Post: #1
Title: رقيص العروس.. أصبح دعوة للفجور يجب محاربتها
Author: سامي عبد الوهاب إدريس
Date: 11-24-2005, 07:07 AM
Parent: #0
ساقتني الصدفة لكي أشاهد شريط فيديو لرقيص عروس (شخصية عامة) وكم كانت دهشتي لمشاهدة كل هذا التعري وإظهار المفاتن .. يعني يا أخونا بالبلدي كدا الشريط كان فاضح جدا لدرجة إنك ما ممكن تشوفو مرتين وشي مزري جدا جدا ومستفذ وخليع وفوق دا كلو فيهو شخصيات عامة (للأسف الشديد)
ليه كدا يا جماعة!!! يعنهي أهمية رقيص العروس ذاتو شنو؟؟ في ناس حيقولوا ليك دي عادات سودانية.. عادة مهببة. وإذا قلنا فن.. فالفن شئ جميل لكن دا أنا ما شايف فيهو أي جماليات (والعروس ذاتا كانت شترا وزمنها كعب عديييييل كدا).
وبعدين شنو حكاية تغيير اللبس دي!!! مرة طويل ومرة قصير ومرة بالهندي (يعني البطن مكشوفة) .. والله غايتو جنس حركات عليكم يا (السودانيين المعاصرين). وذكر لي بعض الأخوان بأن هنالك رقصات بالبكيني.. وعجبي!!!!!!
كلام للمرأة السودانية: عهدناك مناضلة وزولة حارة وغبشاء وما عندك المسخرة وملتزمة ومضرب مثل فلا تدعي مجال لضعاف النفوس والإيمان لتحويلك إلى سلعة رخيصة مثلما صارت المرأة في كثير من الدول العربية والإسلامية (مثل الصبايا) فالحذر كل الحذر من الإنسياق وراء هؤلاء.
وكلام لأخوان فاطمة: والله عيب على كل واحد يسمح لعروسته بممارسة هذا المجون.. وهذه دعوة لأول حليفة طلاق في حياتك الزوجية.. يعني لازم تقول للعروس (بعد العقد طبعا) علي بالطلاق ما ترقصي، وشوفا كان ترقص.
إخوتي
معا لمحاربة هذه العادة السيئة وأي عادة لا تشبه ديننا ولا مجتمعنا السوداني الجميل.
ولنا عودة إنشاء الله
سامي عبد الوهاب إدريس
دعوة لكل سوداني أصيل: لا تنسخ شريط فيديو خاص.. ولا تساهم في نشره .. عييييييييب والله
|
Post: #2
Title: Re: رقيص العروس.. أصبح دعوة للفجور يجب محاربتها
Author: Dr. Moiz Bakhiet
Date: 11-24-2005, 07:51 AM
Parent: #1
الأخ الحبيب سامي
| Quote: دعوة لكل سوداني أصيل: لا تنسخ شريط فيديو خاص.. ولا تساهم في نشره .. عييييييييب والله |
عيب كبير جداً
وهذه الظاهرة القميئة تنتشر في أسواء بلاد الدنيا والتي يعيش بها معظم المغتربين السودانيين..
ولقد كتبت حول هذه الظاهرة هنا وقد دار جدل هناك حول ما أوردته من رؤى:
لماذا تتاجرون بأعراض بني ملتكم يا هؤلاء.. ؟!
|
Post: #3
Title: Re: رقيص العروس.. أصبح دعوة للفجور يجب محاربتها
Author: سامي عبد الوهاب إدريس
Date: 11-25-2005, 04:31 AM
لمذا هذا الصمت؟؟؟
هل هي عادتنا المتأصل فينا(دس الرأس في الرمل)؟؟
أم هي تشبث الناس بهذه العادة المقيتة؟؟
ولا رأس السوط وصلكم؟؟
أسمعونا رأيكم رجاءا...
التحية لك د. معز بخيت
ولنا عودة إنشاء الله
سامي عبد الوهاب إدريس
|
Post: #4
Title: Re: رقيص العروس.. أصبح دعوة للفجور يجب محاربتها
Author: abuguta
Date: 11-25-2005, 05:06 AM
Parent: #3
اشرطة موجودة فى السوق
اللوم لا
يقع
على
الناسخين
ولا على المشترين
ولا على البايعين
ولا على العريس
انما يقع على اسرة العروس
عندما يدفعون ببنتهم الى من لا خلاق له
وينجرفون نحو المادة والشهرة
المؤقته
(من اتاكم من ترضون دينه وخلقه فزوجوه
فان لم تفعلو تكن فتنة فى الارض وفساد كبير)
شكرا سمامى على الحرقة التى تشبه تشيعك للمريخ
ولكن لا حياة لمن تنادى
|
Post: #8
Title: Re: رقيص العروس.. أصبح دعوة للفجور يجب محاربتها
Author: سامي عبد الوهاب إدريس
Date: 11-26-2005, 04:48 AM
Parent: #4
الأخ أبوقوتة
شكرا على التفاعل..
وعلى رأيك المسألة في الأساس ترجع للأسرة.. لكن يجب ألا ننسى دور العريس، لأنو لازم يكون زول حمش ويرفض الكلام دا..
للعلم: أنا سامي عبد الوهاب إدريس وليس سامي عبد الوهاب مكي (المريخابي).. له ولك التحية
لنا عودة إنشاء الله
سامي
|
Post: #5
Title: Re: رقيص العروس.. أصبح دعوة للفجور يجب محاربتها
Author: Halema2
Date: 11-25-2005, 05:12 AM
Parent: #1
الاخ سامى
اولا دعنى اسالك :لماذا شاهدت انت الشريط?
اما راى فى ماقلت
رقيص العروس من العادات السودانيه القديمه وقد كان له قيمته واحترامه ومعناه قديما اما مايحدث الان فعلا غير جميل واصبح شئ من التنافس بين الشابات وكثيرا من الفتيات قد لايرغبن فى ذلك ولكنهن يتعرضن لضقط من الاهل وخاصه الامهات الجاهلات وخاصه اصحاب القروش والاسر المعروفه, يعنى بالبلدى كدى :شوفوا انا بتى سمحه ورقاصه كيف ..وفى رواية اخرى العريس نفسه يشجع العروس على ذلك ويرقص معها وكمان يبدل اللبسات معها(الجلااليب الطالعه الايام دى(
يعنى ما نلوم البنات فقط لانو القصه طويله والكل يشارك فيها
راى الخاص اذا اردت الفتاه ان ترقص وتعتبرها لعبه وضحكه وفن ومتعه لا قضاضه فى ذلك ولكن بدون توثيق وشوفنيه ومع الاهل فقط..
تحياتى
حليمه
|
Post: #6
Title: Re: رقيص العروس.. أصبح دعوة للفجور يجب محاربتها
Author: nashaat elemam
Date: 11-26-2005, 03:44 AM
Parent: #5
اخي سامي..
هممت بالكتابة لك.. ولكن المداخلة أعلاه كفتني ذلك.. فهي ليست كما ذكرت بدعة مستجدة على مجتمعنا.. بل كانت منذ قديم الزمان.. ويبدو ان الخلاعة كانت أكثر من الآن بكثير.. اذ حكى لي جدي عليه رحمة الله أن العروس كانت ترقص بالرحط فقط.. وكما نعلم أن الرحط يصنع من الجلد.. ويُلف به الجزء من أسفل البطن وإلى أعلى الركبتين بقليل.. ولك أن تتخيل ما تبقى للعيان..
لكن وبعد أن خمدت جذوة تلك العادة و(تأدبت) زمناً.. عادت الآن وكأنها تبحث عن مجد قديم عادت لتبعثه.. فحدث ما تحكي عنه أنت الآن.. لذا فهذا التسجيل لهذه الرقصات لربما أصبح يمتهن من كرامة المرأة كثيراً.. فمن الأوجب تحاشيه.. والمسؤولية تقع على الجميع ولابد أن نرتقي بوعينا حتى لا نقع في مثل هذا المجون الذي يؤدي حتماً إلى التفسخ.. وفضح الأعراض.
|
Post: #10
Title: Re: رقيص العروس.. أصبح دعوة للفجور يجب محاربتها
Author: سامي عبد الوهاب إدريس
Date: 11-26-2005, 05:14 AM
Parent: #6
التحية للأخ نشأت.. على الموضوعية في النقاش وعلى المعلومة..
سامي
|
Post: #9
Title: Re: رقيص العروس.. أصبح دعوة للفجور يجب محاربتها
Author: سامي عبد الوهاب إدريس
Date: 11-26-2005, 05:09 AM
Parent: #5
الأخت حليمة..
تحياتي..
لا أود أن ننجرف وراء سؤالك (لماذا شاهدت الشريط) لأنو دا ما موضوعنا..
أتفق معاك في مسألة الضغوط لكنها ليست مبرر على الأقل بالنسبة للعريس (لييييييه يوافق على هذه المسخرة)
أما مسألة إنو النسوان بس هم المسموح ليهم بالفرجة.. فأنا أقول لك إن هذا لا يجوز شرعا ويمكنك أنا تسألي من هم أعلم مني في أمور الشرع.
بعدين دلوقت في تصوير يالجوال وتصوير بكمرات فيديو صغيرة جدا فأحسن شئ نعملو ما ندي زول فرصة يصور بالدس أو ينسخ شريط ونمتنع عن ممارسة هذه العادة
إنت عارفة؛ ذكر لي بعض الأخوان بأن في بنات بصورو ليلة دخلتن بدون علم العريس بكاميرة فيديو (وهذه معلومة مؤكدة)..
شفتي نحن وصلنا وين؟؟؟؟؟
الله يستر
ولنا عودة إنشاء الله
سامي عبد الوهاب إدريس
|
Post: #7
Title: Re: رقيص العروس.. أصبح دعوة للفجور يجب محاربتها
Author: Ahmed Mohammed Osman
Date: 11-26-2005, 04:06 AM
Parent: #1
| Quote: ساقتني الصدفة لكي أشاهد شريط فيديو لرقيص عروس (شخصية عامة) |
الصدفة عندك لكن...
اما رقيص العروس وزي ما قال الاخ نشات انو زمان كان بي الرحط بس
واعتقد -والعهده علي الراوي - انو الفكرة اصلا هي حث شباب الحي واصدقاء
العريس علي الزواج ..
والموضوع لو عاينت ليهو بتلاقيهو كل مرة ماشي علي سترة..بي الجد
عاين :
لما بدا كان بي الرحط بس...
تاني قامو لبسو العروس هدوم
بس كان الرجال بتفرجو
وهسي
مافي راجل بدخل يحضر رقيص العروس
الا لو كان حلو او اهل العروس طيبين
يلا لما البنات يكونو براهم ومافي رجال
معاهم يلبسو يقلعو يرقصو دي ما شغلتنا ما دام مافي رجال
لكن يبقي العيب في الراجل البطلع الشريط لي برة
ويوزعو او ينسخو اواواو
عرفت يا سامي
| Quote: دعوة لكل سوداني أصيل: لا تنسخ شريط فيديو خاص.. ولا تساهم في نشره .. عييييييييب والله |
|
Post: #11
Title: Re: رقيص العروس.. أصبح دعوة للفجور يجب محاربتها
Author: سامي عبد الوهاب إدريس
Date: 11-26-2005, 05:18 AM
Parent: #7
شنو ياااااا أخ أحمد يعني الواحد ما يعمل ليهو مدخل؟؟؟؟
عديها... وماااااا تحكها كدا
لك تحياتي
سامي
|
Post: #12
Title: Re: رقيص العروس.. أصبح دعوة للفجور يجب محاربتها
Author: Ahmed Mohammed Osman
Date: 11-26-2005, 05:39 AM
Parent: #1
Quote: شنو ياااااا أخ أحمد يعني الواحد ما يعمل ليهو مدخل؟؟؟؟
عديها... وماااااا تحكها كدا |
ادخل ادخل ساي يا خوي
لكن قلنا ندخلك صح
|
Post: #13
Title: Re: رقيص العروس.. أصبح دعوة للفجور يجب محاربتها
Author: طارق جبريل
Date: 11-26-2005, 08:09 AM
Parent: #1
الصديق العزيز سامي
الامر يبدو انه متفشي في منطقة الخليج بشدة وكنت في زيارة هناك في الصيف الفائت وهالني الامر والقضية تحتاج لوقفة وتوعية
غايتو نحن لسا ما وصلنا الامر في المغرب
تحياتي للصغار وامهم
|
Post: #14
Title: Re: رقيص العروس.. أصبح دعوة للفجور يجب محاربتها
Author: سامي عبد الوهاب إدريس
Date: 11-26-2005, 08:54 AM
Parent: #13
عزيزي طارق
لك التحية
يلا همتكم معانا ومن خلال هذا البورد أعتقد يمكن نسهم في حل العديد من المعضلات الضاربة جذورها بقوة في عصب المجتمع إذا ما تم تناولها بالجدية المطلوبة..
تحياتي لك والأسرة
سامي
|
Post: #15
Title: Re: رقيص العروس.. أصبح دعوة للفجور يجب محاربتها
Author: Kamel mohamad
Date: 11-26-2005, 08:04 PM
Parent: #14
الأخ سامي عبد الوهاب إدريس:
رقيص العروس في أعتقادي هو قمة الفجور و الانحلال و الانحطاط في مجتمعنا السوداني ويجب أن نحارب هذه العادة بشدة
و يجب علي الشباب محاربة هذه الظاهرة بشدة
شخصيا أستغرب كثيرا من وجود هذه الظاهرة اللعينة في مجتمع مسلم
|
Post: #16
Title: Re: رقيص العروس.. أصبح دعوة للفجور يجب محاربتها
Author: سامي عبد الوهاب إدريس
Date: 11-27-2005, 01:15 AM
Parent: #15
الأخ كامل محمد
لك التحية
الكلام الدغري ما زيو.. الله يديك العافية..
ومعا لمحاربة هذا الوباء..
ولنا عودة إنشاء الله
سامي
|
|