سودان مطلوب جد و بدون مشاكل

سودان مطلوب جد وبدون مشاكل

لكل الناس الطيبين تعالوا نسوى بلدنا جميل ....
تعالوا نغنى نشيد واحد عربى رطانه...ونرفع شعارا واحد..وطن طيب
فيهو كتير..
ملوال جعفر ادروب والدومة جميعا فيهو ..العندو المنجل والفى ساقتو
الشارب القهوة والمشنق طاقتو كلهم فى دربا واحد..
الحاضن المصحف والشايل انجيلو والعندو كجور جميعا واحد فى سودان كبير
يربى عيالو بالاحسان والفرح الزائد
بدون احقاد وبدون بندق ,, بدون القيل والقال..بدون (ديل كفار يا ولدى
حطب النار)..( ديل جلابة يا ولدى مطرودين من ربع الخراب)..
مالو القس لو ماشى كنيستو مالو الامام لو صفى سريرتو عشان
سودانا جميع ....
مالو الشيخ لوصلى عشان سودانا جميع
لا جغرافية و لا تاريخ بتحل المشكل.. لاغرابه ولا جلابه.. لاشمالى ولا جنوبى فى حرابة.. سودان كبير يسع الكل
البصلى يصلى صلاتو..والبرنم نريدو حلاتو.. والببشر مع الله بذاتو
نجلس جميع فى حلقة نحكى حكاوى ..ادروب يجيب القهوة حسان يفتح بيتوا للجايين ..وملوال يغنى غناوى و يفرح بيهو اخوه الدومة...عشان سودانا يبقى كبير.
العسكر يحرسوا الحله من كلاب الحله التانيه
والعدل هناك بتحقق ..
حب سلام يكون عنوان ..واوع واحد يشاتر عشان لانموت ولانفوت ببندق اخوى التانى لو كان
عربى او كان رطانى

مع حبى لجميع الناس

ينصر دينك يامنعم

عزيزى/عبدالماجد

ليت الحلم يتحقق ...والبندق يقيف ...والفرح يعم

اخوتى فى المنبر

تحيه و محبة

السودان الذى نعشم فيه لا يشبه صراعاتنا الجهويه و نعراتنا العنصريه.
ألمدنيه و التمدن يرفضان التمييز بين الناس وعلى اى اسس.
علينا ان نقبل التمايز وان نرفض التمييز...الثقافات اصبحت تحدد شكل
الانتماء .
من قال انه افريقى فما على الاخرين الا احترام ما ذهب اليه حتى ولو
كان ابيضا....ومن قال انه عربى فما علينا الا ان نحترم ما ذهب اليه
ولو كان اسود.
الانتماء شى شعورى فلا حجر على من اراد جماعة او ثقافة معينه.
فى السودان علينا ان نقبل واقع التمايز على ان لا تستقله اى جه
لتحقيق مصالح لفئه او جماعه
علينا ان نقف ضد عمليات الاسلمه و التعريب القسريين.


احياء الثقافات الخاصه داخل التنوع و اللهجات المحليه.

سأكتفى و ساعود

الاخ العزيز منعم، كل عام و انت بخير و مرحبا بك في المنبر العامر.

عين ما وصفت و ما اشرت.. هذا الوطن المفقود الذي نبحث و لن نترك إلا ملاقيا.

و الشاهد يا عزيزي ان حكم الانقاذ الهمجي عرَي المجتمع و فسخ وشائجه، بضربه المنظم للمجتمع المدني فأرداه إلى عناصر تكوينه الأولية.. القبلية و العشائرية و الجهوية، و نفخ فيها من نار الهوجاء و الظلم و التهميش من مستصغر الشرر الذى ورث.
فباتت تزرونا رياح التخلف و الغوغاء و عقلية الغيبوبة.
تمدد يا عزيزي بيننا فما احوجنا إليك في زمن و مساحة صار الفحش بالتحَضر يمشي فيها على قدمين.


شكرا على جميل الوطن. و دعنا نقول هاهنا وردة.

إنت صاح الصاح
...........

الاخوة/ثزوت والعزيز /عبدالعزيز
تحية و محبة

علينا ان نقف جميعناضد العنصرية وضد العنصريين.
وان نقف فى وجهة كل من يستخدم اسم اللة ليذل الناس.
فلنعرى كل من يرسل اولادناليموتوا من اجل سلطانه وجبروته.
فلنعرى كل من قتل باسم الله ...وكل من انتهك اعراض الناس .
ولقول لاهلنا الطيبين ليس هذا صنيع الله لان الله برى من اعمالهم الشريرة
الله طيب لايعرف الا طيب...الله لا ينصر الظلم ولا الظالميين.
الله الة تعميير وليس إلة تدمير.الة منحاز للفقراء,الة
قوى لايحتاج لمعين.ليس له علاقة با لقتله لانه اله حياة.
ليس ببعيد عنا ليسلط عليتا غيره ,ليس بغائب لينوب عنه اخر.
اله لا ينحاز الا للخير.
ايها السلطويون ارفعوا ايدكم الملطخه بدم الذين ارسلتم ليموتوا
دفاعا عن سلطتكم واموالكم الحرام قصوركم وبنوككم.
متوهم من ظن انه يدافع عن الله ,لان الله ليس يمغلول الايادى او مستضعف.

up up

العزيز منعم
مرحبا بك في حوش بكري
والله زمان يامنعم؟؟؟
الولد مليان اصرار وصحة
جرب آلام الحراسة
وحرض أولاد الدراسة
وهد كتف العسكرية
هانحن في زمن الشتات
نلوك حسرة الوطن
ونستجدي الديمقراطية
كما قال درويش
عادوا من اساطير الدفاع
الى البسيط من الكلام؟
مرحبا بك
عقلا نابها
وقلم شجاع
لازالت شوارع الصحافة تذكر قيادتك لمظاهرات الانتفاضة
مرحبا بك مناضلا جسور
وانسان جمييل
لك الحب والمودة
أمينِ

كل عام وانتم بخير
دعنا نحلم
فالمشروعات الكبيرة بدأت بحلم
فلنحلم جميعاً
وندعوا كل الناس ليحلموا معنا

ولنرفع راية خضراء للسلام في بلادي

سلام مع النفس اولا
سلام مع الاخر
سلام مع المجمع
سلام مع الكون كله.

الحبيب الغالى/ امين السيدوالاخن المحترمه/القلب النابض

اشكركم على مروركم
معن من اجل السودان البنحلم بيهو يوماتى

حلم الجعان عيش يا منعم..

سودان زى دا تجيبه من وين؟!

الاخت الجميلة/نور تاور
سلام ليك وللمعاك جالسين وكل حول انتم طيبين
الحلم مشروع,,,دعينا نحلم عشان سودان كل الناس ....
لما كنا صغار اهلنا كانوا بيحلموا بينا عشان نبقى كبار
ونزيل الغبار... كانو بيغنوا بتين يا على تكبر تشيل حملى .
ونحن يانور كبرنا ولازم نزيل الغبار عن بلدنا ونشيل حمل اهلنا.
الحلم مشروع ولازم نعمل سوى سوى....

منعم



(لما كنا صغار اهلنا كانوا بيحلموا بينا عشان نبقى كبار
ونزيل الغبار... كانو بيغنوا بتين يا على تكبر تشيل حملى) .


اها على وينو؟!

مشى وين وخلا الدنيا قايمة قاعدة؟!

نور

صدقينى على ما فات , على ما مات ,على كل زول فينا.

انت على وانا على وكل من عفص الجمر على .

تعالى نحلم ونبنى,نبنى ونحلم عشان سودانا يكبر,,,,,,,

مع محبتى

منعـم
إزيًك يا ود الناس.

Quote: الحاضن المصحف والشايل انجيلو والعندو كجور جميعا واحد فى سودان كبير يربى عيالو بالاحسان والفرح الزائد بدون احقاد وبدون بندق ,, بدون القيل والقال..بدون (ديل كفار يا ولدى حطب النار)..( ديل جلابة يا ولدى مطرودين من ربع الخراب).. مالو القس لو ماشى كنيستو مالو الامام لو صفى سريرتو عشان سودانا جميع ....

فيًن إنت من زمان ياراقي..
أهديك أغنيًه للعطبراوي..
ياغيثارة....

الاخ الغالى/محمد ادم

سلام ومحبة
عاوزك انت تغنى معاناعشان سودانا الكان .
لاقبلية, لاجهوية ,لاعنصرية ,كل سوى سوى .
مد يدك اخوى الغالى ,عشان يفوت العسكر وربعنا يخدر .

تعرف ..
السودان دا ممكن يجيب سودانيين أحسن من البنفكر فيهم .. لكن متين ؟؟؟
لمن تتوفرفينا قدرة صبر
.. وقالا ودالشريف زمان

(أعاف الصديق الما بهم بيك
وأخاف الطريق الما يودي ليك)





______________________________
مهداه لبورداب الــ(إعادة توطين)

up up

الاخ الحبيب منعم
تحياتى يا شفيف ويا رشيق الكلمة والإحساس
اتذكر؟ لسنين طوال مر بها الزمن ولم تسقطها الذاكرة ، كنا بنحلم بهذا الوطن الجميل الذى تحدثت عنه . كنا سحنا مختلفة تحت راية واحدة . عبد القادر بلكنته الشايقية , وراشد من الوسط ، وحماد حامدين من الغرب واتذكر كرار من الشرق وكثير من رفاقنا فى الحاج يوسف من الجنوب ، و من اي بقعة فى هذا السودان المترامى ، تجد احدنا. أتذكر؟
كنا كلنا تحت نسيج واحد . ترى ما الذى تغير ؟ هل تغير الوطن ام تغيرنا؟
تتقدم الامم ونتقهقر نحن . والسؤال لماذا ؟ هذا ما يجب ان تبحثه. بدون البحث عن الإجابة سندور فى حلقات مفرغة كما هو حال السياسة فى بلادنا.
واعتقد ان السر فى حل هذا الوضع يكمن فى الإحساس بهذا المسمى وطنا .
فمن اين لنا بهذا الإحساس الجميل ؟