((( هروب )))

كُتْ قايل صحيحْ الهجرة تِرياق للجراحاتْ
ورَاح أرتاح من أحْزانى القديماتْ ،
وقُمْ طشيتَ فى دُنياتْ .. بعيداتْ
برايا جريحْ
أكاتل الريحْ
وأكوس فوق التخاياتْ ،
وأغلب الشوقْ .. ،
وأقول أصبُر خلاس فِضْلن شِوياتْ
عشان ترتاح من أوجاع حُبَك الفاتْ ،
وكم مرات
أحِنْ للارضِ .. والناس الحليوينْ
وادَفْدِف فوق بُلود الغيرْ مِطيراتْ ،
وكم مراتْ ،
... أوَاصلَ الهجرة فى الذاتْ ،
... ورُحتَ بعيدْ
وضيَّعتَ المسافاتْ
وضيّعتَ العناوين والجواباتْ ،
وقُتَ خلاسْ
خلاس الماضِى قد ماتْ ،
وودعتَ الجراحاتْ
-2-
.. ومرت بيّا زى شوبتينْ
وزىْ شِيتاً حميمْ .. ودفينْ
يجيكْ وكتَ الوجع .. والشينْ
يجيكْ زىَّ العديل ... والزينْ
حضرنى شعورْ
شعورْ بحضورْ
حُضور محضورْ
وسادِى الدنيا .. جايى عليّا .. زفة نورْ
.. واتلَفَتَ .. بى هجمة فرحْ .. مسحورْ
وجُوه النورْ
بَشُوفِك نورْ
شَلَح تَالاىْ
تقول مَقطعْ من الدوباىْ
بِفتش ليهو .. لى غناىْ ،
أتاريكْ .. كُتِ دِيمه معاىْ
مهاجرة .. وفى الضُلوع .. جُواىْ ،
-3-
أتاريكْ .. رُحتِ قبلى هناكْ
وشلتِ معاكى كل الفاتْ ،
-4-
لِقيتِك واقفه فى كل المطاراتْ
ومتظرانى بالشوق والبسماتْ
وايدِك راعشة بِتقول لىْ .. سلاماتْ ،
لقيتك فى محطات القطاراتْ
والتُلوج نازلات على وِشيشك وصاباتْ ،
وإنتِ تحاحى بالتوبْ .. الدِميعاتْ
-5-
أتاريكْ رُحتِ قبلى هناكْ
وشلتِ معاكى .. كل الفاتْ ،
-6-
لِقيتِك فى الشوارع والمطوراتْ
وجارية معايا مرات للضُلولاتْ
وواقفه معايا مرات فى الشموساتْ ،
وقاعدة معايا فى قهواية مراتْ
وتحكى لىْ حكاياتْ ،
وأشوف عينيكى ضاواتْ
كما أُمبارحْ ...
ومليانات محناتْ ،
-7-
أتاريكْ رحتِ قبلى هناكْ .
وشلتِ معاكى .. كل الفاتْ
تَّصاويرنا
وغناوينا
وفريحاتنا .. ومشاويرنا ،
وحاجاتنا الصغيرونات
والخليتَه تذكاراتْ
ورايا هناكْ
لِقيتَه معاىْ
بِتمشى معاى
وتقعد جَنْبى تتكلمْ
تعيد ليا جميعَ الفاتْ ،
-8-
أتاريكْ .. رُحتِ قبلى هناكْ
وشلتِ معاكى .. كل الفاتْ ،
-9-
وكُتْ قايل .. صَحيح الهجرة بتداوى
ولقيتَ الهجرة .. بتكاوى ،
وتَفتِحْ لينا ماَضينا
وتخلينا
مساجينُو ،
وكُلْ مادُرنا نَهرُبْ مِنوُ ...
نَلقانا ... مساجينوُ ،
-10-
أتاريكْ . . رُحتِ قبلى هناكْ
وشلتِ معاكى . . كُلَّ الفاتْ.

الحاردلو
باريس –مايو –1974-

Quote: كُتْ قايل صحيحْ الهجرة تِرياق للجراحاتْ ورَاح أرتاح من أحْزانى القديماتْ ، وقُمْ طشيتَ فى دُنياتْ .. بعيداتْ برايا جريحْ أكاتل الريحْ وأكوس فوق التخاياتْ ، وأغلب الشوقْ .. ، وأقول أصبُر خلاس فِضْلن شِوياتْ عشان ترتاح من أوجاع حُبَك الفاتْ ، وكم مرات أحِنْ للارضِ .. والناس الحليوينْ وادَفْدِف فوق بُلود الغيرْ مِطيراتْ ، وكم مراتْ ، ... أوَاصلَ الهجرة فى الذاتْ ، ... ورُحتَ بعيدْ وضيَّعتَ المسافاتْ وضيّعتَ العناوين والجواباتْ ، وقُتَ خلاسْ خلاس الماضِى قد ماتْ ، وودعتَ الجراحاتْ -2- .. ومرت بيّا زى شوبتينْ وزىْ شِيتاً حميمْ .. ودفينْ يجيكْ وكتَ الوجع .. والشينْ يجيكْ زىَّ العديل ... والزينْ حضرنى شعورْ شعورْ بحضورْ حُضور محضورْ وسادِى الدنيا .. جايى عليّا .. زفة نورْ .. واتلَفَتَ .. بى هجمة فرحْ .. مسحورْ وجُوه النورْ بَشُوفِك نورْ شَلَح تَالاىْ تقول مَقطعْ من الدوباىْ بِفتش ليهو .. لى غناىْ ، أتاريكْ .. كُتِ دِيمه معاىْ مهاجرة .. وفى الضُلوع .. جُواىْ ، -3- أتاريكْ .. رُحتِ قبلى هناكْ وشلتِ معاكى كل الفاتْ ، -4- لِقيتِك واقفه فى كل المطاراتْ ومتظرانى بالشوق والبسماتْ وايدِك راعشة بِتقول لىْ .. سلاماتْ ، لقيتك فى محطات القطاراتْ والتُلوج نازلات على وِشيشك وصاباتْ ، وإنتِ تحاحى بالتوبْ .. الدِميعاتْ -5- أتاريكْ رُحتِ قبلى هناكْ وشلتِ معاكى .. كل الفاتْ ، -6- لِقيتِك فى الشوارع والمطوراتْ وجارية معايا مرات للضُلولاتْ وواقفه معايا مرات فى الشموساتْ ، وقاعدة معايا فى قهواية مراتْ وتحكى لىْ حكاياتْ ، وأشوف عينيكى ضاواتْ كما أُمبارحْ ... ومليانات محناتْ ، -7- أتاريكْ رحتِ قبلى هناكْ . وشلتِ معاكى .. كل الفاتْ تَّصاويرنا وغناوينا وفريحاتنا .. ومشاويرنا ، وحاجاتنا الصغيرونات والخليتَه تذكاراتْ ورايا هناكْ لِقيتَه معاىْ بِتمشى معاى وتقعد جَنْبى تتكلمْ تعيد ليا جميعَ الفاتْ ، -8- أتاريكْ .. رُحتِ قبلى هناكْ وشلتِ معاكى .. كل الفاتْ ، -9- وكُتْ قايل .. صَحيح الهجرة بتداوى ولقيتَ الهجرة .. بتكاوى ، وتَفتِحْ لينا ماَضينا وتخلينا مساجينُو ، وكُلْ مادُرنا نَهرُبْ مِنوُ ... نَلقانا ... مساجينوُ ، -10- أتاريكْ . . رُحتِ قبلى هناكْ وشلتِ معاكى . . كُلَّ الفاتْ.

Quote: وااااااااااااااااااااااااااااااااااااااااااااااااااااااااااااااااي

كوليل

ربنا يرد غربتنا غانمين سالمين

كوليل
انت بتكاوي ولا بتداوي
ولا بتنخر في جراحاتنا
عشان نرجع

Quote: وكُتْ قايل .. صَحيح الهجرة بتداوى ولقيتَ الهجرة .. بتكاوى ، وتَفتِحْ لينا ماَضينا وتخلينا مساجينُو ، وكُلْ مادُرنا نَهرُبْ مِنوُ ... نَلقانا ... مساجينوُ ، ]

الخوف نرجع ومانتحرر من الماضي
ويكون السجن في ذات المكان ... ويكون السجن.. اختياري .... والهروب منه وليه..


لك الشكر

آمين ياود الخالة ...

Quote: الخوف نرجع ومانتحرر من الماضي ويكون السجن في ذات المكان ... ويكون السجن.. اختياري .... والهروب منه وليه..

كوليل بعد اذنك

يا قلب يا نابض
كل سنه و انتي طيبه

مش بعد مرات الواحد لما يكون في بلد بيكون داير يطلع منو

اها لما تطلعي و يجيكي حنين لاهلك تعملي شنو ؟

و العجب لو بقيتي ادروب

ولا ما كده يا ود الخاله

شكرا على المرور ياقلب

لاكن

العيش مصيرو الطاحونة ......

كوليل
نوبي

مشكلتنا دايرين نرجع.... نلقى الماضي راجينا..وعارفين الوجع بتاور....ولازم نرجع وناخد مسكنات ...
ومضادات غربة ..... انا كان رجعت اصلي ما بطلع لاني قلت الرووووب
ومع اهلي وننسجن سوا في الزكريات .. كنت دايرة اقول نعمل حاضر بشبه الماضي ... لكن المشكلة في الوعي .... فالاستمتاع بهذه الحياة يحتاج الى قليل من "الغبا"بتاع الاطفال

وعايزة ارجع غبيانة علشان افرح.....!!!!!
اختك ادروووبة شديد
وكل سنة وانت طيب يا فيصل نوبي

أدروب طبعو حنين ....

بس الا حقتكم دى يكونو تامنها موية ....

غايتو قلنا الروب انحنا عديل كدا ....

Quote: ولازم نرجع وناخد مسكنات ... ومضادات غربة ..... انا كان رجعت اصلي ما بطلع لاني قلت الرووووب

القلب النابض

ضاره الجرسه طيب نحن نسوي شنو يا حبيبه ؟

Quote: بس الا حقتكم دى يكونو تامنها موية .... غايتو قلنا الروب انحنا عديل كدا ....

والله يا ود الخاله كان شفت حالتي

كان ما فكرت ترجع

غايتو غربتنا دي الله ينجي منها اولادنا بعدين

تهريجه:

العرجاء لي مراحه صاده

كدى النلقى امهم اول ....

الباقى هين

قول ياجامع

Quote: قول ياجامع

يا جامع


ربنا يديك بت الحلال

و الخلف الصالح

تهريجه:

و يصلح العندنا

وانتى يديك الفى مرادك

بدون كسر قروش ساى الترجع اهلك بس

Quote: وانتى يديك الفى مرادك بدون كسر قروش ساى الترجع اهلك بس

ده شنو يا كوليل

القلب قام بيك ؟

كوليل إت حتك موتب فى الغربه الرغيفه مسيخ...وسكرها ذاتو فرق...وناسا تقول ثعابين زحيح ووحيح وفحيح كل زول قميص دابيهو فى إيدو...وسمو بقول لى سم الفأر بتعرف شنو....إشتهينا الزغته والهبوب الزرقاء وأشتهينا شربة مويه من زيرا مكوارى يوشل ألمى تسمع طق طق طق فى النقاع...إشتهينا الورده والناس تزورك يا كوليل الغربه الله ما يديها حبيب.............

منصور

منصور

كيفنك حساك رايق