Post: #1
Title: الفيكس
Author: نجود حسن عبد الرحمن
Date: 10-06-2005, 07:38 AM
Parent: #0
هذه القصيدة تحتوي على موضوعين .. أول حاجة السخرية من ظاهرة هجرة الصينين إلى السودان وطبعاً معظم المهاجرين هم فتيات .. وبسخر الشاعر من هذه الظاهرة ويحاول أن يجد لها سبباً وفي النهاية بعبقريته الواضحة يصل إلى استنتاج السبب الذي يجعل الصينيات يحضرن إلى السودان غير حمل الكبابي :-] .. ومافي داعي نتم .. الموضوع التاني هو الشرّة بتاعت المواصلات والمعاناة اليومية .. يعني الواحد يطلع مستحمي قبل ما يصل هذفه يكون زي الليهو سنة ما هبش صابونة!.. إلا البيمشي بي كرسيدا دي ليها أحكام أخرى .. والله يدينا ويديكم 
تأليف : مشرور راجي الدّفار!
لاحظت شيئاً في قصائد الحلمنتيش ، على الرغم من أن مواضيعها بعيدة كل البعد عن المسائل المتعلقة بالسودان والحالة التي آل إليها حاله ، إلاّ أن الشاعر يقحم السودان في الموضوع مهما كان الأمر
الفيكس
حاجة عجيبة ودنيا تنسّي
ناس اغتربت تمشي المانيا
تمشي اليابان ونيوجيرسي
حاجة عجيبة وجات بالعكس
من الصين وللسودان
الجكس اغترب وباع الفيكس
واحدين قالوا جونا هنا
لأنو هناك حرارة الطقس
واحد قال بكين بالنص
للسوق العربي رماهم بوكس
وميه الميه بايركس
وبايركسنا كمان بايركس
السودان ضاع وضح النهار
من غير ما لبس
والشوارع دقداق تفتل دركسون
وتحل جربوكس
ومن الصحافة زلط وللخرطوم بالعكس
ثقيف مشرور وتهتز زي البترول
وما يفضالك كرسي
نهارك ضاع من تصبح لامن تمسي
ركشه هنا وركشه هناك وللصالح العام
أحالوا التكسي ..
الدفار جاك وهاك يا كوداك
تصل عرقان وقميصك وسخان
وحالتك يخسي
راسك زي سخّان يغلي غليان
وما يساوي الفلس
بمشى بجيكم بواحد تانى
باقى لاحقه المواصلات فشان بدور الحق الفطر فى البيت
|
Post: #2
Title: Re: الفيكس
Author: كوليل
Date: 10-06-2005, 12:58 PM
Parent: #1
سلام ليك نجود .... ورمضان كريم
دا كان زمان ببيعو الفكس ... لاكن حسع نبيع الفكس أنحنا
|
Post: #9
Title: Re: الفيكس
Author: نجود حسن عبد الرحمن
Date: 10-08-2005, 01:38 AM
Parent: #2
| Quote: دا كان زمان ببيعو الفكس ... لاكن حسع نبيع الفكس أنحنا |
والله هن لغاية اسى قاعدات يبيعن كان شوقتوهم فى السوق العربى واقفات حلاتن والشمش طاقة فوقن والله حالن يحنن لابسات الطواقى من الشمش والله مرات اقرب اقول ليهن خلونا نحنا النبيع وانتن اشترن مننا
بس تقول شنو دنيا بت كلب خالات بلدن وجايات يبيعن الفيكس عندنا
ولو شوفتو منظرن وهن يكوركن (فيكس .. فيكس ) مابيعرفن غيره فى اللغه العربية الواحده لمن تفهمك داير كم علبة فكس الشمش تكون اخدت منك بالذايد تمسح العلبة جمبها وتتخارج وهى كان علبة مالو .. هى عليبة
|
Post: #3
Title: Re: الفيكس
Author: فيصل نوبي
Date: 10-06-2005, 06:01 PM
Parent: #1
| Quote: دا كان زمان ببيعو الفكس ... لاكن حسع نبيع الفكس أنحنا |
نجود سلام
كيفك
بوستاتك دايما روعه
كوليل
تعرف والله يا مان لما اشووف اسمك في بوست بفرح
يا ادروب
تهريجه:
نجود عليك الله زحي لينا من الوصفات ديك سمح !
عشان نستمتع رجال و حربم ولو انو في رجال عاجباهم
|
Post: #4
Title: Re: الفيكس
Author: كوليل
Date: 10-06-2005, 06:20 PM
Parent: #1
والله يافيصل ياخوى العطلة فى البلد دى
والحاجة الإسمها نت وكمبيوتر والحاجات العجيبة دى هنا متوفرة
عشان كدا بعمل ليكم وجع وش ...
قول يالطيف
|
Post: #5
Title: Re: الفيكس
Author: فيصل نوبي
Date: 10-06-2005, 06:52 PM
Parent: #1
| Quote: عشان كدا بعمل ليكم وجع وش ... |
نحنا لاقين يا حبه .....
|
Post: #6
Title: Re: الفيكس
Author: كوليل
Date: 10-06-2005, 06:57 PM
Parent: #1
تسلم .....
ومليش على التخريمات ياست البنات ....
|
Post: #7
Title: Re: الفيكس
Author: فيصل نوبي
Date: 10-07-2005, 10:30 AM
Parent: #1
| Quote: ومليش على التخريمات ياست البنات .... |
نجود وينك ؟
اسفيت علي التخريمات
تعالي صاده سمح !
|
Post: #8
Title: Re: الفيكس
Author: منصوري
Date: 10-07-2005, 12:10 PM
Parent: #1
أختنا نجود شكراً ليك على القصيدة تعبر فعلاً عن الواقع. نتابع مقالاتك الدسمة.. رمضان كريم. وربنا يديك من خير الدين والدنيا..
|
|