أتصلت على واحد صاحبنا نافذ لأتخاذ حزمه من القرارات الماليه والاداريه

الوالده سودانيه الأصل ومن صميم هوايات امهاتنا السودانيات التخزين من زمن السحاره .اليوم صباحا وانا عازم امرى على الذهاب الى العمل فاجأتنى بميه دولار من نصف الرفوف طلبت منى ان اقوم بتحويلها الى الدينار السودانى وفقا الى معايير وشروط اسعار سوق السودان الغير ملزمه باسعار البورصات وشددت على ان احضر عليها اعلى سعر وذكرتنى باننى منذ ولادتى مشهور بأمانتى وشده باسى وجلدى وعظيم فقرى دون ان تتهمنى بالفساد
المهم عاينت للميه دولار نظره ناس المعامل الجنائيه المركزيه لعل ان تكون عينى نجيضه وافرز الخيط الابيض من الخيط الاسود فى الدولار واكتشف زيفه لكن انا كنت متأكد انو الوالده لا تحب الاشياء المزيفه كل شى أصلى سقنل تو فنيك شندى شباطه باتا الكسره السحاره بيوت البكاء شاى المغرب لقيمات بعد كل مطره
المهم وعدتها خيرا
وصلت منطقه حره لاستبدال العملات الحره صرف صرف قلت لى عم حمزه الميه دولار دى بتجيب متين وخمسين الف شالا وقال لى ابدا بتجيب متين وتلاتين بس قلت ليهو لييييييييه التضخم نزل ولا شنو عبدالرحيم دا جنا ولا شنو
قال لااااااا دى ميه دولار راس صغير يعنى دا الدولار القديم اتذكرت ان الزول الجوه الدولار راسه صغير فعلا قلت ليه الحل شنو انا اديت الوالده ميه الف امانه ماحقتى لازم تحل لى المشكله دى
قال امشى بنك امدرمان الوطنى مشيت فرع اسمه الزهراء مخصص للنساء والرجال رغم انه فى لافتته مكتوب فرع النساء لاقيت فى الكاونتر بنات بشبهو بعض ادتنى فورم ومليتو مشيت ابدل الصرافه قالت لى متأسفه تمشى بنك السودان بس
مشيت صرافه انيقه فى شارع الجمهوريه تابعه لدوله الامارات الشقيقه فيها حسناوات ما بشبهو بعض فيها اجانب فى الكاونتر وبين الزبائن وفيها صاحبنا اسمه على ولقيت صف طويل طلعت الميه دولار خجلان حتى لا يتم اتهامى بشى ما. قالت لى الشابه الانيقه سورى بانقليزيه وعربيه ويتخلل بينهما حديث فى الموبايل بالعاميه تمشى بنك السودان المنشور واضح .قلت لواحد لابس جلابيه خارج الصرافه شكلو تاجر حر فى السوق الحر عندى ميه دولار رأس صغير طبعه غير منقحه ساقنى جوار وكاله الخرطوم للسفر والسياحه لمجموعه من رجال البورصه الحره ادونى فيها ميه وخمسين قلت ليهم ليييييه بمشى بنك السودان ادونى متين الف قلت لي واحد فيهم انت فاضى قال لى لا قلت ليه كنت دايرا اسوققك بنك السودان عشان تشوف انو القروش دى مبرأ للذمه ومافيها مشكله المهم اتخارجت قلت امشى بنك السودان لانى متورط فى مع ناس ميه الف امانه حقت زول شالتا الولده الصباح خصما على الميه دولار وخمسين الف هدايا ابن صديقى المتواجد فى الدلنج الذى حولها ولم يصل التحويل عن طريق بنك الادخار فرع الامم التحده جوار القبه الخضراء واليوم هو عيد ميلاد ابنه وانا اقسمت لصديقى لحل هذه المشكله حتى لا تترك اثرا نفسيا عميقا فى نفس ابن صديقى لكن اتذكرت بنك السودان الدخول ليه مشكله حسب ما اعتقد والله اعلم رغم ان لدى بطاقه يمكن ان تمررنى الى داخل الاماكن او المرافق العامه دون ازعاج ولكن حسيت بفخامه بنك السودان او ربما شى اخر لا اعرفه المهم اتصلت على على واحد صاحبنا نافذ لاتخاذ حزمه من القرارات الماليه والاداريه ليوجه كل البنوك العامله فى ولايه الخرطوم لقبول الدولار راس صغير والتعامل به ووضع الامر موضع التنفيذ من لحظه صدور القرار لكن اعتذر بلطف لحساسيه العلاقه مع الولايات المتحده الشقيقه فى هذه اللحظات التاريخيه والدقيقه والحرجه التى يمر بها شعبنا قدرت موقفه وشكرته عاينت للساعه لقيتاها الساعه واحده وربع موعد اغلاق كافه منافذ الصرف فى السودان عدا الصراف الالى المتواجد فى فروع بنك امدرمان الوطنى والذى سيفتتحه السيد الرئيس اليوم بهذا تتدخل بلادنا مرحله جديده فى فجر الصرف الالى
احتاج ما اقوله الان للوالده فى عدم نجاحى فى صرف الميه دولار
مؤكد سوف تتهمنى بخيابتى وقلت حيلتى وعدم نفاذ بصيرتى وعدم كياستى وكل النعوت لشخص ارسلته والدته لصرف ميه دولار فذهب ولم يستطع ان ينجح
اللهم لا شماته
اللهم لا شماته

يا فرح

والله شيلتني هم..... ما ممكن تصور لنا الدولار اب راس ضغير دا؟ وتنزلو هنا.... صراحة انا مطووووووووووووول من الدولارات شوفتي ليها سنة الفيضان....... ونسيت شكلها..... وخايف اورط في واحد زي دا......

سجيمان طبعا القصه دى حقيقيه هسى لو فى اسكانر بنزل ليك الدولار حتى يعلم الكافه من ابناء شعبنا المتواجدون داخل وخارج الحدود
المشكله انا خايف من ترسيم جديد لعلاقتى بالوالده بسبب الورطه دى

فرح كدي شيلو وامشي تاني حاول... يمكن ربنا يهديهم يغيروهو لك.....وبعدين الوالدة ما تكلمها حسي

العزيز فرح
تحياتي وكتير سلامي

يا أخوي الدولار الزي راس النيفة دا ما سمعنا بيهو، على العموم حقك علينا لو صغير ولا كبير.

والحسنوات الما بيشبهن بعض بيسلموا عليك.

العزيز فرح
تحياتي وكتير سلامي

يا أخوي الدولار الزي راس النيفة دا ما سمعنا بيهو، على العموم حقك علينا لو صغير ولا كبير.

والحسنوات الما بيشبهن بعض بيسلموا عليك.

سى جى سالت واحد نافذ من تجار السوق الحره قال لى المشكله دى انو الامريكان قالو الزول الخاتى صوره فى العمله دى الشهيد جعفر شكلو ماجذاب خاصه انو العالم كله ماشى بالجاذبيه والصلصه الجذابه
عشان كدا ما تخاف




الرايق تعرف الحسناء دى لمن شفتها كنت داير اقول ليها ازيك مرتبطه لان النانسيت قصه الوالده دى وبقيت افكر فى مستقبلى وداير اشوف جناى قبل ما اموت
سلم لى عليهم شديد

اها يا اخوانا مافى زول لقى لينا حل