حكومة يا ظالمة يا النقلت قسيم ريدى

يا جماعة مساء الخير ... مشاقين ... معليش منعنا منكم الشديد القوى ومشاغل الدنيا تجبرنى اخالف وعدى واتلوم ..
هذا حجيتكم ما بجيتكم ... خيرا جانا وجاكم ... قالو والعهدة على الرواة وروابط النت الشفتها وشفت معاها العجب انو فى زول اسمو حسن موسى - قالو فنان - تهكم على اخوة واعضاء وزملاء وسودانيين وبشر زيو ... وشفت الحكاية ... يا لطيف ... طبعا وزى ما كل الناس امنت واكدت دا شيتا بشع ووضع مش حلو ...
اى من حق الاستاذ الكبير دا يزعل ويرد وينتقد لو فى زول تعدى عليهو لكن هل الحق دا ممكن يصل لغاية ما يصل بالناس الدرجة المريعة من الانحطاط ...
انا غايتو حسن موسى دا منو ... ما بعرفو ... وما اظن معرفتو فرض عين وواجب يتم به العقل .. مش كدا .. وما افتكر يوم هبشتو بكلمة ولا لاقيتو فى منبر خشيت معاهو فى مخاشنة عشان يرسمنا (بعوضة ) ويشيل حالنا فى جريدة فى هولندا ...
ليه كدا ... يا حسن حسون ... عملت ليك شنو ... قول النصيحة كلمنى ... لو خلافك مع الضلاميين .. ما مشكلة ... اشرق لينا بكتابة راقية وادب رفيع وفكر مرتب ورسل لينا اتنين تلاتة فولت عشان نستنير ... لو عشان انت يسار وانا يمين ... ما مشكلة يا مان نظم الحركة عشان كلنا نجى فى المسار الصاح .... لكن تخلى دا كلو وتلم فينا برسومات وعمايل زى دى .. دا كلام اعوج ... ونى ... والنى للنار ... والنار يا موسى الريشتو لاحوسة حتكون بس انك اول شى (كيست ) فردك والناس البعرفوك عشان يمشو كلو شوية يقولو لينا ابو الحسن دا بعرف على المك والبروف عبد الله الطيب وكان صاحب الطيب ود ضحوية وكتب غنى لابراهيم عوض ولحن السلام الجمهورى والسلام الرفيع ورسم شعار الدولار الامريكى وفى فرنسا الزول دا لو ما مد ضراعو فى الصينية لا زين الدين زيدان ولا شيراك ولا الن ديلون بياكلو مزعة لحمة ...
دا كلو ما بيحلك لانك بالغت وشذيت ... لانو لو حقيقى دا مناقب زول بالمستوى دا ما ممكن يعمل العملو دا .. الراجل العندو خلاف فكرى مع جماعة ولا ناس بيقعد وبيجضم الحروف والحجج وواحد زائد واحد يساوى اتنين بدون تقعر وحذلقات ولا فلهمة فاضية لكن الزول البس بيقعد يشتم ويفلق من بعيد ... وانت يا حسن موسى قايلنا ما بنعرف النضمى العفن ... عارفنو وناقشين قامسو لكن الزول بيحترم اسمو .. واهلو وناسو .. وبلدو واهلها كانو معاك ولا ضدك .. السمعة ولا طولت العمر لكن الزول البيقعد بس فى الكلام الشين والبايخ والعمل الردى دا زول مفلس ... وقاعد ساى ... وركب مكنة ... وبتاع اوهام تجارية وجلكسات ... معليش يا مان على لغة الرندوق ... لكن قلت اذكرك بكلام الفرد لانك الظاهر ضربت الترطيبة وراسك كبر ...
اها انا الهامل البعوضة دا بجيب راسك ... بالقلم دا بجيب راسك ... وراك ... وراك ... وشفت يا حسن موسى ... لو مشيت وين ووين عار العملتو وكتبتو دا ما بيحلك منى ... حديد يلاقى حديد وينبرش الطرور ويثبت الصنديد ... بالقانون ... والقانون بس ... وحظ الكعب انو الواحد بدعوى من ناس مستنيرين خواجات جاى طرفكم قريب وجاريها من فرنسا لمن امرق بغادى منها ... وبقيل ليك ... وبقعد ليك ... ببقى ليك .. كبسور ... بتعرفو ..؟؟؟ شفت الواحد زاتو يجرب عدالة وشفافية الغرب دى زاتها ورسمك وثيقة ضدك و جاييك ... جاييك ... وهولندا ولا فرنسا ماها بعيدة ... وتشوف عينك ومن هسة جهز ليك مرافعة موق ... ومحامى حنكو سنين ....
اها خم وصر وابقى رقيق يا حبيب ومن هسة احفظ معاى (حكومة يا ظالمة يا النقلت قسيم ريدى ) ... لانو مرات حكومات الخواجات دى زاتها ... بتنقل !

والله عفيت منك