انه نجم المنبر.. ؟؟؟

تحياتي ..

أكيد الكل تساءل وقال من هو/هي نجم أو نجمة هذا المنبر؟؟

مادفعني لكتابة هذا الموضوع هو بالرغم من انى عضو جديد في المنبر الا انى من المتتبعين لما يكتب في المنبر منذ اكثر من سنتين ورأيت شغف السودانيين لكل مايكتب هنا. فأي موضوع يكتب لا يقل عدد قراءه عن مائة أما اذا كان عنوان الموضوع لافت للنظر وله بريق فنجد القراء بالآلاف. شي يدعو للفخر بان السودانيين شعب محب للاطلاع الدائم وبارك الله في القائمين على هذا المنبر الذين فتحو لنا هذه المكتبة المجانية للقراءة والاطلاع .
مافلت نظري لينا نحن كسودانيين فالواحد لو ماشي في الشارع ووجد ورقة او جريدة تتقاذفها الرياح فاذا به يصطادها ليعرف ماتحويها.

بالرغم من اقامتي خارج السودان منذ فترة طويلة لم أجد هذه الميزة الا فينا نحن السودانيين -اقصد ميزة حب القراءة والاطلاع - اللهم الا اذا استثنينا الشعب الياباني فمنذ فترة كنت أشاهد في احد القنوات الفضائية احد الدبلوماسيين المقيمين في اليابان وهو يتكلم عن انطباعاته عن شعب اليابان فقال الياباني محب جدا للقراءة حتى اذا كان يتنزه في حديقة عامة تجد الكتاب في يده.
أكيد هناك شعوب أوربية كثيرة محبة للقراءة ولكن انا اتكلم عن السودانيين مقارنة بالشعوب المحيطة بهم من دول القارة السمراء.
نرجع لموضوعنا ...

في هذا العالم الذي نعيش فيه في ناس تركو بصماتهم وستبقى مابقي الكون. وفي ناس بصماتهم ستمسح وتزول عقب وفاتهم مباشرة وفي ناس ستدفن بصامتهم الا بعض نفض الغبار عليها عشان تظهر من جديد.وفي ناس عاشو وماتو ولم يتركو اي اثر لبصمة وفي ناس وهم احياء يرزقون وبصماتهم كل يوم واضحة وضوح الشمس.


اديكم مثال لو قلنا عنتر بن شداد من منا لا يعرف عنترة رغم انو مات وشبع موت من آلاف السنين لكن شفتو بصمة عنترة قوية كيف . واذا قلنا مصطفى سيد احمد ...او فيروز وهكذا

بس معظمنا نسى أو تناسى في زحمة الحياة ذلك الرجل الذي نفخر ونفاخر بأنه سوداني مبدع ذلك الانسان الذي جعل آلاف السودانيين تحلق وتحدق في سماء هذا المنبر الرائع الذي يجمع كل أطياف السودانيين منهم المعارض ومنهم المؤيد ومنهم المحايد ومنهم المحارب. وبعمله الرائع هذا كم جمع زملاء وأصدقاء ليهم سنين لم يتقابلو مع بعض وكم صداقات تكونت من خلال هذا البورد وكم أفكار نيره وخيره تم عرضها في هذا المنبر وكم تعرفنا على ناس يمتلكون مواهب رائعة جدا في فن الكتابة وحسن الاسلوب.
فبالله عليكم لو لا الاخ بكري ابوبكر وسماحه لنا بالانضمام لهذا المنبر .أين سيكون مكاننا نحن كمشاركين او زائرين لهذا المنبر؟؟.
فبمنحنا العضوية للانضمام لهذا المنبر من قبل الاخ بكري والذي اصبح حسب ظنى وطنا لنا جميعا (وعلى رأي قناة الجزيرة ..منبر الجزيرة منبر من لا منبر له ) بس نحن بنقول منبر سودانيز اون لاين منبر من لا منبر له ..واصبح العشرات منا يقضى الساعات الطوال واكيد في ناس كتيييرة سايبة مشاغلها وقاعدين يصولو ويجولو من موضوع لاخر
أليس هو نجم المنبر بلا منازع؟؟

حبيت أحي الأخ بكري على مجهوده الرائع وأقول له مجهوداتك وابداعاتك نذكرها فنشكرها.


دائما يعجبنى الانسان المبدع وصاحب الأفكار الخلاقة والتي لم يسبقه عليها أحد من منا لم يقرأ كيف بدأ بيل غيتس مشروعه في برمجيات الكمبيوتر حتى اصبح من اصحاب الملايين ام ذلك الفرنسي بريل وكيف باختراعه للحروف البارزة أضاء النور لملاين البشر مِن مَن كف بصرهم باختراعه لحروف بريل وقائمة المبدعين تطول وغيرهم الكثير الكثير
سؤالي هل في واحد فيكم خطر في بالو انو نجم المنبر هو بكري أبوبكر ؟
ألم اقل لكم انو زحمة الحياة خلتنا ندخل هذا المنبر ونطالع معظم مايكتب ونقوم بالرد احيانا على بعض الكتابات مع نسيان من يقف وراء هذا العمل الرائع. فالتحية لبكرى مرة أخرى.

سؤال للأخ بكرى اذا قرأ هذا الموضوع هل سبق ان تم محاربة هذا المنبر؟ او هل كانت هناك محاولات لتدميره؟؟ ام ان الدفاعات الأرضية والجوية قوية وقادرة على صد أي هجوم حتى اذا كان انتحاري....ارجو التوضيح

تحياتي هشام حامد

الأخ القادم بقوة هشام

Quote: واكيد في ناس كتيييرة سايبة مشاغلها وقاعدين يصولو ويجولو من موضوع لاخر

صدق وتامن بالله أنا واحد من الناس ديل.. يعني لو عندي شغلانة بي مليون جنيه مثلا مستعد أخليها عشان أتاوق في المنبر دا لي شمار معين ..

صنفرة :

أتنبا لك بمستقبل باهر وأرشحك نجم المنبر بعدشهرين إنشاء الله إذا ماواصلت في إسلوبك هذا

خالص التحايا
العزيز هشام..
انا تقريبا قريب من ناذر فى كلامو
بانو انا باخد من زمنى بتاع الراحه فى متابعة البورد بس ما مطلوق زى ناذر
بخش اى بوست. .
بس لانو مرات بكون خاشى دقشمان بجى اكشف الحاصل على شنو
انت ماشفت مرت بى ايام سوده كيف
كل دقيقيتين اسمى معلق فوق
يعنى مرحلة النجوميه دى كل فتره بتجى لى زول
عموما الاوسكار ده انا اخدتو
وبرضو اتذكر جمعه الجبجهى
واخر زول تقريبا كان نجم ناذر ده
كلن ماعارف الجديد منو الحيعلقوه فى المشنقه ويدهو النجوميه
قايتو كلامك سمح الا بكرى ده تب مابنديهو صوتنا..
اسى عليك الله فرقو من عمر البشير شنو
كدى انت اقعد ليك شهر شهرين بتشوف كلامى ده ..
او ربما كما ذكر ناذر

Quote: أتنبا لك بمستقبل باهر وأرشحك نجم المنبر بعدشهرين إنشاء الله إذا ماواصلت في إسلوبك هذا

..

ده غير انو الزول حارس ليهو رعية هنا. .
التحايا النواضر

يا هشام خلي بالك من كلام تروتسكي دا ..

Quote: كلن ماعارف الجديد منو الحيعلقوه فى المشنقه ويدهو النجوميه

ودا بيعني إنو ما بين نجومية المنبر ومشنقة المنبر شعرة تنسل من العجين ..

وأتمنى لك نجومية المنبر كي تحس بمشنقة المنبر وهي بقربك !!

صنفرة :

ما بين الجنون والعبقرية شعرة !!!
وما بين المشنقة والنجومية شعرة أيضا !!!

تحياتي... ياناس وحدو الله ...مشنقة شنو العاوزين تعلقوني فيها بعد شهرين .. انا بخاف اشوف خروف العيد معلق وبسلخو فيو عاوزين كمان تطبقو فيني نفس النظرية ولا شنو

كدى هسه بس خلونا نعلق بكري ونشوف الحا يحصل شنو يعدين يحلها الف حلال

تحياتي هشام حامد

مرحب يا هشام

ناس معتز وتاذر ديل شفووووت ما بتكلمو ساي يا اخوي

وأحييك علي كده

Quote: حبيت أحي الأخ بكري على مجهوده الرائع وأقول له مجهوداتك وابداعاتك نذكرها فنشكرها

وأحي الأستاذ الجابري الله يرحمه عندما صدح : يا بحر حلتنا

شكرا لكم وله على هذا البحر الأثيري المتلاطم الأمواج.