مصطفي سيد احمد.... كل عام وانت بخير

العزيز مصطفي سيد احمد .كل عام وانت بخير وكيف العيد معاك؟ وكيف العالم البهناك؟ ,سالين عنك.... ويوماتي رحيل ,رحيلك شلهت الدنيا ورتب العالم البهناك ,امبارح ازهري قال: عصفورتك ركت في البال... وطارت من قولة كر.... وبقولك عوافي عليك ياخلاصة الخير الفي الناس وترياق الزمن المتعافي... وبرضوا تغني...تغني من التعب لامن كلاك دمن لاشكرا رجيت لامن فهل يعني النهايه الموت ؟...يعني كان لازم تفوت... وتخلي اوتارك سكوت... والله ايام يازمان ببكي واتحسر عليك.... وانت اروع مافي الوجود... انت اول وانت تاني ...ياحليلك براك الما وقف بين بين.... ,تموت متل الشجر واقف علي حيلك فياحليلك ,كان نفسي اقولك من زمان ...الورده لوفات الفراش مااظن تسيبوا مع الندي مابتجرح احساسوا الجميل والريده ياابوسامر كده .
ياضلنا... طال الليل بالمسافر....ولسه بيناتنه المسافه ....كيف حال يابوي؟ كيف حال ياخال؟ ...لسه ساكين القطاره... والدنيا ليل.... ولسه العساكر تباري الكباري تقطع قلوب الجهال الشلوخوم هويه, مريم محمود تسال عنك..... وبثينه باقيه علي همك ,ومن هنا تقبل سلام عم عبد الرحيم والحاج ود عجبنا وقاسم والشفيع وبقية العقد الفريد.... وماشين في السكه نمد لمن يجي الزمن الفلاني
ولنا عوده

1-

... تانى قام واحدْ جميلْ فى بلدنا ماتْ

وكان بِغنى للمساكين والمسولتين والحفاةْ

وكان بِغنى للمنافى والعصافير والرُعاةْ

وكان بِغني لى بلدْ فى الحُلم شايل أغنياتْ

وكان بِطنبر .. وكان بِدوبى للحياةْ



-2-

تانى قام واحدْ مَلِكْ رَوَّحْ وفاتْ

وكان مَلِكْ فى الريدْ .. وانسانْ فى الصفاتْ

وكان مهاجر فى دموعْ كُلَّ البُكاةْ

وكان وترْ مشدودْ .. ومسكونْ دندناتْ

وكان – عليه سلامْ – تقولْ ما زولْ حياةْ !



-3-

يا مصطفي

طاري الجماعه الكانوا سَاكِنكْ دوامْ

من منفى لى منفي

ومن عودْ .. لى سَفرْ

طاري العصافير المسافراتْ دون جوازْ

طاري اللى داجين فى المطرْ

عبد الرحيم وهلمَّ جَرْ

طاري القطرْ

طارى الحرازْ



... الليله كانوا جميعْ هناكْ

قَسَماً يمينْ

كان الجميعْ باكين عليكْ

كان المطارْ والطائراتْ فارشينْ عليكْ

كان الجميعْ مشتاق اليكْ



يا سلام عليكْ

لمان تكون زولاً عزيزْ

عِنْ ناسْ عُزازْ

يا سلام عليكْ



-4-

.. يعنى كان لازم تفوتْ

والحُزنِ مشرورْ فى البيوتْ

والدنيا مَا زال فيها حُوتْ

وفيها لِسَعْ عنكبوتْ !



... يعنى كان لازم تفوتْ

وتخلى أوتارك سُكوتْ

ولسه عندنا ريدْ جديدْ

ولسهَ عندنا ليكْ قصيدْ !





... يعنى كان لازم تفوتْ

وتخلى هذا الحبْ يموتْ !



-5-

يا سلامْ عليكْ

لمان تكون زولا عزيزْ

عِنْ ناسْ عُزازْ

يا سَلامْ عليكْ !