فاطنه القصب الأحمر

ولعل القصب الأحمر هو قصب السكر الذى يزرع فى الجنيد فلونه احمر او كبدى ولكننا لا نكترث لتوصيف الالوان عادة ...

فاطنة القصب الأحمر حجوة كانت تحكيها لنا عمتنا عشة بت طه ومعها حجاوى اخر منها فاطنة السمحة واخريات طال الزمن وتبخرت من الذاكرة ولم يبقى سوى ذكريات جميلة حينما كنا نجلس على البرش وتأتى الينا بالبلح والفول والتسالى وهى تحكى لنا وتحجينا ونحن نقزقز حتى ننوم فى منزلهم ويأتى اهلونا ليأخذوننا ونحن نيام .. بقيت فقط الذكريات الجميلة من زمن ولى ولن يعود بحال ...

ترى أحبتى هل فيكم من يحفظ فى ذاكرته شىء من تلك الاحاجى الجميلة ؟؟؟؟

وهل هنالك احاجى جديدة تحمل مضامين رائعة وأفكار جميلة لتربية النشء ؟؟؟

وهل هنالك موقع يجمع حكاوى ما قبل النوم للاطفال ؟؟؟؟

ابنى الصغير يطالبنى بحكاية قبل النوم ولكن الذاكرة لا تسعفنى فاضطر لتحويله الى امه التى تؤلف من رأسها ما شاءت وقطعا ليست حكاوى مدروسة تربويا وعلميا ....

هل أطمع فى عونكم أحبتى ؟؟؟؟


لكم ودى

الحبيب قرشـــو
لك الود
يقال : الزواج من ثانية دون العشرين من العمر
يجدد الشباب ويعود بالذاكرة لحيويتها

الجدة بت حرّان ، لها الرحمة
كنا نسهر معها بالحكاوي والأحاجي
وأذكر تلك التي كتبت عنها رواية في هذا المنبر
تحت عنوان (ليلة في الراكوبة) وهي شبه واقعية
لك ان تبحث عنها

حجيتكم ما بجيتكم
- تجري سريعة لا تفتر
تقطع الزمن بالساعة
تأكل ولا تشرب، ما هي؟
الطاحونة

الحبيب EMO

Quote: يقال : الزواج من ثانية دون العشرين من العمر يجدد الشباب ويعود بالذاكرة لحيويتها

قصدك الزواج من ثانية أم ثالثة ؟؟؟؟؟؟
ياخوى خلينى من قوالتهم دى ...

كلام ساااااااااااكت .....

أشكرك سيدى لمرورك الجميل وساحاول البحث عن (ليلة فى الراكوبة) بس ارجو انها ما تكون مخيفة يا سيدى فاطفال اليوم يشاهدون افلام الخيال العلمى التى تخيف الكبار وهم لا يخافون..

العزيز قرشو لك التحية وانت تثير فينا ذكرى ما مضى من حكاوى الزمن الجميل..

نحن جيل أواخر الستينات وبدايات السبعينات آخر من لحق بزمن الأحاجى (يعنى زى ما تقول لحقنا آخر عربية فى القطر)..

اتذكر تماماً عندما كنا صغار فى قريتى بالشمال كُنا نتجاذب أطراف الحكاوى ونحن نجلس تارةً على كثبان الرمال وتارة أخرى فى (الحيشان) الواسعة عندما نرغب فى الإستماع لـ(حجوة) من أحاجى (الحبوبة) والتى كانت تسرد فى مشقة بين (رطانتها) وما تجود بها قريحتها من كلمات معدودة بالعربية ..وكانت كثيراً من تولى هذه المهمة الى الخالة (الفاكة الخط)..والتى كانت بدورها تنتهز هذه الفرصة لتتخير المخيف من الأحاجى ،نستمع إليها وفى اوصالنا رعدة لا نكف عن الالتفات بين الحين والآخر وكلما تعمقت فى السرد زدنا إلتصاقاً ببعضنا البعض فى خوف ...وكانت الخالة تتعمد حكى قصص مخيفة عادة ما تكون مقرونة بمانقترف من شقاوة أثناء فترة النهار علها تكون لنا رادع.
ذلك ما أذكر..

Quote: ابنى الصغير يطالبنى بحكاية قبل النوم ولكن

ولكن ...ترى هل يقبل بنمط الحكاوى القديمة ام يجب ان تكون الحكاوى Modren

لك ودى
ودمت

الاخ قرشو

انصحك بقرأة كتاب كليلة ودمنة ففيه كثير من القصص على لسان الحيوانات ولكنها تنطوي على حكمة بالغة, وأدب حميل. واعتقد انها عصارة عمل يستحق أن نحكيه لاطفالنا؟ مع قليل من التخفيف إذا كانو صغاراً.

الأخت القلب النابض

لك التحية والاحترام

ولك الشكر على التوجيه الجميل ولكن عزيزتى قصص كليلة ودمنه كبيرة المحتوى وقد لا يهم الاطفال المغزى من حديث الحيوانات الذى اريد به توجيه رسائل للناس فى أزمنة منعت فيها الخطابة والحديث المباشر فكان حديث الحكماء على لسان الحيوانات...

لك تحياتى وودى الجميل

العزيز وليد طه

شكرا لمرورك سيدى ومحاولتك العون

حقا كانت الحكاوى جميلة ورائعة وبقى صداها فى الاعماق بلا توقف

اما اطفالنا اليوم فهم لن يصدقوا مثل تلك الحكاوى لانهم يروا فى التلفزيون العجائب والغرائب التى لا نستطيع مجاراتها ولو حاولنا وحقيقة المسألة محتاجة لجهد تربويين..

لك شكرى وتقديرى سيدى ولن تصدق ان الولد يرفض النوم دون ان يحكوا له حكاية ..

مع حبى واحترامى

العمدة قرشو
تغيب وتاتى بالجديد..والذكريات الحلوة

حجوة كانت تحكيها لى حبوبتى الحرم الله يرحمها ..على ما اعتقد كانت بدايتها..كانت هنالك عنزتين واحدة تسمى الجدلاء والاخرى كريت..مشن يسرحن فى الخلاء..يرعن العشب ..ومشن بعيييييييييييييد..وسط الغابة الى ان غابت الشمس..قامت الجدلاء قالت لكريت..ارحكى البيت..فابت كريت ان تمشى البيت فمشت شكتها للعصا ..قالت ليه ..
يالعصا قولى لكريت تمشى البيت ..فقال ليها ابيت...
فمشت للنار..قالت يالنار قولى للعصا عشان تكلم كريت كريت ابت ما تمشى البيت قالت ليها ابيت..
فمشت للسيل قالت ليه يالسيل قول للنار عشان تكلم العصا..العصا ابت ما تقول لكريت كريت ابت ما تمشى البيت قال ليها ابيت...
فمشت للجمل قالت ليه يالجمل قول للسيل عشان يكلم النار عشان تكلم العصا..
العصا ابت ما تقول لكريت كريت ابت ما تمشى البيت قال ليها ابيت..
. فمشت للرحل..قالت ليه يالرحل قول للجمل عشان يكلم السيل عشان يكلم النار عشان تكلم العصا عشان تكلم كريت كريت ابت ما تمشى البيت قال ليها ابيت..
.فمشت للفأر قالت ليه يالفأر كلم الرحل عشان عشان يقول للجمل عشان يكلم السيل عشان يكلم النار عشان تكلم العصا عشان تكلم كريت كريت ابت ما تمشى البيت قال ليها ابيت...
فمشت للكديسة قالت ليها يالكديسة كلمى الفار..عشان يكلم الرحل عشان يقول للجمل عشان يكلم السيل عشان يكلم النار عشان تكلم العصا عشان تكلم كريت كريت ابت ما تمشى البيت ...
.فاكديسة..سكت الفار ..والفأر قرض الرحل..فالرحل هجر الجمل..والجمل شرب من السيل..فالسيل داير يطفى النار..فالنار دايرة تحرق العصا..فالعصا ضربت كريت..فكريت مشت البيت....
انقر فى زول صاحى غير اصابعى والكى بورد....

الحبيب ابوقوته

لك التحية

يا سلام ماهو نوع الحجوات دى نحن العاوزنها ياخى

يعنى كل حاجة عندها دواء وزى ما بقولوا الحبوبات سيد ابوى بى سيدو ...

وبعدين يا سيدى انت بتكتب لينا فى انصاص الليالى وداك وقت استدعاء الاحاجى الجميلة ولكن فى حالنا هذه لا شىء يسوق النوم الينا ولكن ابناءنا مازالوا فى طريق الهدهده وهى تتواصل بالاحاجى ..

سعيد بمرورك وسمعت قالوا سويت ليك موقع براك بس ما عارف الرابط بتاعه ...

لك تحياتى

خالد دا رابط الموقع
زورنا واقطف زهورنا
اياك شمسنا وبدورنا
abuguta.com/db

شكرا اخى ابوقوته

لكن تصدق الموقع ابى يفتح معاى عديل كده


خلينى احاول فيه لاحقا

لك تحياتى