Post: #1
Title: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: عمر الفاروق
Date: 11-26-2005, 00:57 AM
أولاً الخبر من مصادرنا الموثوق بها جداً ومن داخل قناة ART الوكيل والراعي الرسمي للبطولة !!
قبل مباراة الهلال وحرس الحدود (مباراة الإياب) والتي كانت ستحدد الفريق المتأهل لدور الثمانية طلب وليد الكردي (من الإتحدا العربي) من مجدي شمس الدين سكرتير الإتحاد العام للكرة السودانية طلب منه أن يرسل أسماء الأشخاص الذين سيحضرون قرعة دور الثمانية في حال تأهل الهلال حتى يتم تجهيز الفيزا لهم فماذا تتوقعون كان رد مجدي شمس الدين للكردي؟؟؟؟؟؟؟؟؟؟
قالها وبالحرف الواحد :
((( يا الكردي ما تتعبوا روحكم ساي الهلال ما حا يتأهل وبالتالي ما ح نرسل ليكم الأسامي لأنو الهلال طاير طاير !!!!!!!!!!!!!!! )))
فما كان من الكردي إلا وقال له :
(( إنتو ما خسرانين شي يا مجدي رسل الأسامي وبس وإذا الهلال طار ما مشكلة ممكن الفيزا تتلغي))!!!!!!
وأصر مجدي على موقفه بعدم إرسال أسماء ممثلين الإتحاد لحضور القرعة !!!!!!!!
هكذا يا سادتي ينظر رؤوساء إتحادنا للفرق !!!!!!!!
هكذا يا سادتي يتحكم أمثال مجدي شمس الدين في مستقبلنا الكروي !!!!!!
هكذا يا سادتي تسبط العزائم وتموت الهمم !!!!!!!!
هكذا يا سادتي يودون أن نتأهل لكأس العالم !!!!!!!
هكذا يا سادتي تكسر مجاديفنا ومن من ؟؟؟؟ من المسئولين عن هموم الرياضة في بلادنا!!!!!
الأن وقد صعد الهلال يا مجدي رغماً عن أنفك وأنف الجميع !!!!
الأن وقد صعد الهلال يا مجدي فانبريتم للأجهزة الإعلامية تتحدثون عن فرقة الهلال والإنجاز التاريخي وأنتم في الظل وفي الخفاء لا تثقون به !!!!
الأن يا مجدي وقد تأهل الهلال فهل ستكون أول من سيتقدم للحصول على الفيزا لحضور القرعة !!!!!!؟؟؟؟؟؟؟
يا للعار ويا للأسف !!!!!!!!!!!!!!
وأنا من هنا أتقدم لأهلي في نادي الهلال من إدارة وجماهير بإتخاذ الإجراء اللازم حيال هذا الموضوع والتحقيق مع مجدي شمس الدين الذي مرمط بكرتنا التراب أكثر من ما هي عليه !!!!!!!!
وأرجو من الإتحاد رفع يده عن نادي الهلال حتى إنتهاء هذه البطولة فدوماً للهزيمة وجه واحد بينما للفوز أكثر من وجه يحب الظهور !!!!!!!!!!
|
Post: #2
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: عمر عبد الخالق سعيد
Date: 11-26-2005, 01:07 AM
Parent: #1
Quote: هكذا يا سادتي ينظر رؤوساء إتحادنا للفرق !!!!!!!!
هكذا يا سادتي يتحكم أمثال مجدي شمس الدين في مستقبلنا الكروي !!!!!!
هكذا يا سادتي تسبط العزائم وتموت الهمم !!!!!!!!
هكذا يا سادتي يودون أن نتأهل لكأس العالم !!!!!!!
هكذا يا سادتي تكسر مجاديفنا ومن من ؟؟؟؟ من المسئولين عن هموم الرياضة في بلادنا!!!!! |
ده كلام صاااااااااااااح اوافقك تماما
ونتمني ان نتكاتف جميعا ضدهم
| Quote: وأرجو من الإتحاد رفع يده عن نادي الهلال حتى إنتهاء هذه البطولة فدوماً للهزيمة وجه واحد بينما للفوز أكثر من وجه يحب الظهور !!!!!!!!!! |
نتمني ذلك
|
Post: #3
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Ahmed Alrayah
Date: 11-26-2005, 03:35 AM
Parent: #2
سلام يا عمر،
بالنسبة لخبر مجدي شمس الدين، صعب يا عمر تصديقه رغم ثقتي فيك طبعاً، لكن عدم معرفتي الشخصية بالرجل تجعل كل شيء وارداً، وبافتراض صحته، هل يمكن لمجدي أن يعترف بخطئه إن ووجه به؟ هل يمكن أن يتقدم باعتذاره المشفوع باستقالته من الأمانة العامة للاتحاد العام؟
خبر كهذا موقعُـه الصدر في صحفنا الرياضية بعد التثبت من صحته، مع الضغط على مجدي بالاستقالة، لكن رد مجدي شمس الدين -كما أظن- لن يخرج عن المألوف: "هذا الخبر استهداف ومحاولة رخيصة لعرقلة جهودنا في تطوير كرة القدم بالسودان" !!
آخر خبر
للتوثيق: نقلاً عن صحيفة قوون في حوارِ لها مع الدكتور كمال شداد:
| Quote: اوضح د. شداد ان المريخ يقف وراء فتح ملف قضية الرقمين 2 و21 الشهيرة وذلك عندما كشف ملابساتها للاتحاد الافريقي وقال ان الكاف قد ارسل يستوضحه حول الامر فاخبرهم ان لديهم مراقبا للمباراة هو المسئول واوضح د.شداد ان ايدام طلب منه كتابة خطاب يبرئ الهلال لكنه رفض ذلك وقال انه لا يمكن ان يكذب ابدا |
إذا علمنا أنّ الدكتور كمال شداد لا يكذب وأنّ المريخ لن يسعده فوز الهلال بكأس إفريقي رفيع المستوى، يمكننا عندها أن نقول: تحيا الوطنيّـة ويحيا المتشدقون بها !!
وعلى طريقة مقالك الأخير الحنك البيش .. أقول: حرص المريخ على العدالة وسيادة الاخلاق الرياضية جعله يسارع بكشف حقيقة 2/12 للإتحاد الإفريقي والأمر ليس استهدافاً للهلال ولا يحزنون !!
أحمد الريّح
ملحوظة: قضية 2/12 جريمة ارتكبها بعض أبناء الهلال في حقه، هم المسؤولون عنها وللأسف ارتبطت باسم الهلال، كم أتمنى أن يعتذر عنها أصحابها رغم تعاقب السنوات.
|
Post: #4
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Rakoba
Date: 11-26-2005, 03:52 AM
Parent: #3
ودالريح سلامات ياحبيب،
| Quote: المريخ يقف وراء فتح ملف قضية الرقمين 2 و21 الشهيرة وذلك عندما كشف ملابساتها للاتحاد الافريقي |
وليه لأ، إنتو قايلين شيل الكاسات دي بالساهل كده ولا شنو ، لو فتحوا المجال للتزوير والمنشطات ما (كانش حد غلب) مع إنوا في ناس برضو غلبهم
|
Post: #5
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Ahmed Alrayah
Date: 11-26-2005, 03:55 AM
Parent: #3
... أما بخصوص القرعة يا عمر، فإنّ ابتسامها لنا يعني وقوعنا مع القادسية الكويتي، لكنها إذا "كشرت لنا عن أنيابها" فقد وقعنا -حينئذ- مع الرجاء المغربي أو الوداد المغربي ولكلاهما معنا ممارسات إرهابية تشبه أعمال بن لادن التونسي "الدكتور مانعني أقول اسمو عشان ما يجيني ضغط"، غايتو ربنا يستر، لو وقعنا مع واحد من الاتنين ديل يا عمر فعليك بالانصراف لتشجيع برشلونة أو تشيلسي اللندني لمدة شهرين، أما أنا فسأنصرف لمتابعة دوري السلة الأمريكي!!
أنا غايتو أمبارح حلمت إنو الهلال لاعب مباراة صعبة أمام جمهور "شرس"، وعلاء جبريل انطرد، وأبوبكر الشريف بيسخّـن... ربنا يستر
أحمد الريّـح
|
Post: #6
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Ahmed Alrayah
Date: 11-26-2005, 04:01 AM
Parent: #5
يا ركوبة سلامات،
اسألك بحق الزمالة في هذا المنبر أن تسأل الله أن يبعد عنّـا الرجاء والوداد، وأوعدك إني أدعو ربنا يبعد عنكم الأهلي المصري اليومين ديل،
وعندي ليك سؤال فني: لو الكلام الخايف منو أنا ده حصل، هل يمكن أن تقبلوني مشجعاً للمريخ لمدة شهرين على سبيل الإعارة ؟!
أحمد الريّح
|
Post: #7
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: mahmed alhassan
Date: 11-26-2005, 04:21 AM
Parent: #6
الهلالابي الغيور / عمـــر الفاروق
الاستاذ/ محمد الحسن الرضي عضو مجلس الاتحاد العام السوداني لكرة القدم
الاستاذ/التجاني أبوســـن نائب الامين العام لمجلس ادارة نادي الهلال والذين شرفا الرياض لحضور اجراء القرعة لدورالثمانية هم الان محل حفاوة واسستقبال بالسفارة السودانية 0
نتمني التوفيق لهلال الملايين 0
ما عارف سبق صحفي ولاقديمة 000
|
Post: #15
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Rakoba
Date: 11-27-2005, 02:19 AM
Parent: #6
ودالريح
كان كدي إنشاء الله يحصل عشان نشوف حكاية الشهرين دي ، وظاهر عليها قابلة للتمديد
|
Post: #8
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: عمر الفاروق
Date: 11-26-2005, 04:23 AM
Parent: #1
أخونا أبو عمير:
ليك التحية على المرور والمساندة ..
أبو حميد يا ريّح :
| Quote: بالنسبة لخبر مجدي شمس الدين، صعب يا عمر تصديقه رغم ثقتي فيك طبعاً، |
شكراً للثقة يا أحمد بس تعرف انا لو ما إتصال هاتفي جاني صباح اليوم من زول جووووة الART وهو نفسو المسئول من تنسيق الأمور دي ما كنت كتبتو والزول الجاب لي الخبر أصرّ إني أكتبوا وعلى ضمانتو بعد ما إترددت لأنو أمور زي دي حساسة جداً !!!
| Quote: خبر كهذا موقعُـه الصدر في صحفنا الرياضية بعد التثبت من صحته، |
والله يا ريت لو الواحد عندو واسطة في صحفنا كنت أول شي عملتو بس للأسف انا مجرد مشجع مهموم بي الهلال وبي أمر كورتنا !!!
أما بخصوص 2 و12 فتعرف يا أحمد إنو في الزمن داك وجود كندورة في الهلال كان أهم من وجود الثعلب كندورة لاعب فنان وحريف ومباراة الإسماعيلي كانت في أرضنا وكنا بنحتاج لي كندورة يلعب لكن بس تقول شنو في الفهم الإداري العندنا !!!!!!!!!!!!
والغريبة المريخاب الحنكهم ما بيش وروحهم على الرياضة ما جابو سيرة لي فضيحة الطيب عبد الرحمن مختار سكرتير الإتحاد العام السابق لمن أهداهم كأس سيكافا وزوور في أحداث المباراة مع سيمبا التنزاني !!!!!!!
|
Post: #9
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: عمر الفاروق
Date: 11-26-2005, 04:33 AM
Parent: #1
القرعة يا أحمد كان من المفترض أن يكون فيها وبالتساوي (على حسب فهم المنظمين) فرق من اسيا وفرق من افريقيا ولكن كعادة فرق أفريقيا جاء التفوق وأصبح عدد المشاركين 5 من أفريقيا و3 من اسيا !!!!!
3 فرق من افريقيا ستقابل 3 فرق من اسيا ويبقا فريقان أفريقيان يلعبان مع بعضهما البعض !!!!
طبعاً الفريقان المغربيان لا يمكن أن تكون بينهم المباراة لذا سيكون أحدى الفرق المغربية سيلعب مع فريق أفريقي اخر !!!!!
وطبعاً إنت عارف حظنا جميل كيف وحا نكون نحن الفريق الأفريقي الحا يلعب مع فريق أفريقي مغربي !!!! والله التقول ناس الإتحاد العربي ديل قاعدين يقصدونا !!!!!!!
شاهدت فريق الوحدات الأردني والفريق يلعب كورة أجمل من كورة المغاربة وهو الأخطر حالياً !!!!
النصر السعودي يعيش مشاكل إدارية وعدم وجود مدرب وتمرد لاعبين لم يصرفوا رواتب !!!!
يبقا يا قريبك الكويت الكويتي الحمام المييت وكمان كان بقت الكورة الأولى في الكويت والله ناس الإتحاد العربي يكونوا ما قصروا معانا تب !!!!!!
اما كوابيسك المزعجة يا أحمد أتمنى لو تقرا المعوذتين قبل النوم وتتوَا وتقرا قل هو الله أحد وتنوم على الجمبة اليمين !!!!!
بالمناسبة في حلمك ده ما ظهر ليك السفير السوداني في المغرب وهو بيتحرك بين المنصة الرئيسية وكنبة الإحتياطي ؟؟؟؟؟؟
|
Post: #10
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: مهدى الصادق السيد
Date: 11-26-2005, 11:56 AM
Parent: #1
يافاروق يادوبكم عرفتو
نحن زمان ماكتبنا وقلنا وكننا اعداء الوطن
.....ديل بيرتفعوا فى سلم المجد درجتين واربعة
ونحن نتدحرج اضعافها بسببهم
شداد ومجدى ومعتصم وزمرتهم من المطبلاتية لاهم
لهم غير الاسفار والسياحة فى بلاد الله الواسعة
ونحن مايهم سمعتنا تمرمط فى الوحل مامهم ما دام
حواء السودان عقمت ولم تلد غير عباقرة هذا الزمان
والذى هو زمن المهازل والفضائح
الله لك ياوطنى
ابو الصادق
|
Post: #11
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Al Sunda
Date: 11-26-2005, 12:18 PM
Parent: #10
عمر الفاروق
الهلالابي شديد
إذا اصلك واصل ناس ال ART
ممكن تسألهم انو في كل الدنيا برمجة البطولات معروفة من قولة تيت وعمرنا ما شفنا كل جولة يبرمجو ليها من جديد يعني كاس العالم اللي جاي في المانيا الفرق عارفه انها لو وصلت دور الستة عشر حتقابل ياتو فرق وفي دور الثمانية ممكن تقابل منو وعندما تصل دور الاربعة حتي قابل منو يعني في جدول معروف دوليا لمثل هذه البطولات
لماذا لا توجد برمجة مسبقة للبطولة العربية كما يسمونها ؟
يمكن السبب مادي وهما عايزين مباريات جماهيرية عبر ترصيص الفرق حتي لا تقع الفرق القوية مع بعض مثلا في ادوار متقدمة
جايز!
ومع ذلك نصف الشعب السوداني وليس مجدي وحده كان يتوقع خروج الهلال خاصة ان نتيجة المبارة الاولى من اصعب النتائج في المباريات الداخلية
وعقبال ما نقابل القادسية يارب .
|
Post: #12
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: سامى عبد الوهاب مكى
Date: 11-26-2005, 02:30 PM
Parent: #1
عمر الفاروق
تعال نسعلك سعال.
إنت ناس الإتحاد ديل شايتين على وين.
شداد قال مابحضر كورة سودانيه عشان مايفسد ذوقوا الرفيع المامنكوش!!
ومجدي قال الكلام الفوق ده....
أُمال لاصقين وكدبين فينا كده مالهم..
ياربي يكون عشان هموم التذاكر والرحيل(السفر)
اللهم لا اعتراض في حكمك..
تخريمه.
مع اني معاهو في حكايه انه الهلال طوالي عامل احلام الفتى الطاير.
|
Post: #13
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: صديق الموج
Date: 11-26-2005, 02:52 PM
Parent: #1
عمر بس الراجل كان اصدق مما يجب...
|
Post: #14
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: عمر الفاروق
Date: 11-26-2005, 11:44 PM
Parent: #1
أخونا وعمنا مهدي صادق (طبعاً عمنا دي من خلال الصورة)
Quote: .....ديل بيرتفعوا فى سلم المجد درجتين واربعة
ونحن نتدحرج اضعافها بسببهم
شداد ومجدى ومعتصم وزمرتهم من المطبلاتية لاهم
لهم غير الاسفار والسياحة فى بلاد الله الواسعة |
والله ده الكلام الصاح والناس ديل جوازاتهم بتكون إتملت خمسة ستة مرات ونحن يانا نحن !!!
أخونا السوندا:
Quote: إذا اصلك واصل ناس ال ART
ممكن تسألهم انو في كل الدنيا برمجة البطولات معروفة من قولة تيت وعمرنا ما شفنا كل جولة يبرمجو ليها من جديد يعني كاس العالم اللي جاي في المانيا الفرق عارفه انها لو وصلت دور الستة عشر حتقابل ياتو فرق وفي دور الثمانية ممكن تقابل منو وعندما تصل دور الاربعة حتي قابل منو يعني في جدول معروف دوليا لمثل هذه البطولات
لماذا لا توجد برمجة مسبقة للبطولة العربية كما يسمونها ؟ |
تعرف يا أخوي الموضوع ما داير ليهو عشان نسأل ناس الART لأنو واضح جداً وإنت إتفضلت بي توضيحه !!!
فالموضوع في الأصل بطولة تجارية بحتة وأكيد ART مش همها تطوير الكورة في المنطقة العربية عشان كده بتصرف وتحجز فنادق وتدفع جوائز عشان سودا عيونا !!!!!!
وانا متأكد في السمتقبل القريب حا يرتفع عدد متابعي البطولة نسبة للعداوة الشديدة بين الفرق العربية والكورة تعتبر منفذ مناسب للإنتقام بدلاً من أن تكون تواصل شعوب !!!
الأمر تاي يا صديقي والما بيخفا على أحد إنو الإتحاد العربي ميال لفرق إتحاد اسيا من وخصوصاً الفرق السعودية ويحاول دوماً أن يفرش لها الطريق ورود للوصول للأدوار النهائية !!!
والمعروف أن القدح المعلى يكون دوماً للفرق الأفريقية بحكم قوة وإرتفاع مستوى اللاعبين والفرق ..
سامي الخصال:
Quote: عمر الفاروق
تعال نسعلك سعال.
إنت ناس الإتحاد ديل شايتين على وين. |
ديل بيشجعوا السفرة الحلوة ..قصدي اللعبة الحلوة ..
ويا كافي البلا لا رئيسنا عاجبو الحال ولا سكرتيرو وراجين بتاع المال إمكن كمان يكون عندو رأي !!!!!
صديق الموج :
| Quote: عمر بس الراجل كان اصدق مما يجب... |
طيب ليه ما تقول حبل الكضب قصيييييييييير وأهو جاء الحق وزهق الباطل إن الباطل كان زهوقا !!!!
|
Post: #16
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: shammashi
Date: 11-27-2005, 02:28 AM
Parent: #14
| Quote: هكذا يا سادتي تسبط العزائم وتموت الهمم !!!!!!!!!!!! |
هكذا يا سادتي تظبط الحلل.
|
Post: #17
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: عمر الفاروق
Date: 11-27-2005, 02:53 AM
Parent: #16
شموشي التمبوشي:
| Quote: هكذا يا سادتي تظبط الحلل. |
إنت موضوع الحلة ده لسة ما عايز تسيبو ؟؟؟؟ مش زمااااااااان انا قلت ليك بتذكرني بي زولنا بتاع الكبدة ؟؟؟؟؟؟
تخريمة :
يا كافي البلا لا بتفهم في السياسة ولا بتفهم في الفن ولا بتفهم في الكورة !!!!!!
الشي خلق وين ؟؟؟؟؟؟؟؟؟؟؟
|
Post: #18
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: على محمد على بشير
Date: 11-27-2005, 02:55 AM
Parent: #16
| Quote: وطبعاً إنت عارف حظنا جميل كيف وحا نكون نحن الفريق الأفريقي الحا يلعب مع فريق أفريقي مغربي !!!! |
ود فاروق
حظكم لو ما سمح صحى كان لعبتوا مع ( لكصر الموريتانى ) وحرس الحدود!!
انشاء الله المره دى الحظ يقلب وتقعوا مع المغاربه
تخريمه : -
نتمنى ليكم اداء مشرف وحظ سعيد وكاس البطوله
انشاء الله
|
Post: #19
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: عمر الفاروق
Date: 11-27-2005, 03:06 AM
Parent: #18
يا أبو علوة :
ده بقيتوهو حمام مييييت ؟؟؟؟
زماااااااان ما قلتوا ده الفريق الحا يجيب خبرنا !!!!!
انا خايف لو إتخطينا الفريق المغربي تقولوا ده ما مستواهو الزمان !!!!!!!
حيرتونا يا زعيم !!!!!
|
Post: #20
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Ahmed Alrayah
Date: 11-27-2005, 03:16 AM
Parent: #19
القرعة جابت الهلال السوداني مع الوداد المغربي في دور الثمانية لبطولة العرب
لا حول ولا قوة إلا بالله، حدث ما كنتُ أخشاه يا عمر، سأبدأ منذ اليوم وحتى إشعار آخر بمتابعة دوري السلة الأمريكي ونجومه الكبار الطوربيد شاكيل أونيل والبرنس كوبي براينت والساحر ألان آيفرسون.
أحمد الريّح
|
Post: #21
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: shammashi
Date: 11-27-2005, 03:17 AM
Parent: #19
ما تعمل لي فيها مجنون
عارفني باتكلم عن اللغةالعربية القلتو مجضمينها.
قال حلل قال
يحلك الحل بلة .
|
Post: #22
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: سامى عبد الوهاب مكى
Date: 11-27-2005, 03:27 AM
Parent: #1
الفــــــــــــــــــــــــــــــاتحه البركه في الجميع.
احسن الله عزاءكم ..
المرحوم كان طوالي ماشي جنب الحيطه ولازم حدودو لابعاين لناس وداد لاناس رجاء.
لحدي بنات الذينه جوهو عديل وودوه في ستين نيله.
|
Post: #23
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Rakoba
Date: 11-27-2005, 03:32 AM
Parent: #22
السامي
البرير قاعد، وقال (ندقهم) اذا استلزم الأمر ، رجل المهمات الصعبة!!
|
Post: #24
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Ahmed Alrayah
Date: 11-27-2005, 03:34 AM
Parent: #22
| Quote: الفاتحه البركه في الجميع. احسن الله عزاءكم |
الله يبارك فيك يا سامي، دايماً أصيل وبتعرف الأصول، لكن ده حال (الكورة)، اللهم إنا لا نسألك رد القضاء ولكننا نسالك اللطف فيه!
أحمد الريّح
|
Post: #25
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: سامى عبد الوهاب مكى
Date: 11-27-2005, 03:44 AM
Parent: #1
ماهي تكلفة شحن عدد اثنين كديسه كحليه من هنا لـ هناااك.
|
Post: #26
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: عمر الفاروق
Date: 11-27-2005, 03:57 AM
Parent: #1
احمد الريح:
أها يا أخوي الدفن بعد (المغرب) ؟؟؟؟؟؟؟
|
Post: #27
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Ahmed Alrayah
Date: 11-27-2005, 04:06 AM
Parent: #26
| Quote: احمد الريح: أها يا أخوي الدفن بعد (المغرب) ؟ |
والله يا عمر الموضوع ده ما ناقشناهو، نحن لسه متأثرين بالصدمة.
|
Post: #28
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: سامى عبد الوهاب مكى
Date: 11-27-2005, 04:08 AM
Parent: #1
ياجماعه هوي رسلتو زول يجهز القبر؟؟
|
Post: #29
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: على محمد على بشير
Date: 11-27-2005, 07:40 AM
Parent: #28
الدفن ماهنا ياسامى
الدفن فى المغرب بعد مباراة الرد !!
|
Post: #30
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: بلدى يا حبوب
Date: 11-27-2005, 09:01 AM
Parent: #1
عمر الفاورق
لا استبعد هذا فرجال الاتحاد العام اصبحوا يبحثون عن المناصب فى اتحادات سيكافا والعربى والافريقى بل رئيس الاتحاد ينشن على الفيفا .
ويستمر الهلال فى التأهل متى كانت الاستعدادات مستمرة
واقول للزملاء اللذين كتبوا للهلال الخروج على ايد الوداد البيضاوى المغربى
Quote: الوداد البيضاوى المغربى تخطى الوحدة السورى فى دور 32 بنتيجة :
الاولى 1/1 = الثانية 1/ صفر
الوداد البيضاوى المغربى تخطى الاتحاد السعودى فى دور 16 بنتيجة :
الاولى صفر/2 = الثانية 2/صفر فوز الوداد البيضاوى بالضربات الترجحية |
هل الهلال غير قادر على تخطى فريق كانت مسيرته كما اسلفت فى دورى كأس العرب الحالية
فبقليل من الاستعدادات بأذن الله سيوفق .
تحياتى
|
Post: #31
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: عمر الفاروق
Date: 11-27-2005, 09:18 AM
Parent: #30
Quote: هل الهلال غير قادر على تخطى فريق كانت مسيرته كما اسلفت فى دورى كأس العرب الحالية
فبقليل من الاستعدادات بأذن الله سيوفق . |
بلدنا الحبوب:
ده الكلام الزين والعارفنوا الجماعة إياهم وكان كمان عشان تعم ليهم الفايدة توريهم سجل الهلال في البطولة دي كان كيف عشان يعرفوا مين الخايف ...
تحياتي..
|
Post: #32
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: صديق الموج
Date: 11-27-2005, 11:56 AM
Parent: #1
سامى تعال نقول لى ناس عمر مبروك من هسع يمكن ما نلقى لينا تانى بوست بعد
دور الثمانية ده.
عمر الف اورووووووووووووووك،،،
|
Post: #33
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Ahmed Alrayah
Date: 11-28-2005, 00:36 AM
Parent: #32
سلامات يا أبو عمير،
كتب الأستاذ الرشيد علي عمر هذه الكلمات في مقاله بتأريخ 28/11/2005 بالصحافة ما يلي:
| Quote: مازلنا نتقصى الحقيقة عن المكالمة التى يقال انها جرت بين مجدى شمس الدين والكردى مسؤول الاتحاد العربى ، والتى سخر فيها السكرتير من الهلال وتنبأ بخروجه على يد حرس الحدود ...!!! وان كانت حقيقية فان مجدى حتما سيطالب الهلال بالانسحاب امام الوداد عند الاياب بالمغرب ..!! |
أحمد الريّح
|
Post: #34
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Ahmed Alrayah
Date: 11-28-2005, 09:53 AM
Parent: #33
نقلاً عن صحيفة الصدى الرياضية (28/11/2005)| Quote: واذا قدر للهلال تجاوز الوداد البيضاوي فانه سيلاقي في نصف النهائي الفائز من فريقي الرجاء البيضاوي والقادسية الكويتي |
القرعة دي لو عملها سامي عبدالوهاب ما بتجي كده!
أحمد الريّـح
|
Post: #35
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: عمر الفاروق
Date: 11-28-2005, 11:56 PM
Parent: #34
(السي )احمد الريح :
قلت لي القرعة عجيبة !!!!1 والله بيني وبينك التقول عاملها سامي عبد الوهاب
غايتو انا لو محل صلاح إدريس بعد مباراة الإياب ما أرجع السودان وأتكل في المغرب عشان أقلل تكاليف مباراة دور الأربعة ...
|
Post: #36
Title: Re: مجدي شمس الدين والفضيحة الكبرى بخصوص قرعة دور الثمانية لبطولة العرب
Author: Hisham Amin
Date: 11-29-2005, 00:07 AM
Parent: #1
سلام
انتوا عارفين حقوا نعمل بوست ونجمع فية توقيعات معظم اعضاء البورد
ونطالب فية بحل جهاز الكرة فى السودان عن بكرة ابية ونجيب دماء جديدة
تعمل على احياء الكرة فى السودان عامة وليس الهلال والمريخ
|
|