Post: #1
Title: يا غصن الرياض المائل ( ادخل واسمع)
Author: جمال سعيد
Date: 09-19-2005, 12:43 PM
ابداعات المرحوم رمضان زايد بصوت المبدع قاسم الاسمرانى
اهداء للجميع واخص كل من رحب بى
عفوا عنوان العمل غصن الرياض المائد
والشكر للفنان صديق الموج
فقط اضغط هنا
قاسم الاسمرانى
جمال دفار
|
Post: #2
Title: Re: يا غصن الرياض المائل ( ادخل واسمع)
Author: Abdulla Ageed
Date: 09-19-2005, 12:48 PM
Parent: #1
الله عليك يا ولدنا
انت جايي بي تقيلك ما شاء الله
يا سلام عليك ياخ..
حررم بعد مرقت جيتك صاد عشان اقول ليك شكرا
وياريت كل من يدخل جديد يدينا هدية زي دي..
نص الأغنية
يا غصن الرياض المايد
يا الناحِلني هجرك وانت ناضر وزايد
تهجرني ليه.. وأنا ليك رايد؟
...
يا غصن الرياض المايد
ما أظن عن غرامك لو أموت ما حايد
سهران ليلي طال والعين صِحت ما قايد
تعبان قصدي ليمك، وإنت ناضر وزايد
...
يا الهاجر جفيتني بنظرة لي ماك عايد
شوفتك زي هلال العيد، وفيهو بعايد
...
أنا وحبك ترعرعنا ونشأنا ندايد
من زمنا قِبيل، أيام قُلال وعدايد
ما خلِص القديم، وتبين مصايبو جدايد؟
حِن يا حبيب .. كفاي مُر العذاب وشدايد
....
يا خُلاصة الحواري الـ من جِنان وخوالد
حُسنك ليك يدوم، لا أم تلِد لا والد
راسخ في ظلال مجدو التليد التالد
يا الـ لابس العفاف حلية وعقود وقلايد
|
Post: #3
Title: Re: يا غصن الرياض المائل ( ادخل واسمع)
Author: جمال سعيد
Date: 09-19-2005, 12:51 PM
Parent: #2
عبدالله يا اخوى انتى تستاهل اكتر من كدا
شكرا على الكلمات الرقيقه
|
Post: #9
Title: Re: يا غصن الرياض المائل ( ادخل واسمع)
Author: جمال سعيد
Date: 09-19-2005, 01:16 PM
Parent: #2
| Quote: يا غصن الرياض المايد |
عبدالله يا اخوى
اتخيل لى ان البيت بتاع الشعر بيقول
يا غصن الرياض المائل
ولك كل الود وشكرا على نص الاغنيه
|
Post: #4
Title: Re: يا غصن الرياض المائل ( ادخل واسمع)
Author: فيصل نوبي
Date: 09-19-2005, 12:59 PM
Parent: #1
تسجيل حضور و متابعه ( لصيقه)
و مافي داعي للتهريج
دايرين نستمتع بالفن
نوبي
|
Post: #5
Title: Re: يا غصن الرياض المائل ( ادخل واسمع)
Author: جمال سعيد
Date: 09-19-2005, 01:02 PM
Parent: #4
صديقى فيصل ( دخول شمال)
ما عرفتك استمتعت بالمشاركه والا لا ؟؟؟
|
Post: #6
Title: Re: يا غصن الرياض المائل ( ادخل واسمع)
Author: Elmuez
Date: 09-19-2005, 01:10 PM
Parent: #1
لا دي بداية قيمة! رحم الله رمضان زائد ذلك الشلكاوي الفريد ورحم الله أفضل من تغني له وبخاصة غصن الرياض , الأخ الراحل السر السنوسي..
المرة الجاية ; أنا ليتني ;..
شكرا جمال
|
Post: #7
Title: Re: يا غصن الرياض المائل ( ادخل واسمع)
Author: جمال سعيد
Date: 09-19-2005, 01:13 PM
Parent: #6
شكرا ليك يا زووق
الاغنيه برضو موجوده بس ما نحرق دى نخلى الناس تستمتع بيها اول
ولك كل الود
|
Post: #8
Title: Re: يا غصن الرياض المائل ( ادخل واسمع)
Author: فيصل نوبي
Date: 09-19-2005, 01:14 PM
Parent: #1
الاخ جمال
الفن متعه ازليه
والاذن تعشق قبل القلب احيانا 
تهريجه:
و ما دام مافي تهريج ده احترام للفن و استمتاع بيو
اها الاسم ده قصتو شنو 
|
Post: #10
Title: Re: يا غصن الرياض المائل ( ادخل واسمع)
Author: جمال سعيد
Date: 09-19-2005, 01:21 PM
Parent: #8
فيصل بصعوبه عرفته انك استمتعت بالمشاركه
دفار دا لقب ورثته من ليق الخرطوم زمن لعب الكوره قبل الدفارات ما تنزل السوق
|
Post: #11
Title: Re: يا غصن الرياض المائل ( ادخل واسمع)
Author: فيصل نوبي
Date: 09-19-2005, 01:35 PM
Parent: #1
| Quote: فيصل بصعوبه عرفته انك استمتعت بالمشاركه |
الاخ جمال
فعلتها فقط ليرسخ اسمي في الذاكره
اسف اذا كنت ازعجتك اتمني لك اقامه طيبه بيننا
تهريجه:
| Quote: دفار دا لقب ورثته من ليق الخرطوم زمن لعب الكوره قبل الدفارات ما تنزل السوق |
معليش بس الشمار كان كاتلني
ما تحكيها تاني عشان ما يطلعوك من زمن عصور الفرسان ديييييييييك
اااها كنت دفار كوره بس يعني ما نعمل حسابنا منك
مره اخري اتمني ان لا تحمل في قلبك
|
Post: #12
Title: Re: يا غصن الرياض المائل ( ادخل واسمع)
Author: صديق الموج
Date: 09-19-2005, 02:57 PM
Parent: #1
| Quote: يا غصن الرياض المائل ( ادخل واسمع) |
جمال السمح شكرا جميلا على هذا الابداع ولكن اسمح لى اصحح اسم الاغنية
وهو فى نفس الوقت مطلعها:
غصن الرياض المايد يا الناحلنى هجرك وانت ناضر وزايد
جافيتنى وليك انا رايد
|
Post: #13
Title: Re: يا غصن الرياض المائل ( ادخل واسمع)
Author: جمال سعيد
Date: 09-19-2005, 03:04 PM
Parent: #12
شفت الفن كيف
شكرا يا فنان يل رائع والعتبى للعزيز عبدالله
|
Post: #15
Title: Re: يا غصن الرياض المائل ( ادخل واسمع)
Author: Emad Abdulla
Date: 09-19-2005, 11:08 PM
Parent: #13
جمال الرائع
.. صديق الموج موسوعة تمشي على قدمين في كل شأن الفن و الغناء السوداني الأصيل و يحفظ عن ظهر قلب ما عرفنا و ما لم نعرف عن شعراءنا و فنانينا و .. و .. وذلك الزمن الذهبي الجميل الجميل .. ولا يزعج الموج و يجعله يزبد ويرغي ( و يرفع مده و ضغطه ) الا ان يخطيء أحدهم في لفظ أو كلمة أو نغمة أو حادثة مرتبطة بإحدى درر الحقيبة أو عيون الغناء السوداني الأصيل - حينها - شوف ليك حته اتضارى فيها .. كاترينا شنو و هوريكان شنو
الحب لك
|
Post: #14
Title: Re: يا غصن الرياض المائل ( ادخل واسمع)
Author: ABUZEEGH
Date: 09-19-2005, 03:19 PM
Parent: #12
الأخ/ الدفّار،
أولاً، ألف تحيّة من عاشق الكلاكلة القبة برابطتها، وتاكتها وفولها وخضرها.
شكراً علي الأغنية، وأكثر ما يشد المرء إليها، غير الكلمات، الإيقاع الهادي الجميل.
أخيراً، أعتب عليك أنّك أسقطت اسم العم العزيز عبد الخالق، متّعه الله بالصحة والعافية، من اسمك. ولولا اسم الدفّار لما تعرّفت عليك.
|
Post: #23
Title: Re: يا غصن الرياض المائل ( ادخل واسمع)
Author: جمال سعيد
Date: 09-20-2005, 05:47 AM
Parent: #14
الاخ الحبيب الدكتور محمد ابوزيق
لك كل الود يا اخى كم اشتقت اليك
اشكرك على المرور الطيب والكلمات الجميله
ابقى اتصل بينا
وادعوك قدام الناس ديل وانتى احد معجبى الفنان محمد وردى ان نعمل بوست خاص بالعملاق وردى
انتى بالكلام السمح والزكريات وتاريخ الاغانى وانا بالاغانى ونشوف واحد يفك طلاسم الالحان
المستعد يا شباب يرفع يدو؟؟
|
Post: #16
Title: Re: يا غصن الرياض المائل ( ادخل واسمع)
Author: أبوذر بابكر
Date: 09-19-2005, 11:25 PM
Parent: #1
الأخ جمال
تحايا وتقدير كبير على هذا الجمال
المبدع رمضان زايد واحد من الإشراقات الفريدة فى سماء غنائنا الجميل
الأغنية طبعا من نظم العبقرى المطبوع والإنسان العاشق
على المساح
ورمضان رايد يمتلك طاقة تطريبية فارهة القوام وسامقة المعنى
ولا أتردد إطلاقا فى ضمه الى مدرسة ابوداود وخضر بشير
ومن قبلهما سيد الطرب الأكبر عبد الكريم عبد الله مختار "كرومة"
الأغنية طبعا أخرجها للناس المتفرد أبوداود
وأجدد الشكر لك يا جمال
وآلاف المراحب بك هنا فى هذه الديار التى ما فتئت تجود بالطيبين مثلك
|
Post: #17
Title: Re: يا غصن الرياض المائل ( ادخل واسمع)
Author: سفيان بشير نابرى
Date: 09-19-2005, 11:35 PM
Parent: #16
الصديق/
جمال (( دفار))...
ياخى الف الف شكر ليك يا ود الليق ... شكراً لانك زكرتنا الليق لما كان لليق جد جد
وشكر (( كبـــــــــــــــــــــير)) لانك نزلته اغنية جميلة جداً وزكرتنا رمضان حسن
الصوت التعرفنا عليهو برانا دون ان نعاصر عهده ربنا يرحمو ويرحمنا.
وكمان شكر خاص منى ليك لانو سمعتنا صوت (( قاسم الاسمرانى)) الشاب الجميل الفنان
وصاحب المقدرة الصوتية الشجية ...
جمال يا اخوى عليك الله نزل للاسمرانى ده اغنية اغنيتين تانى من الحقيبة
وكمان لو نزلته ليهو اغنية للهرم عثمان حسين تكون كملته الناقصه وجيت الاول عديل كده
الف تحية ليك.
|
Post: #25
Title: Re: يا غصن الرياض المائل ( ادخل واسمع)
Author: جمال سعيد
Date: 09-20-2005, 05:50 AM
Parent: #17
سفيان شكرا على المرور الراقى والكلمات الرائعه
|
Post: #24
Title: Re: يا غصن الرياض المائل ( ادخل واسمع)
Author: جمال سعيد
Date: 09-20-2005, 05:49 AM
Parent: #16
ابوزر الرايع شكرا على الاضافه والكلمات الطيبه
|
Post: #18
Title: Re: يا غصن الرياض المائل ( ادخل واسمع)
Author: صديق الموج
Date: 09-20-2005, 00:03 AM
Parent: #1
Quote: جمال الرائع
.. صديق الموج موسوعة تمشي على قدمين في كل شأن الفن و الغناء السوداني الأصيل |
عماد السمح ما داير اشكرك عشان ما تكون هذى بتلك ولكن لابد من تحايا لحلوم والبنيات
والوليد جوالى هذا رقمه 009665051326623
هلا اسمعتنا صوتك؟؟؟؟؟
|
Post: #19
Title: Re: يا غصن الرياض المائل ( ادخل واسمع)
Author: Emad Abdulla
Date: 09-20-2005, 00:51 AM
Parent: #18
جمال الجميل ...
... كنا حضورا زاهيا - مرة ما .. قبل تاريخ تكوين الجهات - لا للجمال كنه حينها ولا لليل وجيع ..
ليس إلا تلك المؤانسة الإنسانية الأنيسة ..
الحادي ياجمال كان شيخي ( الموج )..
ونوقنا العصافير في ذاك الليل ـ المشع - يصدحها رهط ألق من نوار ( الرياض )
.. لم يكن ليلتئذ الا استحلاب ضرع الليل .. و النم النم .. والوضاءات المترعة ( بونسة ) صديق الموج
- وونسة ( الموج ) ليست كالونسات - ان كنتم لاتعلمون.
صديق يغمض عينيه و ينجذب .. و يشف .. يشف ( الله يا شيخي صديق ) :
المعاصم جدله
والكفيفات غوف
والكتيف الهادل بالكفل مشغوف
نايمه او كان صاحيه
حال جلوس ووقوف
فيهو لاحم ديمه
ومنه مالو براح
.......
من فروع الحنه
وزهرة التفاح
هاج بلابل فكري
النسيم الفاح
.......
و( يرجحن ) الحضور الألِق
والليل حينها نشوة ..
ونحن قوم سُرى .. والنم النم
....
جمال .. أمسك في صديق قوي .. والله انها لحظوة ان يداخلك ( شيخي الموج ) في هذا البوست
.. يا جمال ..
ابشر
الود لك...
( وللموج ) العالي انحناءة االمريد
|
Post: #26
Title: Re: يا غصن الرياض المائل ( ادخل واسمع)
Author: جمال سعيد
Date: 09-20-2005, 05:51 AM
Parent: #19
عماد الفنان شكرا ليك
|
Post: #20
Title: Re: يا غصن الرياض المائد
Author: محمد عبدالله محمود
Date: 09-20-2005, 01:58 AM
Parent: #1
سلامات يا جمال سعيد
ويا سلام عليك يا خى على هذا الاختيار الرائع.
وكما ذكر الاخ ابوذربابكر ان الاغنية من نظم الشاعر المساح (محمد على المساح 1901م – 1966م) وفى رواية اخرى (1903م – 1966م) . وعنوانها يا غصن الرياض المايد
المساح لم يدخل المدرسة، ولم يتعلم القراءة والكتابة.
من اشعاره المغناة ايضا (الشاغلين فؤادى)، و (انت بدر السماء فى صفاك).
وقد ذكر الاستاذ محمد حسن (الجقر) فى كتابه روائع حقيبة ام درمان، ان هذه الاغنية كانت تغنى قبل تسجيلها بلحن يقارب لحن اغنية يا جميل يا مدلل لزمن طويل، الى ان احياها الاستاذ ابوداؤد بهذا الاداء الرائع.
الفنان محمود عبدالعزيز تغنى بهذه الاغنية ايضا فى احد البوماته، وشاركته فى الغناء حنان بلوبلو، وقد استخدما فى العزف العود والكمنجة والايقاع.
هناك بعضالاختلاف بين النص المكتوب للاغنية والنص المغنى (النص المغنى اورده الاخ عبدالله عقيد)، ويلاحظ الاختلاف بين النص المكتوب والنص المغنى فى الكثير من اغانى الحقيبة.
وكمثال للاغنية اعلاه، يقول الشاعر فى المقطع الاول:
يا غصن الرياض المايد
يا الناحِلني هجرك وانت ناضر وزايد
جافيتنى ليك أنا رايد؟
لكن لدواعى التلحين فان المقطع يبدو كالاتى
جافيتنى ليه وانا ليك رايد[/RED/]
كما انه قد تم تجاوز المقطع الثانى من القصيدة الذى يقول:
فى الجيل يا الجمالك سائد
عينيك ليك جنود وانت ليهن قائد
يا نافر جفيتنى بنظره ... لى ماك عايد
شوفتك زى هلال العيد وفيه اعايد[/RED/]
اختزل المقطع اعلاه الى:
يا الهاجر جفيتني بنظرة لي ماك عايد
شوفتك زي هلال العيد، وفيهو بعايد[RED/]
المقطع الذى يلي النص اعلاه غنى كما بالنص:
انا وحبك ترعرعنا ونشانا ندايد
من زمن قبيل ايام قلال وعدايد
ما خلص القديم وتبين مصايب وجدايد
حن يا حبيب كفاى مر العذاب وشدايد[RED/]
وكذلك المقطع الذى يليه:
يا خُلاصة الحواري المن جِنان وخوالد
حُسنك ليك يدوم، لا أم تلِد لا والد
رافل في ظلال مجد التليد التالد
يا لابس العفاف حلي وعقود وقلايد[RED/]
اما المقطع الاخير من القصيدة فقد تم تجاوزه تماما فى الاغنية، وهو يقول
عانيت فى ليالى هواك صنوف واحايد
مشكلة بين هواى وجفاك وانت محايد
بس ما ذنبى غير صوت النشيد ونشايد
فى مدحك بنيت قصر الرشيد الشايد[RED/]
على اية حال فقد امتعت صباحى بهذا الغناء و اللحن الجميل
|
Post: #21
Title: Re: يا غصن الرياض المائل ( ادخل واسمع)
Author: nashaat elemam
Date: 09-20-2005, 02:08 AM
Parent: #1
الاخ جمال
مشاركة جميلة.. نشكرك عليها.. وداوم في مدنا بهذه الدرر الثمينة
|
Post: #27
Title: Re: يا غصن الرياض المائل ( ادخل واسمع)
Author: جمال سعيد
Date: 09-20-2005, 05:52 AM
Parent: #21
نشات شكرا على التوقيع
|
Post: #22
Title: Re: يا غصن الرياض المائل ( ادخل واسمع)
Author: Haitham El Galal
Date: 09-20-2005, 05:05 AM
Parent: #1
يا سلام عليك يا رائع
|
Post: #28
Title: Re: يا غصن الرياض المائل ( ادخل واسمع)
Author: Naji A.Moniem
Date: 09-20-2005, 08:15 AM
Parent: #1
تحية طيبة
شكرا على الجمال المعتق
ياريت كمان لو جبت لينا مرسال الشوق لابوعركى
وشكرا مقدما عزيزى
|
Post: #29
Title: Re: يا غصن الرياض المائل ( ادخل واسمع)
Author: الجندرية
Date: 09-20-2005, 09:16 AM
Parent: #1
غايتو العجلة الله يقلع شيطانها
جيت جاااااااااااريةقبل ما اسمع ونفسي مخموم
عشان اقول العنوان غلط
فإذ بصديق الموج والاخرين يقطعوها لي في راسي
تسلموا كلكم /ن
وتسلم جمال ويسلم جمال ذوقك
|
Post: #30
Title: Re: يا غصن الرياض المائل ( ادخل واسمع)
Author: جمال سعيد
Date: 09-20-2005, 09:21 AM
Parent: #29
الجندريه
تسلمى وشكرا على المرور حتى لو كان بعجله
بسال هل فى امكانيه تعديل العنوان؟؟؟؟ وساعدونا يا فطاحله الموقع
|
|