هواتفنا على الشاشه

أقعد قدام التلفزيون كل يوم بعد الفطور – فطور رمضان طبعاً – ولما لم أكن أتعاطي التمباك ولا السجائر العادي أو أبو زلومه والأخير ده طبعاً حتى لا يسئ البعض الظن بي هو الشيشة جراكاً كانت أم معسلاً ، أها رأس زي ده الحلاق يحردو لا سجاير لا صعوت وحتى الشاي والقهوة عندي فيها رأي بحكم أنها لا تفرق معاي لقيتها أو لم ألقاها.
وأنا قاعد أمام التلفاز هذا الجهاز النكسة ولأنني منحاز لوطني أقوم أجيب الفضائية السودانية والأرضية السودانية على طول يجيني مغص وأغادر للمكان بالدس ، برامج مهببه والحشو بين البرامج أو ما يسمى زندقة بالدعايات ، تصوروا أى حاجه بنغني ليها مفروشات أكل طوب سيراميك ملابس مستوصفات ومستشفيات خاصة حتى إسبيرات العربات ، لا ويقول ليك هواتفنا على الشاشة والله لو رمشت ساكت أو جات ضبانه طايره قدامك تلقي الشاشة إتمسحت تقول الشاشه الغشاشة لو رقمين ما بتقدر تشوفهم من سرعة تطشيشهم. أها يا جماعه للمرة التانيه بعرض تلفزيوني للبيع والريموت كنترول هواده بلا مقابل

العزيز الملا عمر

رمضان كريم......وعيد سعيد مقدما

Quote: تصوروا أى حاجه بنغني ليها مفروشات أكل طوب سيراميك ملابس مستوصفات ومستشفيات خاصة حتى إسبيرات العربات

دى حريفة شديد.....امكن الغنه بفك البورة.....




لك التحيه اخى

هواتفنا على الشاشة

Quote: لا ويقول ليك هواتفنا على الشاشة والله لو رمشت ساكت أو جات ضبانه طايره قدامك تلقي الشاشة إتمسحت

سمعنا بي عزومة مراكبية لكن أول مرة نسمع بي هواتف مراكبية
يمكن يا جنا دا المس كول البعنوهو؟؟؟

بدري سلام عليك يود مناقزا هسع السودان آجنا زي زمان الحكاية كلها جايطة وخليها على الله ، القروش فسدت الناس والناس غالبهم يا خوي فسد وسقط والإعلام برضوا بسوهوا ناس بشبهم وبقصلوا على مقاسهم وانتى كان رجعت البلد بتعرف أخطر من كدة زمان الناس بشربوا المريسة والعرقي والكجومورو والعسلية في هببنا وفي كمبو عبدالسلام وكمبو سبعة هسه الأولاد بقو يشمو السلسيون والحشيش والمخدرات ويروجوها والبلوتوث والأفلام عبر الموبايل والحاجات الأخرى صارت لها شقق مفروشة وقلة الأدب وعدم التربية بقت ما مدسوسة وقائمة الفساد طالت أي حاجة يا أخي الفساد في بلدنا يحميه القانون ومنفذيه ( حاميها حراميها)

الملا عمر:
سلامات للجميل الراقي إحساسو ..

Quote: وأنا قاعد أمام التلفاز هذا الجهاز النكسة

ليي هو إخترعوهو سنة 67 ولا شنو ؟؟؟؟

Quote: تصوروا أى حاجه بنغني ليها مفروشات أكل طوب سيراميك ملابس مستوصفات ومستشفيات خاصة حتى إسبيرات العربات

وأزيدك من الشعر بيت ( الجملة دي عاجباني ياخ )
الدعايات كلها فيها بت وااااااااحدة صفراء فاقع لونها لا يسر الناظرين والله يا الملا عمر بتلخبطني لخبطة شديدة خلاص ..
ألقاها ليك في دعاية محلبية تاج محل (ياربي جابوها عشان حلبية ؟؟؟) وفجأة نفس البت تجيك في مفروشات منو داك وبعد شوية البت زاااااتا الما بتغباني تجيك ناطة دعاية صابون وتلللللللللب تنط ليك في دعاية بسكويت والله انا خايفة يوم تجينا في شكل جدااااادة تقول كاك كاك كاك انا ماجي ومرقة ماجي أحب الماجي ...

Quote: لا ويقول ليك هواتفنا على الشاشة والله لو رمشت ساكت أو جات ضبانه طايره قدامك تلقي الشاشة إتمسحت تقول الشاشه الغشاشة لو رقمين ما بتقدر تشوفهم

والجميل في الموضوع مرات تلقا شركة ما عندها تلفون زاتو وتقول ليك هواتفنا على الشاشة وتعاين في الشاشة ما تلقا أي رقم ...
انا لو محلهم الناس ديل أخت أرقام بتاعت المطافئ ولا بتاع النجدة والعمليات ..

اخي عمر الفاروق
سبعة وستين دي نكسة وإنتهت لكين نكستنا نحنا باقية فينا إلى يوم يبعثون ، أنا لست متشائماً لكنني أحاول أن أكون متشائلاً. عن الغنية البتفك البورة أخي الفاروق لا أحسب أن هذه النظرة أو النظرية صحيحة فقد ظلت ...... تغني في الحفلات وما زالت عانس لا أمل ولا رجاء لها في عرس الكورة حتى وقد سرت العدوي منها إلى الكورس.
أتفق معك بأن بت المحلبية التي تتحول إلى بت صابون ومن ثم إلى بت حلاوة قبل أن تنتهي بت بطاريات هي ظاهرة تستحق التوفق عندها ، وقد أخبرني أحد خبراء الدعاية والإعلان عندنا بأن حكاية جمال العلم والأدب دي بتخاطب شريحة ضيقة في المجتمع يعني ما يغطوا حق الدعاية والناس عاوزه كده يعني عشان بضاعتك ما تبور وفر أكبر عدد من بنات المحلبية وفي النهاية المنافع متبادلة ومكسب كبير ليك وللوكالة وللمحلبية وبناتها.
بدر الدين شنا بيقول إنو تزويغ التلفون بهذه السرعة يعتبر في عرف ثورة الإتصالات ضرب من ضروب المسكولات.

الملا

شكلك كدة بتاثث

عايز تلقط تلفونات ناس المحاميد ااااااااا

ثبت النضارة كويس وزح الشفع من قدام الشاشة واقعد محلهم

ما سمعت

انا بنجو مع العفش

Quote: على طول يجيني مغص وأغادر للمكان بالدس

وكل ما اشوفها اتكبكب ..
ويجيني مغص .. وصوت عجلات ودبابات صلاح الدين
وأغادر للبركس بالدس ..

مش العميري غناها كدا برضو يا ملا ..


بعد الشحتفة ..
كل عام وانت بخير .. رمضانكم مالو السنة دي متأخر ..

الملا عمر

كل سنة وانت طيب والقابلة تفتح قناة سودانية خاصة

تعرف كلما تجى دعاية الاسبيرات الغنائية دى اتلفت على المرأة واقول ليها مستنكرا ( وكانها من قامت باخرج هذه الدعاية ) الله !!!! الاسبيرات كمان بقوا يغنوا ليها ؟؟؟

بصراحة حتى الان لم اجد من يقنعنى بجدوى الغناء للاسبيرات ابدا

وده قادنى لانه بعض الناس هنا بنتقدوا البشير لانه برقص عقيب الخطابات
طيب ما اهو الشعب كله بغنى ويرقص ياخى

يعنى جات على الريس براه ؟؟؟

الحبيب الملا ..ياااااخ انت رائع
وعشان دى

Quote: أها يا جماعه للمرة التانيه بعرض تلفزيوني للبيع والريموت كنترول هواده بلا مقابل

انا موافق بس تزيدنى معاهم المزيع الفلانى والمزيعة الفلتكانية عشان نفسى اعضيهم ياخ ديل جابو لينا سؤ هضم
ضفرة:فى اجمل من كده

Quote: وانا بنجو مع العفش

مرضتونا الله ....

اكتر حاجة خلت المويات ما تنزل من حلقي

واحدة في دعاية بتقول

تلفوناتنا

خمسة سفر ستة تلاتة سفر سفر اربعة


يا عمو عاين دي بتقول

للصفر سفر


وكان هذا التصحيح من طفل عمره ثمانية اعوام

سلام من الله عليك يا ملا
الواحد او الواحدة من مقدمي البرامج تترصد الضيف , وتختف ليها كلمة وتحورها لحدي ما تلفق مع موضوع الفقرة الجاية ,,يعني مثلا الضيف يقول :
وطبعا اهم شئ عسل اليدين بالماء والصابون واقناع الطفل بترك عادة فرك عينية ووو الخ
تقوم المذيعة تقول :
طبعا النظافة من الإيمان , نتوقف لرفع الاذان