Post: #1
Title: بوست مريخابى احمر ,, للتضامن مع هلال العزه فى معركة عبور الوداد ,, من اجل الوطن الواحد !!
Author: على محمد على بشير
Date: 12-20-2005, 04:12 AM
غدا الاربعاء ,, وعندما تودعنا الشمس وهى تركض نحو مسارات المغيب
نتحد نحن اهل المريخ العظيم ,, نتحد بقلوبنا ومشاعرنا مع هلال العزه والشموخ وهو يلاعب الوداد ,, نتحد معهم بقلوبنا من اجل السودان الوطن الواحد ,, ومن اجل عزتنا كسودانيين ,, ومن اجل تآخينا فى الوطن الكبير .
غدا تتحد مشاعرنا وقلوبنا ,, ونخلع ثوب الانتماء الضيق ونلبس ثوب الوطنيه الواسع الزاهى وبكل الالوان ,, فغدا معركة نكون او لانكون ,, معركة عز وفخار ,, معركة كل سودانى وكل سودانيه ,, معركة كل شاب وطفل وشيخ ,, معركه من اجل السودان ولا شئ سواه
معركه من اجل الوطن واسمه وسمعته ومكانته ,, غدا نودع الاختلاف والاحتراب وتتوحد فينا الكلمه والهدف والمشاعر والاحساس بالاخر ,, غدا تزغرد مهيره ويصفق محمد احمد ويركض مسرورا دينق ويبتسم بحبور ادروب ,, نريد ان يكون غدا يوما من ايام السودان الخالده ,, نريده يوم وحده وتضامن ,, لا سخريه ولاتناحر ,, فالذى يحدث للهلال يشمل الوطن كله ,, فان كان خيرا فأن اسم السودان سيتردد على الفضائيات فخرا وعزة للجميع ,, وان كان شرا فسيتوارى الجميع خجلا واستحياءا .
وانا على يقين بأننا ان فعلنا وتوحدنا غدا بقلب رجل واحد ,, فسيقوم الاهله فى اليوم الذى يليه برد الدين فى اول مقابله خارجيه للمريخ ,, وعندها سنكون قد عبرنا بسلام نفق العنصريه المظلم الى سموات التسامى والتسامح والاتحاد والتعاضد نحو فهم رياضى سليم وتشجيع معافى ومبرأ من كل عيب ,, وانا واخوى على لبن عمى ,, وانا وابن عمى على الغريب !!
فهلا اتيتم ووقعتم هاهنا تضامنا مع الموج الازرق
هلا فعلتم
|
Post: #2
Title: Re: بوست مريخابى احمر ,, للتضامن مع هلال العزه فى معركة عبور الوداد ,, من اجل الوطن الواحد !
Author: Rakoba
Date: 12-20-2005, 04:25 AM
Parent: #1
| Quote: برد الدين فى اول مقابله خارجيه للمريخ |
ممنوع الدين ولو لي بعدين
|
Post: #3
Title: Re: بوست مريخابى احمر ,, للتضامن مع هلال العزه فى معركة عبور الوداد ,, من اجل الوطن الواحد !
Author: على محمد على بشير
Date: 12-20-2005, 04:47 AM
Parent: #2
| Quote: ممنوع الدين ولو لي بعدين |
العزيز راكوبه
ماكنت اود ان تكون اول مداخله فى بوست التضامن ,, هذه الكلمات
وخاصه من مريخابى اصيل ذيك كدا
ارجوك راجع ردك مره تانيه
ارجوك
|
Post: #4
Title: Re: بوست مريخابى احمر ,, للتضامن مع هلال العزه فى معركة عبور الوداد ,, من اجل الوطن الواحد !
Author: Rakoba
Date: 12-20-2005, 07:27 AM
Parent: #3
الاخ علي
تحياتي
ما أسهل أن أوافقك "سايبرياً" ولكن هذه كرة القدم، ولكل منا طريقته!
المباريات على مستوى الأندية لها طابع خاص!
تمنى لهم التوفيق بطريقتك وسأفعل بطريقتي !!
شاهد هدف مدافع الوداد محمد بن شريفة في مرمى الاتحاد السعودي (رابع العالم)، من المرة الأولى لن تتمكن من مشاهدة الكرة، فركز معاي في الإعادة البطيئة
|
Post: #5
Title: Re: بوست مريخابى احمر ,, للتضامن مع هلال العزه فى معركة عبور الوداد ,, من اجل الوطن الواحد !
Author: Rakoba
Date: 12-21-2005, 02:27 AM
Parent: #4
المبارة مساء اليوم ومنقولة على قناة ART 4 وهي بالطبع مشفرة.
تابعوا واحذروا
من سمير صرصار وعبدالرحيم الصعيدي!! وبالطبع قيدوم الفريق المخضرم محمد بن شريفه!
وأطرف تعليق من لاعبي الوداد، أنهم طالبوا بتحكيم نزيه!! المرة دي سبقوا الجماعة
|
Post: #6
Title: Re: بوست مريخابى احمر ,, للتضامن مع هلال العزه فى معركة عبور الوداد ,, من اجل الوطن الواحد !
Author: سامى عبد الوهاب مكى
Date: 12-21-2005, 02:46 AM
Parent: #1
مشاركة بسيطه لرفع الروح المعدنية.
رغماً عن اهل الهلال لم يعودوناعلى مثل هذه المواقف.
في مباراتنا مع مولودية اتي جمع من مشجعي الهلال وقد خلطوا الاحمر بالازرق وصفافير وهيلمانة قبل الكورة..ومع اول هجمه لمولودية إنقلب التشجيع لصرخة عجيبه(وااااااااااااااااي) عاد ده كلام ده.
|
Post: #7
Title: Re: بوست مريخابى احمر ,, للتضامن مع هلال العزه فى معركة عبور الوداد ,, من اجل الوطن الواحد !
Author: keiga2000
Date: 12-21-2005, 03:15 AM
Parent: #6
والله نحن معاهم لكن مابسترونا ديل ما اظنهم ينستروا خاصة وامام الوداد
بس قول يالطيف ماتصل الخمسات والسبعات
وانشاء الله منتصرين هو نحن لاقين فريق ينافسنا في الكاساااااااات المحموله جواااا
حرام نكون برانا كدا اليد الواحده مابتصفق
يلا هلموا للنصر
بس انسو لينا من هسع حكاية ام ضبيبينة بتاعت التحكيم دي والعبو كورتكم
ومافي حكم غلبوا فريق في بلدوا واستروا حالكم من هنا عشان ماتحتاجوا لاي شئ هناك
والله المستعان
|
Post: #8
Title: Re: بوست مريخابى احمر ,, للتضامن مع هلال العزه فى معركة عبور الوداد ,, من اجل الوطن الواحد !
Author: عصام دهب
Date: 12-21-2005, 06:12 AM
Parent: #7
| Quote: نتحد نحن اهل المريخ العظيم ,, نتحد بقلوبنا ومشاعرنا مع هلال العزه والشموخ وهو يلاعب الوداد |
يا جماعة بصراحة أنا ما متحد معاكم و لا حاجة ..
ما تفهموني غلط .. بس الموضوع ببساطة أنا ما بحب الهلال ..
و ما ممكن عشان الهلال لاعب مع فريق من برا أشجع الهلال رغم إني ما بحبه ..
ما في واحد يقول لي وطنيتك .. و فنيلتك .. و شنو .. شنو ..
القصة ما قصة وطنية و لا كابويات ..
القصة قصة ريد و بس ..
صراحة لو الهلال غلب الوداد .. الهلالاب حيفرحوا براهم ويقدونا عملنا و سوينا ..
عشان كدا .. أنا واضح و صريح ..
و ما داسيها ..
يلعب الهلال مع مكابي تل أبيب .. بشجع مكابي ..
يلعب الهلال مع هلال بورتسودان مثلاً .. أتمنى أنو الإتنين بتغلبوا دي ما بعرف تجي كيف لكن أسأل الله يجيبهايوم ..
يلا يا شباب .. أتقبلوا كلامي دا بروح رياضية و ما تزعلوا .. دا رايي و أنا مخيّر فيهو ..
و صدفوني فوز الهلال ما بفرحني و هزيمته ما بتزعلني ..
|
|