مصادرة الطلح في مطار الخرطوم

الظلم: هو مجاوزة الحد والتعدي على الخلق ، وقال الراغب : هو لغة وضع الشيء في غير موضعه المختص به بنقص أو زيادة أو عدول عن وقته أو مكانه ، وأقبح أنواعه ظلم من ليس له ناصر إلا الله ، قال ابن عبد العزيز: إياك ! إياك أن تظلم من لا ينتصر عليك إلا بالله (فحسبي الله ونعم الوكيل فيمن ظلمني وظلم أخواني)

القصة عادية مقارنة بقصص الظلم التي تقع على المواطن السوداني بصورة عامة والمغتررررب بصورة خاصة وسجم المغتربين وخاسة البي نساوينم.

استمتعت بإجازتي السنوية في السودان وقمة المتعة هي أن تكون بين الأهل والأصدقاء والأحباب والجيران ...الخ،وفي كل صباح تنداح قصص وحكايات ومواقف (العجب العجاب) يعني كل واحدة نكته ...يعني بي صراحة الحلمان يرجع السودان (الضحك شرطك)
والضحك شرطني في آخر دقائق وأنا في مطار الخرطوم،،،حيث كادت الطائرة أن تقلع دوني بسبب ربطة بتاعت طلح.
المهم استمتعوا معي بالتأمل في الإيصال أو السند المالي أو التصريح أو.... سموه ما شئتم إلى أن أعود إليكم بالقصة (الضحك شرطني).

بالمناسبة نويت أشتغل في تصدير الطلح حسب ما ورد في الشهادة أعلاه لأنو الفترة الجاية حتكون في أزمة بتاعت حفر (أقصد بتاعت طلح)

إن كانت الشهادة الصحية للطلح حالة كونه حطب دخان فإنها في هذه الحالة يجب أن تكون شهادة وفاة. وأكيد أخي إذا عرف السبب بطل العجب كما يقولون فهانذا أحاول أن أجد تبرير للمنع وسوف أسرح مرة ومرة ومرة وآه وآه لو تنفع آه
فالسرحة الأولى (والسرح في حد ذاته نوع من أنواع الشجر في أمصارأهل العوض) أنه إذا كان المنع حفاظاً على البيئة فلا مانع من ذلك بل أنا من أكثر المناصرين للحفاظ عليها بعد أن ضربها الجفاف ولم تعد هناك شجرة واحدة قائمة أو قاعدة ، أما السرحة التانية فهي بكل تأكيد تتعلق بتحديد النسل.
والخوف أخي الكريم أن تتم مصادرة شريط الكاسيت خاصتي لأن من بين أغنياته أسأل العنبه الرامية فوق بيتنا لأنه قد تم تصنيف العنب من المنتجات الزراعية.
وعشرة كيلو يا كبسيبه يا مفتري طيب خليها خمسة طلح وخمسه شاف و ما شاف حتى

كبسيبةأخوي
اعتقد أن الايصال هو للمستورد.. ويعنى بفحص الفسائل الحية المجلوبة للزراعة خوفاً من انتشار الامراض.. كما حدث في الشمالية حيث ان انخيل اصيبت بمرض مستورد .. أو أن هنالك من اتى بالمرض لضرب الاقتصاد.. ونشر الفيروسات..
أما قصة طلحك يبدو أنك استخدمت وسيلة نفل ممنوعة رغم أن الموظف لم يتعب نفسو لكي يملأ هذه الخانه وخانات اخرى.. ويبدو أن أم العيال ليلتها كانت متدخنة مما أشكل عليه معرفة اذا ما كان الطرد ماشي ولا جايي..
أرى أن ما ذهب اليه السيد الرفيف ملاعمر في الكثير من الحقائق التى تدحض نية بعضهم للدخان تلك الليلة .. وذلك بغرض التكاثر المشروع.. والحفاظ على البيئة التكاثرية لانجاب اطفال أصحاء مدخنين..

في انتظارك..

كبسيبة يا اخوى سلام

عاد يطرشنى ويعمى بنات جيرانا من دا الخبر

الله يهون انا كل سنة باخوى واخوك يحصلونى الطيارة

دا كله عشان عيون الحاجات السودانية

اها كمان جابت ليها شهادات طلح

نبقى خواجات ونسافر بشنطة يد صغيرة عشان

نتماشى مع المشروع الحضارى


انتصار

Salam
I don't believe that! and you don't believe that
one day American authority confisicated
some (Sudanese Nabag) (sent to a friend of mine) from
me in San Francisco airport. If they see
this (10 K Talih) will arrest you as a terrorist
and your (Talih/Dukhan Hufrah) will be in Guntanamo.o
Have a nice night daily

سلامات

كبسيبة

والجاتك فى طلحك سامحتك
الحمد لله .. ما صادروا العِدّة ..

القضية واضحة ( غير معالج كيميائيا)

يعنى يا ما عندك خبرة ما اضفت ليه خُمرة و ضُفرة ..
غايتو أخونا ( فتحى دا حاسد بس) ..

والله يا هو ..

والله يا كبسيبة أخوي الظلم حاصل بس يظهر على الماعندو ظهر
يعني بقت على خشب الطلح الذي يباع في كل مكان وتأخذ الدولة زكاته وضرائبه
هم لو مقتحين كدا لكل وارد وصادر ما يفتحوا عيونهم على الموضوع دا
شركة CBMC الأمريكية في السودان ستتولى معالجة مخلّفات اليونان

ولا دا وراه رجال ظهرهم مسنود

يستوردوا عفن و مخلفات الآخرين لشركة تعمل على أرض السودان على عينك يا تاجر ويمنعوا حفنة من الخشب



لا حول ولا قوة إلا بالله

ملحوظة:
بس شعار الوزارة رهيب جداً بجد عجبني

تحياتي
فرانكلي

كالعادة انتهت الإجازة بسرعة البرق ورغم أنني مطيتها يومين كمان لكن لم أحس بهما بتاتاً على العموم ختمتها بعشوة كوارع ختيرة عند الحاجة سكينة وبعدها مشيت البقالة لأنو أخوي صمم أجيب لي معاهو (ستيم) شلت زي أربعة قزازات حجم عائلي ، يعني الشنطة كلها كانت عبارة عن طلح وستيم وفيما بعد سميناهو (الاستيم المكبرت) حقيقة طوال إجازتي استفزتني أشياء كثيرة (خاسة خاسة في شئون المسجمين والمهمشين)ولهذا من كثرتها لا أريد أن أذكرها لأنها بعد مرورها أحاول أن أهيل عليها التراب حتى لا أنبشها من جديد فتفســــد صفــائي الذهني خاصة الحظ أننا شعب لا نعرف الحقد والانتقام لأن الحب يغلب على المقت كما إن مواقف الحزن تذهب أيضًا بعد أن تمر العاصفة، ولأنني متفائل أتـوقع بأن الخير ســـوف يغـلب ولا يبقى إلا ما ينفع وأما الزبد فيذهب جفاء( والله يا جماعة ممغوس جنس مغسة).
المهم ستفت شنطتي وطلحي وستيمي وما تبقى من هديماتي طبعاً لازم يكون معاك ضهر ولا واسطة ولا أي مصيبة زمان عشان تخلص الإجراءات يعني بدون (سيك ميك) ولا (كاني ماني) وركبت البوكس يا يمه وطزززز في المطار، مطار التاباني
والكاسيت شغال بصوت فرفور (لما الريد يفوت حدو يبقى مصيرنا في يدو ....

نواصل

كبسيبة



تمشو من هنا تشاكلو بتاعين الخطوط على الوزن والقزاز والهدوم السمحات

تجو من هناك شايلين الحطب والطين ( الدلكة)

تجننننو

almulaomar يديك العافية أخوي
أنت مقتنع بأنو الموضوع مجرد شهادة ولا الشهادة دي زاتها بي كم وهل سعرها يغطي على تكلفة الطباعة والختم وماهية الموظف القاعد ده

Quote: وعشرة كيلو يا كبسيبه يا مفتري

أنت عارفو تموين كم سنة

showgi ليك طال

Quote: أما قصة طلحك يبدو أنك استخدمت وسيلة نفل ممنوعة

جاتني فكرة يا شوقي المرة الجاية أجيبو منجض
يعني أولع الدخان وأعبيهو في أكياس ولا أنبوب
نشوف المرة دي حيطلعوا لينا شهادة شنو!!!!!

انتسار بت مهمد سالخ : ازيك
توجد شركة الآن تسعي لتصنيع ساونا بنكهة الطلح
ممكن يكون بديل رأيك شنو؟

كبسيبة فكرة تصدير الطلح ممتازة خالص لكن ان اقترح انو مايتصدر كمادة خام انت ممكن تعمل مصنع حديث لتحويل الطلح الى دخان جاهز ويتعباء في اسطوانات باحجام مختلفة وباسعار مختلفة يعني حسب الطلب و الحوجة وماتنسي تكتب تاريخ الصنع وتاريخ انتهاء الصلاحية وتعمل ليك كم وكيل في الدول المستوردة ... وممكن تعمل هدية مع الاسطوانات ذات الحجم العائلي (شملة) او(نطع) .............هههها

yasiko بيكو
ما أنا جربتها قبل كده مع التركين (الملوحة)
وقعدت سنتين في سيبيريا

معتصم الطاهر : يديك العافية

Quote: والجاتك فى طلحك سامحتك الحمد لله .. ما صادروا العِدّة ..

العدة خليتها في الورشة يا معتصم

Quote: يعنى يا ما عندك خبرة ما اضفت ليه خُمرة و ضُفرة .. غايتو أخونا ( فتحى دا حاسد بس) ..

أنت عارف فتحي ده بارك الله فيهو قطع مشوار من بره الصالة لحدي جوه الصالة
عشان يجي يفحص الطلح يعني حق الشهادة ما بغطي مشوارو ده إذا ركب ليهو ركشة

Frankly أزيك يا لذيذ

عارف العلاقة بين عمر البشير والجنجويد والصعوط

تسلم يا ألذ ملك

Quote: عارف العلاقة بين عمر البشير والجنجويد والصعوط

أببببببداً

garjah الملتهب ليك وحشة والله

Quote: تجو من هناك شايلين الحطب والطين ( الدلكة)

أنت قعد تجي شايل شنو عشان نجيب زيك

ياخوانا ناقشوا الموضوع بجدية وروية ،

الذي يفهم من هذا الموضوع أن السلطات أرادت منعاً لتصدير الطلح ، وهذا ولله الحمد والمنة أحسن قرار أسمعه صادر كدا من جهة المطار والجمارك والسلطات المشابهة لها والتي كثيراً ما تتغلغل قرارتها في أمور تخصنا وغالباً تأتي بنتائج نعتبرها سالبة ومجحفة في حقنا واضعين في الإعتبار غربتنا الماهنتنا ومطالبين في نفس الوقت بمعاملة خاصة تراعي ظروفنا النفسية المتأرجحة بين الإحباط والأمل المشوب بالحذر.
جمال القرار يتفق مع رغبة ملحة كانت تراودني منذ أمد وأنا أعاني حاسيسة الأنف المزمنة تجاه كل ماهو أو من هو متصاعد غصباً عنك وأنت ترقبه. يتغشاك بما حمل من جزيئات تاركاً أثراً على حياتك شئت أم أبيت.
1- الطلح أخواني الكرام إن منعته السلطات بحجة تنظيم القطع الجاير للغابات فهو دون شك قرار حضاري ينسجم مع تطلعات أصدقاء البيئة أعداء التصحر ، وفي هذا تنظيم تلقائي للنسل بحبس أنفاس المستكينين تحت دوحة ((مثير بابلوف الشرطي)) أسوة بكلابه،،،، يعني سمكتين بطعم واحد خوفاً من عصفوري الإنفلونزا.

2- إنحسار الجبال المهولة من الأخشاب التي تصاحبنا في أسفارنا محملين بها : شيء هدايا وشيء وصايا وشيء نكاية ، وكثيرا من الأحيان ثقالة دم وعدم ذوق ، والغريب في الأمر أن لا أحد مطلقاً أظنه قد سال يوماً عن سبب الأرسالية هذه أو جدواها للمرسل إليه !!!!! حتى أن موظفي الجمارك في مطارات العالم بأسره - بعد أن تفرقت بنا المطارات - أصبح الأمر إليهم واقعا ولا يسألونا عن سر هذا العقار.

3- الأبخرة المتصاعدة من فوهات المداخن وأسطح المنازل كوراث بيئية تنذر بوجود سودانيين في الجوار، هذا أصبح منظراً مؤلوفا في أحياء بعينها في مدن كالرياض وبعض عواصم الخليج وبدأت تتقبله بقية الشعوب الأخرى وتألفه على مضض، أما المدائن التي غزاها السودانيون مؤخراً فإننا نشفق على أساطيل الدفاع المدني فيها خصوصاً تلك المرتبطة بتقنية الإنذار المبكر عن الحريق.

4- البند ثالثاً جعل السوداني موضع شبهة كبيرة عند إستئجار السكن وأصبح خيارا سيئاً لمالك العقار (ليس مالك عقار حق أحمد البلال) ، ويستبعد تماما إن كانت الشقة مجددة أو بيضاء تسر الناظرين.

5- ابناءنا بعد لعنة الطلح وقرد الطلح أصبحوا يعيرون بماحملناه وزنا زائداً بمحض فلوسنا: فيذكر أن شايب يغلي غيظا من حركات أولاد المغتربين وقلة أدبهم : أساء لهذه العملية في مجملها(ترحيل الطلح ليلاً ونهارا) : ملعون أبوكم : يشيلوكم طلح ويجبوكم شفع.

6- أرحمونا أحبابنا في جمعية أصدقاء الطلح والمتباكين على فراقه : تضامنوا معنا وشجعوا منتجات أخرى وأساليب أكثر صداقة لنا ولبيئتنا المحيطة : بأن تخصصوا غرف للساونا في دياركم العامرة وترتاحو من حكاية أحفرك أحفرك دي زي الأرانب ، أو ترتاحوا ومن رؤية ذلك الصندوق البشع الذي جادت به قريحة التقنيين منكم ليصبح بكل التواضع والقبح التصميمي : a portable cell or mobile hole

7- قال الله تعالى أعوذ بالله من الشيطان الرجيم ((وَأَصْحَابُ الْيَمِينِ مَا أَصْحَابُ الْيَمِينِ (27) فِي سِدْرٍ مَخْضُودٍ-28- وَطَلْحٍ مَنْضُودٍ (29)وَظِلٍّ مَمْدُودٍ (30) وَمَاءٍ مَسْكُوبٍ (31) وَفَاكِهَةٍ كَثِيرَةٍ
(32) لا مَقْطُوعَةٍ وَلا مَمْنُوعَةٍ (33) وَفُرُشٍ مَرْفُوعَةٍ (34)
صدق الله العظيم :
والشرح وأصحاب اليمين, ما أعظم مكانتهم وجزاءهم!! هم في سِدْر لا شوك فيه, وموز متراكب بعضه على بعض, وظلٍّ دائم لا يزول, وماء جار لا ينقطع, وفاكهة كثيرة لا تنفَد ولا تنقطع عنهم, ولا يمنعهم منها مانع, وفرشٍ مرفوعة على السرر.

8- جعلنا الله وإياكم منهم : اللهم آمين اللهم أمين اللهم آمين ، وصلى الله وسلم على نبينا محمد وعلى آله وصحبه أجمعين.

I do agree with you Kakri
we have to look at this case seriously

without comment

Quote: فيذكر أن شايب يغلي غيظا من حركات أولاد المغتربين وقلة أدبهم : أساء لهذه العملية في مجملها(ترحيل الطلح ليلاً ونهارا) : ملعون أبوكم : يشيلوكم طلح ويجبوكم شفع.

لا تعليق لدي سواء أنني تذكرت الفنان ابو داؤود عليه رحمة من الله
حينما كان مسافراً للخليج للقيام بحفلات للجالية السودانية
قابله واحد في المطار صديقه جداً
قال ليه يا أبوداؤود وصل الحاجة معاك ماشة تولد (تنفس) بنتها
وبدأت رحلة الشقاء مع أبو داؤود في العتالة وحمل ما ثقل وزنه وقلت قيمته
ألا وهو ( الطلـــــــــــــــــــح)
وعندما خرج من الصاله قابلوا الجماعة
قالوا ليه يا أبو داؤود المعاك دي مني؟
قال ليهم بزهج دي ... دي .. ما حمالة الحطب).
عموما لا تأسى على مصادرته
ما الدولة صادرت كرامتنا وأرواحنا

عبداللطيف : وأنا أقول ناس الهيلاهوب لمو فيك وين

Quote: قرار حضاري ينسجم مع تطلعات أصدقاء البيئة

أنا زاتي منهم ..ليه ما أتسجمته؟

Quote: أو جدواها للمرسل إليه !!!!!

ياتها فيهم الطلح ولا الشاف؟

Quote: الأبخرة المتصاعدة من فوهات المداخن

فوهات عديل كده ...دي وين ده عشان نمشي نشم

Quote: جعل السوداني موضع شبهة كبيرة عند إستئجار السكن وأصبح خيارا سيئاً لمالك العقار

سمعت في مرة إنو الشقة بقت تتأجر بالحفرة بحساب غرفة إضافية

Quote: ملعون أبوكم : يشيلوكم طلح ويجبوكم شفع.

نفسي أعرف شايب الهارت ده جابوهو كيف؟

Quote: أرحمونا أحبابنا في جمعية أصدقاء الطلح والمتباكين على فراقه

أنا لنا أن نبكي وقد غاب الدخان الذي يبكينا

عبداللطيف أنت حالتك شنو؟

كبسيبة العزيز تحياتي /

ياخ صورة جماعتك المشرمين دي والله رهيبة ، وتعرف كلما الواحد تجيهو دبرسة يجي ينبسط مع الجوز العجيب دا وكأني بهما يتزاحمان ليرسلان لنا هذه الإبتسامة الآسرة الساحرة ، ولسان حالهما يقول : الجود بالموجود ، ومع أنو مافي حاجة موجودة لكنهما بصراحة أهدياني راحة لا تتصورها ، والدنيا لسه بخيرها.

حلوة فكرة الحفرة والغرفة الإضافية ، يعني الواحد لو عندو قطعة أرض ممكن يعملها أم الحفر ويأجرها (حفر مفروشة) والطلح داخل الحفرة مسئولية الراكب)، خصوصا في الأحياء الراقية داخل وخارج المحمية.

إنت أكيد عارف أنو السكر ممنوع في السعودية ، لذا فإن القادمين على غير الخطوط السعودية عند وصولهم المطار تجدهم في حالة سكر ونشوة على وشك (أن تفك)، لذا نتوقع القادمين من السودان أن يكونو (smoked)بجرعات مكثفة أو أن تتكرم سودانير بعمل جلسات (تدخين) مشابهة لجلسات تخزين القات حتى لا يتأثروا بطول الإنتظار أو يشتكو من رداءة التكييف بصالات المغادرة،،

إنت عارف مرة واحد إقترح علي إقتراح إستثماري وجيه جدا يمكن من خلاله إضافة (function)جديدة للركشات خصوصا وإن جميع زبائنها من المتدخنات : الإقتراح : بما أن الركشة مقفلة بالجنبات فيمكن الإستفادة من خاصية الدخاخين الطالعة منها بتحويلها إلى حفرة متحركة بعد إضافة القليل من الطلح وأصلها نيرانها مولعة. في النهاية(two in one)منها ركوبة وراكوبة والسعر هو هو ، ويصبح دخان الركشة بدل كارثة بيئية شعار الإستفادة القصوى من الوقت ، مع إمكانية إضافة خاصية المساج للركشات إعتمادا على مطبات الطرق العرضية.


بمناسبة الهيلاهوب عليك الله أسأل عن نكتة الفكي الديجتال حكوها قبل 4 أيام في التلفزيون وأنا متأكد حتضحك لمن شرماتكم الفضلن ديل يلحقن أمات طه.

سلام ياكبس،،

othman mohmmadien يديك العافية

Quote: عموما لا تأسى على مصادرته ما الدولة صادرت كرامتنا وأرواحنا

أنت عارف يا جنى محمدين بعد شوية حتدفع دبل ضريبة عشان محمد التاني ده ..تشارطني

لسة الناس دي مليانة حاجات كتيرة تصادر مثلا يمكن يخادو منك باقي شفعك في المطار ويقولو ليك تشيل واحد فيهم...ممكن ولا ما ممكن...ولا شنو
وي بيوووووووووووووو

السلام عليكم ورحمة الله وبركاته ياكبسيبة والمتداخلون
لتوضيح بعض الامور التي غابت عنكم ولامانع من اخذ الموضوع مأخذ الدعابة
أولآ أعرف الأخ فتحي كاتب الشهادة الزراعية بحكم زمالتي له وكوني كنت رئيسا لهذا القسم من حوالي 15 سنة كده والرجل في منهي الأمانة والخلق ولكني أعيب عليه أنه لم يوضح لمسافر لمذا صادر أو منع روج الطلح من المطار
الموضوع لا دخل له باليئة كما ذكر اد الأخوة هناولكنة خاص بوقاية النباتات في البلد المصدر له الشحنة*هناك قوانبن عالمية لتنقل الأجزاء النباتية بين الدول لمنع انتشار الامراض والحشرات كما ذكر ولذلك تجد مكتبا للحجر الزراعي في كل مطارات ومواني العالم وهم يتعاملون بصرامة شديدة تحير المسافر العادي وغالبامالايقتنع بما يذكر له من اسباب
بين الحين والآخر تصدر بعض الدول قرارات بمنع دخول بعض المنتجات الزراعية إليها- وهذا ما أفترض حدوثة من السعودية- او ان الأخ فتحي طبق القانون الساري في تلك الآونة
حقيقة لم نكن نتمسك في هذا الموضوع بالذات لكن صدقني ربا كان الرجل في وضع لا يمكنةالعمل خلاف مافعل
ارجو ان اكون اوضحت والمرة الجاية ياكبسيبة إن شاء الله مايقابلك فتحي في المطار
وسلام

الطابق البوخة
وقام من الدخان ايدو مملوخة
وفى مغاور الجوف
موسو مجلوخة



يا كبسيبة الفسيخ بيصادروهو ليه؟؟؟؟؟

Quote: جاتني فكرة يا شوقي المرة الجاية أجيبو منجض يعني أولع الدخان وأعبيهو في أكياس ولا أنبوب

و الدخان يا كبسيبة يجيبوا ليهو الشهادة من ياتو وزارة؟!! وزارة الطلح و التدخين!!

Quote: جاتني فكرة يا شوقي المرة الجاية أجيبو منجض يعني أولع الدخان وأعبيهو في أكياس ولا أنبوب

صدقني الأيدي العاملة حاتلقاها ببلاش...يالطيف

الاخ كبسيبة

سلامات

والله فكرة التعبئة فى اسطوانات جميلة تعال نتشارك

فى هذا المشروع الاستثمارى بس ما يسمعوا بيه ويسبقونا

انتصار

عبداللطيف...سكيرفي..يديك العافية

الصورة دي لعيون الناس الحلوة زيك

Quote: يعني الواحد لو عندو قطعة أرض ممكن يعملها أم الحفر ويأجرها

والله لو عندك قطعة في الخليج أنا جاهز

Quote: بما أن الركشة مقفلة بالجنبات فيمكن الإستفادة من خاصية الدخاخين الطالعة منها بتحويلها إلى حفرة متحركة بعد إضافة القليل من الطلح

ليه ما الشوارع ما كلها حفر وقصاد كل حفرة بتقعد ساعتين يعني لحدي ما تصل بتكون جااااااااااااااهز.


أبو عبده قول لينا النكتة

بالمناسبة يا جماعة عايزين نعرف فوائد الطلح؟
في واحد فقري كده يتبرع لينا

nuba أزيك تحية ليك وتحية لي فتحي والله ماني قاصدو خالس خالس
لكن باين رئيسو الجاء بعدك محرشو علينا

Quote: في كل مطارات ومواني العالم وهم يتعاملون بصرامة شديدة

الصرامة شئ والحقارة شي يا نوبا

shammashi أزيك وينك واحشنا يا راجل

Quote: يا كبسيبة الفسيخ بيصادروهو ليه؟؟؟؟؟

ده الوحيد الما بصادر يا شماسي



قالوا واحد جاي شايل معاهو (أبري أحمر) فبتاع الجمارك قلب ليك الأبري دي شمال يمين ما عرفو ليك قال ليهو : والله يا السودانيين يا السودة حنا نمنعكم من الخمرة سايلة تجيبوها مجففة.

Ali Alhalawi يديك العافية

Quote: و الدخان يا كبسيبة يجيبوا ليهو الشهادة من ياتو وزارة؟!! وزارة الطلح و التدخين!!

مش ديل بجيبو ليهو من مافي ... وكان ما لقوهو حكيتبوا عليهو التدخين ضار جدا بالصحة ننصحك بالابتعاد عنه.

Eng. Mohammed al sayed شكلك جااااااااااهز

انتسار محمد سالخ بشير ...أزيك يا زولة
الفكرة قيد التنفيذ...ولاقت رواجا منقطع النظير..في الطرح الإعلاني الأول
يلا عايزين لينا مستثمر جامد كده...على شرط يكون من عشاق الطلح

عبد اللطيف بكري أحمد

بكره شوف الباربكيو بالغاز بدل الفحم

حفاظا على البيئة

ابو صفوت سلام
عندنا ثعالب في نوتنجهام على مشارف غابات روبنهود أكيد حيتضرروا جدا من موضوع الغاز دا، لأني بصراحة ما شفت هجوم كاسح على الباربكيو زي هجومهم في أحدى أمسيات يونيو الماضي. ديل عندهم الفحم مابيشتعل لزمن كبير ، لأن صبرهم قليل على بال ما تتطلع رائحة الشواء.

على العموم : أنا شخصياً أتمنى أن تكون ضربة البداية في سوق الناقة ومن ثم فروعه المنتشرة في كل السودان ، مع أمنياتي الخاصة للناقة بطول السلامة عساها يارب ما تكون ناقة صالح.

سلامنا

Quote: عساها يارب ما تكون ناقة صالح

هو اللواء اللاوندي ساب لينا ناقة لسة في السوق
ده ياخوي صادرا مع التفاح الامريكي
البستوردوهو الناس الما رجال ديلاك..

ايه السخف ده !!!!!!!

هم عاوزين يطلعو من المواطن قرووش ويحسسوه بقيود الحكم

واحتارو وحار دليلهم

والورقة دي معناها احنا مثقفين وحنثقفكم وننظمكم انتم وطلحكم

تحذير رسمي :
التدخين ضار جدا بالصحة .. وننصحك بالامتناع عنه ..


يا كبسيبة
حمد الله الف على السلامة
والاجازة الجاية جيب معاك ( نيم )

Quote: والاجازة الجاية جيب معاك ( نيم )

النيم اكلو كبسيبة في المطار..

أبوصفوت : أزيك

Quote: البستوردوهو الناس الما رجال ديلاك..

ونحن نقول الشح في الطلح لي شنو

Hozy أزيك يا عروس ....عيييييييييييييك
ما تزعلي ...عملنا مزرعة بي جاي

tmbis اللذيذ أزيك,,,والله زماااااان

Quote: والاجازة الجاية جيب معاك ( نيم )

والله فكرة ...عشان البعوض