عاميتنا السودانية ..

عاميتنا السودانية تشوبها بعض الغرابة حسب منظور كثير من الشعوب العربية او بالاصح غير مفهومة لديهم بالقدر الكافي ،ومرد ذلك -حسب اعتقادى - هو إعلامنا الضعيف وتفردناا بإستخدام عبارات قلما يستخدمها غيرنا فى أُمة العرب...يا زول ،آآآآى ،قولت ليك، داير شنو ...الخ حتى اصبحت عنوان للسوداني اينما ذهب ...

فقلما تجد السعودى او الكويتى مثلاً يخاطب السورى او اللبناني قائلاً (شو بدك؟) ولكن فى مخاطبته للسودانى تجده يقول (داير شنو يا زول)؟!! ما زحاً فى تلذذ.

طبيبة إماراتية -او خليجيةلا ادرى- كانت تقول انه عندما يأتى اليها الشامى فى عيادتها يبتدر كلامه قائلاً فى بشاشة قبل ان يشكو وجعه (يطيك العافية ) ويأتى المصري ويقول لها (صباح الخير يا مدام)، اما السودانى فيقول لها ( أسمعى بلاى)!

يقع اللوم على إعلامنا - فى المقام الاول- فى عدم توصيل عاميتنا للشعوب الاخرى كما يفعل الإعلام السورى والكويتى والمصري....فنحن السودانيين لم نعرف عامية الشعوب الاخرى إلاَ من خلال الإعلام متمثلاً فى المسلسلات التلفزيونية التى اسهمت بصورة فعًالة فى التعريف بثقافات الامم الاخرى ولهجاتها ...أما المسلسلات السودانية فأنها تفتقر للإخراج الجيّد حتى التقنية المستخدمة من (مايكروفونات) وإضاءة وخلافه ليست جيدّة ان لم تكن سيئة.!!!

نحتاج لسبل فى توصيل عاميتنا حتى لا نضطر لمجارات لهجات غيرنا ؟

ماهو رأيكم؟؟؟

يا وليد عندك بوستات بتعرفه براك ..
جنك تفتيش في الحاجات الغميسه ..
على العموم
نحن في شعلقتنا النصانية دي والمنظراتيه الكتار بتاعننا ديل .. لاقادرين نرسي لينا على لغة حقيقيه نعبر بيها عننا ولا قادرين نحفظ حاجاتنا.. بلد فيهو مليون لهجة ولغة ده من غير ( الرندوك ) وبي ده كلو لاتقدر توصل فكرة لي افريقي ولا لي عربي ..
بعدين تعال
انت بتكتب في المواضيع الحساسة دي ليه ؟؟؟
والله انا قريت البوست ده قعدت اضحك اصلو فيهو مادة اصطياد دسمة جدا الشفوت الظاهر لي ما انتبهو ليهو .. والله صدقني مليان لي خشمو ومغري خالص بعد شوية الجماعة كل زول يجيب ( بندقيتو ) ( وسفروقو ) ويجو يلمو فيك ( معط ) ..
انا غايتو بعلق البوست ده فوق .. وتعال بعدينك بعد ما الجماعة يصحو تعال شوف ( بطقطقوك ) كيف ..

تمبس داير شنو يا زول..

جيتك متأخر مش؟

Quote: فيهو مادة اصطياد دسمة جدا الشفوت الظاهر لي ما انتبهو ليهو

ده يا ربى من حظ منو؟

تمبس أرقد عافية
وبجيك

وليد سلام

(بلاي اسمع)

ماده دسمه زي ما قال تمبس

غايتو دي دفعه بدون تعليق

اخد لي لفه و اجيك راجع

مع تحياتي

الاخوان الاعزاء .. وليد طه .. تمبس وفيصل نوبى
كيفنكم والنعلكم بخير يا الطيبين
اول بالتبادى زى ما بتقول حبوبه .. نضمى معاكم كلو بكون بالعاميه ..لاننى اعشقها حد الثماله .. عذرا فى العباره الفاتت لانها ما بالعاميه ..
رمضان كريم عليكم وتصوموا وتفطروا على الف خير

بالنسبه لى انا يا وليد يا خوى .. بتكلم معاك حسب عنوان البوست .. لكن زى ما قال تمبس واخونا فيصل الجماعه بجو يطقطقوك فى كلامك ده .. والله يخربنى كان فرزت كلامهم ولا مقصدهم .. يعلم الله الله يا تمبس يا خوى مانى عارفاك لقيت شنو ..قدر ما بحرت وعويناتى زغللن فى كلام وليد طه ده ما لقيت لى شيتن كتر ..(بى ضم الكاف )
حقيقى عجبنى البوست..
عاميتنا ممتعه جدا يا اخى وليد .. ونفسها حنين محنة اهلنا .. ونحن السودانيين عموما تلقائيين .. يعنى ما بنكون قاصدين معنى الكلمه حرفيا ..زى ما صاحبنا القال لى لى الدكتوره بالله اسمعى ...لووووووول .. طبعا ضحكت من الاعماق .. اتخيلتو جاى عيان ولا محموم ومصدع وقرفان وداير ليه علاج بسرعةالبرق والصاروخ .. نحن اصلوما عندنا صبر لى اى شىء .. خاصه المرض ..لهلاهين لهلهة عدوك يا يابا ..
المهم قلت اجى اتاوق بى جاى واقول رأى المتواضع .. وبكل صراحه معاك فى رايك فى انه اعلامنا مقصر تماما ..
حسب تجربتى المتواضعه فى الكتابه .. معظمها بالعاميه ..بحس انها بتصل للكل بكل بساطه .. بساطةاهلنا الطيبين الحنينين .. وبالمناسبه دى بهديكم يا الحنان .. من القصائد الجديده ... قصيدة رباية الكبار .. واتمنى انها تعجبكم.. وتغير رأى تمبس وفيصل فىانه البوست للعاميه .. يا جماعه شايفاكم كلكم شباب ما معاكم حرمه غيرى .. ممكن تجيبو طوبه تختوها جمب التكل ده ..انا ما بزعل وحات الله ...
لكم كل الود والمحنه .. ورمضان كريم ..

***رباية الكبار ***
ترباية ما بتنقاس
من طينة بحر..
بسندو فوقو الراس
لينة طبع ..
رضعت حكر مو كاس
عزة وفضيله..
وسادة للفراس
شدة و حزم..
ترس الدميره الساس
مشهود بالكرم..
ما بنخرو الوسواس
سند التواقى
خليل مع المحراس
مطمورة الدرت
سيف الضهارى وفاس
سباق اللوارى
سقف الاهل كدباس
بطوف بالديار..
حشاهو من حراس
ابواب القبيلة ..
اوتاد بلا ترباس
قنديلها البضاوى.
دليل برا اجراس
ضى برق الشرق
فى وميضو فايت الماس
يطمن الحارى..
ويرحمن المحتاس

اسماء الجنيد مسقط

أختى العزيزة سوما
رمضان كريم وتحياتى

عاميتنا السودانية اختى لا شك تحمل ما تحمل من عبارات تذخر بكل ما هو جميل وهى كما قلتى لهجة الحبوبات الحنان ..وانا شخصياً اشاركك هذا العشق بدليل انى حتى فى مجال عملى - فى السعودية- لا اجارى احد متمسكاً بها الى حد بعيد ..على امل ان تصبح عاميتنايومامفهومة كغيرها ...
علينا اختى ان لا نعول على اعلامنا كثيراً فالأعلام اصبح صناعة تحتاج الى امكانيات كبيرة حتى يأتى اكله..لذلك فلمنضى فى محاولة تعريف الآخرين بما تذخر به عاميتنا...
مفيش حد احسن من حد

تشكرى يا سومة على مرورك
وشكراً على كلماتك وعلى عاميتك الشيقة

تحياتى

فيصل ازيك

الموضوع كما تعلم شائك ويحتاج الى ابداء آراء
لكنى لا ارى تهافت على ذلك الدسم ..فماذا يا ترى هنالك؟!

فى انتظار الرجعة بعد اللفة

تسلم

ياوليد

تحياتى ليك ..

انت عارف قصة اللغة دى والله تعبانى جدا هنا ..لانو انا ماطولت شديد
عشان اعرف لغة الناس دى ..وغير كده الناس دى عندها كم لهجة
الخليجى لهجة والمصرى لهجة والشامى لهجة ..ونحن بين ديل ضايعين
ضياع السنين ..وغير كده كلامنا بقولوا سريع ....لكن دى برضو
ميزة لانو فى الشغل لما يكون بينا جنسية تانى ونحن سودانيين
بنشتغل بالدراجى ده وبنزود السرعة شويه كمان والله مرات نتكلم
فيهم ومايجيبوا خبر ..والغريبة مرة مصرى (حلف بالتقطعو) انو
نحن لغتنا البنتكلما دى ماعربية ..

بوست سمح وعايز حكاوى ومواقف ..

يمكن اجيك صادى ..

ودى لك ياوليد

الاخ الفاضل محمد عبد الرحمن
رمضان كريم

Quote: ونحن بين ديل ضايعين ضياع السنين

الغريبة يا محمد انو نحن بنفهم كل اللهجات ..ولهجتنا ما غريبة كتير حتى لا يفهما الآخرين..ولا تحتوى عاميتنا على عبارات مضحكه رغم دلك تجدها دوماًمثار سخرية ومزح عند زملاء العمل من جنسيات أخرى!!!!
لمادا؟!!!!

Quote: والغريبة مرة مصرى (حلف بالتقطعو) انو نحن لغتنا البنتكلما دى ماعربية ..

دى بسيطة يا ابو احميد ...فى واحد زميل عمل سورى قالى لى (يا زلمه شو هادا لك يا اخى لئيت تنتين سودانيين بيتكلموا لغة اكتير غريبة...لك يا اخى ما مفهمومة ابنوب ..شو هادا)

طبعاً صاحبك لقى اتنين محس بيرطنو

شفت الكلام ده يا ابو احميد

تحياتى محمد

الأخ وليد
رمضان كريم
نــعم

Quote: الموضوع كما تعلم شائك ويحتاج الى ابداء آراء

ودى فعلا ملفته للنظر وجد كمان

Quote: لكنى لا ارى تهافت على ذلك الدسم ..فماذا يا ترى هنالك؟!

العنوان لو كان مثلا

Quote: عاميتنا العربية السودانية

ما كنتا حتخلص من منظراتية البورد وما اكثرهم..
وكان اول سؤال حيقوليك هو نحن عرب في الأول؟
اها من هنا عد...
ما كنت حتشوف

Quote: اللفة

لكن واصل
تحياتى


الغالبية بهمها العنوان قبل المضمون
ودى مصيبه.

الاخ هشام مدني
لك التحية..

Quote: ما كنتا حتخلص من منظراتية البورد وما اكثرهم..

عشان كده بقيت بظهر مرة ..مرة كده

بالمناسبة كلمة (بظهر) دى ما أظن فى ناس بستعملوها غيرنا ..

مثلاً يقول ليك (وووين ما ظاهر؟) او (اظهر ياخى)

هشام شكرا لمرورك ...ولو اخوك ما ظهر تانى عادى

رمضان كريم ودمت،،،

Quote: الغالبية بهمها العنوان قبل المضمون

الاخ وليد
في احيا كثيره تكون متعه المتابعه اكبر و اجمل من المشاركه
وزي ما قال ليك الاخ هشام مدني
العنوان ما جذب الناس

تهريجه

هسي يا خال دي مناسبه اشرح ليك ( عجيب و راكب الجيب )
دي كنايه للتعجب الشديد عند الجيل الصاعد.

عزيزي وليد طه

تحياتي

عاميتنا السودانية مترعة بمشتقاتها من اللغة العربية الفصحى بنسب عالية جدا.
و موضوع البوست أرجو أن يتحول إلى مفردات دارجة و مقارنتها بالفصحى لمعرفة الصلة.

Quote: يقع اللوم على إعلامنا - فى المقام الاول- فى عدم توصيل عاميتنا للشعوب الاخرى كما يفعل الإعلام السورى والكويتى والمصري....فنحن السودانيين لم نعرف عامية الشعوب الاخرى إلاَ من خلال الإعلام متمثلاً فى المسلسلات التلفزيونية التى اسهمت بصورة فعًالة فى التعريف بثقافات الامم الاخرى ولهجاتها ...أما المسلسلات السودانية فأنها تفتقر للإخراج الجيّد حتى التقنية المستخدمة من (مايكروفونات) وإضاءة وخلافه ليست جيدّة ان لم تكن سيئة.!!!

بعض الحل يكمن في إستعمال مفردات سودانية في وسط النصوص و القصص و الروايات السودانية التي تشكل زخما كبيرا في المكتبة العربية
دمتم

أستادى الجليل أبوجهينة..

(عاميتنا السودانية مترعة بمشتقاتها من اللغة العربية الفصحى بنسب عالية جدا.)

نعم استادى...قال البروفسير عبد الله الطيب -رحمة الله عليه- فى احدى المحاضرات التى اقيمت فى مدينة الرياض ،-وكان قد سئل عن معنى كلمة (زول) وهل هى كلمة عربية-..قال (نعم) كلمة زول كلمة عربية ..وعندمايقال(زولة) تعنى الفتاة الظريفة الدكية خفيفة الظل.


دمت ،،،

الموضوع جميل وغني ومفيد
واتمني الاثراء من المتمكنين من اللغة
انا غايتو ما متمكن خالص لكن
مع ابوجهينة في كلامو انو نمسك مفردات العامية
ونقارنها بي اللغة الاصلية....

فوق من اجل العاميه

و بس

سمح !

Quote: يقع اللوم على إعلامنا - فى المقام الاول- فى عدم توصيل عاميتنا للشعوب الاخرى

يا ولي ....

تعرف اعلامنا دا من زمان شماعتو اتملأت لحدي ما انكسرت ...

اعلام شنو النافع إلى الان الصورة في التلفزيون غبشاء زي الماسحنها (رقيطاء)

اذا كان صورة التلفزيون السوداني ما قادرين يصلحوها وح يصلحوا ليك العامية ..

العاوز يتصلح كثييييييير، نحن نقعد نصلح شنو ونخلي شنو ..

كان الله في عون الشعب السوداني الفضل .. لووول

الاخ المكرم / وليد طه

مساء الورد ,,,

**********************************

ما بصدد ادافع عن عميتنا

بس ملاحظتي أننا اكتر ناس بنحاول في حوارنا مع غيرنا نستخدم عميتهم ونخت عميتنا

جنبه ؟؟؟ ليه !!!

مع انو عاميتنا مفهومه جداً

ولو اتكلمنا براحة ولا سريع ممكن نتفهم ببساطة

بعدين كلمة ( يازول) وداير شنو

مابتزعل

وياخي لو حسيت بأنو البتكلم قاصد يهزر

جيب لى من عميتو التسكتو بيهو

وبس

**************************

أخر الكلام والله شينه شديد في السوداني الكلام الكوكتيل

الشيل من كل عامية حبة _ عدا المصرية طبعا_

فبتبقي الخلطة بأستمرار سعودية / شامية

تضحك وتحير

سلامي ,,,

تطلق كلمة العرب على بلاد واسعة يتخاطبون بلغة واحدة في تعاملاتهم اليةمية مثل اجهزة الاعلام وتاليفاتهم وكتبهم ..وغيرها ، لانهم ينشرون بلغة واحدة وهي لغة العرب او لغة الضاد او لغة القرآن ، وان تكلموا بلهجاتهم المحلية المختلفة عن لهجات البلاد العربية الواسعة المجال لانهم يرجعون الى اصل واحد وهو لسان العرب وان كانت يوجد كلمات والفاظ اعجمية دخلت في لهجات العرب قديما باسباب عوامل عديدة فلادخل لموضوعي في بيان اسبابها .
ويطلق لفظ "العرب" او " عرب " على سكان البلاد العربية عامة على اهل الصحراء والمدن ولافرق بين القبائل سواء حضر او بدو ، فالقبيلي ممن استوطنوا بالمدن مازال ينتمي الى قبيلته وان تمدن وتحضر وانخرط مع اهل المدينة فأنه يبقى على اصله الاصيل وان بقي على الحياة الفطرية البدوية التي فطره الله عليها فهوى مازال من القبائل الاصيلة والمهتمة بانسابهم ، حيث معروف عن قبائل الصحرا معرفة سلالتهم ابا عن كابر ويعلمونها لابنائهم واحدا تلوا الاخر . بل ازدادوا براعتا في معرفة سلالة حيواناتهم مثل الماشية وكذلك برع اهتمامهم بسلالة الطيور الجارحة مثل الصقور وطيور الحمام الزاجل .

ولافرق بين بلد عربي في قطر شرقي او بلد عربي في قطر غربي . والفرق فقط بالجنسية والقومية التي ابتلينا بها. ولهم عادات تربط الحاضر بالماضي.
وهذا حصل حثيثتا عند ظهور الاسلام ، اما قبل الاسلام فكان يطلق على العرب اهل البادية " أهل الوبر" فقط ، ويسمون بالاعراب ، أي على طائفة خاصةمن الغرب كما ذكر في القرآن الكريم. اما في الاسلام فلا يفرق بين طائفتين لسان العرب الحضر ولسان العرب البدو "لا اهل المدنية المتحضرة ولا اهل الوبر البدوية ، كما ذكر في القرآن الكريم والسنة المطهرة وفي الشعر المعاصر لرسول الله صلى الله عليه وسلم ، لقوله تعالى [ ... هذا لسان عربي مبين] النحل آيه 103 .

وماهو موجود لفظه (عرب) عند بعض علماء اللغة العربية، فماهيى إلا آراء في المعنى موجودة في كتبهم " اللفة والمعجمات وكللها من انواع البحوث المألوفة والمبنية على اقوال وآراء تعتمد على نصوص جاهلية ولا تعتمد على دراسات عميقة مقارنة . وكذلك وضعتن الحدس والتخمين . وتجد علماؤنا حيارى في أول من نطق بالعربية فقسم يقول انه (يعرب) كان أول من نطق بالعربية وتكلم بهذا اللسان العربي .
وقسم آخر يقول إن العربية لسان اهل الجنة . لذلك كانت هي اللغة التي كان ينطقها ابونا آدم عليه السلام لانه اتى من الجنة ، أي يعيدون عهد اللغة العربية الى مبداء الخليفة وكان آدم قبل ان يخلق يعرب بزمان طويل.
وتجد آخرون يقولون إن من تكلم العربية ونسى لسان ابيه "اسماعيل عليه السلام وان هذا السان العربي لاسماعيل الهاما وهواول من نطق لسانه بالعربية وهو ابن 14 سنه . ( تاج العروس ج 2 ص 75 وابن خلدون ج 2 ص 86 ) .
وان اسماعيل هو جد العرب المستعربة على حد قولهم .

وانا اميل الى إن القحطانيون اليمنيون هم اصل العرب وجدهم ( يعرب ) هو من نطق بالعربية . فاخذت من اسمه بالعرب .
وان لسانهم هو لسان العرب الاول . ومهم من تعلم العدنانيون العربية والشاهد على ذلك قول شاعر الرسول حسان بن ثابت :
تعلمتم من منطق الشيخ يعرب ***ابينا وهم معربين ذوي نفر
وكنتم قديما مابكم غير عجمية***وكنتم كالبهائم في القفر

كلمة زول و معانيها فى اللغة العربية !!!
كلمة (الزول) تلك اللفظة العربية التي أصبحت تعادل كلمة (سوداني ) في كل مهجر ومغترب، حتى أصبحت شعاراً للسوداني –هي والعمامة- من فصيح العريبة ولها في لسان العرب أكثر من سبعة عشر معني ، فالزول تعني :
1- الكريم الجواد ، أنشد ابن السكيت لمزرد :
لقد أروح بالكرام الأزوال من بين عم وابن عم أو خال
2- والزول : الخفيف الحركات قال ابو منصور الثعالبي في حديثه عن الممادح والمحاسن، حين ذكر أطوار الإنسان : فإذا كان حركاً ظريفاً متوقداص فهو : زول.
3- والزول الفتى ، قال محمد بن عبيد الله الكاتب المشهور بالمفجع يمدح عليا رضي الله عنه :
أشبه الأنبياء كهلاً وزولا ً وفطيماً واضعاً وغذيا ً.
4- والزول : العجب ، ألا تري أن السوداني إذا استغرب شيئاً قال : يا زول؟! يعني ياعجبي من هذا الشي . قال الشاعر في وصف سير ناقته :
مرفوعها زول وموضوعها كمر غيث لجب وسط ريح
فمرفوعها زول يعني سيرها إذا أسرعت عجب من العجائب .
5- والزول : الشجاع الذي يتزايل الناس من شجاعته
6- والزول : الخفيف الظريف الذي يعجب الناس من ظرفه .
7- والزول : الغلام الظريف .
8- الداهية .
9- معالجة الأمر كالمزاولة .
10- التظرف .
11 - الحركة .
12- الصقر .
13- والزولة : المرأة الظريفة ، قال الصمعي : أنشدني عشرقة المحاربية، وهي عجوز حيزبون زولة ..قال أبو علي : الحيزبون التي فيها بقية من شباب
14- المرأة البرزة( الجميلة) الفطنة الزكية قال الطرماح بن حكيم: وأدت إلي القول منهن زولة تلاحن أو ترنو لقول الملاحن
والملاحنة هي الفطنة.
15- والزولة : الفتية من الإبل أو النساء ، قال رؤبة بن العجاج:
قد عتق الأجدع بعد رق بقارح أو زولة معق
16- ووصيفة زولة : إذا كانت نافذة الرسائل
17- ويقولون فلان رامي الزوائل : إذا كان خبيراً بالنساء ، قال الشاعر:
وكنت امرأً أرمي الزوائل مرة فأصبحت قد ودعت رمي الزوائل
فهذا رجل كان يجتذب النساء في شبيبته بحسنه فلما أسن أنصرف عن ذلك .

فالزول والعمامة ملامح للشخصية السودانية .. و العمامة سنة نبوية وعادة إسلامية عربية أصيلة و كانت لباس النبي صلي الله عليه وسلم وأصحابه والتابعين والأئمة والفقهاء.كما أن العمامة كانت لباس العرب قبل الإسلام حتى قالوا( العمائم تيجان العرب) .
ومن الشائع في كلامنا أننا نقول( فلان زول الله أو زول جنة) إذا كان طيب القلب سليم الصدر ، والسودانيون عموما معروفون بطيبة القلب ولكنهم ايضأ مشهورون بأنهم كالكبريت أو البنزين في سرعة الاشتعال وفي الحالتين لا يشتعلان إلا بمثير ، والطيب ايضا يبقى طيباً إلي أن تثيره وتحرك فيه ما يخدشه فيغضب ويشتعل

زَوْل ...

رجل زَوْل وامرأة زَوْلة ، وهو الظريف الرَّكين ، والجمع أزوال.


زُوَيْل ...

من ( زول ) تصغير " الزَوْل " : وهو الغلام الظريف الخفيف الحركات يعجب من ظرفه ، والفطن ، والجواد ، والصقر ، والشجاع ، والعَجَب : يقال هذا زَوْلٌ من الأزْوَال : أي عَجَب من العجائب.
والزُّول في السودان : الرجل ، وذو الزُّويل : موضع من ديار عامر بن صعصعة قرب الحاجر بالكوفة.
__________________

الأخ عبد الرحمن الحلاوي..السلام عليكم كل عام وانتم بخير

شكراً أخى على هذا الحديث الثر

دمت،،،