من هم اللاجئين السودانيين بالقاهرة !!؟

..
.
رأيت بوست لاجَئ القاهرة يعلو ويهبط ..كانه يبحث عن وطن ..
وان صح التعبير كأنهم بلا وطن ..
مع عدد بسيط وضئيل من المشاركين ومن الموقعين ايضاً
قد اكون لم استطع ان استوعب فى هذا الشهر الكريم ..
الخطاب الموجه الى منظمة الامم المتحدة لشئون اللاجئين ..
ولم اود ان اخوض فى مغالطات مع متبني الموضوع ..
فسمحت لنفسي ان استنزف الباندويث لاتسأل .. هنا
من هم اللاجئين اولئك ؟؟
والى الى دولة يودن اللجوء ؟؟
الا يبطل الفعل بزوال السبب ؟؟
لمن يمنح حق اللجوء ؟
الا يوجد بون شاسع بين اللاجئ الفلسطينى والسوداني ؟؟
لماذا نهين انفسنا ونزلها بهذا القدر ؟
وهل لهم فعلا قضية !!
عجـــباً ..
اسئلة قد تكون للاجابة او ليست كذلك ..

ووطنى ولا ......


ولا شنو يا لاجئ ..

كل رمضان وانتم فى دياركم ..

تبلدينا

كيفك يازعيم

رمضانك كريم جدا

Quote: اسئلة قد تكون للاجابة او ليست كذلك ..

بدون تعليق .. الغرض من الاسئلة في ذاتها شنو ؟؟؟

اخي تبلدينا

كيف الحال ورمضان كريم

تشاء الظروف ان اكون في القاهرة في تاريخ سابق وجلست مع كثير من الاخوة وبخاصة من هم بورداب الرياض وغيرهم وتأكد لي الآتي :-
ان الزخم الاعلامي بخصوص لاجئين او خلافه او هروب من الحرب او خلافه هي زوبعة في فنجان يقوم بها البعض فقط .
والدليل على ذلك بان بالقاهرة الألاف من السودانيين فهل كلهم يطلبون اللجوء السياسي او حتى الاجتماعي .
ولنسال أنفسنا لأين يود هؤلاء الذهاب ؟
إلى أي هروب آخر
لماذا لا يواجهون حكم البشير بالطرق المتعارف عليها
وتجربة لمستها بنفسي
فقريبي حضر لنا بالقاهرة ومعه عائلته وعندما سألته عن أسباب حضوره فقال أنه يود اللجوء السياسي لأن أوضاعه في السودان غير مرتاحة
ليس هو من المناطق المهمشة
ليس هو من المناطق التي تشهد حروبا
ليس هو ذوي ميول سياسية
لا علاقة له بمن يحكم لاسودان حتى ولو كان أبليس نفسه
ولكنه حضر في هذه الظروف وهو يطلب اللجوء السياسي ومعه الأسرة
وعندما سألته عن الأسرة
فكان رده ببساطه بأنه يمكن لهم بأن يواصلوا الدرساة حتى لو بالكنيسة بالقاهرة

فهل ياتري هو مع من يفترشون الأرض بجوار مبنى الامم المتحدة ويناشدون العالم اعلاميا بحمايتهم من حكومةالبشير او حتى الغاء الحريات الأربعة بين مصر والسودان او يسبون الشعب المصري .

تبلدينا..
رمضان كريم..

تحضرني في هذه العجالة..
أو السانحة.. هذه...

قصة لأحد المطربين السودانيين الشباب..
في القاهرة أوائل التسعينيات..
أيام ما كانت القاهرة قبلة..
كل معارض جسور...
قبل موسم العودة الطوعية..
لأحضان حظيرة الوطن..
حلوة حظيرة دي..

المهم..
الفنان ده..
قام مشى عدل لوزير الداخلية المصري..
وطلب منو حق اللجوء السياسي..
بحجة إنو معارض للنظام...

رد وزير الداخلية المصري....

وفي غمرة أيام...
عداء مصر للسودان (بأسباب أزمة حلايب)..


قال ليهو..
أجري .. أجري .. يا أبني..
ما ياهو إخواتك إعدين في العتبة في حد سألهم..





وبعد كم سنة من إحياء ليالي القاهرة الغنائية..
وحفلات التخريج.. والأعراس....
نفس المطرب..
أقوم أقابلوا في السفارة..
وأنا بعمل في تأشيرة العمرة للمملكة..

شايل جواز سفرو وببكي..
وبقشقش في دموعو...

سألوه الناس البيعملو مراجعات في السفارة..
قالو ليهو مالك.. يا زول المات ليك منو...
فاكرنو جاي يوثق شهادة وفاة...

قال ليهم بصوت مبحوح محشرج بالخيبة..
أنا تبت..

قلت سبحان الله..
وسألتو قلت ليهو..

إنت سويت شنو لامن تتوب..
التوبة النصوحة دي...
قال..
لي إستتابة لوجه الله...
من أجل الوطن..
وده طرفي من معارضة السجم دي..
والغريبة..


نفس الزول..
هسعي قاعد في الخرطوم..

بيغني في إحتفالات ثورة الإنقاذ..
(الإنقاص)...



مرة كده شفتو في التلفزيون..
بيلعلع..


قلت سبحان الله...
الهادي.....

سؤال برئ وجدا كمان!!!!!

Quote: لماذا لا يواجهون حكم البشير بالطرق المتعارف عليها

المتعارف عليها دى عجبتنى والله
يا خوى خليك في الانتا فيه وانسا الموضوع ده..

قال المتعارف عليها قال
استغفر الله العظيم

الاجئي
هو خروج شخص للدولة اخرى غير دولته خوف من الاتضهاد بسسب اللون - او العرق او الدين او الانتماء الياسي او الانتماء الاجتماعي او الجنس ( قانوناللجؤ )
اضف اذا اندلعت حرب في جزء من ارضه وان لم تكن بالقرب منه)


اسالك لكي نتحاور موضوعيا هل السودان بلد امن
ولا يوجد عب ودعرب في السودان ام لا مسيحي ومسلم ام
وهل لايوجد فرز سياسي واجتماعي
نعم انهم يبحثون عن وطن
لانهم بلا وطن

في قرية الشبارقة تحركت بعض ناس القرية بامر من امام الجامع بعد صلاة الجمعة وحرقو قرية بها جنوبين ونانا كنت محامية اهل قرية الجنوبين
انت لم تشاهد منظر اللاجئين اغلبهم اتوا من مناطق الحرب

الأخ تبلدينا
تحية ورمضان كريم
وحمدا لله بسلامة العودة

تساؤلاتك في محلها
فإن كانت هناك مظالم في الماضي
فقد تغير الحال الآن، وأصبحت هناك
حريات مضمنة في الدستور ومحمية بواسطة
جميع الفعاليات السياسية والصحافة
والمجتمع (الدولي)..
لن يقنع أحد الأمم المتحدة بعد الآن
بأن هناك اضطهاد أو عدم وجود حريات في السودان
مصر التي يعيشون فيها هذه اكثر سوءا من السودان
في مجال الحريات وحقوق الإنسان وخاصة (الإنسان السوداني)
الذي يعيش فيها..

الأخت هنادي يوسف
تحية
أرجو ألا تتحججو بما لا يعقله بشر..
ما في (عب أو ود عرب) كتلتها زول.. ولا في سببا بخلي
الواحد يهرب عشان في قرية عملت مشكلة مع قرية اخرى.
طول عمر الجنوب عايش حرب مع الشمال..
مافي شمالي واحد تعدى على جنوبي واحد في الشمال
فما تحاولو تقولو كلام ما بتصدق..

لكما التقدير

العزيز دائما تبلدينا
رمضان كريم
الموضوع باختصار شديد:
اصلا كان من قبل برنامج اعادة التوطين وهذا البرنامج تابع للامم المتحدة وبالفعل البرنامج كان ماشى بصورة جيدة واستفاد منه الكثيرين الان موجودين في كل من امريكا وكندا واستراليا ولندن ودول كثيرة .والبرنامج حسب القضاية واقدمية التقديم على ما اعتقد. ولكن يبدوا انه توقف لسبب ما والسبب الوحيد الظاهر ان الامم المتحدة احست ان في اتفاقيات سلام تم التوقيع عليها وبذلك ممكن الناس ترجع الى الوطن الاصل السودان.

لكن المشكلة يرجعوا كيف ؟ وين ؟ المسؤل منو منهم وهم خارج الوطن لفترات طويلة؟
الامر معقد ومعقد جدا محتاج حلول وحلول عاجلة لان تطورها ليس من مصحلة لا حكومة السودان ولا الحكومة المصرية.

وان رجعوا جميعهم هل حكومة السودان لديها المقدرة في استقبالهم ومعاونتهم حتى يتمكنوا من العيش الكريم؟؟؟
الـسؤال ده محتاج ايجابة واضحه وصريحة والتزام...

Quote: من هم اللاجئين اولئك ؟؟

سودانيون ضاقت بهم الدنيا في الوطن الأم.


تحياتى لكم جميعا

اخب هشام

لا اعرف ماذا تقصد بالانا فيه

يمكن صلاتي
والمهم انت برضو خليك في الانت فيهو ( مش حلوة دي )

المهم لازلت اؤمن بأنه لا يوجد أي مبرر لان يكون سوداني أصيل لاجئ في اصفاع الأرض
يمكن ان تكون مهاجر من أجل الرزق كما السودانيون في الخليج
او من أجل التعليم كما فعلنا نحن في أواخر السبعينات في مصر وكنا اكثر من عشرة ألف طالب وكنا محل ثقة المصريين ونكن لهم كل الاحترام والتقدير

بالمناسبة احكي لك نكتة وهي تحكي عن احد الاخوة ذهب الى هولندا بحجة انه لاجي سياسي ولكن قابلته بعض العقبات فاضطر الى اللجوء الى السفير السوداني ( له صفة القرابة معه ) في تلك المناطق ليساعده في ازالة هذه العقبات حتى يكون لاجئ سياسي
المهم في الموضوع انني جلست في القاهرة مع عينات كثيرة من السودانيين وخرجت بنتيجة واحدة بان اسباب ومبررات المطالبة بحق اللجوء السياسي ( مشينة ) في حق هؤلاء .
ومنظر السودانيون في العتبة وهم يبعيون امواس الحلاقة والامشاط أو منظر تلك التي تبيع الشاي بجوار المسرح القومي انها غير جميلة في حقنا ( بصراحة ) .

الطرق المتبعة والتي لا تعجبك اظنها تعجب الآخرون وبالمناسبة هي طرق شرعية ومنها هذا المنبر الذي تكتب فيه انت وانا وغيرنا ( اظن الرسالة وصلت ) و اللبيب بالاشارة يفهم .

و

الأخ غريبة
تحيه طيبه
كتبت

Quote: المهم لازلت اؤمن بأنه لا يوجد أي مبرر لان يكون سوداني أصيل لاجئ في اصفاع الأرض يمكن ان تكون مهاجر من أجل الرزق كما السودانيون في الخليج

من حقك ان تؤمن بما تريد ولكن لابد ان تعرف ان الكثيرين من السودانيون الذين تركوا البلد في عهد الانقاذ لم يكن للرزق كما تفضلت به وحقيقة الرد بالنسبة لى على الاقل ليس بغريب لانها اسطوانة رددها الكثير من سفراء ومسؤلين في النظام يتجولون في انحاء العالم بفضل جوازات سفر منحت لهم برضوا باللجوء السياسي.
ما تخلينا ياعزيزي نتكلم في مواضيع تخف موازين كثيرين....
وبعدين يأخى منو القاليك السودان مافيه رزق بالعكس انتا معلوماتك ضعيفه . السودان ده فيه رزق كثير ووفير لكن الطمع والجشع الذى ادخل في بعض النفوس المريضة وسياسية غير كريم والخ .......

Quote: الطرق المتبعة والتي لا تعجبك اظنها تعجب الآخرون وبالمناسبة هي طرق شرعية ومنها هذا المنبر الذي تكتب فيه انت وانا وغيرنا

بالله عليك المنبر ده حجبوه كم مرة خلال سنة واحدة؟؟؟؟
ياعزيزي سؤالي واضح وما محتاج توضيح
وان رجعوا جميعهم هل حكومة السودان لديها المقدرة في استقبالهم ومعاونتهم حتى يتمكنوا من العيش الكريم؟؟؟
الـسؤال ده محتاج ايجابة واضحه وصريحة والتزام...


اظن السؤال وصلت
تحياتى

تبلدينا

سلام

لكن اظنك نائم الآن.

الاخ صلاح غريبه:

Quote: فقريبي حضر لنا بالقاهرة ومعه عائلته وعندما سألته عن أسباب حضوره فقال أنه يود اللجوء السياسي لأن أوضاعه في السودان غير مرتاحة

مثل قريبك هذا كثر, وللاسف هم من يخرج بصفة لاجئ وهؤلاء الغلابه المستوفيين

لصفة اللاجئي الذي يحميه القانون العالمي لحقوق الانسان, لايجدون فرصه للخروج.

اولا فساد الاخوة المصريين العاملين في الامم المتحده فائح وقد قبضوا كثيرا من

حكومة السودان مباشرة, لذلك هم يضعون الحواجز في طريق اللاجئين.

مصر تكسب كثيرا من الامم المتحده مقابل اللاجئين,باعتبارهم يقيمون فيها

ويقاسمون الشعب المصري موارده.

وهؤلاء الذين قلت عنهم يبيعون امواس وخلافه في العتبه هم اشرف من من باعوا

انفسهم للشيطان مقابل الجاه والسلطه, فهم يسعون لان يكسبوا لقمه حلال.

وقديما عرف السودان الهجرات العربيه واحدثها هجرات اليمنيين والحضارمه

لم نسمع انهم حضروا للسودان كمستثمريين بل حضروا كعمال في الميناء وتطوروا وصاروا

مليونيرات, لم نحتقرهم يوما ولم نضايقهم, فما بالنا نخجل من اخوة لنا يسعون لكسب

رزقهم بالحلال.

تراجي.

تبلدينا .... ودالحله

سلام وتحايا
اللاجئين السودانيين في القاهرة وفي شتى بقاع الارض كان لهم وطن اسمه السودان وبعد تاريخ 30 يونيو 89 .. اصبح لهم وطن مسروق .. فبحثوا عنه كثيرا فلم يجدوه فبحثوا عن غيره ...
ووجه الشبهه بين اللاجئي السوداني و الفلسطيني يكمن في التشابهة حد التطابق بين الجلادين ففي فلسطين اليهود وفي السودان الكيزان الم تسمع بتصنيفات الكيزان غير شعبي ووطني ومابين هذا وذاك يوجد (كيزان بني قريظة) (وكيزان بني قينقاع) و(كيزان بني النضير ) ...و (كيزان ناس قريعتي راحت ) ..

كل الشعب السوداني.. اللاجئين في الخارج و اللاجئين في الداخل لهم قضية واضحه وضوح الشمس وكلنا يحسها في نفسه ومن لايحس ذلك فهو اما كوز او انتهازي .... الشعب السوداني الان هو الجالية السودانية في الخرطوم ... و الكيزان وناس دول شرق اسيا و المخابرات الاجنبيه اسياد بلد يقعدوا ويقومو على كيفهم ..
لك الود تبلدينا
---------------------------------------------------
غريبة .... ود البلد

Quote: والدليل على ذلك بان بالقاهرة الألاف من السودانيين فهل كلهم يطلبون اللجوء السياسي او حتى الاجتماعي . ولنسال أنفسنا لأين يود هؤلاء الذهاب ؟

يريدون الذهاب الى بلاد يحترم فيها الانسان لانه انسان ...
والمثل السوداني بيقول (الجمـــــره بتحرق الواطيها)
سؤال : السعوديه ما فيها لاجئين سودانيين ؟؟؟

Quote: لماذا لا يواجهون حكم البشير بالطرق المتعارف عليها

ذي شنو ؟؟؟

Quote: فقريبي حضر لنا بالقاهرة ومعه عائلته وعندما سألته عن أسباب حضوره فقال أنه يود اللجوء السياسي لأن أوضاعه في السودان غير مرتاحة ليس هو من المناطق المهمشة ليس هو من المناطق التي تشهد حروبا ليس هو ذوي ميول سياسية لا علاقة له بمن يحكم لاسودان حتى ولو كان أبليس نفسه

قريبك هذا وكما ذكرت اوضاعه في السودان غير مرتاحه .... فعدم راحته من المسؤل عنها ؟؟
حتى الكاظمين الغيظ من حقم الهجره ...
--------------------------------------------
ودعقيد ..... المغترب

Quote: تساؤلاتك في محلها فإن كانت هناك مظالم في الماضي فقد تغير الحال الآن، وأصبحت هناك حريات مضمنة في الدستور ومحمية بواسطة جميع الفعاليات السياسية والصحافة والمجتمع (الدولي)..

يازووووووول الكلام ده حاصل وين ؟؟؟

طيب ولنفترض ذلك وبالاضافة الى استخراج البترول والراحة التامة لكل الشعب السوداني
طيب انتو قاعدين بره السودان ليه ؟؟؟

الود للجميع
جمال حسين

السودان البلد الوحيد في العالم اهله لأجئين داخل وطنهم الأم
وبعلم الحكومة....!!!!
امر يحير بحــق!!!
وبرضوا يقوليك بالطرق المتعارف عليها