Post: #1
Title: محمد ود الرضي .. راضي بصاقعه يا صديق الموج
Author: Emad Abdulla
Date: 11-09-2005, 11:16 PM
العزيز صديق ..
سلام وشوق وتحايا ..
في يدي تسجيل نادر لما يقارب الساعتين مع شيخنا محمد ود الرضي و صحبة مبارك حسن بركات .. ود الرضي ذاك الشيخ الجليل وهو في أخريات أيامه في هذا التسجيل منحه الطرب والإنتشاء فتوة وحيوية جعلته يطلق الطرائف ويغني ويعلق .. ثم يستغفر ربه بعدها .. ثم يضحك ثم يستزيد عمنا مبارك : الللللللله .. عقب عقب .
غنى مبارك حسن بركات بمزاج عال كل درر شيخنا الرضي و دون مصاحبة حتى آلة إيقاعية واحدة .. وكان الكورس شيخنا ود الرضي .
يطربك تماما يا صديق حين يتبارى الرجلان في قراءة كلمات الأغنيات الجميلة تلك قبل أن يصدح بها مبارك . ود الرضي قال معلقا حين لم تسعفه ذاكرته في بعض الأبيات التي كان مبارك يحفظها عن ظهر قلب ، قال : والله إنت عجيب خلاص ، حافظها تمام . أجاب مبارك : أمال إيه .. دي خزاين شيخنا .
في هذا التسجيل حميمية حتي في خلفية المكان .. كأني به في حوش كبير من حيشان أم در .. والحضور على قلته كان خشوعا إلا من همهمات الإستحسان .. والطرب الجميل .
في مقطع بهذا التسجيل يقول ود الرضي ( رحمه الله و أرضاه ) :
العروس قامت ترقص ، العريس قال الشبال بي سوط .. الشبال بي سوط . وقفت حيلي ، قلت ليها :
الكتوف واقعه
الخدود يا ناس مويتن ناقعه
العيون ناعسات في الظلام فاقعه
قصدي شبَّاله وراضي بي صاقعه
جات وقفت في صدري .. أدتني الشبال .. العريس جه هز فوقي ، ما ضربني
رحم الله ذاك الزمان الندي .
هذا التسجيل النادر مهدى لك يا صديق و سأعمل على إرساله لك سريعا فإنت من يستطيع كيله دون سواك .. وأنت أحق به .
ودي لك والإحترام
|
Post: #2
Title: Re: محمد ود الرضي .. راضي بصاقعه يا صديق الموج
Author: صديق الموج
Date: 11-09-2005, 11:32 PM
Parent: #1
Quote: العروس قامت ترقص ، العريس قال الشبال بي سوط .. الشبال بي سوط . وقفت حيلي ، قلت ليها :
الكتوف واقعه
الخدود يا ناس مويتن ناقعه
العيون ناعسات في الظلام فاقعه
قصدي شبَّاله وراضي بي صاقعه
جات وقفت في صدري .. أدتني الشبال .. العريس جه هز فوقي ، ما ضربني
رحم الله ذاك الزمان الندي . |
عماد السمح كتر خيرك...
الكتوف واقعة....
الخدود يا ناس مويتن ناقعة
الوجن قادحات فى الظلام فاقعة
بالله شفت جنس طعومية الوجن قادحات دى..احى انا!!!!
ياخى اشكرك مثنى وثلاث ورباع وانت احسب دون ان تهدك اللانهائيات فى علم الحساب
وانا منتظرون..وسوف افعل،،،
|
Post: #3
Title: Re: محمد ود الرضي .. راضي بصاقعه يا صديق الموج
Author: Emad Abdulla
Date: 11-10-2005, 00:07 AM
Parent: #2
صديق
سلام ..
آسف لأنه التسجيل ماكان واضح فيهو صوت الشيخ تماما ..
وأشكرك على لطفك في تصحيح ما أخطأت فيه .
يصلك قريبا ما وعدتك به
مودتي والإحترام
|
|