Post: #1
Title: سيجمان اشعبط في الصحافة
Author: محمد الامين محمد
Date: 12-23-2005, 10:50 AM
Parent: #0
وانا اطالع الصحافه لاقني كلام خارم بارم ذي ;كلام سيجمان وفجعه كلحت صوره ياه بتاعت سيجمان حقنادة بي شلاضمو وكاتب الكلام ده
Quote: سنتر الخرتوم.. السلام في الجضوم!!
عشر سنوات عجاف.. في غربة.. لما مشيت لها قلت لها ليكي اللحم ولي العضم.. وفعلا عدت.. وانا عضام نخرة.. عشر سنوات متواصلة انقطاع عن البلد.. دخلتها اباطي والنجم.. وخايف لا الاباط لا النجم بعد شوية ما القاهن!!.. ملاحظاتي ملاحظات زول مندهش ويتلفت بسبب وبلا سبب..
* سمعت انو عوض دكام اتوفي الله يرحمو.. لكن كل ما اركب حافلة واللا اسمع حفلة.. اي فنان يقعد يكورك يا عوض دكام.. يا عوض دكام.. الفنانين قابلو الزول دا.. وفي قبرو ما دايرين يريحوهو..
* لاحظت.. البنوت بقن.. اكثر سماحة من على البعد.. وأول مرة اعرف معنى خافت لونين ـ تلقى الواحدة الوش ابيض ناصع البياض.. والايدين والكرعين سوداء.. يعني خاتف لونين اللون الاساسي لون زينب.. والباقي اجتهاد منها.. السلام في الايدين خلنو.. وختن ليهو القدرو.. بقت الواحدة اول ما تتشعبط في اختها.. تقعد تسلم في الجضوم.. لكن بي حرفنة شديدة.. عشان ما تبوظ البوهية حقة الوش.. تسلم وبعد تفكها تقول ليها: بالله كيف يا ميمي؟!.. واللا.. نيني.. ميمي اسم دلع لمريم ونيني اسم دلع لندى.. واب نيني.. مرض معروف يصيب الماعز.. اليوم داك.. وانا في المسرح.. جنبي قاعدة شلة بنات.. بيني وبينهم مسافة كبيرة.. جات واحدة.. وقعدت تسلم عليهن في جضومهن.. بالدور.. والله لحمي اكلني.. ودخلت في ضفوري.. وخفت البنية دي تقوم تصلني ونبقى في السلام اللعوج دا.. واضمرت في نفسي.. لو جات وحاولت محاولة زي دي.. علا البعا واطيرها هنوووك.. والله اياهو.. كما دا الفضل.. لكن ربنا ستر.. وحفظني.. وغتا علي.. نحن باقي لي ماشين فوق درب الخواجات.. المحيرني ومخليني استعجب.. تلقى اثنين يتقابلن في السوق العربي.. ونص النهار.. ويشعطبن في بعض... ويقعدن يسلمن في الجضوم.. في القايلة دي... والشمش الحارة.. والعرق يخر بيني وبين نفسي فكرت.. يا ربي؟ يكون السلام اللليل البنوت دا في اتفاقية السلام فرت؟ والله يبقى في تكون الحكومة اتلومت فينا.. لوم ضكر..
* ارحب بكل قرائي الذين كانوا يتابعون كتاباتي عبر جريدة الصحافة.. كما ارحب بكل قرائي عبر الانترنت في موقع سودانيز ون لاين.. وموقع الدكتور المعز عمر بخيت.. متمنيا ان اتواصل معهم مرة اخرى عبر ملف ونسة.. كل جمعة من كل اسبوع
|
|
Post: #2
Title: Re: سيجمان اشعبط في الصحافة
Author: ناصر محمد خليل
Date: 12-23-2005, 02:41 PM
Parent: #1
الاخ محمد الامين
حقيقة لقد إندهشت جدا عندما قرأت ما كتبه سجيمان صباح اليوم في الجريدة المذكورة وكان نصف ما كتبه هو أبعد ما يكون عن اسلوبه المعروف والذي يتميز بالعامية الشديدة والنصف الاخر هو اسلوبه المعروف به في هذا المنبر .
ولولا صورته التي رأيتها في تجمع بورداب الخرطوم لما تعرفته .
|
Post: #3
Title: Re: سيجمان اشعبط في الصحافة
Author: تيسير عووضة
Date: 12-23-2005, 02:42 PM
Parent: #1
الأخ محمد الأمين
إزيك
سجيمان دا لو ما لحقا الواشنطن بوست
ولا الديلي تلغراف ماااا بيرتاح 
|
Post: #4
Title: Re: سيجمان اشعبط في الصحافة
Author: سجيمان
Date: 12-25-2005, 07:55 AM
Parent: #3
محمد الامين
المفاجعات في الاعداد القادمة.......
تيسير عووضة
Quote: سجيمان دا لو ما لحقا الواشنطن بوست
ولا الديلي تلغراف ماااا بيرتاح |
اديها صنة بس......
|
Post: #5
Title: Re: سيجمان اشعبط في الصحافة
Author: نادية عثمان
Date: 12-25-2005, 08:02 AM
Parent: #4
سى جى
انت البروف موش محتكرك ؟؟
|
Post: #6
Title: Re: سيجمان اشعبط في الصحافة
Author: سجيمان
Date: 12-25-2005, 08:09 AM
Parent: #5
ندوية العسللي
مقالي في صفحة عكس الريح في جريدة الاضواء..... ما بفرط فيهو حتى لو كتبت في عشرين جريدة..... حتى لو الواشنطون بوست......والبروف كوم براهو.......
|
Post: #7
Title: Re: سيجمان اشعبط في الصحافة
Author: محمد الامين محمد
Date: 12-25-2005, 08:34 AM
Parent: #4
طيب ياسيجمان لو انت بقيت صحفي ناس صباح ديل يعملو شنو عليك الله عندنا طهار الاسبوع الجاي انشر لي الخبر وخقك بره
|
|