كسلا

أنا ...
ما ممكن أجافيها
عيون كسلا
وجبال كسلا
وسواقيها
كل الناس... تعرف الحب
وكسلا الحب
فريده فى شوقها المخبيها
حتى القاش
يلف يمين
ويميل شمال
يقول فى سرو خلونى الاموت فيها
كسلا ما واطاتها جنه
وكل سلامها للمودع
وألف مرحب للبجيها
وانا ... ماممكن أجافيها
عيون كسلا
وجبال كسلا
وسواقيها
عرفتو سر الريده
فى كسلا وبراريها
وسرالطيبه
فى أهلها البخليها
حنينه
كريمه
تفرح للبناديها
ياناس ..
هيه أصيله
ماتوتيلنا راويها
و أنا ...
ماممكن أجافيها
عيون كسلا
وجبال كسلا ... وسواقيها
سافرت كتير
واتفارقنا كم سنوات
قسم بالله يا كسلا
عشان ألقاك
كل خطيوه بمشيها
وأسأل كل يوم عنك
وأدندن
بالحنين والشوق
زى السيل
يسيب بلدان
ويغرق فى غناويها
وايد الغربة يا كسلا
لمتين تلاوينى وألاويها
بين ايديك
عرفنا الحب
واسم القبله نخفيها
وأنا ...
ماممكن أجافيها
عيون كسلا
وجبال كسلا و سواقيها
قوموا الصباح
شوفوا شرقنا
يتبسم
يمد الأيد
يتحايل يصحيها
وشوفوا شمسنا لما تميل
تنزل دمعه من عينيها
دى الفرقه التبكيها
حتى الجمره فى كسلا
حرام
تحرق رجل واطيها
انتى ما أرض الجمال
وكم فيك من تاجوج
نعد فيها
واسألوا عن قمر كسلا
وقماريها
والحمام ساجع حنين
والأوز ... يصرخ يداعب
والبلوم فارد جناحو
بس يقول
عاد مشتهيها
وأنا ماممكن أجافيها
عيون كسلا
وجبال كسلا ... وسواقيها
أدينى منك كلمه واحده
ما وصيتك لي ...
ديمه طاريها
ووصيتى ليك بالله أطريها
ماتبدلى الشوق والحنان
والقدله فى بانتنا
أوعك تمسحيها
واتذكرى...
الشتيل الكان زرعتو
والأمانة الجوه قلبك
خليها فى السر
أحفظيها
وقولى للوداعيه أرمى الودعه
شوفى الخيره شن فيها
و ماتغيرى الحب الكبير
والهامه
دايما أرفعيها
حتى ألقاك يا حليوه
وكل أشواقى
ومشاعرى اللاهبه
بالأخضر صديرك أغطى فيها
يا أم خدود نايرات ...
أريدك ريده
فى كل الدنيا ما ممكن ... ألاقيها
عيون كسلا
و جبال كسلا ... و سواقيها

آخـر صـوره وأنا أغادرها...... سنين مرت والشوق يزيد ويزيد
مع ودى

العزيز / ود كسلا
تشكر على المرور المظلل بالغمام فوق التاكا وأنفاس السواقى الحالمة , بس يا ود كسلا انتا من السواقى ولا ... ؟

وهذه لوحةٌ كسلاوية أخرى نستمد منها نسيم القاش وهمس السواقي وسيل الذكريات الجميلة
مشكور أخ عبدالماجد ...
وبالمناسبة أنت وود كسلا مدعون للمشاركة والتسجيل في منتديات كسلا على الرابط أدناه
www.kassalahome.com
نترقب ظهوركما هناك

الأخ العزيز / صديق رحمه
شكرا جزيلا على كلماتك الرقيقة , والف شكر على الدعوة الكريمه ومن اللحظة ستجدنى معكم دوما .
تحياتى

الأخ / صديق
لك الشكر
والرابط لايعمل وعلى الأخ عبد الماجد الدخول عبر هذا الرابط
http://www.kassalahome.com/php/index.php
الأخ عبد الماجد
بينى وبين أهلى فى السواقى القاش العظيم
لك الود

الأخ العزيز / ودكسلا
ألف شكر على التوضيح وأرجو أن أراك فى منتدى كسلا , لقد ذكرت بأنك من السواقى وأعتقد أيضا أنها السواقى الجنوبيه وبما أنى قد درست المتوسطة فى مدرسة غرب القاش سابقا ولى زملاء دراسه من السواقى وأذكر منهم : عثمان محمد مالك - حسن (بقز) - عبدالحميد حاج على - جمال محمد ابراهيم - عبدالكريم عبدالله - سليمان خالد(سلى) وعماد وسامى عبدالله والكثير الذين لا أتذكر أسماءهم , وارجو أن تكون شقيق أو قريب أو صديق أحدهم .