بشاشا يسأل : ((ياناس في شنو فهمونا))

الي الحبيب بشاشا
سلامات
ومعليش السوال باسمك




بشاشا ده منو يا جماعة

قصتو عجيبة
عجيب امروا
غريب دارو


كان نائم جوة بيتو ....هو فاكر نام ثلاث ساعات
ناس الشافهم لما قام من نومو قالو ليهو انت منو وجيت من وين
........الواقع القدامو بقول نام خمسمية سنة او اكتر
لقي في بيتو ناس تانين
الاسماء اتغيرت
والابواب اتغيرت
مع انو نفس الناس ذاتهم ناس زمان قبل ما ينوم
نفس الملامح والشبه
ايه الغيرتهم
ايه الحصل
انوم بس تلاتة ساعات واقوم القي كل حاجة اتغيرت
بنادي فتوم تقول لي انا سوسو
بنادي اوشيك يقول لي الشيخ
بنادي اساخة بقول لي انا هيثم
بنادي دينق بقول لي عبدالله دينق
الحاصل شنو يا ناس
فهمونا

فتش باب بيتو القديم ما لما فيهو
دور دور لقي ليه باب تاني من حديد كبير وبكيلون كمان
الله!بيتنا ما كان فيهو باب ....كان مفتوح علي طول شمال وجنوب شرق وغرب
يمكن عشان مفتوح دخل منو الناس ديل وانا نائم......بس ناس ديل همن ذاتهم
ما اتغيروا شكلهم بيمثلوا علي
ولا يمكن انا الجنيت او ختفني الجن كلكي او جاويد ووداني لاهلوا

ياخي التفكير مشكلة .....كد نطلع برة البيت الي الشارع يمكن نلم في واحد ما اتغير واحد جوّاه
ذي برّاه
ونزل الشارع
وماشي في الشارع
بنادي في جون يول لو شنو!
بنادي في ادروب يقول لو منو
بنادي في زيت يقولو عبيد
انا وين يا ناس
فهمونا
انت في السكا
ولا يمكن
نبراسكا
بس هناك ناس بنضمو انجليزي
طيب انت في تركيا

ليه شايف ليك واحد اسمو باشا
الناس ديل اشكالهم من
ترينداد
او من سسريلانكا


وماشي في الشارع
كد نشوف الشوارع يمكن نلم لينا في حتة نعرفوا

نعود


وماشي في الشارع



ونواصل

وماشي في الشارع
يتلفت يمين وشمال
ويعاين مرة فوق ومرت تحت

والشارع مزدحمة

ناس ماشية وناس جاية
في البتكلم براهو
والبضحك براهو


الحاصل شنو!
طيب ديل مع نفس الناس الزمان بلقاهم في الشارع
نفس الناس البشوفهم في الافراح وفي المناسبات
نفس الوجوه والاشكال
نفس الاحجام والاطوال

ما اعرف ايه الغيرهم وغير كلاماتهم وهوياتهم وهواياتهم
ولا يمكن ما مغيرين بس ما دايرين يقولوا
او مش قادرين يقولوا

ياخي زمان علي الاقل مافي زول بتكلم في الشارع براهو
ناس ديل بقو اجساد متعددة الذوات
يعني انفس كتيرة في الجسد الواحد ولا شنو

معقول!
"حار بيه الدليل"
وفجا وقف امام لافتة
مكتوب بالعريض :شارع المتنبي
وتحتها مكتوب:
الخيل والليل والبيداء تعرفني

لا تشتري العبد الا والعصي معك
ان العبيد لانجاس مناكيد

يا ساطر ده شارع منو ده
الظاهر انا ودرت خلاص ده ياتو بلد الشوارع حقها غريبة كده ده
وماشي في الشارع نفسه
كلو شوية وهاك يا شعر
انا الذي
انا الذي
اناالذي
انا الذي
لما في واحد قال ليه يا اخينا انت الزول الاسمو المتنبي ده منو
ضحك الراجل لمن قرّب يقع
قال ليهو يا زول انت من وين جيت معقول ما تعرف المنتبي
قال ايوه
يبقي نص عمرك ضائع!
في حد في الدنيا دي ما يعرف الشاعر العظيم المتنبي
انا ما بعرفو
انت شكلك عجيب وغريب انت من وين يا زول
انت مش من البلد دي

انا من هنا
لا ما من هنا
من هنا
لا ما من هنا
من هنا
ياخي ما تعرف المتنبي ده كلام كبير
وممكن يوديك في ستين داهية
ياخي اي واحد هنا حافظ اشعارو بضبانتو وانت تجي تقول لي ما تعرفوا
ماهو باين انكم حافظين اشعارو بضبانتو بس الحق حق انا ما بعرفو
ياخي اختشي شوية , ومضي في حال سبيله تاركا اخينا في "حيص بيص" جديد
انا وين يا ناس
يمكن انا جنيت

المتنبي ده ما يمكن يكون جن ذاتو مش بيركب الخيل
ويمشي في البيداء وبالليل كمان!

"حار بيه الدليل"

قام هبّش راسو لقياهو موجود
فواصل مطاردة الشوارع بحثا عن ذاتو الضائع


اول تقاطع لفّ يمين لقي لافتة كبيرة مكتوب :

شارع الزبير ياشا





نواصل