الـرائــع خضرعطا المنان وعروسته في لقطات ...

زمــــــــــــان ولــــــــــــى



أي آهة ودمعة لا لا
داك زمان ولى انتهى
ما بيرجع استحالة
**************************
يادروب سعدي المشيتك
ومن ضواحي الغربة جيتك
ضحكة الأيام لقيتك
وفوق جبين دنيتنا هالة
***************************
ياربيع عمري المشتي
وروعة في دنيتنا بنتي
أحلى زول في الدنيا انتي
أنتي ضيها ونور هلالا
****************************
عشت قبلك زول مهاجر
في دروب ما ليها آخر
وجيت لقيتك جد عظيمة
الجمال خاضع مشالا
*******************************
كنت تائه دون مراسي
وجد حزين مليان مآسي
وجيت لقيتك ياحبيبة
ضحكة الدنيا وجلالا
*******************************
جيتا شايل حزني باكي
ومن زماني القاسي شاكي
وجيت لقيتك زي بلدنا
زي نخيلا ... وزي رمالا
*******************************
خضر عطاالمنان

العزيز هشام ..

عبركم نرسل التهنئة معتقة برائحة الدعاش وطين الجروف لصديقنا خضر .. ولعروسته الجميلة .. وبالرفاه والبنين ..ودقر يا عين ..
والتهنئة من كل اصدقاء خضر بأبوظبي ..

ولك انت يا حامل المسك الف شكر..



ياسر

عزيزي ياسر
عاطر التحايا
اشكرك لحضورك الجميل

هشام انا جيت طاير قايل في صور......

لكن النضم برضو سمح


واطالب بكري بارجاع خدر

وارجاع كل المفصولين بدون استثناء

المبدع الفنان د.سجيمان
مليون مرحب

Quote: هشام انا جيت طاير قايل في صور......

اصبر شوية يظهر الرائع خضر وعروسته.







الصبر يا دكتور

مع تقديري واحترامي

الف الف مبروك للحبيب خضر وعروسه


ونتمنى ان يقدم بكري هدية للعروسين بارجاعه الى المنبر فالمنبر في حوجة الي اسهاماته ونشاطه وثقافته

ابنناالعزيز ود العمدة
عـــاطـــر الــتحايا
كنت جاى للموضوع ده

Quote: ونتمنى ان يقدم بكري هدية للعروسين بارجاعه الى المنبر فالمنبر في حوجة الي اسهاماته ونشاطه وثقافته

لكن سبقتنى
صـــدقت والله يا ود اخوي كلام في محله جدا...
تقديري واحترامي لك

مـطر الزمــــــــــان

((24-babygirl (( الى رفيقة عمري
______________________________


بعد خلاص نضب المعين
وعمري روح والسنين
وطــــوقت دربـــــــــــي الكــــــــــآبة

عدتي يا أيام فرحتي
ومسحتي baby وجيتي يا
دمـعـــة أحــــــزان الرتــــــــــــــابة

وبالأهازيج والغنا
صحيتي في خاطري المنى
وفـــجرتي في عمــــقي الكتــــــــــــــابة

غسلتي من قلبي العنا
وهم الليالي المحزنة
والنهــــــــــارات واكـتـئـــــــــــــــــابا

عشت طيفك يا أنا
عز موشح بالهنا
نـــاســــــي أيـــــــامي وعــــــــــــذابا

عبر بيك الأزمنة
وسافرت كل الأمكنة
فـــــــوق جـــــــدائل من ســــــــــــحابة

شفتك أفراح بحضنا
ورجعتي بي كمين سنة
كـــــــــــــان ســـــــــــنين طال اغـترابا

********************************************
أمولة ............أمولة
أمولة يا نبض العرق
ما أنتي من الناس فرق
يا لمحة طلت زي برق
ولوعت قلبي الحرق
صحت الليل في الصحاري
والزمان بالريد شرق
ودع أحزان السنين
عب من فرحو وغرق
**************************************

أمولة ..........أمولة
يا طبيبي .. ويا جريحي
أسري في وجداني تيهي
وأمــســــحي ............
الدمع البينزف من وحيحي
شيلي من عمري وأضيفي
وقفي السال من نزيفي
وفي العيون يلا استريحي
ولما أموت ...............
أمشي يا أمولة وأرحل
أبقي شاهد فوق ضريحي
وأحكي للعالم وقولي :
(( مات شهيد عاشق متيم
وكان ربيع فوق داري خيم
والله يعلم ..... الله يعلم
كان بينسج من مشاعرو
جنة كان بى خيرا يحلم
لا الوكت أداهو مهلة
لا الزمن لى ريدو قيم )) .
************************************

أمولة ..............
يا المســـــافات الطويتك
ويا المـــــشاوير المشيتك
ومن ضواحي الغربة جيتك
يالدميـــعات الرويتـــــــك
ويا الرايحة مني وجد لقيتك ..
**********************************************

أمولة ..........
انتي يازينة فؤادي
قبلك الهم كان حصادي
والعذاب عانق سهادي

كنت شايل جرحي نازف
ولى مكانك ما ني عارف

وحدي في الحرمان بقاسي
تهت ما خليت مراسي
عشت في عمق المآسي
وبالوجع شربانو كاسي ..

وفجأة ..............
فجأة يا أمولة جيتي
أنتي يا كل المنى
يا لهفة المشتاق وحنا
أنتي يا ضحكة أهلنا
ويا زمن عامر محنة
يا وتر .................
جوا في أعماقي رنا
ويافرح ..............
سوا من أحزاني جنة
وفوق غصوني اليابسة غنى ..

فرهد العمر الجديد
وردد القمري النشيد
بيكي يهتف يا أنا
عز موشح بالهنا
جيتي أفراح بحضنا
ورجعتي بي كمين سنة
فجرتي في عمقي الغنا
وصحيتي في خاطري المنى
يا روعة الريد يا أنا .
************************************************

ورغم أنك
خوفي منك
ومن زمن جاف مرتعب
جيتي يا أمولة انتي
وفجأة في دنياي ظهرتي
ريدة كانت جد سبب
الا يا أ مولة جيتي
جيتي في زمن الحرب
جيتي في آخر الدرب
بعد المصايب والتعب
والفرح ولى وهرب
جيتي في زمنن كعب
زمن المآسي والكرب ...

جيتي انتي ....
جيتي في آخر المطاف
والسنين دارت تمش
وقبل أعرفك .....
طاشة كانت ايامي طش
كنت تائه جد حزين
وفي المدامع مرتعش
لا ورد قدامي يرقش
لا فرح جواي يعشعش
يبست ينابيع المنى
والزرع جف وعطش
وجيتي يا مطــر الزمان
في خريف رشاني رش
أداني في الكون الأمان
وخلاني فرحان منتعش

خــضر عطاالمنان

الف الف مبروك يازول ياحلو

أخى الحبيب هشام مدنى

عبرك أزف التهانى من قلبى المفعم بحب هذا الإنسان
الرائع خضر عطا المنان
و أتمنى له حياه زوجيه سعيده و مديده ،

و ياريت تكون هدية زواجه من الأخ بكرى هى رجوعه
لهذا البراح الذى يفتقده كل صباح و مساء .

سلام للجميع ،

وألفين مبروك للعزيز خضر عطا المنان وعروسته ،

معلومة :

يحتفظ الأخ خضر بكيس مملوء بتراب من الوطن فى شقته بالدنمارك !

وقد كان قد أوصى والدته أطال الله عمرها أن تحضره له فى احدى زياراتها للدنمارك !

ما أجمل عشقك للوطن وترابه يا خضر !

ست البنات .

الاخ الحبيب هشام مدني

لك تحياتي وعبرك اهنئ الاخ خضر وعروسته امال واتمنى لهم كل سعادة وهناء
طبعا يا هشام استمعت واستمتعت الى القصيدتين من خضر (لايف) بصوته في المسنجر
والعروسة بقربه فكانت لها روعة الخلود وسحر المساء كانت دفق من الحنين وشحنة من سفر الارواح تسمو بك الى عوالم الوله السحري.
شكرا لك وشكرا لخضر وشكرا لعشق الناس-الكلمة والكلمة-الناس
مودتي وشكرا تاني

عبدالله

ماشاء الله...وصلاتي علي النبي... وعيني باردة

عينى بااااااااااااااااااردة ياخضر

عين دناقلة !!

الف الف مبروووووووووووووووووووووووووك


ومزيد من الصور الفنانة يااستاذ هشام

الف مبروك يا خدورى...نفتقدك كثيرا هل من عوده هل؟؟؟؟

الرائع العزيز خضر والفضلى العروسة آمال


بالرفاء والبنين مع تمنياتي لكما بحياة زوجية هانئة ناعمة طيبة وفي رعاية الله وحفظه

هشام هباني

الف مبروك وربنا يهنيكم ببعض

الف مبروك لي خضر و العروس

و عقبال اولاد اولادك با خال

عين الحسود فيها عود

الحبيب الاستاذ خضر
كل عام و انت بالف خير و الف مبروك ثانية الزواج الميمون و جعله الله مقدم الهناء اليك
شكرا للحبيب هشام مدني و تصوم و تفطر على خير

مبروك ياخدر وبيت مال وعيال


بس عل الصور وينة دخلت مخصوص عشان ابرك واشوف الصور بالمرة

المعذرة لعدم ظهور الصور السابقة

مبروووووووووك لأستاذنا الفاضل خضر


وباالرفاه والبنين ان شاءالله

كنت تائه دون مراسي
وجد حزين مليان مآسي
وجيت لقيتك ياحبيبة
ضحكة الدنيا وجلالا ..
......
التهانى والتباريك من قدامى الاصدقاء.. المخرج/ صالح مطر والمخرج/ محمد الحسن السيد .وتهنيئة خاصة جدا وخالصة مع كل حبى وتقديرى وتحياتى المخرج/ اسماعيل محمد الحسن

الف مبروك للحسان
خضر وعروسه

ألف ألف مبروك للعروسين خضر وأمال
وبالرفاء والبنين إنشاء الله