نحلم بحل لمشكلة دارفور وشرق السودان

نحلم بحل لمشكلة دآرفور و شرق السودان


يا أخوانا كل واحد منكم يحضر ورقة و قلم، لأنه الشغلانه تحتاج لحسابات كثيرة.

أولاً خلونا نشوف عدد المسعولين الكبار في الخرتوم والمتنسفعين من ورآهم -الرجال فقط- ( و بعدين بتعرفوا ليه حددنا الرجال (أرجو من النساء أن يطولوا بالهم شويه ويصبروا وما يزعلوا ويقولوا شوفوا الراجل ده داير يحل مشكلة دارفور والشرق بدونا))
عنـــــــــــــــــــــــــــــــــــــــــــــــدنا:
1. حوالي 80 من مستشار لي وزير مركزي لي وزير دولة. العدد= 80
2. يا أخوانا والحمد لله حوالي 360 عضواً في المجلس – نطرح منهم 40 امرأة يبقي لينا .320 العدد= 320
3. أها قولوا معاي – نضيف للجماعه ديل المدراء العامين في الوزآرآت ( زمان كانوا بسموهم وكلاء). العدد= 30
4. من القوات المسلحه نشوف لينا ذي 300 ضابط (من الجماعة العندهم دآهيات ضفر كتار في كتوفهم). العدد= 300
5. من قوات الشرطه نشوف لينا ذي 300 ضابط( من الجماعة العندهم دآهيات فضيات كتار في كتوفهم. العدد= 300
6. من ناس الضرآئب و ديوآن الزكاة و الجمارك وضرآئب المغتربين ناخد 200 راجل. العدد= 200
7. .من المؤتمر الوطني نشوف لينا 400 نفر (لآنه الجماعه ديل امورهم متسهله) العدد= 400
8. كمان من ناس الشعبي نباصر لينا ذى 300 راجل العدد= 300
9. من أحزاب التوالي ناخذ 200 راجل العدد= 200
10. من ألأحزاب المعارضه والمتعارضه ( ذى شوكة الحوت في حلقوووووووووووووم الحكومه) ناخذ 50 راجل العدد= 50
11. و علشان ناس السلك البلوماسئ ما يزعلوا ناخد منهم حوالي 250 نفر ( أها قصرنا معاهم) العدد= 250
المجمووووووووووووووووووووووووووووووووووووووووووووووووووووووع =2430
وبما أنه وراء كل منتفع، منتفع أو منتفعين أو تلاته .........ألخ نأخذ متوسط 6 منتفين لك واحد من الجماعه الفوق ديل
وعليه يكون إجمالي عدد المسعولين و المنتفعين يساوي 2430*5 ــــــــ العدد 14580
يا أخوانا إتأكدوا من العدد ده علشان بعدين ما ندخل في غلاط
و لتسهيل عمليه ( الضرب) وذي ما بقولوا ناس الرياضيات نخلي العدد Round figure أي15000
ونسمي ده فريق الخرتوم للمسعولين والمنتفعين
وعشان ما أكتر عليكم النضم ( ذي ما عملوا الجماعه في نيفاشا وقاعدين يسوا الأيام ديه في أبوجا) نقوم نقدر المسعولين و المنتفعين في
الولايات بنفس الطريقه وخلونا نقدر العدد بحوالي 1000 في كل ولايه. وبالتالي يكون ناس الولايات عددهم 26000
ونسمي ديل فريق الولايات.
ولكي ما يزعل مننا ناس تحرير السودان وناس الأسود الحره، ناخد لينا منهم ذي 300 نفر .ونسمي ديل فريق المهمشين
وبي كدي يكون عدد المسعولين والمنتفعين في السودان يساوي(خرتوم+ ولايات+مهمشين) = 41300 راجل
نقوم نخليهم Round figure ويبقي العدد = 42000 راجل
أها نقوم نجمع الناس ديل كلهم في سوبا في البكان القاعدين يسوا فيه الجماعه ديلك موتمراتهم و نقفل عليهم الزريبه.
وبما إنه الأيام ديه في موضه اسمها الشفافية والشفافيه ديه جايه من شف يشف شفاَ وهي علي وزن لحس يلحس لحسا أو شطف يشطف شطفا ونقل ليهم نحنا دايرين نخليكم شفافين ( يعني كل مسعول لازم يكون شفاف ذي الورق البرسومو فيه الآطفال الخرائط )
((بالمناسبه في التقرير الأخير لمنظمة الشفافيه العالميه ورد النص التالي- يعني مش من عندي-( أن السودان والعراق احتلا ذيل القائمة
العربية حيث جاء السودان في الترتيب رقم 144 بالاشتراك مع دول أخرى من بينها جمهورية الكونغو الديمقراطية، وكينيا،
وباكستان، وباراغواي، والصومال، وتاجيكستان، اما العراق فاحتل المرتبة 137)) يعني نحنا الحمد لله رابع الطيش وهى تشاد

وبما أننا آلان في سوبا و بالقرب من ألأبحاث البيطريه، نطلب من أخوانا المغلوب علي امرهم، العلماْء الباحثين هناك تحضير 2000 برميل من لقاح الشفافيه العنيد (شفافيتوسايت) وهو مبيد ضد الكذب والنفاق واللغف والمحسوبيه وكلما هو فاسد و مفسد. و القاح ده إذا شربه ألإنسان أصبح شفافاَ وإذا أصبح شفافاً ولغف من المال العام مثلاً ظهر المال العام داخل جسمه وفي مسكنه وعربته وملبسه وهكذا اذا كذب أو نافق و هلمجرا !!!!!!!- يعني سيك سيك معلق فيك. كما نطلب من أخوانا العلماء في سوبا خلط الشفافيتوسايت بدواء اسمه وطنوسايد والوطنوسايد ده إذا شرب منه الإنسان يصبح كل ولائه للوطن ويترك الحزبية والجهويه والعنصرية والمحسوبية.
أها نقوم نجيب الجماعة ديل كلهم وننده أسماهم واحد واحد ونسقيهم من خليط الشفافوسايت والوطنوسايد كل حسب شفافيته وولائه الحزبي وعدم ذمته. وطبعاً فيهم من تكفيه كبايه وفيهم من يحتاج لجردل.وبي كده نكون ضمنا انه الجماعة ديل بقوا شفافين ووطنيين وباقي الشفافيتوسايت والوطنوسايد نخليه شويه وحا اقول ليكم نعمل بيه إيه.

أها ندخل في اللحم الحي وهو حل مشكلة دآرفور والشرق، وطبعاَ بعد ما الجماعة ديل كلهم أصبحوا شفافين ووطنيين ما في داعي نحلفهم القسم.بس حا نسألهم سوآل وآضح ونقول ليهم يا جماعة إنتوا دايرين تحلوا مشكلة دآرفور والشرق وكل السودان؟ أكيد إجابتهم حاتكون نعم وألف نعم ونكرر عليم السوال تلاته مرات. وبرضو أكيد إجابتهم حاتكون نعم وألف نعم، أها نقول ليهم نحنا عندنا الحل وبما انهم أصبحوا ناس شفافين ووطنيين، اكيد حا يقولوا بنقبل بي حلكم. وبما أننا ضمنا موافقتهم نشترط عليهم شرط وهو الما بقبل بي حلنا ده حا نفصله من المسعوليه والمنفعجيه، طبعا كلهم وبي الفم المليان حا يقولوا بنقبل بي حلكم.

الحل يا جماعة الخير كالآتي:

عندنا 42000 مسعول و مستنفع ،قول منهم 2000 مسيحين ويبقي لينا 40000 مسلم وبما أنه ألإسلام حلل للراجل أربعه زوجات يبقي نفرض علي كل مسعول و مستنفع يتزوج ثلاثة زوجات زياده.يعني حوالي 120000 ( مائه وعشرون ألف زوجه بالتمام والكمال) كلكم حا تسالوا طيب وين حل مشكلة دآرفور والشرق وكل السودان، الحل يا أخوان يكمن في أن 80000 من الزيجات تتم الآن من دارفور والشرق وال 40000 زيجه الباقية نخليهم إحتياطي لباقي الأقاليم ( الوسط، كردفان والشمالية) لما يتمردوا. و كمان عندنا شوية شروط للجماعه وهي:

1. المسعول لازم يتزوج واحده من دارفور والتانية من الشرق.( وبتالي يبقي كل مسعول و مستنفع من مواطني المناطق المهمشة)
2. أي واحدة من الزوجات لازم تبقي في بلدها و ما يرحلوها الخرتوم أبدأ.
3. مافي مسعولين إتنين يتزوجوا من قريه واحده يعني كل مسعول او مستنفع في قرية ( 80000 قرية يوجد بها زوجة مسعول أو مستنفع)
4. المسعول أو المستنفع لازم يعدل علي زوجاته كلهم( مما جميعه ) و حسب الشرع.
5. المهر عشرة جنيهات و مؤخر الصداق عشره سنوات في بيوت الآشباح.

.(برضوا أنا عارفكم حا تسألوني طيب وين الحل وحا أقول ليكم أصبروا شويه الحل جاييكم).

الحل يا أخوان إنه المسعولين و الستنفعين ديل سوا ليهم زوجات و حا يلدوا ليهم أولاد ولابد ليهم من زيارة زوجاتهم وأولادهم مره واحدة علي الأقل في الأسبوع وعليه الحكومة لازم توفر لهم ما يعينهم علي ذلك في مكان زوجاتم الجداد والذي يتلخص في الآتي:

1. بناء مطارآت.(80000 مطار جديد)- لأنه الجماعة ديل مابقدروا يركبوا الحمير والجمال ذى بقية السودانين.
2. بناء مدارس مكتملة – مدرسين وكتب وكراسات وخلافه.( 80000 مدرسة جديدة) عشان عيالهم الجداد يتعلموا وبي جاههم يتعلم أبناء عموم السودان.( ونقولها نعم عشان أولادنا تتعلم)
3. حفر آبار .( 80000 بئر جديد) – المسعولين و المستنفعين ديل ما بقدروا علي شراب الموية المالحة و الراكدة.( يعني مشروع محاربة عطش موديل ألفين)
4. بناء مستشفيات .( 80000 مستشفي جديد).لآنه القرض والحرجل والحميض والجرده الترابيه يسوا حرقان ومشاكل مع المسعولين.
5. بناء مراكز شرطة وكل المرافق الأخري التي تخدم المجتمع ( 80000 مرفق جديد) ودية ما دايره ليها تفسير وأنا بتركها ليكم إنتوا.

أها بي كدي نكون حلينا مشكلة توزيع الثروه والسلطة و التهيش وما في داعي لي أبوجا واحسن جماعة المفاوضات وناس حركة التحرير يسيبوا الغلاط و يرجوا يعملوا ليهم شيتاً فيه فايده.

أنا قلت ليكم نخلي شوية من خليط الشفافيتوسايت والوطنوسايد دهز إنتوا عارفين خليناه ليه؟؟؟؟؟؟ ده خليناه عشان نشيله في طياره ونبدا نرشه في مياه النيل الآبيض من نمولي للخرتوم وفي مياه النيل الآزرق من ديم إلياس للخرتوم وفي مياه النيل من الخرتوم لي حلفا القديمة وفي موية الآتبراوي من جنوب الهشابه وحمدآيت لي عند أتبره. وكمان ما ننسي وآدي صالح وواديي الملك و املكابراب و وادي أزوم فحل الوديان وكل مرفق مويه ونرشه في كل سمء السودان علشان البشرب مويه والا يتنفس هواء في السودان يبقي شفاف ووطني.

ونصبح نلقي كل مشاكلنا إنحلت. ونهتف ونكورك:

عاش الشفافيتوسايت والوطنوسايد
عاش الشفافيتوسايت والوطنوسايد
عاش الشفافيتوسايت والوطنوسايد
عاش الشفافيتوسايت والوطنوسايد


ختمة
وفجعةً أصحي من النوم علي خبتة بي برطوش في جنبي البمين وأسمع أم العيال تقول لي يا راجل إنت جنيت؟؟؟؟ مني الشفا بنت طنون ود يسين البتهضرب بيها في النوم ديه. قوم ما سامع آذآن الصبح ده.وصحيت وعمي حمد الزين في خاتمة النداء

الله أكبر
الله اكبر
لا إله إلا الله

* *

الغاليه إنتصار

الحكايه ديه غلوتيه والا ايه

الاخ د عبد الله مرحب حبابك

Quote: الحكايه ديه غلوتيه والا ايه

وما السائل باعلم من المسئول
محمد عبد الله

ألآخ محمد عبدالله
تحياتي
نسأل الله أن يفرجها علي أهلنا الغلابه بتسهيل الحل. مع علمنا أن كلا الطرفين لهم أجندتهم الخاصه البعيدة عن مصلحة الشعب السوداني