أمانة (قصيدة مهداة لكل البورداب)

كلمات أخرى مني هدية لكل البورداب .. عساها تجد القبول

لو خلاص ريدتنا عدّت
وانتهت قبال أوانها
وإبتدينا نعيش ضياعنا
وترسم الآهات خطانا
أبقى أسأل عني قلبك
وأسأل الهم الطوانا
مين حيقدر تاني ياخد
فيني من بعدك مكانة
وليه بنكتب بي إيدينا
نهاية لي ريد احتوانا

* * * * *
القدر بيناتنا ساير
في العذاب والمر رمانا
ولسة متعمّد تقابل
ريدتي بالزيف والخيانة
أحلامي فيك لاقت سرابك
وريدتي تاهت من زمانها
إخلاصي ليك زاد من غرورك
وحبي ليك كان لي شقانا
وبس عزاي بحفظ عهودنا
وبنتظر أوهام لقانا
أصلو حبك فيني ذكري
وامنيات مخلوق عشانها
سكّنتو من قلبي المشاعر
وشلتو في جواي أمانة

هشام عباس
10/11/2005م