Post: #1
Title: انت قايلهم صحافيين كشا مشا !
Author: محمد حامد جمعه
Date: 07-23-2005, 05:25 AM
Parent: #0
وزيرة الخارجية الأمريكية زارت الخرطوم والفاشر وكدا والزولة بعد داك رجعت مشت عملت ليها تخريمه وزارت شارون في إسرائيل لزوم تاخد ليها شوية بركات وكدا ومشت بعد داك راجعة بلدها تشوف باقي مشاغلها وهمومها من وزارتها لغاية بتاع الكوافير البيجضم ليها شعرها والدلالية البتبيع ليها (الفير أند لفلى ) والسلة وتشوف نفسها وما هى في النهاية مره برضو وبيكون عندها طموح تعرس وتشوف نفسها هى الوزارة دى كان بتدوم كان دامت لهنري كيسنجر . اها وقالوا يا جماعة الزولة دى لمن جات الخرطوم وخشت على البشير حصلت شمطة عشان شنو قالو ناس الأمن والحرس بتاع الرئيس قطعوه معاها وحمو كم صحفية ولا صحفي امركيى ما عارف يخشو غرفة الاجتماع عشان يصنتو على الكلام بتاع عمك والوزيرة . والله لكن الحرس ديل ببالغو حقو يخلو كل الصحافيين يخشو ويقعدو في الكراسي جنب البشير ورايس واى واحد منهم يفرش عدتو ويصنقر يهبش في المسجل ويقلب في الورق عشان يجهز الأسئلة وأثناء الكلام دا يقعد الواحد منهم يتمغى في الكراسي الكبيرة ديك البتكون في مكاتب الناس الكبار في الحيكومة .
وصحي رايس اخدت ليها زعلة وممكن تكون كمان اتحمقت ونفسها خماها والعبرة غلبتها على الجلافة والفظاظة السودانية ويمكن تكون فكتها بكية وهى تشتكى لمصطفى عثمان إسماعيل ( why MOSTA ) ... هى ..هى ( لكن عساكركم ديل ببالغو والله هم قايلين ديل صحافيين كشا مشا ولا شنو ) هى هى هى ( دا بنير من الواشنطن بوست ودا ماكس من لوس أنجلس تايمز ودي اليزاابيث من نيويورك تايمز لكن والله عساكركم ديل ببالغو يا مصطفى ) .. هى هى هى ( لكن بالجد احبطتنى يا مصطفى حرسكم ديل بالجد إرهابيين ) هى هى هى وطبعا عمك وزير الخارجية زول عسولة وطيب ودبلوماسي دسم الأخلاق بيكون طيب خاطرها (خلاص يا الوزيرة اختى شفتى وعد منى ومن ارادتى ومن ضميري الحرس ديل اكلم مديرهم ينقلوهم ليك مناطق شدة كلهم بكره يمشو العمليات والبلد ما شاء الله حدادي مدادي واى حتة حاصلة فيها وهمة ) .. اها وقالو ليك المرة نفسها طابت وكملت زيارتها للسودان ومشت إسرائيل تزور شارون وكدا زى ما انتم عارفين هناك يا معلم قالو شارون من الباب قالو (هووووووووى يا مطلوقة دا شنو السمعتو دا ) فاتخلعت المسكينة ( مالك يا شارون حماس وكل يوم بنشتمها ليك وحركة الجهاد معاها والعرب الحواليك ديل كلهم سكتناهم وحزب الله دا هسة لفحتى لتوبى دا عشان اغشي من هنا لبنان أقول ليهم يشوفوا ليهو طريقة يضايرهو غادي مالك في شنو ) فقال شارون ( شايف الناس والفضائيات وناس الانترنت شيالين حالك قالو لمو فيك جماعة سودانيين جنجويد قربو يجيبوك لينا بخروف سمايتك ) ويمضى شارون ( أنت يا رايس النظام العام في الخرطوم مش حلوه ولا شنو لأنو السمعتو دا ما أعمال فاضحة وكدا ودي زمان توديك الحراسة ويمكن تجلدك ) ! ! ... يا زول قالو ليك الولية اتحمقت ونفت وحلفت (والله ما حصل شي ) دى تسريبات وحركات لاغتيال شخصية من العواليق في الحزب الديمقراطي أصلهم حاقدين علينا من ما غلبناهم في الانتخابات مرة يقولو أنا فدادية بتاعة بترول ومرة يقولو تاجرة عدة ومرة يقولو وداعية وبتاعة زار وأخرتها كمان عاوزين يقولو الجنجويد آكلو وخلاص قالو نحلى ... برى يا ود امى .. أبرا واستبرا ....
اها كان كدا
يعنى محجوب حسين الناطق الرسمي لحركة تحرير السودان ولكن وبما انو نفى الخبر خلاص بيكون جمهوري انتحل الديمقراطيين أسمو .
|
Post: #2
Title: Re: انت قايلهم صحافيين كشا مشا !
Author: محمد حامد جمعه
Date: 07-23-2005, 05:39 AM
Parent: #1
بالجد يا محجوب ليك حق تنفى ....
|
Post: #3
Title: Re: انت قايلهم صحافيين كشا مشا !
Author: دورنقاس
Date: 07-23-2005, 05:51 AM
اخى محمد
أظن انو المنع تم على أساس الفقرا بيعرفوا بعض
|
Post: #4
Title: Re: انت قايلهم صحافيين كشا مشا !
Author: wadalzain
Date: 07-23-2005, 08:35 AM
Parent: #3
- عشان يصنتو على كلام عمك والوزيره -
اوعى عمك تكون قاصد بيها عمر القشير
غايتو عمك براك
اذا كان ده عم اريتو بعمى الدبب
عمى كباسا
يعمى ويطول عمره
هو اصلا عمى بصيره
عامل تلاليشو وكضومو ديل
وهو ياخوى مالو خلا الرقيص
وييين الغنايات شنان وقيقم واشباههم
ولا الاعراس انتهت عرس الشهيد والحور
اصلو الماذون الترابى الكان بيعقد زعلو منو ودخلو التمنه
|
Post: #5
Title: Re: انت قايلهم صحافيين كشا مشا !
Author: WadAker
Date: 07-23-2005, 09:21 AM
Parent: #1
ياكمدان ود حسين نفى شنو ؟ رغم متابعتى لكن كلام الراجل دا ما لاقنى ؟ كدى بل ريقك من الدعاء"بالغيب على الاخرين"الخشن اعلاة وجاوبنا ياذوق..
|
Post: #6
Title: Re: انت قايلهم صحافيين كشا مشا !
Author: Hatim Elhassan
Date: 07-23-2005, 10:45 AM
Parent: #1
دة اسمه الغنج الحضارى ؟؟!!!!!
| Quote: وطبعا عمك وزير الخارجية زول عسولة |
فعلا هو من ايام الجامعه معروف عسولة جدا
يا مجاهدين ما تشدو حيلكم شوية
|
|