أنا ما بحب الســجاير........ وبكره التمـــــباك

عملية غير حضارية خالص التمباك أو الصعود أو الصعوط
تلقى الواحد قاعد يتكلم في السياسة والباقة والفن والأدب وهو خاتي سفة
حاجة تقرف
ولو مشى معاك واحد سافي في الشارع الوقت كله يتف ويبزق على الأرض ويزيد من العفن عنفنين
يعني معقولة الواحد يكون ماشي معاك التراويح وسافي مثلاً كما حدث معي
بطني طمت
بالله أي واحد بيسف يتف سفتو قبل ما يدخل علينا هنا
وبس

تحياتي
فرانكلي

لووووووول فرانكلى
اولا رمضان كريم عليك وتصوم وتفطر على الف خير ان شاء الله
اريتك انت يا يابا ود السرور والخاتر المجبور
مع احترامى لى خصوصيات الناس البتتعامل مع الحاجه دى ..
لكن جد شىء مشين جدا .. غير انه ضار بالصحه
الغريبه يا خوى يا فرانكلى فى بعض الهنود ولا الباكستانيين ..
عندهم نوع من انواع الصعوت على ما اعتقد بترك لون احمر ..
لكن ما بتناولوه قدام الناس ..لكن نحن ناسنا السودانيين الله يديهم العافيه
الواحد فيهم لو ما ظهرها لى العلا والملا ما برتاح ..لكن بينى وبينك البمشوا بيها للجامع دى ما جايه تب ..الله يهدى الجميع

احكى ليك نكته بالمناسبه دى .. حصلت حقيقه والله العظيم
وحكوها لى ناس بعرفهم ..فى مدرسة بنات فى قريه
عندهم استاذ مرضان بالحاجه دى .. بشرح الحصه كلها وهو سافى
ما حصل يوم شافوه بدون سفه
الاستاذ الجليل جاتوا اعاره للسعوديه .. والبنيات البريئات مشن اشترن ليه هديه لى وداعه .. جريده ملفوفه الهديه جواها ..بعدما اتخاتتو قيمتها
وعملوا ليه شاى ولقيمات وقدمن ليه الهديه ..
اللفه قدر المخده بدا يفتح فيها ويشكر فيهن
وصاحبنا يشيل فى الجرائد ويردم فى التربيزه .. كوم اكبر من كوم هدوم الغسيل ..كلو فاضى.. والبنيات التلميذات عايشات معاه الدور بتاع المفاجأة بى برآءه
اخيرا صاحبنا عتر ليه فى كيس صعود.. والبنات صفقن لانه حسب خبرتن معاه دى اجمل هديه
صاحبنا ضحك لمن وقع ..لكن ياهو الجابوا لى روحوا .. وده الشافنه بعشقه حد الجنون
ما قصرن والله مش ؟
لك خاص التحايا وىسفه للاطاله.
والله يكتر من امثالك