يوم للزيارة والمطايبة.. وعشمنا أن نتمكن من سماعك في يوم على البالتوك في ليلة سماع..

كما قال ود قاسم، فإن هذا المنبر فتح لنا بابا للسعادة..

لو لحظة من وسن تحمل عني حزني
تحملني ترجعني إلى عيون وطني

هذا البورد أصبح وطننا..

أبوساندرا...

تحياتى نديات...

رقية وراق ؟

الكلام النسيم الآن بالدوحة..

أكاد أكون على حسد...

لا أعرفها الا عبر هذا المنبر

لكن كلامها يكاد يكون (طبطبة) على..

كلام نسيم ننتظره من الدوحة..

كذلك..

إبحثوا معى عن محمد مدنى..تراه كيف يكون ؟


ارتال الود...


عبد الرحمن قوى

Quote: نسمة باردة هبت على الدوحة

نسمة وبادرة في الدوحة.. أول ما قريت الكلمتين ديل في جملة واحدة قلت.. في الأمر إن وباقي الأخوات... رقية وراق في البلد وانا آخر من يعلم!؟ صحيح انا منقطعه عن العالم الخارجي والداخلي كله.. لكن.. معقولة لم أرى نجماً يلمع في سمائنا الحارة حتى في نص الليل... يا جماعة.. قولوا لينا.. نسلم كيف.. ونرحب بي وين.. ونعمل شنو بالضبط عشان نتشرف باللقاء

بنت الحسين

ياصوتها لما سري عبر الاسير.......
ليتني كنت معكم لاسترق السمع والبصر..فامتلا بذلك النور

هنئية لكم بورداب قطر وصحبتك السلامة يارقية، نتمنى لكم قضاء اجازة سعيدة

ابوساندرا فاتح لينا وبترد علينا، اها رقية دى وبتسافر بعدين تمشى تفتش فى صحباتك القديمات، حتى معاوية الزبير ونادوس بطلوا الطلة والله بالغتوا،


الوصية فى الزمة، قول لمعاوية مافى جديد


ومحبة

ابو ساندرا يا ثقيل...جنك تحندك الناس!!!!!!!!

المهم هزوا اليكم بجزع نخلة رقية تساقط عليكم رطب الود والشعر
واسمعوا واعوا وما ان ترون احد من البورداب قولو له انا نذرنا
لرقية وراق اسبوع من عمرنا وانتم الفائزون..وما تنسونا من صالح
الكاست...تانى بختكم،،،،

ابنوسة
شكراً على التلفون
لكن وحاتك الشوق دا حوض رملة

ابو ساندرا
ان شاء الله رقية .. تنفعكم .
بلقاها رقية في جواي . وبتظل جواي ، وبتمشي منكم ياخونة .
رقية نحن جنبك علينا الله مري علينا

عفوآ يا صحاب ،ما زلت متعتع نشوة من ما دلقته علينا رقية من المعتق ،خمرآ صافي سال بصوتها ذي النبرة الهادئة الوقور فبلل أوردة صابها الجفاف ، فأزحت عن الجبين تقطيبة ، عن القلب ما تراكم من تنهدات وآلآم ، وأماطت الصهد عن الدوحة فإستنشق الناس هواءآ طيبآ ،ريحآ عبقآ ودعاش.
بالأمس رتلت بعض من سور الحب والشوق والحنين ، ناحت من الصقيع ، فأن نعيم المهدي وراح يلتمس المن والسلوى من فاموس البداوة باهر التعبير ، عميق الدلالات.
بألأمس أعادتني رقية إلى سنوات الصبا في الجامعة ، حينما كنا ننتظرها عند البوابة الشمالية ، ونفرح لما نراها قادمة بمشيتها العجول { قبل ان ترغمها الهجرأت على تهدئة إيقاعها} رأيت الفناء يمور بحرارة اللقيا وزخم النضال ، {ايت سلوى سعيد ، وعادل فيصل وياسر عرمان ، بل رأيت أبناء وبنات جيلي في الجامعة ، علي عوض وأحمد عكاشة ، ونفيسة هلال ، ذات المشاعر الجياشة ، أيامها ، رأيتها بألأمس في عيون ود رمليه التي تقالد الحضور من جم ، رأيتها في توتر محمد عبدالرحمن ، في رهبة غشت معتصم الطاهر الشاعر الذي ضل طريقه إلى الهندسة ، كان أشبه بيوم الإمتحان ، إرتجف حتى أخمص قدميه في حضرة رقية

بختكم/ن وفى انتظار نسمع ونشوف الصور

إشراق
- الصور في الطريق وكذلك التسجيل وهذا كله مكلف به نادوس
-نحن كذلك نتمنى حضورك هنا ، وسوف نبذل كل الجهد ومعاوية ونادوس على أهبة الإستعداد
ود قاسم:
عمرة !! بضم العين وصرتها أم بفتحها قدر الريال أبوعشرين وعندها يلك الله ، بعدين إنت قائل صحوبيتنا قشرة ، دي يا ولد واصلة لغاية الديم ، ورقراق شايفاها تؤامة بيننا حددت لي تفاصيلها فأدهشتني وصدقت يا توم ، وجيري

ياسر الشريف:
نفرح بزيارتك جدآ ، ونتمنى لك حظ وفير وليس بالجرام ، هكذا أنتم دائمآ زاهدين

عبدالرحمن قوي
محمد مدني كان أمس حاضرآ في حكايات رقية ، كيف أحوالك؟

مريم بت الحسين
فاتك يوم ، فاتك الروعة والجمال

صديق الموج
يا { صديق} أمواجك!

ود رملية:
ما أروعك ، صادق الحس والشعور ، كاد دمعك يطفر من أجل المشردين

المسافة
تايغر18
ديمقرسي
شكرآ على توقيعكم في دفتر الحضور

خلسة تسربت من بين الأصابع ، كما الماء يأبى ألإعتقال، كما الضوء إذ ينسرب شفيفا ، هذا الصباح مارست الطائرة عادتها في عدم الإستقرار على حال ، كما الدنيا، تجيب وتودي ، لما إستجابت وجابت رقراق لينا هتفنا المجد للطائرات بنات المطار وتعتعنا فرحآ غامر ، هاهي تسرق فرحتنا ، بصباح ، وتأخذها للخرطوم توديها،
غني يا خرطوم غني ، شدي أوتار المغني ، فيا بورداب الخرطوم رقية الآن بينكم فهيئو الأحضان ، ويا بورداب الدوحة هاتو المناديل .

أبو ساندرا
زعلت من كلامي ولا شنو؟ شايفك اتجاهلتني .
والله انا بهظر . لاحاسد ولا بغران . لكني غيران . ومنبع هذه الغيرة حب محض . فهل تلومني على المحبة ، هذه الطافحة نحوكم جميعأً ؟

تراث
لك كل الحب يا عثمان ،وأنت تعرف مشاعرنا نحوك ومعزتك عندنا لا يعتورها زعل ولا يشوبها أي إحتمال لذلك ، بل على العكس تمامآ ، كنت مستمتع ومازلت بشلهتك في التلفون .