Post: #1
Title: ليلة القدر...قصيدة مموسقة
Author: منصوري
Date: 10-13-2005, 04:43 PM
 كلمات عبد الغني النابلسي..ألحان كرومة..عزف وأداء صديق منصوري
|
Post: #2
Title: Re: ليلة القدر...قصيدة مموسقة
Author: منصوري
Date: 10-13-2005, 08:54 PM
Parent: #1
إنا أنزلناه في ليلة القدر...
|
Post: #3
Title: Re: ليلة القدر...قصيدة مموسقة
Author: عمر ادريس محمد
Date: 10-13-2005, 09:29 PM
Parent: #1
ياســـــــــــــــــــــــــــــــــــــــــلام
يا منصورى
هذا هو اخر الكلام فى اركان الجمال وشروطه ....
من هم
عبدالغنى
وصديق منصورى .....ياهو( منصورى) الله والرسول المعانا ده والله منصورا تانى ؟
بعدين عثمان حسين يمشى ويجى خصوصا فى المقطع قبل الأخير
قادر الله .
انا ليلة القدر التى هى خير من الف شهر
ياسلام تانى وتالت ورابع ...الى ما لانهايه
|
Post: #4
Title: Re: ليلة القدر...قصيدة مموسقة
Author: عمر ادريس محمد
Date: 10-13-2005, 11:29 PM
Parent: #1
اسمعوا
ياجماعه
|
Post: #5
Title: Re: ليلة القدر...قصيدة مموسقة
Author: منصوري
Date: 10-14-2005, 06:40 AM
Parent: #1
عمر والله اسعدنا مرورك بي جاي.يبدو أنك راجل ذواقة في قمة الذوق.. وكل ناسنا بهذا المستوى.. اسمع كان ما زمن الفطور قرب.. كنتا قلبتها ليك دليب.. لكن زمن الفطور وكمان ابل الآبري.. واسوي الدمعة النصها لحم.. أصلوا متقسمين الخدمة أنا والوراقية بنت الوراريق في رمضان دا. أنا على المويات والدمعة وهي عليها القراصة والسلطات..
|
Post: #6
Title: Re: ليلة القدر...قصيدة مموسقة
Author: منصوري
Date: 10-14-2005, 03:28 PM
Parent: #1
الله أنزل حكم أمري
في نشأتى في ليل قدري
............
|
Post: #7
Title: Re: ليلة القدر...قصيدة مموسقة
Author: Dr.Mohammed Ali Elmusharaf
Date: 10-14-2005, 03:35 PM
Parent: #1
الحبيب منصوري
رمضان كريم
معزتي لك وللاسرة الكريمة
|
Post: #8
Title: Re: ليلة القدر...قصيدة مموسقة
Author: القلب النابض
Date: 10-14-2005, 07:39 PM
Parent: #7
رائعة
يا حبذا لو كتبت الكلمات.
ادعوكم كلكم للاستماع اليها
|
Post: #9
Title: Re: ليلة القدر...قصيدة مموسقة
Author: القلب النابض
Date: 10-14-2005, 07:40 PM
Parent: #7
رائعة
يا حبذا لو كتبت الكلمات.
ادعوكم كلكم للاستماع اليها
|
Post: #10
Title: Re: ليلة القدر...قصيدة مموسقة
Author: فيصل نوبي
Date: 10-14-2005, 07:44 PM
Parent: #1
في ميزان حسناتك اخي منصوري
|
Post: #11
Title: Re: ليلة القدر...قصيدة مموسقة
Author: عمر ادريس محمد
Date: 10-14-2005, 08:06 PM
Parent: #1
| Quote: أنا على المويات والدمعة وهي عليها القراصة والسلطات.. |
الله يعلم الوراقيه مظلومه ظلم الحسن والحسين
المويات قعد تسوى ليها شنو ....بعدين دمعه للقراصه دى ماياها المويات ذاتها
على العموم هنيئا لكم ..انتو فاطرين قراصه وسلطات
 :
|
Post: #12
Title: Re: ليلة القدر...قصيدة مموسقة
Author: منصوري
Date: 10-14-2005, 11:14 PM
Parent: #1
الأخ دكتور محمد على المشرف.. نشكرك على طلاتك القريب القريب..وإن شاء الله نوفق الى إرضاء الجميع.. وأنت في تلك البقاع والفيافي البعيدة تسمعنا وتثني.. ربنا يجعل ذلك في ميزان حسناتك كما قال لى الأخ فيصل نوبي..
.........................
عزيزنا فيصل نوبي.. آمين يا رب.. الشكر لك كله...
..................
القلب النابض.. الشي النادر لما يطلك في بوستك لاتدري أيها سعادة اصابتني بتداخلك، ودي اول مرة يا أستاذه تدخلى بوستاتي أنا عاديها ليك وحاسبا ليك. لكن الشي النادر قليله كثير..( احمدك اللهم كثيراً، فقليلى قد صار كثيراً...).إنتي عارفة ماعندنا وراريق معاكم هناك في (شبا) حقتكم دي دخلت القفص من عندهم.. وكان ممكن أدخل القفص مع الوراريق العندنا في أمري معانا.. ما أصلو الوراريق اصلهم من أمري.. وانتشروا في بقيى بقاع الشمالية والسودانية..( الوراريق أهل القبب)..بس تقول شنو؟ أسرتني ( شبا) حقتكم بس برضهم عايشين معانا في بحيرة الخزان. وانت ايضاً لك باع طويل وكبير في إقتطاف معاني العشق الصوفية بعيدة المرامي.. ومفتاح وسجادة وسجود وسجدة في الساجدين على عرش من الدين... والحمد لله جبتى لينا غالينا فيصل نوبي. أصلو شافك دخلتى وجاء داخل.. وخجل يمرق ساكت عشان ما يقولوا جابتوا القلب النابض. فراح قال لى ربنا يجعلها في ميزان حسناتك)... إن شاء الله يا غالينا فيصل ربنا يجعلها في ميزان حسناتنا جميعاً... سأكتب لك يا قلبنا النابض بالشعور والإحساس والحياة وتدفق المجهول ساكتبها على مداد هنا على الورق عبر الأكثير.. وسأكتبها واكتبك معها على صفحات قلبي النابض..
....................
عزيزنا عمر.. ها ها ها.. إنت عارف دمعة القراصة دي اصعب شى، إنت أضفتها للمويات.. كأنها هى بيت القصيد.. زي الحج عرفة.. أو ( الصلاح إمرأة) كان ما ضبضتا دمعة القراصة معناهو كل المجهود ضاع... وبعدين ياخى انا توقعتك تثني على ياخى طالما سنتى وديدنى مساعدة ربة البيت بصورة مكثفة في أعمالها؟....دي كل راجل بعملا؟... صاح عدد يعملا لكن ليست بديدن عندهم؟...هاهاها.. ذكرتني.. مرة جانا من السودان أخ زميل صديق مهندس من أولاد نوري مهندس ذو خلق ودين ورائع اسمو ابو عبيدة محمد سعيد.. هذا الرجل الإنسان الملائكى بني لعدد كبير من المغتربين من ابناء المنطقة بيوتهم ومن غير ابناء المنطقة.. لم يدخل عليه مليماً واحدة.. ويطلع البيت في قمة الروعة من التنفيذ بحيث يدهش صاحب البيت في هذا الزمن الآبق.. يتعب ويشقي من أجل انصاف الآخرين... يا زول لاأطيل عليك.. ناس نوري ياخى منصفنا نحن ناس الحامداب وجزرها وماجاورها قاعدين يعتبرونا منهم.. أها قمنا عملنا لمة كبيرة للمهندس دا في الحدائق وقلنا الليلة بس نشبع شية جمر.. وجاء إقتراح تاني من كبيرنا رجل يعد من قمم المحاسبين والمراجعين في السودان دكتور حسن رحمة من اولاد نوري.. قال ( الليلى الحريم ما يخدمن بس رجالة صر).. في عدد من الشايقية الكلام دا ما وقع لهم؟ كيف يخدموا ويكلفوهم بالخدمة والحريم أكثر من خمسين مرة قاعدات في ضل الشدرة... وواحد أخونا مستهبل؟ شال ورقة وقلم يحصي في كل من يقوم بعمل نسائى في هذه القعدة.. فلان شال ولدوا؟ فلان عير البنبرز لى بتو؟ فلان شالو .( شاليهو) صحن شية لى مرتو حاكماهو؟ ويجى يعلن هذا للملأ في جلسة الرجال المنفصلة بعيد شوية عن مجلس الحريم... فلان عمل كدة وفلان عمل كدة؟ والناس تموت بالضحك؟ اها أنا على التعترني بلا شعور قمتا مارست الأعمال التي معتاد امارسها في البيت بتلقائية، قمتا شلتا البزازة وعندي وليداً صغير كدي دا مشيت جبتوا من بت الوراريق جيت اديهو البزازة.. بس صاحبنا لقاها فرصة( هي ياناس شوفوا الفضيحي. شوفو صديق منصوري قاعد يرضع) يرضع بتضعيف الضاض..
..............
القلب النابض بالعرفان
وبالإيمان وبالإيقان
...
ساكتب لك القصيدة..
|
Post: #13
Title: Re: ليلة القدر...قصيدة مموسقة
Author: منصوري
Date: 10-14-2005, 11:46 PM
Parent: #1
الله أنزل حكم امري...في نشأتى في ليل قدر
وأنا الخفي هناوما... أدراك ما قدري وفخري
أنا ليلة القدرالتي... هى خير قل من ألف شهر
ذى شهرة من أولياء... الوقت زبدة اهل عصري
تتنزل الأملاك أرواح ..... المعني وسط صدري
لمحات اسرار الرجال.... الجامعين لفرق سري
أنا شمسهم والنور .... يبدو لى بهم في كل بدر
في كل مرتبة لهم.... حسب المقام وحسب ذكري
حسب الهلال ورتبة القمر.. الذي في الأفق يجري
والروح روح الحق عن... إذن الإله بكل أمر
منى السلام على.... حتى أنقضي بطلوع فجري
|
Post: #14
Title: Re: ليلة القدر...قصيدة مموسقة
Author: منصوري
Date: 10-15-2005, 03:29 AM
Parent: #1
اللهم أنفحنا بكل نفحات ليلة القدر في هذا الشهر المبارك..وزد من محبتنا لهذه السورة المباركة..وكل القرآن.. وملائكتك ورسلك وذاتك يا أحد...
|
Post: #15
Title: Re: ليلة القدر...قصيدة مموسقة
Author: عمر ادريس محمد
Date: 10-15-2005, 03:56 AM
Parent: #1
اللهم أنفحنا بكل نفحات ليلة القدر في هذا الشهر المبارك..وزد من محبتنا لهذه السورة المباركة..وكل القرآن.. وملائكتك ورسلك وذاتك يا أحد...
أمـــــــــــــــــــــــــــــين
العزيز
منصورى
كل ما القى فجه بجى هنا عشان أسمع ...ومنها خلنى اللطربك معاك شويه ...تعرف بمناسبة الدمعه بالقراصه دى مره عزمنا لينا أمريكى وزوجته أكل سودانى ...ولسؤ حظ القراصه بالدمعه وقع إختيارنا عليها ...مع انو انا عندى راى قديم فيها ...يعنى طالما عندنا اللحم وممكن نعمل القراصه ما طوالى ننجض اللحم ونعوس القراصه وناكل... فى داعى للشربنه والزيوت والنصايب دى.... لو تذكر عندنا فى البلد الرحمتات بسوها بالطريقه البديعه دى ..حاجه ماتخلص ....المهم يازول امناوبناتها قامن ينطاقشن ...وانا وولدى الصغير عليك أمان الله مشينا الدكان وجينا يمكن تسعه مرات ..وفى النهايه ظبطنا الاوضاع والخواجه ومرتو جو..وكت ختيناها فى التربيزه انا من شدة التعب بى قلبى قلتلم أها أ جماعه اكلوعليكم الله وقومو زبلو البيت ده ....صاحبك بدل ينطم وياكل ويقوم يمشى بقينا فى اسئله واجوبه عن المكونات والتفاصيل وسيك وميك ....وفى نهاية الأمر اخدو صوره مننا وقراصتنا ودخلو ايديهم فيها ووقفو(عجبنى للمرقوت) طبعا الجماعه ديل مابجاملو ..يعنى قالولنا بى خشم الباب قراصتكم دى عورا ....وعينك ماتشوف الا النور بعد داك .
لك خالص تحياتى وسلامى للاسره
|
Post: #16
Title: Re: ليلة القدر...قصيدة مموسقة
Author: نهال كرار
Date: 10-15-2005, 02:13 PM
Parent: #1
ياسلااااااام
رائعة بالفعل
|
Post: #17
Title: Re: ليلة القدر...قصيدة مموسقة
Author: منصوري
Date: 10-15-2005, 02:18 PM
Parent: #1
إنت عارف ياعمر واحد شايقي شاف ليلة القدر.. تتصور طلب شنو؟
.......................
أقولك مالا ما ظبطت معاكم؟.. القراصة والله الدمعة؟
الإتنين عايزات ضبطة موزونة..
كيف يعني دخلوا ايدهم فيها ومرقوها؟ عايزين ياكلوها بي معالق والله شوك والله شنو؟
ما إتصور شايقي جايي من ( الحجير) ما تقدر تزبط القراصة بالدمعة؟ لا لا بس الخواجات ناس طير..ديل ما خواجات نجيضين..
..........
دمعة القراصة لازم تكون تخينة شوية.. وصلصتا ما كتيرة.. ولو بقت على صلصة الطماطم العادية بدون صلصة معلبة يكون احسن.. وبعدين اللحم يكون لحم يد خروف عشان هش.. وفيهو قليل من الشحم موش لحم احمر.. وبعدين البصل يكون كتير ومحشوش دقاق ناعم ما يحتاج لى خلط.. يدوب بقليل من الباكنق باودر.. كمان الباكنق باودر الزيادة يمررو.. يخليهو( مقق) مقق دي بي تعرفا.. يعني مرورية كدة مشاترة.. ما سمعتا شاعرنا حاج الماحي.. في قصيدته...
من عنا ليك وانسرق... ياأم قلة دوب
الحسارك لى حرق..
يمشى في ثنائه على المصطفي صلى الله عليه وسلم الى أن يقول
بي تفلو كم حلى المقق
...........
بعدين البصلة المحشوشة دقاق دي ما تحمر تحمير كامل. يعني ما تصفر البصلة. تكون مهرودة مع صفار لايذكر.. تحمرا بالطماطم.. ولو لقيت ليك فردة حبة ماجى كدة رميتا فيها تخليها خلاقي.. نحن لغاية هنا في دمعة القراصة.. حا اجيك برضو للقراصة.. ياما الحريم المابيعرفنا أماني ما بيتبهدلن فيها؟.. وبعدين ياخى ناس الصعيد ديل وناس العاصمة شوهوا قراصتنا.. تتصور يعملوها بالزيت في الطوة وياكلوها بالسكر؟
.............
إنت عارف الشايقي قال شنو لما جاتو ليلة القدر؟
قال داير ( الجني) لكن جنة ما فيها قراصة ما دايرا.. قالوا الجني طبقات. أنا عايز الجني الفيها الناس بيعملوا قراصة؟أقلب فيها على كيفى مرة بالدمعة ومرة بالملاح ومرة باللبن ومرة بالعسل.. ومرة (بكابة) زوادة السفر ديك بتاعة قطر كريمة البيعوسو معاها التمر بي جوة. وفيها حلبة وسمن ..لامن تصل الخرطوم ما تعفن .هناك نجيب باقي كرتونة الزوادة ونضوقا ولاد وبنات ناس الخرتوم ويقولوا قادر الله..
قال شاعرنا..
القراصة أم قمحاً نضيف
يردمولك وتب ما تقيف
ياحلاتك في الشلاليف..
......
أسمع ما يقوم يسمعنا سجيمان. اصلو شايفو بي هناك منزل بوست عن شلوفة واحدة من الفنانات..
|
Post: #18
Title: Re: ليلة القدر...قصيدة مموسقة
Author: منصوري
Date: 10-15-2005, 02:27 PM
Parent: #1
قريبتنا دكتورة نهال.. شكري.. سلامي لأهلى معاك..
|
Post: #19
Title: Re: ليلة القدر...قصيدة مموسقة
Author: منصوري
Date: 10-15-2005, 11:23 PM
Parent: #1
الإكثار من قراءة سورة القدر في ليالى رمضان في الصلاة يعرض الصائم للفضل الكاسح في رمضان بصورة أكبر.. يجعله يتوخى ليلة القدر في اي لحظة...
.........
وعندنا عادة حسنة في أسواق الإمارات .حيث تطبعها بكثرة وتبيعها في المحلات.. مطبوعة على شكل موكيت إيراني عجمي راقي.. ومطبوعة على ورق مصقول... ومطرزة على قماش حريري فاخر.. وموجودة ومطرزة على طريقة إبرة الكووررشي السودانية.خيط وخياطة وكلها معروضة للبيع وخاصة المحلات الإيرانية..
|
Post: #20
Title: Re: ليلة القدر...قصيدة مموسقة
Author: منصوري
Date: 10-16-2005, 02:18 PM
Parent: #1
نساوق مسائلنا كلها ياعمر. وكلو تحت فضل ليلة القدر الكاسح.. والدنيا والدين لازم يمشن مع بعض وإلا لكان الفكر الصراح موحشاً للمبتدئ.. والشيخ فرح ود تكتوك قال( مافي دين بلا عجين
|
Post: #21
Title: Re: ليلة القدر...قصيدة مموسقة
Author: منصوري
Date: 10-17-2005, 04:47 AM
Parent: #1
توخى ليلة القدر في العشر الخواتيم من رمضان.. وخاصة الليالى الوترية..
ليلة 21
ليلة23
ليلة25
ليلة27
ليلة29
وبصورة أخص ليلة 27 من رمضان..
وفضل ليلة القدر وارد بالقرآن والسنة بالقياس وبالإجماع عند جميع علماء المسلمين..
|
Post: #22
Title: Re: ليلة القدر...قصيدة مموسقة
Author: منصوري
Date: 10-20-2005, 12:28 PM
Parent: #1
رمضان كله شهر محاسبة للنفس وشهر صيانة عن ماذا اقترفت النفس خلال العام من أعمال بالخاطر او القول أو الفعل فإن تذكرت خيراً شكرت لله تعالي، أن وفقها للخير، وتسأله أن يمد لها في الصفات الخيرة ، حتي تصير النفس مقامها خيراً ، وإن تذكرت شراً اكتسبته خلال العام ، تستفغر ووتوب وتسأل الله أن يقلص صفاتها الشريرة .
|
Post: #23
Title: Re: ليلة القدر...قصيدة مموسقة
Author: منصوري
Date: 10-23-2005, 03:16 PM
Parent: #1
نتوخى ليلة القدر في هذه الليلة الوترية.. وفي كل ليلة وترية في العشرة الخواتيم..
|
Post: #24
Title: Re: ليلة القدر...قصيدة مموسقة
Author: منصوري
Date: 10-27-2005, 00:29 AM
Parent: #1
زيادة التشمير في العشر الخواتم..مطلوبة وخيرها لوجاك ممكن يمدك السنة كلها.. زي ما الموظفين ليهم راتب آخر كل شهر.. كذلك الموالين لله تعالى ليهم راتب بيقبضوهوا كل شهر وميزانيتو توضع في رمضان.
|
|